1 Mɛ eedhis bin kɛl'ena Febe, mot-mɛsa ɛ Zɛɛb tɔ zɛɛga mendjaala mɛ ghaada Sɛɛkele✝. 2 É sok nyɛ aakum penek ɛ, beka nyɛ ɛnyɔɛpe nɛ din ɛ Ghɛŋ, tyee bot ɛ zedum koŋ nɛ Zɛɛb ɔ di egoka nɛ ɛsa ɛ. Kwyeeka nyɛ tɔ etɛp djas ee nyɛ aadi nɛ gwyes mɛkwyeea ɛ, etɛɛ náá, nyɛ naakwyee mbula bot dɔɔ nɛ mam pe.

3 Swoska Pilisil nɛ ngom Akilas, bot ɛ bis nɛ bɛnɔɔ di esa mɛsa mɛ Yezu Klisto sama ɔ✝. 4 Bɛ naaka bet étɛp ɛtsik ɛ mɛ. Mɛ eedyeebaghaapɛɛ bɛ, ye tok mam nɛ mam, yɛ ɛ́ dɔɔ nɛ bot ɛ ezɛɛga mendjaala djas di ààbɛ bot ɛ mbyak eYuda ɔ eebaaghaapɛɛ bɛ. 5 Swoska dɔɔ nɛ bot ɛ zɛɛga mendjaala di esɛɛga pɛ yɔbɔ ɛ. Swoska mɔn-nyaagam Efayinɛt mɛ di ekwyɛl ɔ, nyɛ nadi ɛ́ mot mɛkɛn nakan ɛdum ɛ koŋ nɛ Yezu Klisto pɛ tɔ kyee dik Azi ɔ. 6 Swoska Maali, mot nadyeebawa lyem tɔ mɛsa étɛp'en ɔ. 7 Swoska pe Andolonikus bɛ nɛ Zunyas bot ɛ mɛbyel mam, bot ɛ bis nɛ bɛnɔɔ nadi tɔ membok ɔ. Bɔɔ djas bɛbá ɛ́ bot ɛ lwoma ee bot di edjɛ duu ɛbuɛpe ɔ. Yɛ ɛ́ bɔɔ ɛ naleedum koŋ nɛ Yezu Klisto ɛsok nɛ nam.

8 Swoska Apilyatus mɔn-nyaagam mɛ di ekwyɛl tɔ ɛsa mɛsa mɛ Ghɛŋ ɔ. 9 Swoska Ulbɛ, mot bis nɛ bɛnɔɔ di esa mɛsa mɛ Yezu Klisto sama ɔ, dɔɔ nɛ Sitasis mɔn-nyaagam mɛ di ekwyɛl ɔ. 10 Swoska Apɛlɛs, mot nalyaal bot popoopwon náá, nyɛ eezedum koŋ'ɛ nɛ Klisto ɔ. Swoska bot ɛ mɛbyel mɛ ndjaŋ ɛ Alistobul. 11 Swoska Eelodiyɔn, mot mɛbyel mam. Baaswoska dɔɔ nɛ bot ɛ ndjaŋ ɛ Naasis di edum koŋ nɛ Ghɛŋ ɔ. 12 Swoska Tiilifɛn bɛ nɛ Tiilifɔɔz, boa di esa mɛsa mɛ Ghɛŋ ɔ, baaswoska Pɛɛsid kɛl'am mɛ di ekwyɛl ɛbuɛpe ɔ, nyɛ naadyeebawa lyem ɛlyelɛpe tɔ mɛsa mɛ Ghɛŋ. 13 Swoska Lufus✝, mot-mɛsa ɛ Ghɛŋ nasɛ́ɛ ɔ. Baaswoska dɔɔ nɛ nyɛɛg, mot mɛ di ebee nyɛ dáa nyaagam ɔ. 14 Swoska pe Asɛɛkilit, nɛ Felegɔn, nɛ Ɛɛlmɛs, nɛ Patolobas, nɛ Ɛɛlmas, zɛnɔɔ bɔn-nyɛɛg bɔɔ djas bot ɛ zedum koŋ nɛ Zɛɛb di sama nɛ nɔɔ ɔ. 15 Baaswoska dɔɔ nɛ Filolɔɔg bɛ nɛ Zuli, nɛ Nɛɛlɛ bɛ nɛ kɛl, swoska Olɛɛpas, zɛnɔɔ bot djas zedum koŋ nɛ Zɛɛb di sama nɛ nɔɔ ɔ. 16 Swoselka pak'en nɛ mɛbeedela dáa bɔn-nyɛɛg tɔ ɛdum ɛ koŋ nɛ Zɛɛb di esa ɛ. Bot ɛ ezɛɛga mendjaala ɛ Klisto djas eeswos bin.

17 Mɛ ɛpedjaala nɛ nen bɔn-nyɛɛg, bi ɛ́ kobaka nɛ bot djas di ewa mbɛk nɛ ɛzɛm tɔ sama bot ɛ zedum koŋ nɛ Zɛɛb ɔ, bot ɛ di esaa náá, bi liig Zɛɛb koŋ nɛ ɛbyen ɛ́ mɛdjek mɛ bi nadjek ɛ. Dika ɛtsetaɛpe nɛ nɔɔ, 18 etɛɛ náá, mbi binɔk bot ààsa mɛsa mɛ Klisto Ghɛŋ'enaka. Tin, bɛ sa mɛsa ɛ́ étɛp emɔ bɔɔ met! Mbɛɛ mɛkpa mɔɔ, nɛ elɛŋ e mɛkɔŋ mɔɔ, yɛ ɛ́ étɛp ɛkɔɔ bot ɛ di ààtselal ɔ. 19 Bot djas nɛ gu ɛlooba ɛ len nɛ Ghɛŋ. Mɛ nɛ myaala étɛp'en, tin, mɛ ɛpekwyɛl náá bi di bɛtsoŋ ɛ bot étɛp ɛsa enɛm esa, esa e dɛɛ, ààbɛ esa e ɛbiyo. 20 Zɛɛb, mot di ɛsuk ɛ egwyem ɔ, nyɛ moo aanyal Satan si mɛko men.

Beta náá, enɛm nɛ embɛɛ Ghɛŋ'enaka Yezu di nɛ nen!

21 Timote mot bis nɛ nɛ di esa mɛsa ɔ eeswos bin, dɔɔ nɛ Lusyus, nɛ Zasɔn zɛnɔɔ Sosipatɛɛd bot ɛ mɛbyel mam.

22 Yɛ ɛ́ mam, Tɛɛtyus ɛ di ekwyal bin mɛkana mak, mɛ eeswos bin nɛ din ɛ Ghɛŋ, mot di esa náá, mena dika tɔ ɛgwakel ɔ.

23 Ghayus, mot mɛ sulal pɛ daa lɛ ɔ eeswos bin. Yɛ ɛ́ pɛ daa lɛ ɛ bot djas di esɛɛga é mendjaala. Eelast mot di enɔɔ epata tɔ ghaada bɛ nɛ mɔn-nyɛɛg'ena Kaltus ɔ eeswos bin✝.

[24 Beta náá, enɛm nɛ embɛɛ e Ghɛŋ'enaka Yezu Klisto di nɛ biyɔ djas. Amɛn.]

25 Djhoobulalka bhɔɔ nɛ Zɛɛb, mot di nɛ ghwyil ɛdjɛ bin mɛghaaz, étɛp bi needi ghiŋ tɔ ɛdum ɛ koŋ ɛ len, dáa mɛ di egoola bin tɔ Mbɛɛ Bhaadal kɔ ɛsu ɛ Yezu Klisto ɛ. É ghɛŋ sok, Zɛɛb nabɛ ɛ́ ààtel bot ɛkwosak ɛ lɛ, nyɛ naasyel yɛ. 26 Nenak yak, nyɛ eetel yɛ popoopwon tɔ bɛmɛkana mɛ bɛngoolel ɛ mɛkpa dáa Zɛɛb na kɔm-kɔm nalɛɛ ɛ. Tin, bot ɛ membyak djas eegwak mɛkpa menek, étɛp bɛ needum koŋ nɛ nɛ, nɛ ɛlooba nɛ nɛ.

27 Djhoodjɛka duu nɛ Zɛɛb nɛ din ɛ Yezu Klisto, nyɛy mot di kɔm-kɔm sii nɛ kɔm ɔ, Amɛn!