1 ସଃକାଳ୍‌ ଅୟ୍‌ଲାକ୍‌ ବଃଡ୍‌ ଜାଜକ୍‌ ମଃନ୍‌ ଆର୍‌ ପାରାଚିନ୍‌ମଃନ୍ ଜିସୁକେ ମଃର୍ନେ ମାରୁକ୍‌ ତାର୍‌ ବିରୁଦେ ଗୁସ୍ଟୁ କଃଲାୟି । 2 ସେମଃନ୍ ଜିସୁକେ ସିକ୍ଳି ସଃଙ୍ଗ୍ ବାନ୍ଦି ରମିୟ ସାସନ୍‌କଃର୍ତା ପିଲାତ ନାଉଁଆର୍‌ ଗର୍ନର୍‌ ଆତେ ସଃହ୍ରି ଦିଲାୟ୍‌ ।

3 ✝ସଃଡେବଃଳ୍‌ ଜିସୁକେ ସଃତ୍ରୁର୍‌ ଆତେ ସଃହ୍ରି ଦିଲା ଜିଉଦା, ଜିସୁ ମଃର୍ନ୍‌ ଦଃଣ୍ଡ୍‌ ହାୟ୍‌ଁ ଆଚେ, ଇରି ଦଃକିକଃରି ସେ ନିଜାର୍ ବୁଲ୍‌ କାମ୍‌କେ ଏତାୟ୍‌ ଦୁକ୍‌କଃରି ମଃନ୍‌ବାଦ୍‌ଲାୟ୍‌ ବଃଡ୍‌ ଜାଜକ୍‌ ଆର୍‌ ପାରାଚିନ୍‌ମଃନାର୍‌ ଲଃଗେ ସେ ତିରିସ୍‌ ଗଟ୍ ରୁହା ଟଃକା ବାଉଳାୟ୍‌ ଦଃୟି କୟ୍‌ଲା, 4 "ମୁଁୟ୍‌ ଗଟେକ୍‌ ନିର୍ଦସି ଲକ୍‌କେ ମଃର୍ନ୍‌ ଦଃଣ୍ଡ୍‌ ହାଉଁକ୍‌ ସଃହ୍ରି ଦଃୟି ହାହ୍‌ କଃରିଆଚି ।"

ମଃତର୍‌ ସେମଃନ୍ କୟ୍‌ଲାୟ୍‌, "ସେ କଃତାୟ୍‌ ଅଃମାର୍‌ କାୟିରି ଆଚେ ? ସେ କଃତା ତୁୟ୍‌ ବୁଜ୍‌ ।"

5 ସେତାକ୍‌ ଜିଉଦା ରୁହା ଟଃକା ସଃବୁ ମନ୍ଦିର୍‌ ବିତ୍ରେ ହଃବ୍ଳାୟ୍‌କଃରି ହଃଳାୟ୍‌ଲା, ତାର୍‌ହଃଚେ ସେ ଜାୟ୍‌ ନିଜେ ଉଚ୍‌କି ଅୟି ମଃଲା ।

6 ମଃତର୍‌ ବଃଡ୍‌ ଜାଜକ୍‌ ମଃନ୍‌ ସେ ରୁହା ଟଃକା ନଃୟ୍‌କଃରି କୟ୍‌ଲାୟ୍‌, "ଇ ଟଃକା ମନ୍ଦିରାର୍‌ ଟଃକା ସଃଙ୍ଗ୍ ଗଟେ ଟାଣେ ମିସାୟ୍‌ ବଃଣ୍ଡାର୍‌ ବିତ୍ରେ ସଃଙ୍ଗାଉତା ବିଦି ନୟ୍‌, ବଃଲେକ୍‌ ଇରି ଗଟ୍ ଲକାର୍‌ ବଃନିର୍‌ ମଲ୍‌ ।" 7 ସେମଃନ୍ ଇ ଟଃକାକ୍‌ କାୟି କଃରୁଆଁ ବଃଲି କଃତା ଅୟ୍‌କଃରି ବିନ୍‌ଦେସାର୍‌ ଲକ୍‌ମଃନାର୍‌ ମଃସୁଣ୍‌ ଗିନେ ଗଟ୍ କୁମ୍ବାର୍‌ ଲକାର୍‌ ବୁୟ୍‌ଁ ସେ ଟଃକା ଦଃୟି ଗେନ୍‌ଲାୟ୍‌ । 8 ସେତାର୍‌ଗିନେ ଆଜି ହଃତେକ୍‌ ସେ ହଃଦାକେ "ବଃନି ହଃଦା" ବଃଲି କଃଉତି ।

9 ଇରଃକମ୍‌ ଜିରିମିୟ ବାବ୍‌ବାଦି କୟ୍‌ରିଲା ବାବ୍‌ବାଣି ହୁରା ଅୟ୍‌ଲି, "ଜାୟ୍‌ରି ତିରିସ୍‌ ଟଃକାୟ୍‌ ବିକୁକ୍‌ ଇସ୍ରାଏଲ୍‌ ଲକ୍‌ମଃନ୍‌ ତିର୍‌ କଃରି ରିଲାୟ୍‌, ସେ ତିରିସ୍‌ ଟଃକା ସେମଃନ୍ ନଃୟ୍‌, 10 ସେ କୁମ୍ବାର୍‌ ଲକାର୍‌ ହଃଦା ଗେନ୍‌ଲାୟ୍‌ । ଇରି କଃରୁକେ ମକ୍‌ ଇସ୍ୱର୍‌ ଆଦେସ୍‌ ଦଃୟ୍‌ରିଲା ।"

11 ଜିସୁକେ ରମିୟ ଗର୍ନରାର୍‌ ପିଲାତର୍‌ ଚଃମେ ଟିଆ କଃଲାୟି, ଆର୍‌ ଗର୍ନରାର୍‌ ପିଲାତ ଜିସୁକେ ହଃଚାର୍ଲା, "ତୁୟ୍‌ କାୟି ଜିଉଦିମଃନାର୍‌ ରଃଜା ?"

ଜିସୁ କୟ୍‌ଲା, "ହେଁ, ତୁୟ୍‌ କଃଉଁଲିସ୍‌ ।" 12 ମଃତର୍‌ ବଃଡ୍‌ ଜାଜକ୍‌ ଆର୍‌ ପାରାଚିନ୍‌ମଃନ୍ ଜିସୁର୍‌ ବିରୁଦେ ଦଃସ୍‌ ଦଃକାୟ୍‌ କୟ୍‌ଲାକ୍‌, ଜିସୁ କାୟିରି ହେଁ ନଃକୟ୍‌ଲା ।

13 ସେତାକ୍‌ ପିଲାତ ଜିସୁକେ କୟ୍‌ଲା, "ଇମଃନ୍‌ ତର୍‌ ବିରୁଦେ କଃତେକ୍‌ ସାକି ଦେଉଁଲାୟ୍‌, ସେ ସଃବୁ ତୁୟ୍‌ କାୟି ନଃସୁଣୁଲିସ୍‌ ?"

14 ମଃତର୍‌ ଜିସୁ କଃତା ହଃଦେକ୍‌ ହେଁ କାୟିରି ନଃକୟ୍‌ଲା, ତଃବେ ପିଲାତ ବଃଡେ କାବା ଅୟ୍‌ଲା ।

15 ସଃବୁ ବଃର୍ସ୍ ନିସ୍ତାର୍‌ ହଃର୍ବ୍‌ ବଃଳ୍‌ ଲକ୍‌ମଃନାର୍‌ ଇଚାୟ୍‌ ଗଟେକ୍‌ କଃୟ୍‌ଦିକେ ସେମଃନାର୍‌ ଗିନେ ଚାଡି ଦେତାର୍‌ ରମିୟ ସଃର୍କାରାର୍‌ ଗର୍ନରାର୍‌ ରିତି ରିଲି । 16 ସଃଡେବଃଳ୍‌ ସେମଃନାର୍‌ ବାରବା* ନାଉଁଆର୍‌ ଗଟେକ୍‌ ବଃଡ୍‌ କୟ୍‌ଦି ରିଲା । 17 ତଃବେ ସେମଃନ୍ ଗଟ୍‌ତଃୟ୍‌ ରୁଣ୍ଡ୍‌ଲାବଃଳ୍‌ ପିଲାତ ସେମଃନ୍‌କେ ହଃଚାର୍ଲା, "ମୁଁୟ୍‌ ତୁମାର୍‌ ଗିନେ କାକେ ଚାଡି ଦଃୟ୍‌ନ୍ଦ୍ ବଃଲି ତୁମିମଃନ୍ ଇଚା କଃରୁଲାସ୍‌ ? ବାରବାକେ କି ଜାକେ କ୍ରିସ୍ଟ ବଃଲି କଃଉତି, ସେ ଜିସୁକେ ?" 18 କାୟିତାକ୍‌ବଃଲେକ୍‌ ଜିଉଦି ନେତାମଃନ୍ ଜେ ଡାରା ଅୟ୍‌କଃରି ଜିସୁକେ ସଃହ୍ରି ଦଃୟ୍‌ରିଲାୟ୍‌, ସେରି ପିଲାତ ଜାଣି ରିଲା ।

19 ଆର୍‌ ପିଲାତ ବିଚାର୍‌ କଃର୍ତା ଟାଣେ ବଃସିରିଲାବଃଳ୍‌ ତାର୍‌ ଡକୁର୍ସି ତାର୍‌ ଚଃମେ କବୁର୍ ହଃଟାୟ୍‌ଲି, "ସେ ଦଃର୍ମି ଲକାର୍‌ କଃତାୟ୍‌ ତୁୟ୍‌ ମୁଳ୍‌କେ ଆତ୍‌ ଦେସ୍‌ନାୟ୍‌, କାୟିତାକ୍‌ବଃଲେକ୍‌ ତାର୍‌ ଗିନେ ମୁଁୟ୍‌ ଆଜି ଚଃହ୍ନେ ବଃଡେ କଃସ୍ଟ ହାୟ୍‌ଁ ଆଚି ।"

20 ମଃତର୍‌ ବଃଡ୍‌ ଜାଜକ୍‌ ଆର୍‌ ପାରାଚିନ୍‌ମଃନ୍ ବାରବାକେ ଚାଡୁକ୍‌ ଆର୍‌ ଜିସୁକେ ଅଃତ୍ୟା କଃରୁକେ ଲକ୍‌ମଃନ୍‌କେ କଃଉଁକେ ବୁଜାୟ୍‌ଲାୟ୍‌ । 21 ମଃତର୍‌ ପିଲାତ ଆରେକ୍‌ ଲକ୍‌ମଃନ୍‌କେ ହଃଚାର୍ଲା, "ଅଃମି ଇ ଦୁୟ୍‌ ଲକାର୍‌ ବିତ୍ରେ ତୁମାର୍‌ ଗିନେ କାକେ ଚାଡି ଦେଉଁନ୍ଦ୍ ବଃଲି ତୁମିମଃନାର୍‌ ମଃନ୍‌ ?"

ସେମଃନ୍ କୟ୍‌ଲାୟ୍‌, "ବାରବାକେ ।"

22 ପିଲାତ ସେମଃନ୍‌କେ ହଃଚାର୍ଲା, "ତଃବେ ଜାକେ କ୍ରିସ୍ଟ ବଃଲି କଃଉତି, ସେ ଜିସୁକେ ମୁଁୟ୍‌ କାୟି କଃରିନ୍ଦ୍‌ ?"

ସେମଃନ୍ ସଃବୁଲକ୍‌ କୟ୍‌ଲାୟ୍‌, "ତାକ୍‌ କ୍ରୁସ୍‌ ଉହ୍ରେ ଚଃଗାଉଆ ।" 23 ସେତାକ୍‌ ସେ ହଃଚାର୍ଲା, "କାୟିତାକ୍‌, ସେ କାୟି ଦଃସ୍‌ କଃରିଆଚେ ?"

ମଃତର୍‌ ସେମଃନ୍ ବଃଡେ ଉଲ୍‌ଗାଟ୍‌ ଅୟି କୟ୍‌ଲାୟ୍‌, "ତାକ୍‌ କ୍ରୁସ୍‌ ଉହ୍ରେ ଚଃଗାଉଆ ।"

24 ଇତାକ୍‌ ପିଲାତ ଜଃଡେବଃଳ୍‌ ଦଃକ୍‌ଲା ଜେ, ସେ କାୟି କଃରୁକେ ନଃହାରୁଲା, ବଃଲେକ୍‌ ଆରେକ୍‌ ଗଃଣ୍ଡ୍‌ଗଳ୍‌ ଅଃଉଁଲି । ସଃଡେବଃଳ୍‌ ସେ ହାଣି ନଃୟ୍‌ ଲକ୍‌ମଃନାର୍‌ ମୁଏଁ ଆତ୍‌ ଦୟ୍‌କଃରି କୟ୍‌ଲା, "ଇ ଲକାର୍‌ ଅଃତ୍ୟାୟ୍‌ ମୁଁୟ୍‌ ନିର୍ଦସ୍‌ ! ତୁମିମଃନ୍ ସେରି ବୁଜା ।"

25 ଇତାକ୍‌ ସଃବୁଲକ୍‌ କୟ୍‌ଲାୟ୍‌, "ଜିସୁର୍‌ ଅଃତ୍ୟାର୍‌ ଦଃସ୍‌ ଅଃମାର୍‌ ଆର୍‌ ଅଃମାର୍‌ ହିଲାମଃନାର୍‌ ଉହ୍ରେ ହଃଳ ।"

26 ସେତାକ୍‌ ପିଲାତ ସେମଃନାର୍‌ ଗିନେ ବାରବାକେ ଚାଡି ଦିଲା, ମଃତର୍‌ ଜିସୁକେ ସାଟ୍‍ଣି ସଃଙ୍ଗ୍ ମାରାୟ୍‌ କ୍ରୁସ୍‌ ଉହ୍ରେ ଚଃଗାଉଁକ୍‌ ସଃଇନ୍‌ମଃନାର୍‌ ଆତେ ସଃହ୍ରି ଦିଲା ।

27 ତାର୍‌ହଃଚେ ପିଲାତର୍‌ ସଃଇନ୍‌ମଃନ୍ ଜିସୁକେ ପିଲାତର୍‌ କୁଆଳ୍‌ ବିତ୍ରେ ନଃୟ୍‌ ସଃବୁ ସଃଇନ୍‌ ଦଃଳ୍‌କେ ଜିସୁର୍‌ ଚଃମେ ରୁଣ୍ଡାୟ୍‌ଲାୟ୍‌ । 28 ଆରେକ୍‌ ସଃଇନ୍‌ମଃନ୍ ଜିସୁର୍‌ ବଃସ୍ତର୍‌ କାଡି ତାକ୍‌ ଜାମ୍‌କଳି ହର୍‍ ଡିସ୍ତା ବଃସ୍ତର୍‌ ହିନ୍ଦାୟ୍‌ଲାୟ୍‌ । 29 ଆର୍‌ ସେମଃନ୍ ଗଟ୍ କାଟାର୍‌ ମୁକୁଟ୍‌ ହାଜିକଃରି ଜିସୁର୍‌ ମୁଣ୍ଡେ ହିନ୍ଦାୟ୍‌ଲାୟ୍‌, ଆର୍‌ ତାର୍‌ କାତା ଆତେ ଗଟ୍ ସୁର୍ଲିଡାଙ୍ଗ୍ ଦଃରାୟ୍‌କଃରି ତାର୍‌ ମୁଏଁ ମାଣ୍ଡିକୁଟା ଟେସ୍‌ଲାୟ୍‌, ଆର୍‌ ଗେଙ୍ଗ୍ରାୟ୍‌କଃରି କୟ୍‌ଲାୟ୍‌, "ଏ ଜିଉଦିମଃନାର୍‌ ରଃଜା, ଜୁଆର୍‌ ।" 30 ଆର୍‌ ସେମଃନ୍ ଜିସୁର୍‌ ଉହ୍ରେ ଲାଳ୍‌ ତୁକ୍‌ଲାୟ୍‌ ଆର୍‌ ସେମଃନ୍ ଜୁୟି ଡାଙ୍ଗ୍ ତାକ୍‌ ଦଃରାୟ୍‌ ରିଲାୟ୍‌, ସେ ଡାଙ୍ଗ୍ ସଃଙ୍ଗ୍ ତାର୍‌ ମୁଣ୍ଡେ ମାରୁକ୍‌ ଦଃର୍ଲାୟ୍‌ । 31 ଆରେକ୍‌ ସେମଃନ୍ ଜିସୁକେ ଗେଙ୍ଗ୍ରାୟ୍‌ଲା ହଃଚେ, ସେ ରଃଜାର୍‌ ବଃସ୍ତର୍‌ କାଡି ତାର୍‌ ନିଜାର୍ ବଃସ୍ତର୍‌ ହିନ୍ଦାୟ୍‌ଲାୟ୍‌ ଆର୍‌ ଜିସୁକେ କ୍ରୁସ୍‌ ଉହ୍ରେ ଚଃଗାଉଁକ୍‌ ନିଲାୟ୍‌ ।

32 ସେମଃନ୍ ଜିରୁସାଲମ୍‌ ଗଃଳେହୁଣି ବାରାୟ୍‌ ଜାତାବଃଳ୍‌ କୁରିଣିୟ ଗଃଳାର୍‍ ସିମନ୍‌ ନାଉଁଆର୍‌ ଗଟ୍ ଲକ୍‌କେ ଦଃକ୍‌ଲାୟ୍‌, ଆର୍‌ ସଃଇନ୍‌ମଃନ୍ ଜିସୁର୍‌ କ୍ରୁସ୍‌ ବଃଉଁକେ ତାକ୍‌ ବଃଳ୍‌ମତ୍‌ କଃଲାୟି । 33 ଆର୍‌ ସେମଃନ୍ ଗଲ୍‌ଗତା ନାଉଁଆର୍‌ ଗଟେକ୍‌ ଜଃଗାୟ୍‌, ବଃଲେକ୍‌, ଜାକେ "ମୁଣ୍ଡ୍ କିହ୍ରି ହର୍‍ ଜଃଗା" ବଃଲି କଃଉତି, ସେତି ହଚି, 34 ସେତି ସେମଃନ୍ ଜିସୁକେ ହିତା ମିସିରିଲା ଅଙ୍ଗୁର୍‌ ରଃସ୍‌ କାଉଁକେ ଦିଲାୟ୍‌, ମଃତର୍‌ ଜିସୁ ସେରି ଚାକିକଃରି କାଉଁକେ ମଃନ୍‌ ନଃକେଲା ।

35 ତାର୍‌ହଃଚେ ସେମଃନ୍ ଜିସୁକେ କ୍ରୁସ୍‌ ଉହ୍ରେ ଜଃଗାୟ୍‌ ତାର୍‌ ବଃସ୍ତର୍‌କେ କେଳିବାଚି ଅଃହ୍‌ଣା ଅଃହ୍‌ଣାର୍‌ ବିତ୍ରେ ବାଟା କଃରି ନିଲାୟ୍‌ । 36 ଆରେକ୍‌ ସେତି ରଃୟ୍‌ ତାକ୍‌ ଜାଗ୍‌ତି ରିଲାୟ୍‌ । 37 ଆର୍‌ ସେମଃନ୍ ତାର୍‌ ମୁଣ୍ଡ୍ ଉହ୍ରାର୍‌ କ୍ରୁସ୍‌ କାଟେ ଇ ଦଃସାର୍‌ କଃତା ଲେକି ଲାଗାୟ୍‌ଲାୟ୍‌, "ଏ ଜିଉଦିମଃନାର୍‌ ରଃଜା, ଜିସୁ ।" 38 ସଃଡେବଃଳ୍‌ ଜୁଳେକ୍‌ କଃଙ୍ଗାର୍‌ମଃନ୍‌କେ ହେଁ ଜିସୁର୍‌ କାତା ବାଟ ଗଟ୍ ଲକ୍‌କେ ଆର୍‌ ଡେବ୍ରି ବାଟ ଗଟ୍ ଲକ୍‌କେ ତାର୍‌ ସଃଙ୍ଗ୍ କ୍ରୁସ୍‌ ଉହ୍ରେ ଚଃଗାୟ୍‌ଲାୟ୍‌ ।

39 ଆର୍‌ ସେ ବାଟ ଜାତିରିଲା ଲକ୍‌ମଃନ୍‌ ଅଃହ୍‌ଣା ଅଃହ୍‌ଣାର୍‌ ମୁଣ୍ଡ୍ ଜଲାୟ୍‌ ଜିସୁର୍‌ ଲିନ୍ଦା କଃରି କଃଉଁକେ ଦଃର୍ଲାୟ୍‌, 40 ✝"ରେ ମନ୍ଦିର୍‌ ବାଙ୍ଗୁ ଆର୍‌ ତିନିଦିନ୍ ବିତ୍ରେ ସେତାକ୍‌ ତିଆର୍‌ କଃରୁ, ତୁୟ୍‌ ଜଦି ସଃତ୍‌ ଇସ୍ୱରାର୍‌ ହୟିସି, ତଃବେ ନିଜ୍‌କେ ବଚାଉ ଆର୍‌ କ୍ରୁସ୍‌ କାଟେହୁଣି ଉତ୍ରି ଆଉ ।"

41 ବଃଡ୍‌ ଜାଜକ୍‌ ମଃନ୍‌ ହେଁ ଦଃର୍ମ୍‌ଗୁରୁ ଆର୍‌ ପାରାଚିନ୍‌ମଃନାର୍‌ ସଃଙ୍ଗ୍ ମିସିକଃରି ସେବାନ୍ୟା କୟ୍‌କଃରି ଜିସୁକେ ଲିନ୍ଦା କଃରୁକେ ଦଃର୍ଲାୟ୍‌, 42 "ସେ ବିନ୍‌ ସଃବୁ ଲକ୍‌ମଃନ୍‌କେ ରଃକ୍ୟାକଃଲା, ମଃତର୍‌ ଅଃବେ ଅଃହ୍‌ଣାକ୍‌ ବଚାଉଁକେ ନଃହାରୁଲା, ସେ ତ ଇସ୍ରାଏଲାର୍‌ ରଃଜା ସେ ଇ ଦାହ୍ରେ କ୍ରୁସ୍‌ ଉହ୍ରେ ହୁଣି ଉତ୍ରି ଆସ, ତଃବେ ଅଃମିମଃନ୍‌ ତାର୍‌ ତଃୟ୍‌ ବିସ୍ୱାସ୍‌ କଃରୁଆଁ । 43 ସେ ନିଜ୍‌କେ ଇସ୍ୱର୍‌ ହୟିସି ବଃଲି ଇସ୍ୱର୍‌ ଉହ୍ରେ ଆସ୍ର କଃରିଆଚେ, ତଃବେ ଦଃକୁଆଁ ଇସ୍ୱର୍‌ ତାକ୍‌ ଅଃବେ ରଃକ୍ୟା କଃରୁକେ ମଃନ୍‌ କଃରୁଲା କି ନାୟ୍‌ ।"

44 ଆରେକ୍‌ ଜୁୟି କଃଙ୍ଗାର୍‌ମଃନ୍‌କେ ଜିସୁର୍‌ ସଃଙ୍ଗ୍ କ୍ରୁସେ ଚଃଗା ଜାୟ୍‌ ରିଲି, ସେମଃନ୍ ହେଁ ଜିସୁକେ ସେବାନ୍ୟା ଗେଙ୍ଗ୍ରାଉଁକ୍‌ ଦଃର୍ଲାୟ୍‌ ।

45 ହଃଚେ ବାର ଗଃଟାହୁଣି ତିନି ଗଃଟା ହଃତେକ୍‌ ଦେସ୍‌ଜାକ ଅଃନ୍ଦାର୍‌ ଅୟ୍‌ଲି । 46 ଆର୍‌ ହାକାହାକି ତିନି ଗଃଟାବଃଳ୍‌ ଜିସୁ ବଃଡ୍‌ ଟଣ୍ଡ୍ କଃରି କୟ୍‌ଲା, "ଏଲି, ଏଲି, ଲାମା ସାବକ୍‌ତାନି ?" ବଃଲେକ୍‌, "ଏ ମର୍‌ ଇସ୍ୱର୍‌, ଏ ମର୍‌ ଇସ୍ୱର୍‌, ତୁୟ୍‌ ମକ୍‌ କାୟିତାକ୍‌ ଚାଡ୍‌ଲିସ୍‌ ?"

47 ଇରି ସୁଣି ସେତି ଟିଆ ଅୟ୍‌ରିଲା କଃତେକ୍‌ ଲକ୍‌ମଃନ୍‌ କୟ୍‌ଲାୟ୍‌, "ଇ ଲକ୍‌ ଏଲିୟକେ କୁଦୁଲା !" 48 ସେଦାହ୍ରେ ସେମଃନାର୍‌ ବିତ୍ରାର୍‌ ଗଟ୍ ଲକ୍‌ ଦଃବ୍‌ଳି ଜାୟ୍‌କଃରି, ଗଟେକ୍‌ ସ୍ପଞ୍ଜ୍ ଆଣି ତାକ୍‌ ହିତା ଅଙ୍ଗୁର୍‌ ରଃସେ ବୁଡାୟ୍‌କଃରି, ସେତାକ୍‌ ଡାଙ୍ଗ୍ ଟିହେ ବାନ୍ଦିକଃରି ଜିସୁକେ କାଉଁକେ ଦିଲା ।

49 ମଃତର୍‌ ବିନ୍‌ ଲକ୍‌ମଃନ୍‌ କୟ୍‌ଲାୟ୍‌, "ରିଆ, ଏଲିୟ ତାକ୍‌ ବଚାଉଁକେ ଆସୁଲା କି ନାୟ୍‌ ଦଃକୁଆଁ ।"

50 ମଃତର୍‌ ଜିସୁ ଆରେକ୍‌ ଗଟ୍‌ତର୍‌ ଆଉଲି ଅୟି ଆତ୍ମା ଚାଡ୍‌ଲା ।

51 ଆରେକ୍‌ ଦଃକା ମନ୍ଦିର୍‌କେ ଦୁୟ୍‌ ବାଗ୍ କଃର୍ତା ମଃଜାୟ୍‌ ଅଳାୟ୍‌ରିଲା ପର୍ଦା ଉହ୍ରେ ହୁଣି ତଃଳ୍‌ ହଃତେକ୍‌ ଚିରି ଅୟି ଦୁୟ୍‌ ହଳା ଅୟ୍‌ଲି, ଆର୍‌ ବୁୟ୍‌ଁ ଲଃଦ୍‌ବଃଦ୍‌ଲି ଆର୍‌ ଡଙ୍ଗ୍ରାର୍‌ ଟେଳାମଃନ୍ ହୁଟ୍‌ଲି । 52 ଆରେକ୍‌ ମଃସୁଣ୍‌ କାଲ୍‌ମଃନ୍ ମେଲା ଅୟ୍‌ଲି, ଆର୍‌ ଗାଦେକ୍‌ ମଃଲା ଇସ୍ୱରାର୍‌ ପବିତ୍ର ଲଃକ୍‌ମଃନ୍‌ ଉଟ୍‌ଲାୟ୍‌ । 53 ଆରେକ୍‌ ସେମଃନ୍ ମଃରି ଉଟି ମଃସୁଣ୍‌ କାଲେ ହୁଣି ବାରାୟ୍‌ଲାୟ୍‌, ଆର୍‌ ଜିସୁ ମଃରି ଉଟ୍‌ଲା ହଃଚେ, ସେମଃନ୍ ପବିତ୍ର ଜିରୁସାଲମ୍‌ ଗଃଳେ ଗଃଲାୟି ଆର୍‌ ଗାଦେକ୍‌ ଲକ୍‌ମଃନ୍‌କେ ଦଃକାୟ୍‌ ଅୟଃଲାୟ୍‌ ।

54 ହାଁଚ୍ କଳି ସଃଇନ୍‌ମଃନାର୍‌ ମୁଳିକା ଆର୍‌ ତାର୍‌ ସଃଙ୍ଗ୍ ଜୁୟି ଲକ୍‌ମଃନ୍‌ ଜିସୁକେ ଜାଗି ରିଲାୟ୍‌, ସେମଃନ୍ ଦଃର୍ତି ଲଃଦ୍‌ବଃଦ୍‌ଲାର୍‌ ଗଃଟ୍‍ଣା ଦଃକି ବଃଡେ ଡିରିକଃରି କୟ୍‌ଲାୟ୍‌, "ସଃତ୍‌କଃରି, ଏ ଇସ୍ୱରାର୍‌ ହୟିସି ରିଲା ।"

55 ✝ଆରେକ୍‌ କଃତେକ୍‌ ମାୟ୍‌ଜିମଃନ୍ ସେ ଜଃଗାୟ୍‌ ରଃୟ୍‌ ଦୁରିକ୍‌ହୁଣି ଇ ସଃବୁ ଦଃକ୍‌ତି ରିଲାୟ୍‌; ସେମଃନ୍ ଜିସୁକେ ସେବା କଃରି କଃରି ଗାଲିଲି ତଃୟ୍‌ହୁଣି ଜିସୁର୍‌ ସଃଙ୍ଗ୍ ଆସି ରିଲାୟ୍‌ । 56 ସେମଃନାର୍‌ ବିତ୍ରେ ମଗ୍‌ଦଲିନି ମରିୟମ୍‌, ଜାକୁବକ୍‌ ଆର୍‌ ଜସେପାର୍‌ ଆୟ୍‌ସି ମରିୟମ୍‌ ଆର୍‌ ଜେବଦିର୍‌ ହୟିସି ଜାକୁବକ୍‌ ଆର୍‌ ଜହନାର୍‌ ଆୟ୍‌ସି ରିଲାୟ୍‌ ।

57 ବେଳ୍‌ ବୁଡି ଆସ୍ତାବଃଳ୍‌ ଜସେପ୍ ନାଉଁଆର୍‌ ହାରାମାତିଆର୍‌ ଗଟ୍ ମାଜନ୍ ଲକ୍‌ ଆୟ୍‌ଲା; ସେ ହେଁ ଜିସୁର୍‌ ଗଟେକ୍‌ ଚେଲା ରିଲା । 58 ସେ ପିଲାତର୍‌ ହାକ୍‌ ଜାୟ୍‌କଃରି ଜିସୁର୍‌ ଗଃଗାଳ୍‌ ମାଗ୍‌ଲା, ତଃବେ ପିଲାତ ଜିସୁର୍‌ ଗଃଗାଳ୍‌ ଦେଉଁକେ ଆଦେସ୍‌ ଦିଲା । 59 ଜସେପ୍ ଜିସୁର୍‌ ଗଃଗାଳ୍‌କେ ନିଲା ଆର୍‌ ନିର୍ମୁଳ୍‌ ନଃଉଆଁ ହଃଚ୍ୟା ଗୁଳ୍ୟାୟ୍‌, 60 ଜସେପ୍ ଅଃହ୍‌ଣାର୍‌ ଗିନେ ଜୁୟି ନଃଉଆଁ ମଃସୁଣ୍‌ ଡଙ୍ଗ୍ରେ କଃଣିରିଲା, ସେ ବିତ୍ରେ ଜିସୁର୍‌ ମଃଳ୍‌କେ ସଃଙ୍ଗାୟ୍‌ ମଃସୁଣ୍‌ କାଲାର୍‌ ଦୁଆର୍‌ ବାଟେ ଗଟ୍ ବଃଡ୍‌ ଟେଳା ଡାହିକଃରି ଗଃଲାୟି । 61 ମଗ୍‌ଦଲିନି ମରିୟମ୍‌ ଆର୍‌ ବିନ୍‌ ମରିୟମ୍‌ ସେଟାଣେ ମଃସୁଣ୍‌ ଚଃମେ ବଃସି ରିଲାୟ୍‌ ।

62 ତାର୍‌ ଆର୍‌କ ଦିନ୍‌, ବଃଲେକ୍‌ ବିସାଉଁଣିବାର୍‌ ଦିନ୍‌ ବଃଡ୍‌ ଜାଜକ୍‌ ଆର୍‌ ପାରୁସିମଃନ୍ ପିଲାତର୍‌ ଚଃମେ ରୁଣ୍ଡିକଃରି କୟ୍‌ଲାୟ୍‌, 63 ✝"ଏ ଆଜ୍ଞା, ଅଃମିମଃନ୍‌କେ ଏତୁ ହଃଳୁଲି, ସେ ମିଚୁଆ ଜିବନ୍‌ ରିଲା ବଃଳ୍‌ କୟ୍‌ରିଲା, ‘ତିନିଦିନାର୍‌ ହଃଚେ ମୁଁୟ୍‌ ଆରେକ୍‌ ଉଟିନ୍ଦ୍‌ ।’ 64 ସେତାର୍‌ଗିନେ ତିନିଦିନ୍ ହଃତେକ୍‌ ମଃସୁଣ୍‌ ଜାଗୁକେ ଆଦେସ୍‌ ଦେ, ନୟ୍‌ଲେକ୍‌ କେଜାଣ୍ ତାର୍‌ ଚେଲାମଃନ୍ ଆସି ତାର୍‌ ମଃଳ୍‌କେ ଚରିନଃୟ୍‌ ଲକ୍‌ମଃନ୍‌କେ କଃଉତି, ‘ସେ ଜିବନ୍ ହାୟ୍‌କଃରି ଉଟ୍‌ଲା ଆଚେ;’ ସେନ୍‌କାର୍‌ ଅୟିଲେକ୍ ହଃର୍ତୁର୍‌ ମିଚ୍ ତଃୟ୍‌ହୁଣି ହଃଚାର୍‌ ମିଚ୍ ଅଃଦିକ୍‌ କଃରାପ୍‌ ଅୟ୍‌ଦ୍‌ ।"

65 ପିଲାତ ସେମଃନ୍‌କେ କୟ୍‌ଲା, "ଗଟ୍‌ଦଃଳ୍‌ ଜାଗୁଆଳିମଃନ୍‌କେ ନିଆ ଆର୍‌ ଜଃତେକ୍‌ ହାରୁଲାସ୍‌ ସଃତେକ୍‌ ମଃସୁଣ୍‌କେ ଜାଗାଉଆ ।"

66 ତଃବେ ସେମଃନ୍ ଜାୟ୍‌ ସେ ମଃସ୍‌ଣେ ଡାହ୍‌ଲା ଟେଳାୟ୍‌ ମୁଦ୍ରାମାର୍‌ଲାୟ୍‌, ଆର୍‌ ଜାଗୁଆଳିମଃନ୍‌କେ ଜିସୁର୍‌ ମଃସୁଣ୍‌ ଜାଗ୍‌ଲାୟ୍‌ ।