1 Bhii tak Yezu eezɛbaŋa bɛ kana yak, étɛp ɛlyo bɛ dáa bɛ di egoka nɛ ɛdjaala mɛlu djas, ààbula bhis ɛ. 2 Nyɛ eezɛke náá: «Pɛ kɔ dhiiti ghaada wat, ye nabɛ ɛ́ nɛ dhiiti tetɛp ngɔt di náá, etɛp e Zɛɛb ààgwyak nyɛy ɔ. Nyɛ nadi ɛ́ ààkobem ba nɛ mot. 3 Kɔ dɛl ɛ tak, ye nabɛ ɛ́ nɛ dhiiti kus moma nadi epyap ɛzyɛ pɛ daa tetɛp tak étɛp zɛke nɛ nɛ náá: "Pɛ́ɛa mɛ tɛp mɛ di nɛ yɛ bis nɛ nwyak mot’aak," etɛɛ náá, nyɛ nadi egu náá, nyɛ ɛ́ nɛ gham. 4 É mɛkɛn, tetɛp nadi ebyen. Deenek nyɛ eezɛke tɔ lyem’ɛ náá: "Yɛ kobɛ náá, mɛ ààkaab Zɛɛb ɔɔ, yɛ kobaadi náá, mam ààbis bot ɔɔ, 5 dáa ye di náá, kus moma yak ɛpemyel mɛ ɛ, ye goka ɛ́ mɛ pɛ́ɛ tɛp’ɛ, étɛp nyɛ neekat ɛpyap ɛzyɛ wak."» 6 Bhii tak Ghɛŋ eezɛbaabil náá: «Gwakeka, dáa mbee tetɛp tak nalii ɛ. 7 Tin, Zɛɛb tok nɛ ghwyil ɛkwyee bot ɛ nyɛ nazesɛ́ɛ ɔ, bot ɛ tak ɛ di ewaab esonok pɛ daa lɛ mwos nɛ pum ɔɔ. Nyɛ aanàkwaakwyee bɛ? 8 Mɛ lɛɛ bin ɛ́ tsɛɛtsɛ náá: Nyɛ waalel ɛkwyee bɛ. Tin, é sok Sɛɛŋɛlɛ Mɔn Mot aazyɛ ɛ, nyɛ waazɛbela bot ɛ di edum koŋ nɛ Zɛɛb ɔ kɔ bɔs’ak é?»

9 Yezu eebaazɛlɛɛ kana kɔ ɛsu ɛ bot ɛ di ebun náá, bɛ ɛ́ bot ɛ epiki, da bɛ ɛ́ kadyamal bɔn-nyɛɛg bɔɔ ɔ. Nyɛ eezɛke nɛ nɔɔ náá: 10 «Bot ɛbá naazɛbyet pɛ kok Ndjaa-ebuwa étɛp ɛkɛdjaala, ngɔt nadi ɛ́ Falizyɛ, dhiiti kadi ɛ́ nɔŋel epata e lapo. 11 Falizyɛ eezɛtyaa é yɛ di, nyɛ moo edjaala náá: "Heee, Zɛɛb! Mɛ eeghaapɛɛ wɔ, etɛɛ náá, mɛ tok dáa bɛdhiiti bot. Bɛ ɛ́ bot ɛ djii, bɛmbee ɛ bot, bot ɛ mɛzɔ. Mɛ ɛpeduwal wɔ, etɛɛ náá, mɛ tok dáa nɔŋel epata e lapo di’aak. 12 Mam tsi edee etɛp mendjaala ɛ́ esok ebá tɔ yenga wat. Mɛ nɛ djɛ wɔ ndyaal wat tɔ endyaal kam e esa bam djas mɛ di ebela ɛ." 13 Nɔŋel epata e lapo natyaa yɛ ɛ́ ba ɛtsetaɛpe. Nyɛy ààben mis pɛ ɛko, nyɛ eekɛl mɛmbɔ kɔ lo. Nyɛy náá: "Iyeee, Zɛɛb, wɔy ààkogek mɛ ghoŋ é? Mam mot mesyem."» 14 Yezu ɛ́ boozɛke náá: «Nɔŋel epata e lapo nakasik ɛ́, Zɛɛb eezepel mesyem mɛ, ààbɛ Falizyɛ. Étɛp tak ɛ di náá, mot ɛ ghɛɛ nyel ɔɔ, Zɛɛb ɛ́ waasil nyɛ. Mot ɛ sila ɔɔ, Zɛɛb ɛ́ waaghɛɛ nyɛ.»

15 Bot naazyɛ nɛ bɔn tɔlɔɔ bɔɔ pɛ daa Yezu étɛp nyɛ neekɛl bɛ mɛmbɔ. Tyee bɛdjekel nakabee deenek ɛ́, bɛ naazɛbhɛm bɛ. 16 Tin, Yezu eezɛke náá, bɔɔ dhyeeb tiila pɛ nyɛ nadi ɛ́, nyɛy náá: «Betka bɔɔ dhyeeb bɛ zyɛ pɛ daa lam. Sa bi ààlu bɛ, etɛɛ náá, Ɛyoŋ ɛ Zɛɛb ɛ́ yii bot ɛ di dáa bɔɔ dhyeeb ɔ. 17 Tsɛɛtsɛ nɛ tsɛɛtsɛ, mɛ lɛɛ bin ɛ́ náá, mot ɛ di ààmyaal Ɛyoŋ ɛ Zɛɛb dáa mɔɔ dhyeeb ɔɔ, nyɛ aanàkwaani tɔ tak.»

18 Dhiiti kukuma eYuda ngɔt zokazɛdji Yezu náá: «Mbɛɛ Lyoel, mɛ goka nɛ ɛsa dáa étɛp mɛ neebela tsik na kɔm-kɔm?» 19 Yezu eezɛbɔɔza nɛ nɛ náá: «Étɛp yé wɔ di edjóo mɛ mbɛɛ lyoel? Ye tok nɛ mbɛɛ mot kɔ bɔs’ak bhii Zɛɛb nyɛy, nyɛ ɛmet. 20 Wɔ nɛ gu etsi djas: "Sa wɔ ààsa mɛzɔ, sa wɔ ààgó mot, sa wɔ ààdjii sa mot, sa wɔ ààlɛɛ elɛŋ e etsal dum nɛ sɔ’ɔ mot, duwala soog nɛ nyoog*."» 21 Mot’enɔk eezɛbɔɔza nɛ nɛ náá: «Mɛ nɛ duwal etsi binek djas kana edhɔma bam, kɛkum dwoo pan mos’ak.» 22 Bhii Yezu nagwak nyɛ ɛ, nyɛ eezɛke nɛ nɛ náá: «Ye zokalik ɛ́, wɔ sa sa wat: kɛbɔmsa esa bɔ djas, da wɔ ɛ́ nɔɔ epata e tak, djɛ bɛdjel ɛ bot, tin, wɔ waabela mɛvu tɔ gwoo. Bhii tak, da wɔ ɛ́ zɛdu mɛ.» 23 Dáa kum mot’enɔk nagwak deenek ɛ́, ye nabɛ ɛ́ mɛkpa menek naatek nyɛ nyel na wɔyɔŋ, etɛɛ náá, nyɛ nadi ɛ́, nɛ mɛvu ɛbuɛpe.

24 Dáa Yezu nabee náá, lyem mot ekum’enɔk naakpaŋ ɛ, nyɛ ɛ́ boozɛke náá: «Ɛkɔɔla nɛ bɛkum ɛ bot náá, bɛ ni tɔ Ɛyoŋ ɛ Zɛɛb! 25 Ɛkɔɔla náá, boo yaaga bal dhaa tɔ ba mɔɔ ɛlen ɛ dhɔɔ. Yɛ kabɛ bɛkum ɛ bot ɔɔ, ɛni ɛ lɔɔ tɔ Ɛyoŋ ɛ Zɛɛb eebaadhaa-dhaŋak ɛni ɛ boo yaaga bal tɔ ɛlen ɛ dhɔɔ nɛ mɛlyel.» 26 Bot ɛ́ nadi egwak nyɛ ɔ, moo tin eke pak’ɔɔ náá: «Yɛ bɛ deenek ɔɔ, ɛzɛ aabela tsik na kɔm-kɔm?» 27 Yezu eezɛbɔɔza nɛ nɔɔ náá: «Sa di náá, bot aanàkwaak ɛ, Zɛɛb aanàkwaakat yɛ.» 28 Wɔ gwaa, Pyɛɛd zɛke náá: «Gwyáka, bis eezebet djas étɛp ɛdu ɛ wɔ.» 29 Yezu ɛ́ boolɛɛ bɛ náá: «Tsɛɛtsɛ nɛ tsɛɛtsɛ, mɛ lɛɛ bin ɛ́ náá: Mot ɛ́ bet ɛbhis ɛ lɛ nɛghu myɛl, nɛghu bɔn-nyɛɛg, nɛghu sɛɛg nɛ nyɛɛg, nyɛ ɛ́ baabet bɔn bɛ, étɛp Ɛyoŋ ɛ Zɛɛb ɔɔ, 30 nyɛ waabela dhaa-dhaŋak é ɛwala ɛlak, dɔɔ nɛ é ɛwala di ezyɛ ɛ, nyɛ waabela tsik na kɔm-kɔm.»

31 Dhiiti dwoo, Yezu zokanɔɔ bɛdjekel kam nɛ bɛbá, nyɛy nɛ nɔɔ náá: «Gwakeka! Mena moo tɔ́ pɛ Yeluzalɛm. Penek ɛ́ pɛ etɛp djas ee bɛngoolel ɛ Mɛkpa ɛ Zɛɛb nazekwyal dum nɛ Sɛɛŋɛlɛ Mɔn Mot ɛ́ aadjala ɛ. 32 Nyɛ waakaaa é mɛmbɔ mɛ bot ɛ di ààbɛ bot ɛ́ mbyak eYuda ɔ. Bot binɔk aadek nyɛ, lee nyɛ, nɛ ɛsɛɛ nyɛ mɛtel é nyel. 33 Bɛ waanyuu nyɛ nɛ eghwyɛs. Bhii tak, bɛ waagó nyɛ. Mɛlu mɛlɛl bhii tak, nyɛ waagom.» 34 Tin, bɛdjekel kadi ɛ́, ààgu sa wat tɔ etɛp ee nyɛ nadi elɛɛ bɛ ɛ. Ye nadi nɛ nɔɔ ɛ́ syela. Bɛ nadi ɛ́, ààgu sa Yezu nalii ɛ.

35 Dáa Yezu nabɛ náá, bɛ moo ekunaa nɛ Yeliko ɛ, ghuna dhiiti mot na edhim nadi ɛ́ ndiindel é ngwoob gba. Nyɛ nadi ɛ́, mot engwyeebel. 36 Nyɛ eezɛgwak ɛtap ɛ zukamwaa nɛ mot ezyɛ pɛ kyee nyɛ nadi ɛ́, wɔ gwaa, nyɛ zɛdji sa nadi edhaŋ ɛ. 37 Bɛ eezɛlɛɛ nyɛ náá: «Yɛ ɛ́ Yezu, mot Nazalɛt ɛ di edhaa tin.» 38 Wɔ gwaa, nyɛ zɛtsim náá: «Yezu, Mɔn Dhavid, geka mɛ ghoŋ!» 39 Bɛtɛ nɛ bot ɛ nadi ekɛ pɛ sok ɔ moo tin ebhɛm nyɛ, nɛ ɛlyak nyɛ, étɛp nyɛ needi gwyem. Tin, wɔ gwaa nyɛ baazɛloogal gwood ɛlyelɛpe: «Mɔn ɛ Dhavid, geka mɛ ghoŋ!» 40 Yezu eezɛtyaa. Bhii tak, nyɛ eezɛlwom náá, bɛ zyɛ nyɛ nɛ nɛ. Dáa mot edhim yenɔk natiila pɛ Yezu nadi ɛ́, wɔ gwaa Yezu zɛdji nyɛ náá: 41 «Wɔ kwyɛl náá, mɛ sa wɔ yé?» Mot edhim yenɔk eezɛbɔɔza nɛ nɛ náá: «Ghɛŋ, mɛ kwyɛl ɛ́ náá, mis mam baabɛŋel!» 42 Yezu eezɛke nɛ nɛ: «Bɛɛa mis mɔ! Ɛmyaal ɛ lɔ eetsik wɔ.» 43 É di’enek wat, mis mɛ eezɛbɛŋel. Bhii tak, nyɛ moo edu Yezu é duwal Zɛɛb. Dáa ɛdhuu ɛ bot ɛ nadi tinaak ɔ djas nabee deenek ɛ́, bɔɔ djas naaduwal Zɛɛb.