1 Atumtsea s-adunarã anvãrliga di nãsu Fariseilji shi niscãntsã scribi tsi avea vinitã di Ierusalem. 2 Atselji bãgarã oarã cã niscãntsã di ucenitsilji a lui ma mãca pãni cu mãnjili nicurati, va s-dzãcã niaspilati. 3 Fariseilji sh-tuts Iudeilji nu mãcã niaspilati ghini mãnjili ma nãinti, tsãnãnda adetsili a vecljilor. 4 Sh-cãndu s-toarnã dit pãzari nu mãcã macã nu suntu aspilats ma nãinti. Suntu multi alti lucri tsi atselji prindi s-li fac trã itia a adetsilor: aspilarea a cupilor, a pocilor, a cãldãrilor shi a paturilor.

5 Deapoea Fariseilji shi scriblji lu ntribarã: "Cãtse ucenitsilji a tãlji nu facã dupã adetsili a vecljilor, ma mãcã pãni ni aspilati mãnjili?" 6 Ma elu apãndisinda lã dzãsi a lor: "Ghini prufitipsi Isaia trã voi, ipucrits, ashã cum easti scriatã:

‘Aestu popul cu budzãli mi tinjiseashti,

ma inima-a lor easti diparti di mini.

7 Ma digeaba mi alãvdats,

nvitsãnda unã nvitsãturã tsi easti unã Dimãndãciunji umineascã.’

8 Alãsãnda di unã parti ordinlu al Dumnidzãu, ma tsãnets adetsili a oaminjlor, aspilarea a pocilor sh-a cupilor, shi fãtsets multi alti ahtãri lucri." 9 Sh-ninga lã dzãsi a lor: "Voi hits axii ti arnisiri ordinlu al Dumnidzãu, sh-ti tsãneari adetea a voastrã. 10 Moisiul dzãsi: ‘Tinjisea tatãl a tãu sh-muma a ta.’ Shi: ‘Atsel tsi blastimã tatãl sh-muma, easti giudicatã cu moarti.’ 11 Ma voi dzãtsets: ‘Macã vãrã lji-dzãtsi a-tatãlui a lui icã a mumãljei a lui, itsi pot s-facã trã voi easti un Curban, va s-dzãcã un pisches trã Dumnidzãlu,’ 12 nu lu alãsats atsel s-facã tsiva di tatãl a lui icã di muma a lui, 13 ashã voi arnisits zborlu al Dumnidzãu cu adetea a voastrã, tsi voi u-avets mushtinatã. Shi voi ma fãtsets multi alti ahtãri lucri." 14 Deapoea acljimã tutã lumea anvãrliga di nãsu shi lji-dzãsi: "Mi ascultats tuts shi aduchits! 15 Nu ari tsiva di nafoarã a omlui, tsi intrãnda tu nãsu s-u lãvusheascã, aljumtrea, suntu atseali lucri tsi easã di la nãsu tsi u lãvushescu." 16 [Cai ari ureclji trã avdzãri, s-avdã!]* 17 Ma napoea, cãndu elu s-turnã la casã, diparti di multsãmea, ucenitsilji a lui lu-ntribarã trã achicãsirea a parabolãljei. 18 Sh-elu lã-dzãsi a lor: "Sh-voi nu avets minti n-capã. Nu-u aduchitsã cã itsi intrã di nafoarã la omlu nu poati s-u lãvusheascã? 19 Cã nu lji-intrã tu inimã, ma tu pãnticã, sh-deapoea easi nafoarã tu tualet?" Zburãnda ashã, elu li dimãndã curati tuti mãcãrili.

20 Elu dzãsi: "Atsea tsi easi di la omlu, u-fatsi lãvos. 21 Cã di nãuntru, va s-dzãcã dit inima a-omlui es minduirili arali, ncãlcarea a curuniljei, furãrili, vãtãmãrili, 22 putãnsirili, mãniili, ruteatsili, arãdearili, arushinarea, pizma, blãstemlu, pirifanea, hãzãmãrili. 23 Tuti atseali arali es di nãuntru sh-u lãvushescu omlu."

24 Deapoea s-nchisi di aclo shi s-dusi tu cãsãbãlu a Tirlui. Intrã tu unã casã sh-vrea tsi vãrã s-nu shtibã, ma nu putu s-armãnã ascumtu. 25 Unã muljeari, tsi hiljea a ljei avea un duh nicuratã, avdzãnda di Isusul, vini sh-cãdzu la cicioarili a lui. 26 Tora atsea muljeari eara elinã, cu arãdãtsinã Sirofenicã. Shi lji si rugã a lui tsi s-lu aĝunea draclu di hiljea a ljei. 27 Iarã Isusul dzãsi: "Alasã cilimenjlji* prota s-fãnãteascã, cã nu easti ghini s-ljeai pãnea a-cilimenjilor shi s-u arutsã a cãtsãljilor." 28 Ma ea apãndisi shi lj-dzãsi: "Ghini ma greshti, Doamne, ma shi cãtsãljilji sum measã mãcã sãrmili a cilimenjilor!" 29 Atumtsea elu lj-dzãsi: "Trã aestu zbor a tãu, fudz, draclu ishi di hiljea a-ta!" 30 Sh-ea, cãndu s-turnã la casa a-ljei, u-aflã feata tu pat shi draclu avea ishitã.

31 Dupã tsi s-nchisi nãpoi dit locurili a Tirlui shi s-dusi cãtrã Sidon, Isusul agiumsi la amarea a Galileiljei, namisa di loclu di Decapolis. 32 Sh-lji adusirã un mut tsi cu zori grea, shi lji si rugarã s-bagã mãnjili pri nãsu s-lu vindica.

33 Cum lu lo, diparti dit multsãmea, lj-bãgã dzeaditli tu urecljili a lui, shi dupã tsi scuche dzeaditlu, lj-acãtsã limba. 34 Deapoea sculã ocljilji cãtrã tser, suschirã shi-lj dzãsi: "Effatha", tsi va s-dzãcã: "Discljidi-ti!" 35 Shi trãoarã s-discljisirã urecljili shi s-dizligã gura sh-elu grãi cum prindi.

36 Sh-Isusul lã-ursi atselji tsi s-nu lji aspunea a vãrui. Ma cu cãt ma multu lã ursea ahtãt ma multu elji lu scurpisea zborlu. 37 Sh-multu ciudisits, dzãtsea: "Elu itsido lu ari faptã ghini, tsi surdzãlji s-avdã sh-mutsilji s-greascã!"