1 जत्यार तु मारु भाय रवतु,
ने मारा खुदेन घराणा मां ती एक रवतु,
ती मे तुसेक बाहर गुळा देती,
ने कुय बी मेसेक गुनाळी नी ठेहरावती।
2 मे तुसेक मारी मायन घर ली जाती,
ने ची मेसेक सीकाड़ती,
ने मे तुसेक मसालु भेसकेलु अंगुरेन रस पीवाड़ती,
ने आपणा अनारेन रस पीवाड़ती।8:2 नीतीवचन 9:2
3 बेसको वारु रवतो, जत्यार तारु डाखर्यु हात,
मारा मुणका तळे रवतु, ने जेवड़्यु हात मेसेक पुमाळतु!
4 ओ यरुसलेम सहरेन पुरे, मे तुहुंंक सगुन खावाड़ीन कवाड़ो,
जत्यार लग सय टेम नी आवे तत्यार लग मारा परम काजे मां जागाड़े, तत्यार लगुन हामु तीनाक नी जागाड़जे।
छटवो गीत
दुस्तीदार
5 जी कुण छे, ची आपसा परम वाळा काजे हात मां धरीन,
रेतवाळी जागा मां सी आवणे बाजी रय?
लाडी
सेवफळेन झाड़का तळे मे तुसेक जागाड़ी।
चां तारी माय तुसेक पयदा करली। चां तारी मायन वेणा छुट्ला।
6 जसु कुय मुहर लागाड़े, तसु तु मेसेक आपसा मन मां मुहरेन तसु लागाड़ ले।
ने तावीजेन तसु आपसा हात मां बांद ले;
काहाकी परम ते मरने सांय ताकतवाळु छे,
ने जलमेन रीस मसाणेन तसी दयाळी नी हय।
तेरा ते आकठान धुदवा सांय छे।
ची छाचलीन भगवानेन धुदवा छे।
7 फुसाटा दीन नदी आवे, तेबी परम उलाये नी,
ने मट्ली नदी फुसाटा दीन आवे, तेबी परम डुबी नी सके।
कदी कुय परमेन बदले आखो माल-धन बी आप देय,
तेबी आखो माल-धन, परम अगळ फालतु ठेहरसे।
लाडीन भायस
8 हामरी एक नान्ली बहणीस छे,
तेरा छात्या हाल लग मटा बी नी हया।
कदी काहनेस दाहड़े हेरा मांगा आय जासे,
ती तीने दाहड़े हामु काय करसु?
9 कदी ची अवारकुट रवती,
ती हामु तेर पर चांदीन मुंडेवरी बणावता;
ने कदी चो बारनो रवतो,
ती हामु तेरे पर देवदारेन लाकड़ान पाट्या लागाड़ता।
लाडी
10 मे अवारकुट रवती,
ने मारा छात्या मीनारेन तसा रवता;
तत्यार मे मारा परम करन्यान नींगा मां सांती लावण्या मुजुक रवती।8:10 यहेजकेल 16:7; 1 राजा 4:24,25
लाडु
11 बाल्हामोन सहर मां राजा सुलेमानेन एक अंगुरेन वाड़ी हतली;
चु ची अंगुरेन वाड़ी किरसाण काजे ठेका पर आप देदु;
हय हरेक किरसाण हीनुक हींद्रा फळ वाटे,
चांदीन एक हजार सीक्का आपतेलु।
12 मारी खुदेन अंगुरेन वाड़ी मारीत वाड़ी छे;
ए सुलेमान, एक हजार रुप्या पर तारु हक छे,
ने दुय सोव रुप्या, फळेन राखवाळी करन्या किरसाण वाटे छे।
लाडु
13 ओ वाड़ी मां रवणी,
मारा दुस्तीदार्या तारी बुली सामळनेन हेर कर रया; मेसेक बी तारी वात सामळाव।
लाडी
14 ए मारा परम वाळा, उतवाळुस आव, ने गंदाण्या मसालान बयड़ा पर हयणान तसु,
जुवान हयणान तसु दवड़ीन आवती रव।