1 Cãndu elu ma ishea dit templu, un di ucenitsilji a lui lj-dzãsi: "Nvitsãtore, vedz tsi chetri shi tsi adãrãturi!" 2 Sh-Isusul apãndisinda lj-dzãsi: "Li vedz aesti adãrãturi mãri? Nu va s-armãnã cheatrã pisti cheatrã ni dãrãmat."

3 Sh-dupã tsi elu eara apunat pri Muntili a Masnjilor nãintea a templui, Petrul, Iacovul, Ioanul shi Andrea lu ntribarã dinãparti: 4 "Dzã-nã, cãndu va s-facã aesti lucri sh-cai va s-hibã semnul a chirolu tsi tuti atseali lucri va si s-facã?" 5 Isusul apãndisinda a lor ahurhi s-dzãcã: "Bãgats mintea s-nu vã-arãdã vãrã. 6 Cã va yinã multsã pi numa a mea dzãcãnda: ‘Mini escu Hristolu.’ Sh-va si s-arãdã multsã oaminji. 7 Ma cãndu s-avdzãts si zburãscu di alumti sh-di hãbãri di alumti, nu vã tulburats, cã aesti lucri prindi si s-adarã, ma nu va s-hibã bitisita. 8 Va sã scoalã natsiunea contra a natsiuniljei, amirãriljea contra a amirãriljei, va s-facã tulburari pri multi locuri, va s-aibã foami di pãni sh-mintituri. Atseli lucri va s-hibã ahurhirea a durerilor di amintari. 9 Cãshtigats-vã ti bana a voastrã! Cã va vã prida la giudicãtorlji sh-va vã batã tu sinagogã. Va vã scoatã nãintea a guvernatorilor shi a amiradzlor trã itia a mea tsi s-mãrtirsits nãintea a lor. 10 Ma, ma nãinti prindi tsi s-hibã predicatã evanghelu la tuts oaminjlji. 11 Cãndu va vã ducã s-vã prida, s-nu avets gaile di ma nãinti trã atsea tsi prindi s-dzãtsets shi s-nu minduits tsiva. Dzãtsets tsi vã yini tu minti tu oara atsea, cã nu hits voi tsi grits ma easti Duhlu Sãmtu. 12 Fratili va prida fratilu a lui la moarti shi tatãl hiljilu, sh-hiljilji va sã scoalã contra a pãrintsãlor sh-va lji ducã tu moarti. 13 Voi va s-hits aurats di tuts trã itia a numãljei a mea, ma atsel tsi va s-aravdã pãnã tu soni, va s-hibã ascãpat."

14 "Sh-cãndu s-u videts urãciunea a-aspãrdzeariljei [tsi easti aspusã di prufitul Daniel], tsi sta aclo iu nu prindi s-eara [cai ghivãseashti s-aducheascã], atumtsea atselji tsi va s-hibã tu Iudea, s-fugã pri muntsã. 15 Atsel tsi easti pri citia a casãljei, s-nu dipunã, sh-nitsi s-intrã tu casã di loari tsiva di la casa-a lui. 16 Atsel tsi va s-hibã tu cãmpu, nu s-toarnã nãpoi di loari stranjilu a lui. 17 Tora cavai di muljerili sãrtsinati sh-atseali cu njitsi tu sinã, tu atseali dzãli. 18 Rugats-vã tsi fudzirea a voastrã s-nu hibã iarna. 19 Cã tu atsea dzuã va s-hibã unã munduiri mari, ma mari dit apãrnjita a adrariljei a Omlui tsi featsi Dumnidzãlu pãnã azã, sh-ahtari nu va s-aibã pute. 20 Macã Domnul nu va li-avea shcurtatã atseli dzãli, vãrã om nu va ascãpa, ma Domnul li shcurtã atseali dzãli trã itia a aleptsilor tsi elu lã aleapsi. 21 Atumtsea macã vãrã va vã-dzãcã: ‘Ia, Hristolu easti aoa’, icã: ‘Easti aclo’, nu lu pistipsits. 22 Cã va s-easã hristoshi arãdioshi sh-prufits arãdioshi tsi va s-facã seamni shi thavmati tsi s-arãdã, ma s-poatã sh-aleptsilji. 23 Ma voi bãgats minti! Ia, mini vã hãbãrsii ti itsido."

24 "Tu atseali dzãli, dupã munduirea atsea, soarili va si scutidiseascã sh-luna nu va s-da lunjina a ljei. 25 Stealili a tserlui va s-cadã sh-puterili di tu tseruri va s-trundueascã. 26 Atumtsea va lu veadã Hiljilu a Omlui yininda pri niori, cu puteari mari sh-mãriri. 27 Atumtsea elu va pitreacã anghilji a lui sh-va lji-adunã aleptsilji a lui dit patruli vimturi, dit mardzina a loclui pãnã tu mardzina a tserlui."

28 "Tora nvitsats nvitsãtura a hiclui: cãndu dedzili a lui s-muljeadzã shi scoatã frãndzi, voi shtits cã veara easti aproapi. 29 Ashã sh-voi, cãndu va videts cã ma s-facã aesti lucri, si shtits cã Hiljilu a Omlui easti aproapi, ningã ushã. 30 Dealihea ma vã dzãc: cã aestã gheneratã nu va s-treacã, pãnã cãndu tuti aesti va s-hibã adrati. 31 Tserlu sh-loclu va s-treacã, ma zboarili a meali nu va s-treacã."

32 "Cãt di atsea dzuã sh-di atsea oarã, vãrã nu shtii, nitsi anghilji dit tser, nitsi Hiljilu, ma mash Tatãl. 33 Bãgats minti, s-hits dishtiptats shi rugats-vã, cã nu shtits cãndu va s-hibã oara. 34 Easti ca un om tsi nchisinda ti cali, alasi casa a lui shi da autoritati a huzmichearilor a lui, cathiun tu loclu a lui, sh-portarlu lu urseashti s-hibã dishtiptat. 35 Trã atsea stats dishtiptat, cã nu shtits cãndu va s-yinã domnul ali casi, seara ma njeadzã-noapti, cãndu cãnti cucotlu, ama dimineatsa, 36 tsi turnãnda niashtiptat, s-nu vã aflã tu somnu. 37 Tora, aestã tsi vã dzãc a voauã, lã-u dzãc a tutulor: S-hits dishtiptat!"