1 Deapoea Isusul lã dzãsi a lor: "Dealihea vã-dzãc cã namisa di voi tsi hits aoa suntu niscãntsã tsi nu-va u gusteadzã moartea ma nãinti tsi s-veadã cã va yinã cu puteari amirãriljea al Dumnidzãu."

2 Dupã shasi dzãli Isusul lo cu nãsu Petrul, Iacovul sh-Ioanul sh-lji dusi dinãparti, singur atselji pri un munti analtu. Shi s-alãxi nãintea a lor. 3 Shi stranjili a lui si strãlutsirã shi s-featsirã albi ca neaua, ashã cum nu poati s-li alãgheascã vãrã alghitor pri loc. 4 Sh-a lor lã si fãniurisi Elia cu Moisiu tsi ma zbura cu Isusul. 5 Atumtsea lo zborlu Petrul sh-lji dzãsi al Isus: "Nvitsãtore, trã noi easti ghini s-him aoa, s-adrãm trei tendi, unã trã tini, unã trã Moisiu shi unã trã Elia!" 6 Elu nu-shtia tsi s-dzãtsea, cã elji eara aspãrats.

7 Deapoea vini un nior tsi lã anvãli cu aumbra a lui, sh-dit nior ishi unã boatsi tsi dzãsi: "Aestu easti Hiljilu a meu vrut! Ascultats-lu!" 8 Shi trãoarã elji vidzurã anvãrliga, ma nu vidzurã vãrã, dicãt singur Isusul cu nãshi. 9 Tora cãndu ma dipuna dit munti, Isusul lã-ordinã s-nu aspunã a vãrui lucrili tsi avea vidzut, pãnã-cãndu Hiljilu a-Omlui s-nyeadzã dit mortsã. 10 Elji lu tsãnurã zborlu shi ntriba un-alantu cã tsi va s-dzãtsea s-nyeadzã dit mortsã. 11 Deapoea lu ntribarã dzãcãnda: "Cãtse scriblji dzãc cã ma nãinti prindi s-yinã Elia?" 12 Sh-elu, apãndisinda, lã dzãsi a lor: "Elia dealihea prindi s-yinã ma nãinti shi s-adarã itsido. Ma ashã cum easti scriatã trã Hiljilu a-Omlui, elu prindi s-hibã munduit sh-s-dispretsuit. 13 Ma mini ma vã-dzãc cã Elia vini sh-cu nãsu featsirã tsi vrurã, ashã cum easti scriatã ti nãsu."

14 Cãndu s-turnã la ucenitsilji a lui, vidzu unã multsãmi mari anvãrliga di nãshi sh-niscãntsã scribi tsi ma si-ncãcea cu nãshi. 15 Shi dinãoarã tutã multsãmea, cãndu lu vidzu, s-ciudisi sh-vini trãoarã la nãsu ti salutari. 16 Sh-elu lã ntribã scriblji: "Trã tse ma vã ncãceats cu nãshi?" 17 Sh-un dit multsãmea apãndisinda, lji dzãsi: "Nvitsãtore, ts-adush ficiorlu a meu tsi ari un duh mut, 18 shi u-acatsi iutsido, lu-plãscãneashti sh-elu spumeadzã, cãrtsãneashti dintsilji sh-lji ngljeatsã cicioarili. Lã dzãsh a ucenitsilor a tãlji su-aĝuneascã, ma elji nu puturã s-lu facã." 19 Sh-elu dzãsi: "Gheneratã tsi nu-pistipseashti, pãnã-cãndu va hiu cu voi? Pãnã-cãndu va vã aravdã? Adutsets-lu aoa!" 20 Sh-elji lu-adusirã. Macãt duhlu lu vidzu, lu-plãscãni cu fuchii cilimeanlu tsi avea cãdzut mpadi, shi s-arucutea spumãnda. 21 Sh-Isusul lu-ntribã tat-su a lui: "Cãt chiro ari tsi s-fatsi aestã?" Sh-elu dzãsi: "Di cu njic. 22 Di multi ori lu ari arcatã tu foc sh-tu apã tra s-lu chearã, ma s-pots s-fats tsiva, s-ai njilã trã noi shi nã agiutã!" 23 Sh-Isusul lji-dzãsi: "Macã tini pots s-pistipsesht, itsido easti putut trã atsel tsi pistipseashti." 24 Dinãoarã tatãl a-ficiorlui, aurlãnda cu lãcri, dzãsi: "Mini pistipsescu, Doamne, agiutã ni-pistipsirea a mea!"

25 Atumtsea Isusul, vidzãnda cã multsãmea ma yinea trãoarã, lji aurlã al duhlu nicurat, dzãcãnda: "Tini duh tsi mut shi surdu, mini ti ursescu, s-eshi di la nãsu sh-nu intrã pute la nãsu." 26 Sh-demonul, aurlãnda shi trunduinda, ishi di la nãsu. Sh-ficiorlu armasi ca mortu, ashã cãt multsã oaminji dzãtsea: "Ari murit." 27 Ma Isusul lu-acãtsã di mãnã, lu-sculã sh-elu shidzu pri cicioari. 28 Cãndu Isusul intrã tu casã, ucenitsilji a lui lu ntribarã dinãparti: "Cãtse noi nu putum s-lu aĝunim?" 29 Sh-elu lã dzãsi a lor: "Aesti soi di duhuri nu-pots s-li aĝuneshti altã soi, dicãt mash cu rugãciunji."

30 Dupã tsi s-nchisirã di aclo, tricurã pri Galilea, sh-elu nu vrea si shtibã vãrã. 31 Elu lji nvitsa ucenitsilji a lui sh-lã dzãtsea a lor: "Trãoarã Hiljilu a-Omlui va s-prida tu mãnjili a oaminjlor sh-elji va lu vatãmã, sh-dupã tsi va s-hibã vãtãmatã, elu va s-nyeadzã a-treia dzuã." 32 Ma elji nu achicãsea atseali zboari sh-avea fricã s-lu ntriba Isusul.

33 Sh-agiumsirã tu Capernaum, sh-cãndu intrã n-casã, lã-ntribã: "Trã tsi vã ntribats namisa di voi pri cali?" 34 Ma elji pãpsirã, cã pri cali dzãtsea cu un-alantu, cã cai di elji easti ma marli. 35 Atumtsea elu shidzu, lã acljimã di doisprãdzatslji sh-lã dzãsi a lor: "Macã vãrã va s-hibã protlu, prindi s-hibã ma nãpoi di tuts shi huzmichearlu a tutulor." 36 Deapoea lo un cilimean sh-lu bãgã namisa di elji. Deapoea luãnda mbratsã lã dzãsi a lor: 37 "Caitsido tsi aproachi un dit aeshti cilimenji tu numa a mea, mi aproachi mini, sh-caitsido tsi mi aproachi mini, nu mi aproachi mini, ma atsel tsi mi ari pitricut."

38 Atumtsea Ioanul lo zborlu sh-dzãsi: "Nvitsãtore, noi vidzum un om tsi nu nã-urmeadzi, tsi li aĝunea demonjlji tu numa a ta, sh-noi lu nchidicãm cã elu nu yinea dupã noi." 39 Ma Isusul dzãsi: "Nu lu nchidicats cã nu ari om tsi poati s-facã thavmã tu numa a mea, sh-ma napoi s-greascã arãu trã mini. 40 Cã cai nu easti contra noi, easti cu noi. 41 Caitsido tsi va vã da unã cupã cu apã tu numa a mea, cã hits a Hristolui, dealihea ma vã-dzãc cu sigurantsã cã elu nu va u-chearã plãtirea a lui.

42 Sh-caitsido tsi va s-cicãrdiseascã un di aeshti njitslji tsi pistipsescu la mini, va eara ma ghini ti nãsu s-lji spindzira tu zvercã unã cheatrã mari di moarã shi s-arcã tu amari. 43 Tora, macã mãna a ta ti cicãrdiseashti trã amãrtii, talji-u, easti ma ghini trã tini s-intsri tu bana eternã cu mãna tsungã, dicãt s-ai doauã mãnji shi s-ti duts tu Colasi, tu foclu tsi nu s-astindzi pute. 44 [Aclo iu yermul a lor nu moari sh-foclu nu s-astindzi.]* 45 Macã ciciorlu a tãu ti cicãrdiseashti trã amãrtii, talji-lu, easti ma ghini trã tini s-intsri tu banã shcljiop, dicãt s-ai doau cicioari shi s-ti arucã tu Colasi, tu foclu tsi nu s-astindzi pute. 46 [Aclo iu yermul a lor nu moari sh-foclu nu s-astindzi pute.] 47 Sh-macã ocljiul a tãu ti adutsi tu amãrtii, scoat-lu. Easti ma ghini trã tini s-intsri tu banã cu un ocljiu, dicãt s-ai doi oclji shi s-ti arucã tu Colasi, 48 [Aclo iu yermul a lor nu moari sh-foclu nu s-astindzi pute]. 49 Cã caitsido prindi si sãreadzã tu foc sh-itsi curban prindi si sãreadzã cu sari. 50 Sarea easti bunã, macã sarea cheari njiurizma, cu tsi va u-turnats njiurizma? S-avets sari pri voi shi bãnats tu pace namisa di voi."