1 Étɛp tak ɛ di náá, bot ɛ di mos sama nɛ Yezu Klisto ɔ, bɛ tokapɛ nɛ ndjɛ sɔs. 2 Etɛɛ náá, dum nɛ Yezu Klisto, tsi Sisim di edjɛ tsik ɛ, naazepɛk mɛ tɔ ekwom e etsi e mesyem nɛ ɛsyee. 3 Zɛɛb naasa esa ee di náá, etsi ɛ Moiiz nabɛ ɛ́ ààbɛ nɛ ghwyil ɛsa ɛ, etɛɛ náá, epuud nɛ sa elɛtɛ. Nyɛ naadhis mɔn'ɛ nɛ nyel epuud dáa menabɛlka bot ɛ mesyem, etɛɛ náá, nyɛ neepɛk mena tɔ mesyem. Yɛ ɛ́ deenek ɛ́ Zɛɛb nawa é feŋ mesyem mɛ nadi tɔ mɛnyel mɛ bot ɛ. 4 Zɛɛb sa deenek ɛ́, etɛɛ náá, mena needika nɛ ghwyil ɛkɛ dáa etsi di elɛɛ ɛ. Deenek, mena aanàkabaakɛ tɔ ghwyil epuud, tin, mena aakakɛka ɛ́ tɔ ghwyil Sisim. 5 Deenek, bot ɛ di ekɛ tɔ ghwyil epuud ɔ, bɛ sa ɛ́ mɛkwosak mɛ epuud. Tin, bot ɛ di ekɛ tɔ ghwyil Sisim ɔ, bɛ sa ɛ́ mɛkwosak mɛ Sisim. 6 Mot ɛ di ekɛ si ghwyil epuud ɔɔ, ye dul nyɛ ɛ́ é ze ɛsyee. Tin, mot ɛ di ekɛ si ghwyil Sisim ɔɔ, ye djɛ nyɛ ɛ́ tsik nɛ egwyem. 7 Etɛɛ náá, bot ɛ di ekɛ si ghwyil ɛkwosak ɛ epuud ɔ, bɛ ɛ́ bot ɛ mɛbhuka ɛ Zɛɛb, bɛ ààlooba nɛ etsi e Zɛɛb, bɛ tok nɛ ghwyil ɛlooba nɛ etsi e tak. 8 Bot ɛ di ekɛ si ghwyil epuud ɔ, Zɛɛb tok nɛ ghwyil ɛmyaala nɛ nɔɔ.

9 Yɛ kabɛ biyɔ ɔɔ, bi ààkɛ si ghwyil epuud, bi kɛ ɛ́ si ghwyil Sisim, etɛɛ náá, Sisim Zɛɛb eebe di tɔ len. Tin, mot di ààbɛ nɛ Sisim ɛ Klisto ɔ, nyɛ tok ngbɛ Klisto. 10 Ye nakoozodi náá, Klisto ɛ́ tɔ len, mɛnyel men aaboodi ɛ́ gwyɛ kɔ ɛsu ɛ mesyem, tin, Sisim djɛ bin tsik ɛ́, etɛɛ náá, Zɛɛb naazesa náá, bi djóoaa bot ɛ epiki é mis mɛ. 11 Yɛ bɛ náá, Sisim mot nagomal Yezu pak myoŋ ɛ́ tɔ len ɔɔ, tin, Zɛɛb mot nagomal Klisto pak myoŋ ɔ, nyɛ aabaadjɛ tsik é mɛnyel men nazegwyɛ ɔ, kɔ ɛsu ɛ Sisim'ɛ zebe di tɔ len ɛ.

12 É di'enek, bɔn-nyɛɛg, yɛ bɛ náá, bis ɛ́ nɛ kola yebɔ ɔɔ, ye tok kola epuud, etɛɛ náá, bis neekɛ tɔ ɛkwosak ɛ epuud. 13 Etɛɛ náá, bi ɛ́ di tɔ mɛkwosak mɛ epuud ɔɔ, bi ɛ́ waagwyɛ. Tin, dum nɛ ghwyil Sisim di edjɛ bin ɛ, bi ɛ́ waakwak embee mɛfulu di tɔ mɛnyel men ɛ, bi aadi ɛ́ nɛ tsik. 14 Bot djas di edjɛɛdel nɛ Sisim Zɛɛb ɔ, bɛ ɛ́ bɔn ɛ Zɛɛb. 15 Etɛɛ náá, Sisim bi bela ɛ, ye tok Sisim di ewa bin tɔ ekwom nɛ ɛbaadjɛ bin bwoo ɔ. Deenek, Sisim bi nabela ɛ nasa náá, bi di bɛtɛtɛ bɔn ɛ Zɛɛb, yɛ ɛ́ kɔ ɛsu ɛ Sisim yenek ɛ mena di eben gwood, étɛp ɛtsim: «Abha!» Ye kwyɛl ɛlɛɛ ɛ́, «Saagam!» 16 Sisim Zɛɛb nyɛ ɛmet ɛpelyaal nɛ tsɛɛtsɛ nɛ sisim yenaka náá, mena moo ɛ́ bɛtɛtɛ bɔn ɛ Zɛɛb. 17 Deenek, dáa ye di náá, menaka ɛ́ bɔn bɛ ɛ, menaka pe ɛ́ bɔn ɛ lyak! Nɛ tsɛɛtsɛ menaka ɛ́ bɔn ɛ lyak ɛ Zɛɛb, menaka ɛ́ bɔn ɛ lyak sama nɛ Klisto. Etɛɛ náá, mena zukeka sama nɛ nɛ ɔɔ, mena aabaadika ɛ́ sama nɛ nɛ tɔ duma yɛ.

18 Mɛ bee ɛ́ ɛkɛɛ, duma Zɛɛb aalyaal mena djɛmɛn ɛ, eedhaa mezuk mɛ mena di ezukeka mos'aak nɛ mɛtaŋ. 19 Bhwak djas ɛ́ lyem pɛ ɛko é bhwood ɛwala ɛ Zɛɛb aalyaal duma bɔn bɛ ɛ. 20 Etɛɛ náá, bhwak djas naazeni si bhel mɛze mɛ di ààval sonok ɛ. Ààbɛ náá, ye nakwyɛl ɛdi deenek ɛ́ nɛ ɛkwosak ɛ lɛ met. Yɛ ɛ́ kɔ ɛsu ɛ Mot nawa nyɛ si bhel'ɛ ɔ. Bela náá, ye dinaa nɛ ɛbwaalel. 21 Etɛɛ náá, esa ee Zɛɛb nakus djas ɛ, waapɛkel si bhel mɛbwala mɛ nazesaab yɛ nɛ ɛwa yɛ tɔ ekwom ɛ. Tin, bhwak djas aabela di tɔ duma mɛpɛka sama wat nɛ bɔn ɛ Zɛɛb. 22 Mena ɛpeguka náá, dɔɔ nɛ dwoo pan mos'ak, bhwak djas ɛpesim, nɛ ɛzuk dáa moma di egwak ɛbɛl ɔ. 23 Ye tok bhwak nɛ bhwak di ezuk. Yɛ ɛ́ dɔɔ nɛ menabɛlka, bot ɛ nazebela Sisim dáa ɛkɛɛ mɛkɛn tɔ mɛkɛɛ mɛ Zɛɛb nakɛk ɛ, mena ɛpebaasimka tɔ elyem bena. Deenek, menaka ɛ́ tɔ bhwood náá, Zɛɛb sa náá, mena dika bɛtɛtɛ bɔn bɛ, da nyɛ ɛ́ pɛk mɛnyel mena. 24 Etɛɛ náá, mena naazebelaka tsik, yɛ ɛ́ tsik tak ɛ́ di edjɛ mena ɛbwaalel. Yɛ bɛ náá, bot ɛ ɛpebee sa di náá, bot ɛ nɛ ɛbwaalel nɛ yɛ ɔɔ, yenek tokapɛ ɛbwaalel. Yɛ ɛ́ ɛzɛ baadi nɛ ɛbwaalel nɛ sa nyɛ di ebee ɛ? 25 Tin, yɛ bɛ náá, menaka ɛ́ nɛ ɛbwaalel nɛ sa di náá, mena ààbeeka ɔɔ, mena waawaka zii ɛ é bhwood.

26 Yɛ ɛ́ tyee wat nɛ Sisim. Sisim ɛpebaakwyee mena, etɛɛ náá, menaka ɛ́ nɛ elɛtɛ. Mena ààguka ɛdjaala dáa mena di egoka ɛ. Tin, Sisim nyɛ ɛmet ɛpedjaala Zɛɛb étɛp'ena etɔɔla nɛ mɛkpa mɛ di náá, mot tok nɛ ghwyil ɛlii ɛ. 27 Tin, Zɛɛb mot di ebee tɔ ebhum elyem e bot ɔ, nɛ gu sa Sisim di ekwyɛl ɛwaab ɛ. Etɛɛ náá, Sisim ɛpedjaala Zɛɛb, étɛp bot ɛ di edum koŋ nɛ Zɛɛb ɔ, dáa nyɛy Zɛɛb di ekwyɛl ɛ.

28 Mena nɛ baaguka náá, esonok djas sael ɛnyɔɛpe ɛ́, étɛp bot ɛ di ekwyɛl Zɛɛb ɔ, bot ɛ nyɛ nadjóo tɔ ɛkwosak ɛ lɛ ɔ. 29 Etɛɛ náá, Zɛɛb naazesɛ́ɛ bɛ, nyɛ naabaazesa náá, bɛ nɔŋel nɛ Mɔn'ɛ, etɛɛ náá, Mɔn'ɛ tak needi mɔn mɛgwyak mɛ bɛtɛ nɛ bɔn-nyɛɛg. 30 Bot ɛ di náá, Zɛɛb naazesɛ́ɛ bɛ ɔ, nyɛ naadjóo bɛ. Bot ɛ nyɛ nazedjóo ɔ, nyɛ naazedjɛ bɛ di epiki é mis mɛ. Bot ɛ nyɛ naazedjɛ bɛ di epiki ɔ, nyɛ naabaasa náá, bɛ bela di tɔ duma yɛ.

31 Mena aakabaake dáa? Yɛ bɛ náá, Zɛɛb ɛ́ pɛ yenabɛl kyee ɔɔ, ɛzɛ aabaadi nɛ ghwyil ɛkwak mena? 32 Nyɛy mot di náá nyɛ nabɛ ɛ́ ààsa náá Mɔn'ɛ Yezu di ngbɛ met ɔ, nyɛ naaka nyɛ buwa kɔ ɛsu ɛ menabɛlka djas. Sama nɛ Mɔn'ɛ, nyɛ aadi ààdjɛ mena esonok djas tɔ enɛm nɛ embɛɛ bɛ dáa? 33 Ɛzɛ aapit bot ɛ Zɛɛb nazesɛ́ɛ ɔ? Mot tok, etɛɛ náá, yɛ ɛ́ Zɛɛb ɛ di eke nɛ bot ɛ nyɛ nasɛ́ɛ ɔ náá, bɛ ɛ́ bot ɛ epiki. 34 Ɛzɛ di nɛ ghwyil ɛwa bɛ é feŋ? Mot tok, etɛɛ náá, Yezu Klisto ɛ́ mot nagwyɛ da gom bhis ɛsyee ɔ. Nyɛ ɛ́ pɛ mbɔ eghɛŋ ɛ Zɛɛb, nyɛ ɛpedjaala kɔ ɛsu ɛ lena. 35 Ɛzɛ di nɛ ghwyil ɛbɛk mena nɛ kwyɛl ɛ Klisto? Yɛ ɛ́ nɛ ghwyil ɛdi mezuk é, kɛŋ é, mɛtiiga, za, eduuba é, embee etɛp é, nɛghu ɛsyee? 36 Ekwyala lɛɛ ɛ́ náá:

«Yɛ ɛ́ kɔ ɛsu ɛ lɔ ɛ mena di é mɛwala djas kaa é ɛsyee,

bɛ kabee mena ɛ́ tyee ebhata bɛ di edul étɛp kɛtsakaa ɛ✝.»

37 Tin, mena naazekwakeka etɛp binek djas boo kwakak, kɔ ɛsu ɛ mot nazekwyɛl mena ɔ. 38 Nɛ tsɛɛtsɛ, mɛ nɛ gu náá, dhiiti sonok tok nɛ ghwyil ɛbɛk mena nɛ kwyɛl Zɛɛb di nɛ yɛ nɛ nena ɛ:

Ye nakoozodi ɛsyee nɛghu tsik,

ye nakoozodi efofop,

ye nakoozodi edhiiti ekukuma,

nɛghu membi mɛ mɛbwala mɛ di pɛ tɔ gwoo ɛ,

ye nakoozodi etɛp e mos nɛghu etɛp e djɛmɛn,

39 ye nakoozodi esa e mɛbwala mɛ di tɔ gwoo nɛghu pɛ si bɔs ɛ,

ààkobɛ-bɛak sa wat nakusaa-kusak ɛ,

ye tok nɛ sa wat di nɛ ghwyil ɛwa ndje tɔ kwyɛl di pak bis nɛ Zɛɛb ɛ.

Zɛɛb naalyaal mena kwyɛl tak kɔ ɛsu ɛ Yezu Klisto Ghɛŋ'enaka.