1 Menabɛlka bot ɛ di elyel tɔ ɛdum ɛ koŋ nɛ Zɛɛb ɔ, mena goka ɛ́, nɛ ɛdjɛ mɛghaaz nɛ bot ɛ di náá bɛ dinaa ààpalyel tɔ ɛdum ɛ koŋ nɛ Zɛɛb ɔ. Sa mena ààsaaka esa ee elyem bina di emyaala nɛ yɛ ɛ. 2 Ye goka ɛ́ náá, mot nɛ mot sa sa di náá, mɔɔ sɔ aamyaala nɛ yɛ ɛ, étɛp ye neenyɔ nɛ nɛ, ye neekwyee nyɛ é ɛtɔ́ sok tɔ ɛdum ɛkoŋ nɛ Zɛɛb. 3 Tin, Klisto nabɛ ɛ́ ààsaa sa lyem'ɛ aamyaala nɛ yɛ ɛ. Tin, dáa Ekwyala di elɛɛ: «Mɛlee mɛ bɛ nadi elee wɔ ɛ, yɛ eezezii kɔ lo'am.» 4 Tin, sa djas nakwyalaa tɔ mɛkana mɛ na dɛɛ na mwa ɛ, ye nabɛ ɛ́ étɛp ye neelyo mena, etɛɛ náá, yɛ ɛ́ kɔ ɛsu ɛ zii nɛ mɛghaaz mɛ Ekwyala di edjɛ mena ɛ, mena aabelaka ɛbwaalel. 5 Beta náá, Zɛɛb mot di edjɛ bot zii nɛ mɛghaaz ɔ sa náá, bi di tɔ ɛgwakel pak'en dáa Yezu Klisto di esa nɛ nen ɛ. 6 Etɛɛ náá, biyɔ djas tɔ ɛgwakel dhatyee mot ngɔt, bi aaduwal Zɛɛb, Sɛɛg ɛ Ghɛŋ'enaka Yezu Klisto.
7 Tin, myaalelka pak'en, dáa Klisto di emyaal bin étɛp duma Zɛɛb ɛ. 8 Tin, mɛ lɛɛ bin ɛ́ tsɛɛtsɛ náá, Klisto moo ɛ́ mot-mɛsa mɛ bot ɛ mbyak eYuda, étɛp ɛsa náá, ekɛk e Zɛɛb nakɛk nɛ bɛbhaab'ɔɔ ɛ neesael, nɛ ɛbaalyaal náá, Zɛɛb ɛ́ sosoob. 9 Nyɛ nabaazyɛ ɛ́ etɛɛ náá, bot ɛ di ààbɛ bot ɛ mbyak eYuda ɔ needuwal Zɛɛb kɔ ɛsu ɛ boo lyem ghoŋ'ɛ, dáa Ekwyala di elɛɛ ɛ:
«Dum nɛ tɛp tak ɛ mɛ waaduwal wɔ tɔ bot ɛ di ààbɛ bot ɛ mbyak eYuda ɔ,
nɛ ɛduwal din ɛ lɔ.»
10 Ekwyala na dɛɛ ɛpebaalɛɛ náá:
«Biyɔ bot ɛ membyak mɛ sis, myaalaka sama nɛ bot ɛ mbyak ɛ Zɛɛb.»
11 Tin, Ekwyala ɛpebaalɛɛ náá:
«Bot djas di ààbɛ bot ɛ mbyak eYuda ɔ, duwalka Ghɛŋ,
biyɔ bot djas di kɔ ɛko ɛ bɔs ɔ, tiika mɛdjeeb mɛ di eduwal Zɛɛb ɛ!»
12 Ngoolel-Mɛkpa ɛ Zɛɛb Ezayi ɛpelɛɛ náá:
«Dha ɛ Yese ngɔt ɛ́ waabyel,
nyɛ aazyɛ ɛ́ étɛp ɛzɛdi kukuma bot ɛ di ààbɛ bot ɛ mbyak eYuda ɔ,
bot ɛ tak ɛ́ waawa ɛbwaalel ɛ lɔɔ ɛ́ nɛ nɛ.»
13 Beta náá, Zɛɛb mot di ɛsuk ɛbwaalel ɔ, lwoodal bin nɛ mɛmyaala nɛ tɛtɛ egwyem kɔ ɛsu ɛ ɛdum ɛ koŋ ɛ len nɛ nɛ. Etɛɛ náá, bi needi nɛ ɛbwaalel nɛ nɛ ɛbuɛpe nɛ ghwyil ɛ Sisim na Dɛɛ.
14 Bɔn-nyɛɛg bam, mam ɛmet ɛpemyaal ɛnyɔɛpe náá, bi ɛ́ lwoodela nɛ embɛɛ mɛsa, lwoodela nɛ ghwyil ɛgu sa di egoka náá, bi lyoel pak'en ɛ. 15 Deenek, nɛ mɛghaaz djas, mɛ naazekwyal bin tɔ bɛtɛ nɛ mɛze mɛ mɛkana mam, étɛp bi neetaala nɛ sa bi nazedjek ɛ. Mɛ nakwyal deenek ɛ́ kɔ ɛsu ɛ enɛm nɛ embɛɛ ee Zɛɛb nadjɛ mɛ ɛ, 16 étɛp ɛdi ɛ́ mot-mɛsa ɛ Yezu Klisto dum nɛ bot di ààbɛ bot ɛ mbyak eYuda ɔ. Deenek, mɛ sa ɛ́ mɛsa mɛ mɛbwala tɔ ɛgoola Mbɛɛ Bhaadal ɛ Zɛɛb, etɛɛ náá, bot ɛ di ààbɛ bot ɛ mbyak eYuda ɔ needi tyee buwa Zɛɛb di ekwyɛl ɛ, da bɛ ɛ́ beeaa piki é mis ɛ Zɛɛb é ze ɛ Sisim na Dɛɛ. 17 Tɔ ɛgwakel nɛ Yezu Klisto, mɛ ɛ́ nɛ ghwyil ɛdi tɔ mɛmyaala nɛ Zɛɛb dum nɛ mɛsa mam. 18 Etɛɛ náá, yɛ bɛ mɛ eelii dum nɛ dhiiti tɛp ɔɔ, yɛ aazodi ɛ́ sa Klisto nasa dum nɛ nam, étɛp ɛdul ɛ bot ɛ di ààbɛ bot ɛ mbyak eYuda ɔ, bɛ looba nɛ Zɛɛb. Nyɛ nasa yɛ ɛ, nɛ ghwyil mɛkpa nɛ mɛsa, 19 nɛ ghwyil endem e mɛbwala nɛ mɛvyɛkɛlɛ, nɛ ghwyil Sisim Zɛɛb. Étɛp tak ɛ mɛ nagoola nɛ bham djas Mbɛɛ Bhaadal ɛ Klisto, kana pɛ ghaada Yeluzalɛm, zɛnɔɔ mɛdhik mɛ sis kɛkum pɛ kyee dik Iliidi. 20 Tin, mɛ nazokwyɛl ɛgoola Mbɛɛ Bhaadal pɛ tɔ edi di náá, bot nabɛ ɛ́ bɛ dinaa ààgwak bot elii dum nɛ Klisto ɔ. Mɛ nasa deenek ɛ́, étɛp mɛ needi ààsum kɔ ghus-zumal dhiiti mot. 21 Mɛ nasa deenek ɛ́ étɛp ɛdu sa Ekwyala di elɛɛ ɛ:
«Bot ɛ di náá, bɛ nabɛ ɛ́ ààgoola bɛ Mbɛɛ Bhaadal kɔ ɛsu ɛ Klisto ɔ, bɛ waabee nyɛ,
bot ɛ nadi ààgwak Mbɛɛ Bhaadal tak ɔ, bɛ waagu yɛ.»
22 Yɛ ɛ́ etɛp binek ɛ nadi elu mɛ esok nɛ esok náá, mɛ nàzyɛ pɛ yebɔ. 23 Tin, nenak, mɛ eesilal mɛsa mam kɔ mɛdhik mak. Bela náá, membu nɛ membu, mɛ nadi ekwyɛl ɛzyɛ pɛ yebɔ. 24 Mɛ kwyɛl ɛsa yɛ ɛ́, é ghɛŋ mɛ aatɔ́ pɛ kyee dik Ɛspanyɛ ɛ. Etɛɛ náá, mɛ ɛ́ nɛ ɛbwaalel ɛbela mɛkɛɛ é sok mɛ aadhaa pɛ yebɔ ɛ, étɛp ɛtɔ́ pɛ kyee dik yenek ɛ. Tin, mɛ waadi ba mɛlu pɛ yebɔ. 25 Tin, nenak yak, mɛ tɔ́ ɛ́ pɛ ghaada Yeluzalɛm étɛp ɛsa mɛsa pɛ daa bot ɛ zedum koŋ nɛ Zɛɛb di penek ɔ. 26 Étɛp tak ɛ, bot ɛ zɛɛga mendjaala ghaada Masedwan nɛ yii ghaada Akayi naamyam ɛsɛɛg epata, étɛp ɛkwyee bɛdjel ɛ bot ɛ zedum koŋ nɛ Zɛɛb di kɔ ghaada Yeluzalɛm ɔ. 27 Bɛ namyam ɛsa yɛ ɛ́ nɛ mɛghwyil mɔɔ met, tin, nɛ tsɛɛtsɛ, bɛ nadi ɛ́ nɛ kola yɔɔ. Etɛɛ náá, bot ɛ mbyak eYuda di ekeletyɛ ɔ naagwyena esa e Sisim nɛ bot ɛ di ààbɛ bot ɛ mbyak eYuda ɔ. Deenek, bot ɛ di ààbɛ bot ɛ mbyak eYuda ɔ, goka ɛ́ nɛ ɛkwyee bɛ nɛ ekum bɔɔ. 28 É sok mɛ aasilal etɛp binek ɛ, é sok mɛ aadjɛ bɛ epata binek ɛ, mɛ waadhaa pɛ yebɔ étɛp ɛgoola pɛ kyee dik Ɛspanyɛ. 29 Tin, mɛ nɛ gu náá, é sok mɛ aazyɛ pɛ yebɔ ɛ, mɛ aazyɛ ɛ́ tɔɔɔ nɛ esɛɛa mɛtel ɛ Klisto.
30 Tin, bɔn-nyɛɛg, gwakeka sa mɛ di ekwyɛl ɛwaab nɛ nen kɔ ɛsu ɛ Ghɛŋ'enaka Yezu Klisto, kɔ ɛsu ɛ kwyɛl Sisim na Dɛɛ di edjɛ ɛ. Duuka sama nɛ nam tɔ ɛdjaala Zɛɛb kɔ ɛsu ɛ lam. 31 Djaalaka Zɛɛb, étɛp nyɛ neebaal mɛ sok bhwoob bot ɛ kyee dik Yude, bot ɛ di ààdum koŋ nɛ Klisto ɔ. Tin, djaalaka etɛɛ náá, mɛkɛɛ mɛ mɛ aazyɛ nɛ yɛ pɛ ghaada Yeluzalɛm ɛ neemyaalaa nɛ lyem wat nɛ bot ɛ di edum koŋ nɛ Yezu ɔ. 32 Deenek, yɛ waasa náá, mɛ kum pɛ yebɔ nɛ mɛmyaala djas, Zɛɛb ɛ kwyɛl ɔɔ, mɛ waadi ba mɔɔ ɛwala pɛ daa len. 33 Beta náá, Zɛɛb mot di ɛsuk ɛ egwyem ɔ, di sama nɛ biyɔ djas. Amɛn.
/images/a/Tcg2NiV7ce24OT6kCIQGR)
/images/a/-h5KPk8ct3kLpCpYm9-g6)