1 Curund dimineatsa mãrlji a preftsãlor cu aushlji, scriblji sh-tut Sinedriul featsirã consiliu, ligarã Isusul, lu dusirã nafoarã sh-lu-prideadirã al Pilat. 2 Sh-Pilatul lu ntribã: "Tini eshti amirãlu a Iudeilor?" Sh-elu apãndisinda lji dzãsi: "Tini dzãts!" 3 Mãrlji a preftsãlor lu acuza di multi lucri, ma elu nu apãndisea dip. 4 Pilatul lu ntribã nãpoi dzãcãnda: "Nu apãndiseshti dip? Vedz ti cãti lucri ti acuzeascã!" 5 Ma Isusul nu apãndisi dip, sh-Pilatul armasi ciudisit. 6 Tu cathi sãrbãtoari eara ca adeti tsi si sãlãghea a lor un hãpsãnit, caitsido tsi populu cãfta. 7 Sh-eara tu hapsi un om acljimatã Baraba, deadun cu sotslji a lui rebilji, tsi avea faptã un vãtãmari la un rebilipsiri. 8 Sh-multsãmea, aurlãnda, ahurhi tra s-caftã s-facã ashã cum avea faptã totãna cu nãshi. 9 Iarã Pilatul lã apãndisi a lor dzãcãnda: "Vrets s-vã sãlãghescu amirãlu a Iudeilor?" 10 Cã lu shtia tsi mãrlji a preftsãlor lu avea pridatã di inati. 11 Ma mãrlji a preftsãlor lji deadirã curaiu a multsãmiljei s-cãfta sãlãghirea al Baraba. 12 Sh-Pilatul lo zborlu nãpoi sh-lã dzãsi a lor: "Tsi vrets s-fac cu atsel tsi voi lu acljimats amirãlu a Iudeilor?" 13 Elji aurlarã nãpoi: "Crutsisits-lu!" 14 Sh-Pilatul lã dzãsi a lor: "Ma tsi arãu ari faptã?" Atumtsea elji aurlarã sh-ma multu: "Crutsisits-lu?" 15 Trã atsea Pilatul vrãnda s-lji arsea a multsãmiljei, lã l-sãlãghi Baraba. Sh-dupã tsi lu zãpãlirã Isusul, lu deadi a lor tsi s-lu crutsisea.

16 Sh-suldatslji lu-dusirã Isusul tu uborlu di nãuntru, tu pretorium sh-adunarã tutã cohorta. 17 Lu-nviscurã cu mitashi, lji mplãtirã unã curuni di schinji sh-lji-u bãgarã pri cap 18 Deapoea apãrnjirã s-lu saluteascã, dzãcãnda: "Sãnãtati amirãlu a Iudeilor!" 19 Sh-lu agudea pristi cap cu un cãlam, lu scuchea sh-dzinucljãnda nãintea a lui, lu alãvda. 20 Dupã tsi arãsirã cu nãsu, disviscurã mitasha, lu nviscurã cu stranjili a lui, sh-lu scoasirã afoarã s-lu crutsisea.

21 Elji ursirã un cãlãtor, Simonul di Tsirenea tsi s-turna dit agru, tatãl al Alexandru sh-al Rufi, tsi s-tsãnea crutsea a lui. 22 Deapoea lu dusirã Isusul tu loclu acljimatã Golgota, tsi va s-dzãcã "Loclu a Cafcãljei." 23 Lji deadirã s-bea yin misticat cu njirã, ma elu nu u lo. 24 Sh-dupã tsi lu crutsisirã, lji mpãrtsãrã stranjili a lui sh-arcarã soarti tra s-shtia tsi va avea cathiunu. 25 Eara oara a treia* cãndu lu crutsisirã. 26 Scritura tsi aspunea sibepea a acuzãljei tsi eara bãgatã pristi nãsu dzãtsea: "Amirãlu a Iudeilor." 27 Deadun cu nãsu crutsisirã sh-doi furii, un tu nandreapta a lui sh-alantu tu nastãnga a lui. 28 [Ashã si mplini Scritura tsi dzãtsi: "Elu s-lugursi cu urutsilji."]* 29 Sh-atselji tsi tritsea atsia aproapi lu ngiura sh-giucãnda caplu, dzãtsea: "Tini tsi aspãrdzeai templu sh-lu adrai di trei dzãli, 30 ascapã-ti sh-dipunã di crutsi." 31 Tutashã sh-mãrlji a preftsãlor shi scriblji arãdãnda dzãtsea cu un-alantu: "Alantsãlji lji ascãpã, ma elu nu poati s-ascapã. 32 Hristolu, amirãlu a Israelui, s-dipunã tora di crutsi tra s-lu videm shi s-lu pistipsim." Sh-atselji tsi eara crutsisits deadun cu nãsu, lu ngiura.

33 Deapoea cãndu vini a shasea oarã, ntuneariclu anvãli tut loclu pãnã la a noaua oarã. 34 Sh-la a noaua oara Isusul aurlã cu boatsi analtã: "Eloi, Eloi lama sabacthani?", tsi va s-dzãcã: "Dumnidzãlu a meu, Dumnidzãlu a meu cãtse mi ai alãsat?" 35 Sh-niscãntsã di atselji di aproapi, cãndu avdzãrã, dzãsirã: "Ia, elu ma lji greashti al Elia!" 36 Atumtsea un di nãshi vini trãoarã mulje un sfungu tu puscã, sh-dupã tsi l-bãgã tu un cãlami lji-lu deadi s-bea, dzãcãnda: "Alãsats-lu, s-videm macã va yinã Elia s-lu dipun nghios." 37 Ma Isusul cum featsi unã mari aurlari, deadi suflitlu. 38 Sh-velul* tu templu s-disicã pri doauã di nsus pãnã nghios. 39 Tsenturionul tsi stãtea nãintea al Isus, cãndu vidzu cã Isusul aurlã ashã, sh-deadi suflitlu, dzãsi: "Dealihea aestu om eara Hiljilu a Dumnidzãlui!" 40 Atsia eara tutashã sh-muljerili tsi videa di diparti. Namisa di nãsi eara Maria Magdalena sh-Maria muma al Iacovu atsel njiclu sh-al Iose, sh-Salomea, 41 cai lu avea urmat sh-lji avea huzmitipsitã di cãndu eara tu Galilea, eara sh-multi alti tsi avea vinit deadun cu elu tu Ierusalem.

42 Tora s-apruche seara, sh-eara Etimãsirea, tsi va s-dzãcã apirirea a Sãmbãtãljei, 43 Iosifu dit Arimatea, un consilier rispectat, cai ashtipta amirãriljea a Dumnidzãlui, cu curaiu intrã la Pilatu shi cãftã truplu al Isus. 44 Sh-Pilatul s-ciudisi cã tora elu avea murit. Acljimã tsenturionlu sh-lu ntribã macã avea murit di multu chiro. 45 Shi cum si siguripsi di tsenturionlu, lu alãsã truplu al Iosif. 46 Aestu, dupã tsi acumpãrã unã pãndzã, lu dipunã Isusul di crutsi, lu anvãrti cu pãndzã sh-lu bãgã tu un murmintu tsi eara disfapt tu cheatrã, deapoea arucuti unã cheatrã dininti di usha a murmintului. 47 Sh-Maria Magdalena sh-Maria, muma al Iose mutrea iu lu bãgarã.