1 Deenek, bɔn-nyɛɛg, dáa ye di náá, Zɛɛb eezelyaal boo lyem ghoŋ'ɛ nɛ nena ɛ, mɛ ɛpedjɛ bin mɛghaaz náá, bi ka mɛnyel men dáa buwa di nɛ tsik ɛ, buwa na dɛɛ Zɛɛb di emyaala nɛ yɛ ɛ. Deenek, yɛ ɛ́ nɛ nen ɛ́ tɛtɛ mendjaala. 2 Sa bi ààbaŋa mɛfulu mɛ bot ɛ bɔs'ak. Tin, betka náá, Zɛɛb nyɛ ɛmet swoola esiiza bin, etɛɛ náá, bi needi bot ɛ na bes. É di'enek ɛ, bi aagu ɛkwosak ɛ Zɛɛb: yɛ ɛ́ sa di enyɔ ɛ, sa nyɛ di emyaala nɛ yɛ ɛ, sa di ààbɛ nɛ ɛtɔn ɛ.

3 Kɔ ɛsu ɛ enɛm nɛ embɛɛ ee Zɛɛb nadjɛ mɛ ɛ, mɛ lɛɛ nɛ nen ɛ́ náá: Sa bi ààdi nɛ ɛghɛɛa nyel kɛdhaa. Ye goka ɛ́ náá, mot nɛ mot gu mbi mot nyɛ di ɛ, dum nɛ yɛ ɛkɛɛ yii ɛdum ɛ koŋ nɛ Zɛɛb nyɛ bela ɛ. 4 Dáa ye di náá, nyel wat mena dika nɛ yɛ nɛ bu ekyes ɛ, kyes nɛ kyes ɛ́ nɛ mɛsa mɛ ye di esa ɛ. 5 Ye nakoozodi náá, bot ɛ́ ɛbuɛpe, bot moo ɛ́ nyel ngɔt tɔ ɛgwakel nɛ Klisto. Deenek, bot ɛ́ tɔ ɛgwakel pak'enaka dáa esum e nyel mot ngɔt. 6 Deenek, menaka ɛ́ nɛ mɛkɛɛ membi nɛ membi Zɛɛb nadjɛ mot nɛ mot dum nɛ enɛm nɛ embɛɛ bɛ ɛ. Mot ngɔt tɔ len ɛ bela ɛkɛɛ ɛ ɛgoola bhaadal dus pɛ daa Zɛɛb ɔɔ, nyɛ goka ɛ́ nɛ ɛsa yɛ ɛ́ tɔ ɛdum ɛ koŋ ɛ lɛ nɛ Zɛɛb. 7 Tin, yɛ bɛ náá, mot ngɔt ɛ́ nɛ ɛkɛɛ ɛ ɛsa mɛsa ɔɔ, nyɛ sa yɛ. Yɛ bɛ náá, mot ngɔt ɛ́ nɛ ɛkɛɛ ɛ ɛlyo ɔɔ, nyɛ lyo. 8 Yɛ bɛ náá, mot ɛ́ nɛ ɛkɛɛ ɛ ɛdjɛ bɛsɔ mɛghaaz ɔɔ, nyɛ goka ɛ́ nɛ ɛsa yɛ. Yɛ bɛ náá, mot ɛ́ nɛ ɛkɛɛ ɛ ɛgwyena ɔɔ, nyɛ goka ɛ́ nɛ sa yɛ nɛ mbɛɛ lyem. Yɛ bɛ náá, mot ɛ́ nɛ ɛkɛɛ ɛ ɛdjɛɛd bɛsɔ bot ɔɔ, nyɛ goka ɛ́ nɛ ɛsa yɛ nɛ zii. Yɛ bɛ náá, mot ɛ́ nɛ ɛkɛɛ ɛ ɛkwyee bɛdjel ɛ bot ɔɔ, nyɛ goka ɛ́ nɛ ɛsa yɛ tɔ mɛmyaala✝.

9 Beta náá, kwyɛl bi di nɛ yɛ ɛ, di ààbɛ nɛ mɛdjhaaz pɛ ɛko bhimis pɛ si. Byenka ɛsa ɛbiyo, dika tɔ enɛm esa. 10 Kwyɛlaka pak'en nɛ lyem wat dáa bɔn-nyɛɛg tɔ ɛdum ɛ koŋ nɛ Zɛɛb, kaabelka pak'en. 11 Tin, dika bot ɛ ɛsa mɛsa ɛ Ghɛŋ waŋa-waŋa nɛ bham djas, ààkabɛ tɔ elɛtɛ. Waka zii tɔ ɛsa mɛsa ɛ Ghɛŋ. 12 Dika nɛ mɛmyaala kɔ ɛsu ɛ ɛbwaalel ɛ len. Dika nɛ ɛmaad ɛ lyem tɔ mezuk. É di'enek, bi goka ɛ́ nɛ ɛwa zii tɔ mendjaala. 13 Tin, kwyeeka bɔn-nyɛɛg bin bot ɛ na dɛɛ di tɔ pwom ɔ. Beka bot djas di esulal pɛ yebɔ ɛ ɛnyɔɛpe.

14 Deenek, djaalaka náá, Zɛɛb sa enɛm esa nɛ bot ɛ di etiig bin ɔ. Djaalaka náá, Zɛɛb sɛɛ bɛ mɛtel, ààbɛ náá, nyɛ wa bɛ tɔ mbee baka✝. 15 Myaalaka sama nɛ bot ɛ di tɔ mɛmyaala ɔ, djeka sama nɛ bot ɛ di edje ɔ. 16 Dika tɔ ɛgwakel pak'en. Tin, sa bi ààdi bot ɛ ɛghɛɛa nyel, dika bot ɛ mɛsila. Tin, sa bi ààbee náá, biyɔ bɛmet ɛ́ zodi bɛtsoŋ ɛ bot✝.

17 Sa bi ààbulal ɛbiyo nɛ mot sa bin ɛbiyo ɔ. Waka lyem tɔ ɛsa enɛm esa é mis mɛ bot djas. 18 Yɛ bɛ náá, ye dus ɛ́ nɛ nen ɔɔ, bi ɛ di nɛ ghwyil ɔɔ, saka náá, bi di tɔ ɛgwakel nɛ bot djas. 19 Bɔn-nyɛɛg bam mɛ di ekwyɛl ɔ, pak'en, sa bi ààbulal ɛbiyo nɛ ɛbiyo. Tin, betka náá, Zɛɛb nyɛy ɛmet wa mot di esa ɛbiyo ɔ é feŋ, etɛɛ náá, Ghɛŋ lɛɛ tɔ Ekwyala ɛ́ náá: «Yɛ ɛ́ mam ɛ di egoka nɛ ɛbulal ɛbiyo bɛ sa bin ɛ, mam ɛ di edjɛ mot nɛ mot yɛ efute.» 20 Tin, Ekwyala baalɛɛ ɛ́ náá: «Yɛ bɛ náá, mot mɛbhuka mɔ ɛ́ nɛ za, nɛghu nɛ gwyes mɛdii ɔɔ, djɛa nyɛ. Etɛɛ náá, wɔ di esa deenek ɔɔ, yɛ ɛ́ dhatyee náá, wɔ ɛpekɛl nyɛ da kɔ lo✝.» 21 Deenek, sa wɔ ààbet náá, ɛbiyo kwak wɔ. Tin, ye goka ɛ́ náá, enɛm esa bɔ bela eghɛŋ kɔ ɛbiyo.