1 Deapoea Isusul apãrnji s-nveatsã mardzina di amari. Sh-anvãrliga di nãsu s-adunã un multsãmi mari di oaminji, cãt elu intrã tu varcã shi-shidea pri nãsã, shi tutã multsãmea eara mardzina di amari. 2 Sh-elu lã nvitsa a lor cu paraboli multi lucruri, shi tu nvitsãtura-a lui lã dzãsi: 3 "Ascultats! Ia, ishi siminãtorlu si seaminã. 4 Sh-cãndu elu simina, niscãnti gãrnutsi a farãljei cãdzurã pri cali shi puljilji a tserlui vinirã sh-li mãcarã. 5 Sh-niscãnti gãrnutsi di farã cãdzurã pri loc chitros, iu nu avea multã tsarã shi deadi dinãoarã, cã nu avea tsarã hãndoasã. 6 Ma cãndu ishi soarili s-pãlirã sh-trã atsea, tsi nu avea arãdãtsinã s-uscarã. 7 Sh-unã parti a farãljei cãdzu namisa di schinji, schinjilji criscurã, lji acãtsarã anasa sh-nu deadi carpo. 8 Unã altã parti cãdzu pri tsarã bunã, sh-deadi carpo tsi crishtea sh-adusi: unã treidzãtsi, alanta shaidzãtsi, sh-alanta unã sutã." 9 Deapoea elu lã dzãsi a lor: "Cai ari ureclji trã avdzãri, s-avdã."

10 Cãndu Isusul eara singur, atselji tsi eara avãrliga di nãsu deadun cu doisprãdzatslji, lu ntribarã ti parabola. 11 Elu lã dzãsi a lor: "A voauã vã easti datã s-cunushtets mistiryiul a amirãriljei al Dumnidzãu, iarã atsilor tsi suntu afoarã tuti aesti lã si da cu paraboli:

12 ‘Mutrinda, s-mutreascã ma s-nu veadã,

shi avdzãnda, s-avdã ma s-nu aducheascã,

tra nu s-mitãnjiuseascã

shi amãrtiili s-ljeartã.’"

13 Deapoea lã dzãsi a lor: "Nu u-aduchits aestã parabolã? Ma atumtsea cum va li aduchits tuti alanti paraboli? 14 Siminãtorlu seaminã Zborlu. 15 Atselji ningã cali suntu atselji pri la cai si seaminã zborlu, ma dupã tsi lu avdzãrã, yini trãoarã Satanlu shi lã-ljea zborlu siminatã la nãshi. 16 Tutashã atselji tsi suntu siminati fara pri chetri, suntu atselji tsi cãndu lu avdzãrã zborlu, trãoarã lu ljea cu harauã, 17 ma nu acãtsarã arãdãtsinã pri nãshi, shi suntu ti putsãn chiro, shi cãndu yini zorea icã avinarea trã itia a-zborlui, si-cicãrdisescu trãoarã. 18 Atselji cai si seaminã namisa di scinji, suntu atselji tsi lu-ascultã zborlu, 19 ma nvirinãrili-a aishtei eti, arãdearili-a avearilor, shi mania ti alti lucri tsi lji intrã a omlui, astupu zborlu shi nu da carpo. 20 Iarã atselji tsi si siminarã tu tsarã bunã, suntu atselji tsi ascultã zborlu, u ljea shi aducã carpo: un treidzãtsi, altu shaidzãtsi shi altu unã sutã."

21 Deapoea lã dzãsi a lor: "Vahi s-bagã cãndila sum unã gãleatã icã sum un pat? Nu s-bagã pri purtãtorul a lunjinãljei? 22 Cã nu ari tsiva ascumtu tsi s-nu s-dizvãleascã, shi tsiva faptu pri ascumtu tsi s-nu easã tu lunjinã. 23 Cai ari ureclji ti avdzãri, s-avdã!" 24 Shi lã dzãsi a lor: "Bãgats oarã atsea tsi avdzãts. Cu atsea mizurã tsi voi misurats, va vã si misurã, shi a voauã tsi avdzãts va vã si da ma multu. 25 Cã atsilui tsi ari va lji si da, ma atsilui tsi nu ari va lji si ljea shi atsea tsi ari."

26 Isusul dzãsi: "Amirãriljea al Dumnidzãu easti ca un om tsi arucã simintsa pri loc. 27 Noaptea shi dzua, cãndu elu doarmi shi si scoalã, simintsa fitruseashti shi creashti, fãrã si shtibã elu cum. 28 Di singur loclu lu fatsi: ma nãinti curpanlu, sh-apoea schiclu, shi tu soni schiclu cu gãrnutsi. 29 Iarã cãndu carpolu s-coapsi, trãoarã s-bagã seatsira, cã yini oara di sitsirari."

30 Elu dzãsi: "Cu tsi undzeashti amirãriljea al Dumnidzãu? Icã cu tsi parabolã su-aspunem? 31 Ea undzeashti cu simintsa di sinap tsi easti siminat tu loc. Atsea simintsã easti ma njica pri loc. 32 Ma dupã tsi si seaminã, creashti shi s-fatsi ma mari di tuti zãrzãvãtsili, shi sãlãgheashti dedzi ahãnti mãri cãt puljilji a tserlui pot s-aflã streahã sum aumbra a lor." 33 Shi cu multi ahtãri paraboli lã aspunea a lor zborlu, ashã cum elji putea s-lu achicãsea. 34 Sh-nu lã grea a lor fãrã paraboli, iarã a ucenitsilor a lui dinãparti lã spunea itsido.

35 Tu seara a dzuãljei aishtei, lã dzãsi a lor: "Tritsem pri alantã parti." 36 Sh-ucenitsilji, cum u nchisirã multsãmea, lu loarã Isusul ashã cum eara tu varcã. Cu nãsu eara sh-niscãnti vãrtsi njitsi. 37 Tu oarã aestã s-featsi unã furtunã mari shi vãljurili s-plãscãnea pri varcã ahãntã multã cãt ea ma s-umplea. 38 Iarã elu durnjea tu varcã pri un cãpitinj, elji lu dishtiptarã shi lji dzãsirã: "Nvitsãtore nu ai mirachi trã noi cã ma ni nicãm?" 39 Sh-elu cum si dishtiptã lji aurlã a vimtului sh-lji gãri ali amari: "Tãtsi shi pãpsea!" Shi vimtul pãpsi shi s-featsi tãtseari mari. 40 Sh-lã dzãsi a lor: "Cãtse hits fricoshi? Cum nu avets pisti?" 41 Sh-elji lji acãtsã unã fricã mari shi dzãtsea cu un-alantu: "Cai easti aestu tsi lu ascultã sh-vimtul sh-amarea?"