1 Tɔ sama eFalizyɛ, ye nabɛ ɛ́ nɛ dhiiti mot, din ɛ lɛ nabɛ ɛ́ Nikodhɛm. Nyɛ nadi ɛ́, ngɔt pɛ tɔ ekukuma eYuda. 2 Wɔ gwaa, nyɛ zokazɛzyɛ pɛ daa Yezu é pum. Nyɛ eezɛke nɛ nɛ náá: «Labhi, bis nɛ gu náá, Zɛɛb ɛ́ nadhis wɔ pɛ daa les, étɛp wɔ neezɛlyo bis. Etɛɛ náá, mot tok nɛ ghwyil ɛsa endem e mɛbwala mɛ wɔ di esa yenek, yɛ di ààbɛ náá, Zɛɛb ɛ nɛ nɛ sama ɔɔ.» 3 Yezu eezɛbɔɔza nɛ nɛ náá: «Tsɛɛtsɛ nɛ tsɛɛtsɛ, mɛ lɛɛ wɔ ɛ́ náá: Mot ɛ di ààbyel-byelak na bes ɔɔ, nyɛ aanàkwaabee Ɛyoŋ ɛ Zɛɛb.» 4 Nikodhɛm eezɛke nɛ nɛ náá: «Mot aabaabyel-byelak na bes dáa, mot moo yɛ tɔa-mot? Nyɛ ɛ́ nɛ ghwyil ɛbaani tɔ mɔ nyɛɛg, da nyɛ ɛ́ baabyel-byelak sis é?» 5 Yezu eezɛbɔɔza náá: «Tsɛɛtsɛ nɛ tsɛɛtsɛ, mɛ lɛɛ wɔ ɛ́ náá, mot ɛ di ààbyel byela mɛdii nɛ Sisim na Dɛɛ ɔɔ, nyɛ aanàkwaani tɔ Ɛyoŋ ɛ Zɛɛb. 6 Mot ɛ byel-byelak tɔ epuud ɔɔ, nyɛ ɛ́ mot epuud. Mot ɛ byel-byelak tɔ Sisim na Dɛɛ ɔɔ, nyɛ ɛ́ mot sisim. 7 Nàdjoka, etɛɛ náá, mɛ eeke nɛ nɔ náá: "Bi goka ɛ́ nɛ ɛbyel ɛ́, byela na bes." 8 Pup kɛ ɛ́ é ze nyɛ di ekwyɛl ɛ. Tin, wɔy ɛpegwak ghuula tak. Deenek, kabela ɛ́ náá, wɔ ààgu pɛ yɛ di edus ɛ, nɛ pɛ yɛ di etɔ́ ɛ. Yɛ ɛ́ tyee wat nɛ bot ɛ zebyel tɔ Sisim Zɛɛb ɔ.»

9 Nikodhɛm eezɛke nɛ nɛ náá: «Yenek aasael dáa?» 10 Yezu eezɛbɔɔza nɛ nɛ náá: «Wɔy ɛ́ boo lyoel kɔ Yisalaɛl. Wɔ ààgu etɛp binek é? 11 Tsɛɛtsɛ nɛ tsɛɛtsɛ, mɛ lɛɛ wɔ ɛ́ náá, bis dyeebalɛɛ ɛ́ etɛp ee bis di egu ɛ. Bis baŋa bot ɛ́ etɛp ee bis nabee nɛ mis mes ɛ. Tin, biyɔ, bi ààmyaal etɛp ee bis di elɛɛ bin ɛ. 12 Bi ɛ di ààmyaal mɛ, é sok mɛ di elyo bin etɛp e bɔs ɔɔ, haaa bi aamyaal dáa, yɛ bɛ náá, mɛ moo lɛɛ bin etɛp ee di tɔ gwoo ɔɔ? 13 Ye tok nɛ mot zebyet ni tɔ gwoo, yɛ di ààbɛ mot nadus tɔ gwoo ɔɔ, mot tak ɛ́, Sɛɛŋɛlɛ Mɔn Mot. 14 Yɛ ɛ́ deenek ɛ, dáa Moiiz nadi nyɛ dinaa tɔ kyee bɔs bɛsyɛ di ààbɛ nɛ mɛdii ɛ, nyɛ naatsel nyɔ é le*. Tyee wat, ye goka ɛ́ náá, Sɛɛŋɛlɛ Mɔn Mot tselaa é le. 15 Etɛɛ náá, yɛ ɛ́ deenek ɛ́ mot kwaadum koŋ nɛ nɛ ɔ, nyɛ aabela tsik na kɔm-kɔm.

16 Zɛɛb naadyeebakwyɛl bot kɔ bɔs, étɛp tak ɛ nyɛ ɛ́ nadhis sim Mɔn’ɛ met. Etɛɛ náá, mot aadum koŋ nɛ nɛ ɔ, needi ààgwyɛ, nyɛ neebela tsik na kɔm-kɔm. 17 Etɛɛ náá, Zɛɛb nabɛ ɛ́ ààdhis Mɔn’ɛ kɔ bɔs étɛp ɛpɛ́ɛ bot. Nyɛ nadhis Mɔn’ɛ étɛp bot ɛ bɔs neebela tsik kɔ ɛsu ɛ lɛ. 18 Mot aadum koŋ nɛ nɛ ɔ, yenɔk mot aanàkwaakwyeselaa ndjɛ sɔs. Tin, mot aadi ààdum koŋ nɛ nɛ ɔ, yenɔk eezelookwyeselaa ndjɛ sɔs, etɛɛ náá, nyɛ nabɛ ɛ́, nyɛ eepɛɛ ɛdum ɛ koŋ nɛ sim Mɔn ɛ Zɛɛb.

19 Beeka dáa Zɛɛb aapɛ́ɛ bot ɛ: Mɛkas naazyɛ kɔ bɔs, tin, bot ɛ bɔs kakwyɛl yɔbɔ ɛbuɛpe ɛ́ ghooghom dhaa mɛkas. Etɛɛ náá, bɛ nabɛ ɛ́ bot ɛ embee mɛsa. 20 Bot djas di esa embee mɛsa ɔ, bɛ ààkwyɛl mɛkas. Deenek, mot tak ààkwyɛl ɛtɔ́ pɛ gwyɛ di ɛ, etɛɛ náá nyɛ ɛpekaab náá, embee etɛp bɛ ɛzɛkɛnyen na "ngbɛlɛlɛ" é mis mɛ bot. 21 Tin, mot di ekɛ dáa etsɛɛtsɛ di elɛɛ ɛ, nyɛ ɛpetiila tɔ ngel gwyɛ, étɛp mɛsa mɛ nyɛ di esa sama nɛ Zɛɛb ɛ, neenyen popoopwon é mis mɛ bot djas.»

22 Bhii tak, Yezu eezɛtɔ́ pɛ kyee dik Yude bɛ nɛ bɛdjekel bɛ. Bɛ eezɛbe di penek, tin, nyɛ nadi eduu bot Zɛɛb. 23 É ghɛŋ tak, pɛ dɛl Enɔn é ngwoob dɛl Salim, Zaŋ nabaadi pe ɛ́, eduu bot Zɛɛb penek etɛɛ náá, pɛ kyee dik tak nabɛ ɛ́ nɛ mɛdhii ɛbuɛpe. Tin, bot ɛbuɛpe nadi ezezyɛ, zɛduwa Zɛɛb. 24 Etɛp binek djas nasael ɛ́, Zaŋ dinaa ààkɔɔlaa é mbok.

25 Tin, bɛdhiiti bɛdjekel ɛ Zaŋ nadi ebe mɛso bɛ nɛ dhiiti mot mbyak eYuda. Mot tak nadi elii ɛ́ dum nɛ dáa mot di egoka nɛ ɛsa étɛp nyɛ needis edhuud, da bula dɛɛ é mis ɛ Zɛɛb ɛ. 26 Wɔ gwaa bɛ zokazyɛ pɛ daa Zaŋ, bɛ eezɛke nɛ nɛ náá: «Labhi, é sok mena nadika pɛ yii kyiid dii Yuldɛn ɛ, ye nabɛ ɛ́, wɔ naalii nɛ nes kɔ ɛsu ɛ mot ngɔt. Beea! Mot tak ɛpeduu bot Zɛɛb, deenek bot djas katɔ́ ɛ penek pɛ daa lɛ.»

27 Zaŋ eezɛbɔɔza nɛ nɔɔ náá: «Dhiiti mot tok nɛ ghwyil ɛbela duu sis, bhis yii Zɛɛb zedjɛ nyɛ ɛ. 28 Biyɔ bɛmet nadi ɛ́ tak, esok mɛ nalɛɛ náá: "Mɛ tok Mɛsia ɛ. Mam ɛ́ mot Zɛɛb nanyɛl ɛdhis ɛsok nɛ nɛ ɔ." 29 Mot di nakuma moma ɛba ɔ, yɛ ngom. Tin, mɔɔ sɔ mot ba moma ɔ, nyɛ ɛ́ é ngwoob’ɛ étɛp nyɛ neegwak nyɛ. Nyɛ ɛ́ tɔ mɛmyaala ɛbuɛpe dáa nyɛ gwak gwood motom ba ɔ. Tyee wat mɛmyaala menek ɛ mɛ mɛmyaala mam. Mɛmyaala mɛ tak eebela ɛsuk. 30 Ye goka ɛ́ náá, duma ɛ Yezu byet, ɛbyet nɛ ɛbyet, da yam ɛ́ sila.

31 Mot dus pɛ ɛko ɔ, nyɛ eedhaa bot djas. Mot di kɔ bɔs ɛ, nyɛ ɛ́ mot bɔs, nyɛ lii ɛ́, etɛp e bɔs. Deenek, mot dus pɛ ɛko ɔ, nyɛ eedhaa bot djas. 32 Nyɛ nɛ dyeebalɛɛ bot esesɛɛ ee nyɛ di ebee ɛ, nɛ yii nyɛ di egwak ɛ. Tin, bot ààkwyɛl ɛmyaal etɛp ee nyɛ di elii nɛ nɔɔ ɛ. 33 Mot di myaal etɛp ee nyɛ di elɛɛ ɛ, baamyaal ɛ́ náá, yɛ ɛ́ tsɛɛtsɛ náá, Zɛɛb lɛɛ ɛ́ etsɛɛtsɛ. 34 Mot Zɛɛb lwom ɔ, dyeebalii ɛ etɛp e Zɛɛb. Etɛɛ náá, Zɛɛb naadjɛ nyɛ ghwyil Sisim na Dɛɛ djas.

35 Sɛɛg nɛ kwyɛl Mɔn. Étɛp tak ɛ nyɛ nadjɛ nyɛ eghɛŋ nɛ ghwyil kɔ esonok djas. 36 Mot ɛ dum koŋ nɛ Mɔn ɔ, yenɔk ɛ́ waabela tsik na kɔm-kɔm. Tin, mot di ààdum koŋ nɛ Mɔn ɔ, yenɔk aanàkwaabela tsik na kɔm-kɔm. Deenek, ɛbuk ɛ Zɛɛb ɛ́ pɛ kɔ lɛ.»