1 Yezu eezɛke nɛ nɔɔ náá: «Sa mot ààbem ba. Dumka koŋ nɛ Zɛɛb, da bi ɛ́ baadum koŋ nɛ nam. 2 Mɛdhɛŋ nɛ bu tɔ ndjaa Saagam. Yɛ ɛpedi ɛ́, ààbɛ tak ɔɔ, pe mɛ eelɛɛ bin. Yɛ ɛ́ étɛp tak ɛ mɛ di etɔ́, étɛp ɛkɛkoobal bin di bi aakɛdi ɛ. 3 Tin, bhii mɛ aatɔ́ kɛkoobal bin di ɛ, mɛ aakazyɛ zɛsaa bin étɛp bi needi é ngwoob’am. Yɛ ɛ́ deenek ɛ́ bi aadi é di mam aadi ɔ. 4 Bi nɛ gu ze di edul bot pɛ pak mɛ di ɛ.»

5 Tin, Toma eezɛke nɛ nɛ náá: «Ghɛŋ, bis ààgu pɛ pak wɔ di tɔ́ ɛ. Haaa bis aagu ze dáa?» 6 Yezu eezɛbɔɔza nɛ nɛ náá: «Yɛ ɛ́ mam ɛ di ze, mɛ ɛ́ etsɛɛtsɛ, mam ɛ́ di tsik. Mot tok nɛ ghwyil ɛtɔ́ pɛ daa Saagam, nyɛ di ààdhaa pɛ daa lam ɔɔ. 7 Dáa ye di náá, bi nɛ gu mɛ ɛ, bi nɛ baagu pe Saagam. Deenek, di mena kadi nenak’aak, bi nɛ gu nyɛ etɛɛ náá, bi eebee nyɛ.»

8 Tin, Filip eezɛke nɛ nɛ náá: «Ghɛŋ! Lyaala bis Soog, deenek, elyem ɛ́ waasila bis.» 9 É di’enek, Yezu eezɛbɔɔza náá: «Mena eezebɔya mɛlu ɛbuɛpe é di wat, wɔ dinaa ààpagu mɛ, Filip? Mot bee mɛ ɔ, nyɛ eezebee Saagam. Étɛp yé wɔ di baake náá: "Lyaala bis Soog"? 10 Wɔ ààmyaal náá, mɛ ɛ́ pɛ tɔ Saagam, dáa Saagam ɛ́ baadi pɛ tɔ lam ɛ? Etɛp ee mɛ di elɛɛ nɛ biyɔ djas’aak, yɛ ààdus pɛ daa lam, yɛ ɛ́ Saagam, mot di tɔ lam ɔ, di esa náá, esesɛɛ binek djas sael. 11 Myaalka mɛ é sok mɛ di eke náá, mɛ ɛ́ tɔ Saagam, Saagam ɛ́ pɛ tɔ lam pe ɛ. Yɛ bɛ náá, bi ààmyaal ɔɔ, zomyaalka, etɛɛ náá, bi ɛpebee endem e mɛbwala mam.

12 Mɛ lɛɛ bin ɛ, yɛ ɛ́ tsɛɛtsɛ náá, mot ɛ dum koŋ’ɛ nɛ nam ɔɔ, nyɛ waasa endem e mɛbwala. Nyɛ waasa eboo endem e mɛbwala dhaa tyɛ, etɛɛ náá, mɛ ɛpetɔ́ pɛ daa Saagam. 13 Tin, mɛ waasa esa djas yii bi aawaab nɛ din ɛ lam ɛ. Etɛɛ náá, Mɔn neelyaal bot duu ɛ Sɛɛg. 14 Bi ɛ́ waab sonok nɛ din ɛ lam ɔɔ, mɛ waasa sa tak.»

15 «Yɛ bɛ náá, bi nɛ kwyɛl mɛ ɔɔ, kɛka dáa mɛtiŋ mam di elyaal ɛ. 16 Mɛ waawaab nɛ Saagam nyɛ dhis bin Mot-Mɛghɛm, étɛp nyɛ neezɛkɛm bin, etɛɛ náá, nyɛ needi sama wat nɛ nen kɔm-kɔm. 17 Mot tak ɛ́ Sisim e etsɛɛtsɛ. Tinaak, bot ɛ bɔs’ak aanàkwaabela Sisim tak. Etɛɛ náá, bɛ tok nɛ ghwyil ɛbee nyɛ, bɛ tok nɛ ghwyil ɛgu nyɛ. Yɛ kabɛ biyɔ ɔɔ, bi ɛ́ waagu nyɛ etɛɛ náá, nyɛ ɛ́ nɛ nen sama, nyɛ ɛ́ tɔ len.

18 Mɛ aanàkwaalik bin biyɔ bɛmet tyee bɔn nyel. Mɛ waabula pɛ daa len. 19 Ye kalik ɛ́ batsa etɛɛ náá, bot ɛ bɔs’ak needi ààbaabee mɛ. Yɛ kabɛ biyɔ ɔɔ, bi ɛ́ waabebee mɛ. Etɛɛ náá, mɛ ɛ́ nɛ tsik, dɔɔ nɛ biyɔ pe, bi ɛ́ waadi nɛ tsik. 20 Dwoo tak bi ɛ́ waagu ɛnyɔɛpe náá, bis nɛ Saagam ɛ́ mot ngɔt. Dáa biyɔ baadi mot ngɔt nɛ nam ɛ, mam ɛ́ mot ngɔt nɛ nen.

21 Mot di emɛt mɛtiŋ mam, da nyɛ ɛ́ kɛ dáa ɛkwosak ɛ tak di elɛɛ ɛ, mot di ekwyɛl mam ɛ́ yenɔk. Saagam aakwyɛl nyɛ, mam pe, mɛ waakwyɛl nyɛ. Mɛ waatel nyɛ nyel’am.»

22 Zuud, ààkabɛ Yudas Iskaliɔt, zokazɛke nɛ nɛ náá: «Ghɛŋ, étɛp yé wɔ aalyaal bis nyel’ɔ, da wɔ ɛ́ kadi ɛ́, ààlyaal bot ɛ bɔs di ààmyaal wɔ ɔ?» 23 Tin, Yezu eezɛbɔɔza nɛ nɛ náá: «Mot di ekwyɛl mɛ ɔ, nyɛ waakɛ dáa mɛ di elɛɛ ɛ. Tin, Saagam ɛ́ waakwyɛl nyɛ. Bis nɛ Saagam ɛ́ waazyɛ pɛ daa lɛ, bis aadi nɛ nɛ sama. 24 Mot di ààkwyɛl mɛ ɔ, nyɛ ààkɛ dáa mɛkpa mam di elɛɛ ɛ. Bela náá, etɛp ee mɛ di elii nɛ nen ɛ ààdus pɛ daa lam, ye dus ɛ́ pɛ daa Saagam, mot nadhis mɛ ɔ. 25 Mɛ bɛ ɛ́, mɛ eelɛɛ bin etɛp binek, é sok mena dika é di wat ɛ. 26 Mot-Mɛghɛm aazyɛ. Yɛ ɛ́ nyɛ ɛ di Sisim na Dɛɛ Saagam aadhis nɛ din ɛ lam ɛ, étɛp nyɛ neelyaal bin esonok djas. Nyɛ waasa náá, bi siiza etɛp djas mɛ nadi elelɛɛ bin ɛ.

27 Mɛ lik bin ɛ́ egwyem. Yɛ ɛ́ egwyem bam ɛ mɛ di edjɛ bin. Mam ààpadjɛ bin yɛ dáa bot ɛ bɔs’ak di djɛ ɛ. Sa mot ààbem ba. Sa mot ààdi nɛ bwoo. 28 Bi eegwak dáa mɛ ke náá: "Mɛ ɛpetɔ́, tin, mɛ waabula pak’en". Bi ɛ kwyɛl mɛ ɔɔ, bi ɛ́ waadi tɔ mɛmyaala étɛp mɛ ke náá, mɛ ɛpetɔ́ pɛ daa Saagam ɛ. Etɛɛ náá, Saagam eedhaa mɛ boo dhaŋak. 29 Mɛ eelɛɛ bin yɛ nenak, ɛsok nɛ esesɛɛ bak djas nɛ sael. É sok esonok binek djas aazyɛ ɛ, bi ɛ́ waadum koŋ nɛ nam. 30 Mɛ aanàkwaabaalii ɛbuɛpe nɛ nen etɛɛ náá, mɛkoozi mɛ bɔs’ak moo aazyɛ. Nyɛ tok nɛ ghwyil ɛsa mɛ dhiiti sonok. 31 Tin, ye goka ɛ́ náá, bot ɛ bɔs’ak gu náá, mɛ nɛ kwyɛl Saagam. Deenek, mɛ sa mɛsa mam ɛ, dáa Saagam nalwom mɛ náá, mɛ sa ɛ. Wyɛlka. Djhooduska wak.»