8 ଏ ଲାଡାର୍‌ମଃନ୍, ମାପୁରାର୍‌ ତଃୟ୍‌ ଗଟେକ୍‌ ଦିନ୍‌ ଜେ ଅଃଜାର୍‌ ବଃର୍ସ୍ ହର୍‍ ଆର୍‌ ଅଃଜାର୍‌ ବଃର୍ସ୍ ଜେ ଗଟେକ୍‌ ଦିନ୍‌ ହର୍‍, ମୁଳ୍‌କଃରି ଇ କଃତା ତୁମିମଃନ୍ ହାସ୍ରା ନାୟ୍‌ । 9 ବିଲମ୍‌ ବଃଲି ଜଃନ୍‌କଃରି କଃତେକ୍‌ ଲକ୍‌ ବାବୁଲାୟ୍‌, ମାପୁର୍ ଅଃହ୍‌ଣାର୍‌ ସଃୟ୍‌ତ୍‌ କଃଲାର୍‌ ସେ ରଃକମ୍‌ ବିଲମ୍‌ ନଃକେରେ; ମଃତର୍‌ କେଏ ହେଁ ଜଃନ୍‌କଃରି ନାସ୍‌ ନଃଉତି, ସଃବୁଲକ୍‌ ମଃନ୍‌ ବାଦ୍‌ଲାଉତି, ଇରି ଇଚା କଃରି ସେ ତୁମିମଃନାର୍‌ ଗିନେ ବୁତେକ୍‌ ବିନ୍‌ ହଃତେକ୍‌ ଜାଗିକଃରି ଆଚେ ।

10 ✝*ମାପୁରାର୍‌ ଦିନ୍‌ ଚର୍‌ ହର୍‍ ହଚେଦ୍‌ । ସେ ଦିନ୍‌ ଅଃଗାସ୍‌ ମଃଣ୍ଡଳ୍‌ ବଃଡେ ସଃବଦ୍‌ ସଃଙ୍ଗ୍ ନାସ୍‌ ଅୟ୍‌ଦ୍‌, ଆର୍‌ ଉବୁଜ୍‌ଲାର୍‌ ବଃଡେ ତାହାତାର୍‌ ଗିନେ ତଃର୍‌ଲି ଜାୟ୍‌ଦ୍‌ ଆର୍‌ ହୁର୍ତି ଆର୍‌ ସେତିର୍‌ ଆସ୍ତି ସଃବୁ ହଡି ଜାୟ୍‌ଦ୍‌ । 11 ସେ ଦିନାର୍‌ ଆସ୍ତାର୍‌ ଜାଗିକଃରି, ସେରି ଜଃନ୍‌କଃରି ବେଗି ଆସେଦ୍‌, ଇତାର୍‌ ଗିନେ ତୁମିମଃନ୍ କଃନ୍‌କଃରି ସଃବୁବଃଳ୍‌ ନିକ ଗୁଣାର୍‌ ଆର୍‌ ଦଃର୍ମି ଅଃଉତା ଲଳା । 12 ଇ ସଃବୁ ବିସୟ୍‌ ଇରଃକମ୍‌ ନାସ୍‌ ଅଃଉତାର୍‌ ଗିନେ, ଇସ୍ୱରାର୍‌ ଜୁୟି ଦିନ୍‌ ଅଃଗାସ୍‌ ମଃଣ୍ଡଳ୍‌ ଜୟ୍‌ଲାଗି ଆଜିଜାୟ୍‌ଦ୍‌ ଆର୍‌ ଉବ୍‌ଜାଣ୍‌ ଅଇଲାର୍‌ ସଃବୁ ବଃଡେ ତଃହାତେ ତଃର୍‌ଲି ଜାୟ୍‌ଦ୍‌, 13 ✝ଅଃମିମଃନ୍‌ ତାର୍‌ ସଃୟ୍‌ତ୍‌ ହଃର୍କାରେ ଗଟ୍ ନଃଉଆଁ ଅଃଗାସ୍‌ ଆର୍‌ ନଃଉଆଁ ହୁର୍ତିବିକେ ଜାଗିଆଚୁ, ଜୁୟ୍‌ରି ଦଃର୍ମିଲକାର୍‌ ବାସ୍‌ କଃର୍ତା ଟାଣ୍ ଅୟ୍‌ଦ୍‌ ।