1 Wɔy, ye nakoozodi náá wɔ ɛ́ ɛzɛ, wɔy mot di epɛ́ɛ bɛsɔ bɔ ɔ, gua náá, wɔ aanàbela ɛpelak✝. Etɛɛ náá, wɔ di epɛ́ɛ bɛsɔ bɔ, da wɔ ɛ́ baadi ekɛ dáa bɔɔ ɔ, deenek, wɔy ɛmet ɛpewa nyel'ɔ é feŋ. 2 Mena nɛ guka náá, epɛ́ɛ e Zɛɛb ɛ́ tsɛɛtsɛ dum nɛ mbi bot ɛ di esa esesɛɛ binek ɔ. 3 Wɔy mot di epɛ́ɛ bot ɛ di esa embee esesɛɛ binek, da wɔ ɛ́ baadi esa esesɛɛ tak ɔ, wɔ gek ɛ́ náá, wɔ aadi ɛ́ kyiid tɔ epɛ́ɛ e Zɛɛb é? 4 Nɛghu, wɔ kwyɛl ɛ́ ɛbyasal boo enɛm esa e Zɛɛb, nɛ ɛdil ɛ lyem'ɛ nɛ mbɛɛ lyem'ɛ? Wɔ ààgu náá, boo enɛm esa e Zɛɛb ɛ́ kwaasa náá, wɔ swoola tsik é? 5 Tin, wɔ ɛpesa maa-ɛlɔ, wɔ ààkwyɛl ɛswoola mɛfulu. Yɛ ɛ́ étɛp tak ɛ wɔ di esɛɛg boo ɛbuk ɛ Zɛɛb kɔ nyel'ɔ endita-endita, dwoo Zɛɛb aatel boo ɛbuk ɛ lɛ tɔ epɛ́ɛ bɛ e piki ɛ. 6 Nyɛ waadjɛ mot nɛ mot efute mɛsa mɛ nyɛ nadi esa ɛ. 7 É di'enek, nyɛ aadjɛ tsik na kɔm-kɔm ɛ́, nɛ bot ɛ di wa zii tɔ ɛsa enɛm esa, nɛ ɛsaŋ ɛ duma, duu, nɛ tsik na kɔm-kɔm ɔ. 8 Tin, nyɛ aatel boo ɛbuk ɛ lɛ ɛ́ nɛ bot ɛ di ààlooba nɛ nɛ ɔ, bot ɛ di ààkwyɛl ɛlooba nɛ etsɛɛtsɛ, da looba nɛ etɛp di ààbɛ tɔ epiki ɛ. 9 Bot djas di esa ɛbiyo ɔ, bɛ waabee mezuk nɛ bɛbebwol, yɛ aakan ɛ́ nɛ bot ɛ mbyak eYuda, zɛnɔɔ bot ɛ mbyak eGhɛlɛk. 10 É di'enek, Zɛɛb ɛ́ waadjɛ duma, duu, egwyem nɛ bot djas di esa sa mɛnyɔ ɔ, yɛ aakan ɛ́ nɛ bot ɛ mbyak eYuda, zɛnɔɔ bot ɛ mbyak eGhɛlɛk, 11 etɛɛ náá, Zɛɛb ààwa mbɛk pak bot.

12 Bot ɛ di esyem ààgu etsi ɛ Moiiz ɔ, bɛ waagwyɛ pe ɛ́ ààbɛ nɛ etsi. Tin, bot ɛ di esyem, bɔɔ é gu etsi ɛ Moiiz ɔ, bɛ waapɛ́ɛaa ɛ́ dum nɛ etsi tak. 13 Etɛɛ náá, bot ɛ di bot ɛ epiki é mis ɛ Zɛɛb ɔ, ye tok bot ɛ di náá, bɔɔ zosik ɛ é ɛgwak etsi ɛ Moiiz ɔ. Tin, bot ɛ di bot ɛ epiki é mis ɛ Zɛɛb ɔ, yɛ ɛ́ bot ɛ di ewa etsi tak tɔ mɛsa ɔ. 14 É ghɛŋ bot ɛ di ààbɛ bot ɛ mbyak eYuda, bot ɛ di ààgu etsi ɛ Moiiz di elooba nɛ etsi bɔɔ bɛmet ɔ. Yɛ ɛ́ ɛkɛɛ, etsi tak ɛ́ nɛ nɔɔ ɛ́ baala tɔ elyem, ye nakoozodi náá, bɛ tok nɛ yɛ. 15 Tin, bɛ lyaal deenek ɛ́, sa etsi di elyo náá, mot sa ɛ, yɛ ɛ́ kwyala tɔ elyem bɔɔ. Egeka e lyem bɔɔ ɛpelyaal yɛ, deenek, esiiza bɔɔ nɛ pit bɛ é dhiiti mɛwala, da baakɛm bɛ é yak mɛwala. 16 Etɛp binek djas aanyen ɛ́ dwoo Zɛɛb aapɛ́ɛ esa djas di syela tɔ tsik mot nɛ mot é ze ɛ Yezu Klisto ɛ. Yɛ ɛ́ sa Mbɛɛ Bhaadal mɛ di egoola ɛ di elɛɛ ɛ.

17 Tin, wɔy mot di nɛ din ɛ mot mbyak eYuda ɔ, ɛbwaalel ɛ lɔ ɛ́ pɛ tɔ etsi, wɔ nɛ ben nyel kɔ ɛsu ɛ Zɛɛb'ɔ. 18 Wɔ nɛ gu ɛkwosak ɛ lɛ, etsi naalyo dáa wɔ di egoka nɛ ɛwa mbɛk pak mɛnyɔ nɛ ɛbiyo ɛ. 19 Wɔ bee ɛ́ náá, wɔy ɛ́ ndjɛɛdel bot ɛ edhim, wɔy ɛ́ gwyɛ bot ɛ di tɔ ghooghom ɔ. 20 Wɔy ɛ́ lyoel bot ɛ di ààgu mɛdjek ɔ, lyoel bɔɔ dhyeeb, etɛɛ náá wɔy eezemyaal nɛ lyem wat náá, etsi ɛpesa náá, wɔ di mot di egu etɛp ɔ, mot di egu etsɛɛtsɛ ɔ. 21 Tin, wɔy, mot di elyo bɛsɔ bɔ ɔ, étɛp yé wɔ di ààlyo nyel'ɔ met? Wɔy, mot di egoola bɛsɔ bɔ Mbɛɛ Bhaadal náá, bɛ nàdjii ɔ, étɛp yé wɔ di edjii? 22 Wɔy, mot di elu bot náá, bɛ nàsa ɛzɔ ɔ, étɛp yé wɔy di esa yɛ? Wɔy, mot di ebyen bɛnaghisɛ ɔ, étɛp yé wɔ di ekɛdjii esa ee di tɔ mendjaa mɛ bɛzɛɛb bɔɔ ɛ? 23 Wɔ nɛ sa ɛghɛɛa nyel kɔ ɛsu ɛ etsi, tin, wɔ kadi ɛ́ ààdjɛ Zɛɛb duu, é sok wɔ di esa sa etsi di elu ɛ! 24 Tin, Ekwyala lɛɛ ɛ́ náá: «Dum nɛ etɛp bi di esa ɛ, bɛdhiiti membyak ɛpenyek Zɛɛb✝.»

25 Ɛni ɛ́ beka val ɛ, yɛ bɛ náá, wɔ ɛpelooba nɛ etsi ɔɔ. Tin, wɔ kadi ààlooba nɛ etsi ɔɔ, yɛ ɛ́ ɛkɛɛ wɔ ààpani beka. 26 Tin, mot di ààni beka ɔ, nyɛ looba nɛ mɛtiŋ mɛ etsi ɔɔ, Zɛɛb aanàkwaabee nyɛ tyee mot zeni beka ɔ? 27 Tin, mot di ààni beka ɔ, nyɛ looba nɛ etsi ɔɔ, nyɛ waapɛ́ɛ wɔ, wɔy mot di ààlooba nɛ etsi ɔ, ye nakoozodi náá, wɔ nɛ gu mɛkana mɛ etsi nɛ náá, wɔ naaniigelaa beka. 28 É di'enek, tɛtɛ mot mbyak eYuda tok mot di etel é mis mɛ bot náá, nyɛ ɛ́ Yuda ɔ. Tɛtɛ Yuda tok pe mot di nɛ bam pyoŋ beka é nyel ɔ. 29 Tin, tɛtɛ mot mbyak eYuda ɛ́ mot di ààdiig bet é mis mɛ bot ɔ, yɛ ɛ́ mot naniigelaa beka tɔ lyem'ɛ ɔ, beka tak ɛ́ yii Sisim Zɛɛb, ààbɛ yii etsi. Tɛtɛ mot mbyak e Yuda bela duu ɛ́ nɛ Zɛɛb, ààkabɛ nɛ bot ɛ bɔs.