1 Bhii tak, Yezu eezɛdjaad kɔ kyee dik Ghalile. Nyɛ nabɛ ɛ́ ààkwyɛl ɛgyee pɛ kyee dik Yude, etɛɛ náá, bot ɛ dik eYuda nadi ekwyɛl ɛgó ɛ nyɛ. 2 Ghuna mɛlu mɛ ɛbyoŋ ɛ eYuda nadi edjóoaa ɛbyoŋ ɛ Epɛt* ɛ, nabɛ ɛ́ yɛ eezekunaa. 3 Tin, bɔn-nyɛɛg ɛ Yezu eezɛke nɛ nɛ náá: «Dusa wak, da wɔ ɛ́ tɔ́ pɛ kyee dik Yude etɛɛ náá, bɛdjekel bɔ neebee mɛsa mɛ wɔ di esa ɛ. 4 Mot ɛ kwyɛl nyɛ neeguaa ɔɔ, nyɛ aanàkwaasa mɛsa mɛ sɔ. Dáa ye di náá, wɔ ɛpesa eboo etɛp ɛ, wɔ goka ɛ́ wɔ lyaal nyel é mis mɛ bot ɛ bɔs.» 5 Bɛ nadi elii deenek ɛ́ etɛɛ náá, bɔn-nyɛɛg bɛ met nabɛ ɛ́ ààdi dum koŋ nɛ nɛ.

6 Yezu eebɔɔza nɛ nɔɔ náá: «Yam ɛwala dinaa ààpadjala, yɛ kabɛ biyɔ ɔɔ, mɛwala djas ɛ́, ɛnyɔɛpe nɛ nen. 7 Biyɔ, bot ɛ bɔs’ak tok nɛ ghwyil ɛbhina bin. Yɛ kabɛ mam ɔɔ, bot ɛpebhina mɛ. Etɛɛ náá, mɛ ɛpelɛɛ bot náá, mɛsa mɛ bɛ di esa ɛ, yɛ àànyɔ. 8 Biyɔ, bi ɛ́ nɛ ghwyil ɛtɔ́ kɛbɔl ɛbyoŋ. Yɛ kabɛ mam ɔɔ, é ɛwala ɛlak, mam aanàkwaatɔ́. Etɛɛ náá, tɛtɛ ɛwala mɛ di egoka nɛ ɛtɔ́ ɛ dinaa ààpakum.» 9 Bhii nyɛ nazelii nɛ nɔɔ deenek ɛ́, nyɛ eezɛlik yɛ pɛ Ghalile.

10 Tin, dáa nabela náá, bɔn-nyɛɛg nabɛ ɛ́, bɛ eezetɔ́ pɛ ɛbyoŋ ɛ, wɔ gwaa Yezu zɛtɔ́ yɛ pe pɛ ɛbyoŋ ɛ tak tyee syaab, bot ààgu.

11 Tin, tɔ ɛbyoŋ, eYuda moo tin esaa nyɛ. Bɔɔ náá: «Nyɛ ɛ́ wo?» 12 Tɔ mɛdhuu mɛ bot ɛ nadi tin ɔ, ye nabɛ ɛ́ nɛ bot ɛ nadi elii kɔ ɛsu ɛ lɛ ɔ. Bak bot náá: «Nyɛ ɛ́ mbɛɛ mot.» Bɛdhiiti náá: «Nyɛ ɛpeful bot elo nɛ mɛlyo mɛ.» 13 Tin, bot nabɛ ɛ́ ààdi elii kɔ ɛsu ɛ lɛ é mis mɛ bot, etɛɛ náá, bɛ nadi ekaab ekukuma eYuda.

14 Dáa ɛbyoŋ nabɛ é moo kuku tak ɛ, Yezu eezɛtɔ́ tɔ kok Ndjaa-ebuwa, é di’enek, nyɛ moo tin elyo bot. 15 Tin, eYuda moo djoka. Bɔɔ náá: «Nyɛ gu Ekwyala e Zɛɛb dáa, nyɛy ààbɛ náá, nyɛ naakɛdjek mɛdjek?» 16 Tin, Yezu eezɛbɔɔza nɛ nɔɔ náá: «Ye tok mam nakus mɛlyo mɛ mɛ di elyo’aak. Yɛ ɛ́ mot nadhis mɛ ɔ di nakuma tak. 17 Mot di nɛ lyem ɛsa mɛsa mɛ Zɛɛb ɔ, nyɛ waagu náá, mɛlyo mam ɛ́ yii Zɛɛb, nyɛ waabaagu nɛghu mɛlyo mɛ tak dus ɛ́ pɛ daa lam. 18 Mot ɛ di elii dum nɛ nyel’ɛ met ɔɔ, nyɛ saŋ ɛ́ duu étɛp nyel’ɛ met. Tin, mot di esaa duu mot nadhis nyɛ ɔ, yenɔk lɛɛ ɛ́ etɛp e tsɛɛtsɛ, yenɔk mot tok nɛ etsal tɔ lɛ. 19 Moiiz nabɛ ɛ́ ààdjɛ bin etsi? Tin, ye tok nɛ mot ngɔt pak’en di ekɛ dáa etsi e tak di elɛɛ ɛ. Étɛp yé bi di ekwyɛl ɛgó ɛ mɛ?» 20 Mɛdhuu mɛ bot ɛ nadi tin ɔ zokazɛbɔɔza náá: «Wɔ ɛ́ nɛ mbee sisim tɔ lɔ! Ɛzɛ di esaŋ ɛgó ɛ wɔ?»

21 É di’enek, Yezu eezɛke nɛ nɔɔ náá: «Mɛ eesa ndem mɛbwala mɛ ngɔt wak, ye nabɛ ɛ́ biyɔ djas naadjoka. 22 Moiiz naadjɛ bin ze ɛniigal mengbaaz men beka. Nɛ tsɛɛtsɛ, ye tok náá, Moiiz ɛ́ nakus beka tak. Ye nadus ɛ́ pɛ daa bɛbhaab bin. Dɔɔ nɛ dwoo saba bi ɛpemyaal ɛniigal bot beka. 23 Bi sa deenek ɛ́, etɛɛ náá, etsi ɛ Moiiz ɛzɛkɛkat ɛduwalaa. Dwoo saba, bi ɛpeniigal mengbaaz men beka. Haaa étɛp yé bi di ebiyo nɛ nam etɛɛ náá, mɛ eetsik mot é dwoo saba? 24 Nàmwaapɛ́ɛka etɛp dáa biyɔ di ebee nɛ mis ɛ. Pɛ́ɛka dáa di egoka tɔ epiki ɛ.»

25 Bɛdhiiti bot pak bot ɛ ghaada Yeluzalɛm moo tin eke náá: «Mot’ak tok mot ekukuma bis di esaŋ ɛgó ɛ nyɛ ɔ? 26 Beeka, nyɛ ɛpelii é mis mɛ bot djas, ààbɛ nɛ mot lyak nyɛ. Ye kwyɛl ɛlɛɛ ɛ́ náá, ekukuma bina eemyaal náá, yɛ ɛ́ tsɛɛtsɛ náá, nyɛ ɛ́ Mɛsia? 27 Zobela náá, nwyak mot, bis nɛ gu pɛ nyɛ dus ɛ. Yɛ kabɛ, é ghɛŋ Mɛsia aazyɛ ɔ, ye tok mot aagu pɛ pak nyɛ aadus ɛ.»

28 É di’enek, dáa Yezu nadi elyo bot tɔ kok Ndjaa-ebuwa ɛ, nyɛ naazɛben gwood, ke náá: «Nɛ tsɛɛtsɛ bi nɛ gu mɛ, bi nɛ baagu pɛ kyee mɛ nadus ɛ. Tin guka náá, mɛ nabɛ ɛ́ ààzyɛ nɛ ɛkwosak ɛ lam met. Tin, mot nadhis mɛ ɔ, nyɛ ɛ́ mot etsɛɛtsɛ. Saabɛgɔs kabɛ ɛ́, bi ààgu nyɛ. 29 Mɛ nɛ gu nyɛ, etɛɛ náá, mɛ nadus ɛ́ pɛ daa lɛ. Nyɛ ɛ́ nadhis mɛ.»

30 Deenek, bot moo esaa mɛpek mɛ ɛmɛt ɛ Yezu. Tin, ye tok nɛ mot nàkomɛt nyɛ, etɛɛ náá, ɛwala ɛ nakoobelaa étɛp ɛmɛt ɛ nyɛ ɔ, nabɛ ɛ́, ye dinaa ààpakum. 31 Bot ɛbuɛpe tɔ mɛdhuu mɛ bot ɛ nadi tin ɔ, naadyeebadum koŋ nɛ nɛ. Bɔɔ náá: «É ghɛŋ Mɛsia aazyɛ ɛ, nyɛ waasa eboo endem mɛbwala dhaa mot’ak é?»

32 Wɔ gwaa, eFalizyɛ zokagwak dáa bot nadi elii pak’ɔɔ dum nɛ Yezu ɛ. Deenek, eboo bɛghaa-Zɛɛb nɛ eFalizyɛ eezɛkyeed esodja di ebaal kok Ndjaa-ebuwa ɔ, bɛ kɛmɛt nyɛ. 33 Tin, Yezu eezɛke nɛ nɔɔ náá: «Mɛ dinaa wak ɛ́ menabɛlka, ba bim bɔɔ mɛlu, bhii tak, da mɛ ɛ́ sik pɛ daa mot nadhis mɛ ɔ. 34 Bi ɛ́ waasaa mɛ, kabela ɛ́ náá, bi aanàkwaabela mɛ. Etɛɛ náá, bi tok nɛ ghwyil ɛzyɛ pɛ pak mɛ aadi ɛ.» 35 É di’enek, ekukuma eYuda moo tin edjinel pak’ɔɔ náá: «Nyɛ aatɔ́ paa? Pɛ di náá, mena aanàkwaabela nyɛ ɛ? Nyɛ aatɔ́ ɛ́ pɛ daa bot ɛ mbyak eYuda di é di wat nɛ bot ɛ mbyak eGhɛlɛk, étɛp ɛ́ baakɛlyo bot ɛ yiizaag mbyak é? 36 Ye kwyɛl ɛlɛɛ yé, mɛkpa mɛ nyɛ di eke náá: "Bi ɛ́ waasaa mɛ, kabela ɛ́ náá, bi aanàkwaabela mɛ. Bi tok nɛ ghwyil ɛtɔ́ pɛ kyee mɛ di tɔ́ ɛ?"»

37 Dwoo mɛsik mɛ ɛbyoŋ, dwoo nabɛ nɛ boo mɛtaŋ ɛ, Yezu tetel, wɔ gwaa nyɛ zokabaazɛben gwood, etuud náá: «Mot ɛ di nɛ gwyes mɛdii ɔɔ, nyɛ zyɛ pɛ daa lam, nyɛ neezɛdɛ mɛdii. 38 Mot ɛ dum koŋ nɛ nam ɔɔ, "mɛdhii mɛ di edjɛ tsik ɛ waawyis tɔ lyem’ɛ, da yɛ ɛ́ wo", dáa Ekwyala di elɛɛ ɛ*.»

39 Yezu nadi eke deenek ɛ́, étɛp Sisim Zɛɛb. Bot ɛ di edum koŋ nɛ Yezu ɔ waabela Sisim tak. Tin, ye nabɛ ɛ́ Sisim na Dɛɛ dinaa ààzyɛ. Etɛɛ náá, Yezu nabɛ ɛ́, nyɛ dinaa ààpasik tɔ gwoo étɛp ɛbela duu.

40 Dáa mɛdhuu mɛ bot nadi egwak etɛp binek ɛ, bɛ ɛ́ boozɛke náá: «Yɛ ɛ́ tsɛɛtsɛ náá, mot’ak ɛ́ ngoolel-Mɛkpa ɛ Zɛɛb!» 41 Bak bot náá: «Yɛ ɛ́ Mɛsia.» Bɛdhiiti kake ɛ́ tyee sis náá: «Mɛsia tok nɛ ghwyil ɛdus pɛ kyee dik Ghalile! 42 Tinaak, mena dyeebalaaka tɔ Ekwyala e Mɛkana ɛ Zɛɛb náá: "Mɛsia aadus ɛ́ tɔ bɔɔ bɛdha ɛ mɛkoozi Dhavid. Mɛsia aadus ɛ́ pɛ Bheteleɛm, dɛl ɛ Dhavid.*"» 43 Tin, kɔ ɛsu ɛ lɛ, ye nabɛ ɛ́ zyaala naani tɔ bot ɛbuɛpe. 44 Bɛdhiiti bot nadi ekwyɛl náá, bɛ mɛt nyɛ. Tin, ye tok nɛ mot namɛt nyɛ.

45 É di’enek, bot ɛ di ebaal kok Ndjaa-ebuwa ɔ, eezɛnɔɔ mɛnyel, sik pɛ pak eboo bɛghaa-Zɛɛb nɛ eFalizyɛ nadi ɛ. Dáa bɛ nakakum ɛ, ekukuma eezɛdji bɛmbaalel náá: «Bi di ààzyɛ nɛ nɛ étɛp yé?» 46 Bɛmbaalel binɔk eezɛbɔɔza náá: «Bis dinaa ààpabee mot di elii dáa mot yenɔk!» 47 EFalizyɛ eezɛbaalii nɛ bot binɔk náá: «Bis bee ɛ́ náá, biyɔ pe, bi eezemyaal mɛkɔŋ mɛ! 48 Yɛ ɛ́ nɛ dhiiti kukuma, nɛghu dhiiti Falizyɛ, di edum koŋ nɛ nɛ? 49 Etɛɛ náá, mɛdhuu mɛ bot ɛ di ààgu etsi ɛ Moiiz ɔ, yɛ ɛ́ bot ɛ zelekaa ɛbiyoɛpe ɔ!»

50 Nikodhɛm, mot nazyɛ ɛsok zɛbela Yezu é pum ɔ, nyɛ nadi ɛ́ ngɔt tɔ sama eFalizyɛ. Nyɛ eezɛke nɛ bɛsɔ náá: 51 «Etsi bina lɛɛ ɛ́ náá, mot ɛ nɛ ghwyil ɛmɛtaa, bot dinaa ààgwak taŋal’ɛ, bot dinaa ààgu, sa mot tak di esa ɛ?» 52 Tin, bɛ eezɛke nɛ nɛ náá: «Wɔy pe, wɔ ɛ́ mot Ghalile? Laŋa Ekwyala ɛnyɔɛpe. Wɔ aabee náá, Ngoolel-Mɛkpa ɛ Zɛɛb tok nɛ ghwyil ɛtuula, da dus pɛ Ghalile.»

[ 53 Bhii tak, mot nɛ mot eezɛsik pɛ ndjaŋ’ɛ.