1 Nɔ nyɔ̀ʼ mbəŋ-ɔŋ Bɔɔ nyɔ̀ʼ ŋwɔʼnə-ɔ̄ŋ, ndə Nyii kə séʼ mɔ ndə ŋkʉʉnə tʉʉ-i, ndə məbɛ lɔntəŋ gìe shʉəŋ mu Klai Jiso.

Mɔ nɔ tʉʼ nyɔ̀ʼ tʉ bʉə-Nyii ndə bɔ̂ŋ bɛ mu Ɛfɛso, bʉə ndə bɔ̂ŋ lyʉ̀ʉtə́nə ghɔŋbə Klai Jiso mɔʼɔ. 2 Tə Nyii Tie-yʉʼʉ ghɔŋbə Jiso Klai Tiekətʉ, dʉ̀ʼ buuŋjyu tʉ bii ghɔŋbə fyiighʉ́ənə.

3 B̈ʉʼʉ lə̀ʼtə Nyii, mbʉ Tie Tiekətʉ-yʉʼʉ Jiso Klai ndə ɔ nɔʼ bìʼ bʉʼʉ ndə bʉʼʉ bɛ mu Klai nə ntɛ-bəbiʼ-hə inchəŋ, ndə i gwè hə kəghɔ-LyʉʉhəNyiikə lɔʼɔ ŋguu. 4 Buŋ ndə wʉʉnəmbikə nə kə̂ chʉ́ʉhə, tʉ ɔ nɔʼ kə séʼ bʉʼʉ mbɔ bʉʼʉ bɔŋ bɛ fɔkə imɔʼ, mbɔ bʉʼʉ chʉʼ bɛ ŋkʉʉ təmə kie kwɔtəkə bəshʉ ɔ fɛ. Bʉʼka ŋkʉ̂ʉ-Nyii, 5 ɔ nɔʼ kə shʉ̀tə mbɔ bʉʼʉ bu nə bɛ vâanchinə-bi tíŋ hə bɔ̌ŋ Jiso Klai, ɔ nɔ nə chìi haʼ ndə ɔ nɔʼ kə shʉ̀tə ndə ŋkʉʉnə tʉʉ-i.

6 Ɔ nɔ nə chìi nɔ mbɔ bʉʼʉ chʉʼ kə́ lə̀ʼtə ɔŋ, bʉʼka fɔŋ buuŋjyu-i ndə ɔ dʉ̀ʼ tʉ bʉʼʉ, tíŋ hə bɔ̌ŋ Vaa-ɛ ndə ɔ kʉ̀ʉ daa. 7 Ɔ nɔʼ chʉ̀ʼ tʉkə-ʉʼʉ nə fɔbʉə-Jiso-Klai-kə*, bɔŋleʼ sʉ̀fyii hə ndəŋ bʉ̂ʼtə-ʉʼʉ, yɔ̄ŋ-yə nɔ bɛ bʉʼka buuŋjyu yɔ́ŋyɔ́ŋ-ɛŋ, 8 ndə ɔ véʼ ndəŋ bʉʼʉ yɔ́ŋyɔ́ŋ, nə mukətʉ-súunə leʼnə ŋkwɔʼtə jyujyu.

9 Nyii chìi bʉʼʉ kínə nubə ndə ɔ kə kʉ̀ʉ, lə̀ŋ bətɔ-ɔ haʼ ndə ɔ nɔʼ kə shʉ̀tə mbɔ Klai fɔ̀ʼ nubə ndə ɔ kʉ̀ʉ. 10 Nubə-ɔ̄ŋ ndə Nyii nɔʼ kə shʉ̀tə nɔ, ɔ bu mìʼtə ndʉʉ ndə ŋgwɔʼmbi bu yi kʉ̀ʼnə, ɔ chìi fɔbə inchəŋ bɛ nukə imɔʼ Klai kə́ gìe kətʉ-bɔŋ, fɔbə ndə i bɛ yuo ghɔŋbə fɔbə ndə i bɛ kəchisê. 11 Nyii nɔʼ kə séʼ baʼa mbɔ baʼa bɛ yi-yə bʉə ndə bɔ̂ŋ bɛ nukə imɔʼ ghɔŋbə Klai, bʉʼka nukə ndə ɔ tʉʼ kʉ́ʉ nɔ bɛ nɔ ndə ɔ nɔʼ kə shʉ̀tə mbɔ i bu yi bɛ, nubə ndə i bɛ mu fyii-ɔ nɔ bɛ mbɔ nubə inchəŋ yi bɛ haʼ ndə ɔ kə shʉ̀tə. 12 Ɔ nɔ nə chìi nɔ mbɔ mbəŋ-yaʼ ndə baʼa kə bɛ fəŋ ndə məyʉ́əʼnə ndəŋ məgwè-Klai, chʉʼ kə́ lə̀ʼtə Nyii ndə məgʉə-e. 13 Mbəŋ-yii ghɔ nɔ nə leʼ bɛ vâa-Nyii, ndʉʉ ndə bii kə yʉ́ ŋgie-shʉəŋ-kə, kə́ bɛ ntəŋjyujyu ndə i kə kwáa bii. Ndʉʉ ndə bii kə bɛ́ŋ Jiso Klai, Nyii chèʼ bii nə Lyʉʉhəkə-i haʼ ndə ɔ nɔʼ kə kɔ̀ʼnə. 14 Mbʉ kəLyʉʉhəNyii ndə bʉʼʉ kə kie, nɔ tʉʼ dʉ̀ʼ mbɔ bʉʼʉ bu yi kie fɔbə ndə Nyii nɔʼ kə kɔ̀ʼnə tʉ bʉʼʉ, ndʉʉ ndə Nyii bu yi kɛŋ chʉ̀ʼ tʉkə-ʉʼʉ gɛ̀ kùu. Yɔ̄ŋ-yə bu chìi bʉə lə̀ʼtə Nyii bʉʼka məgʉə-e.

15 Bʉʼka nchəŋnchəŋ bənu ndə Nyii nɔʼ fɔ̀ʼ, lʉ̀ hə mbi ndə mɔ kə yʉ́ ndə bii mɔ̀ʼfyiihə-ii ndəŋ Jiso Tiekətʉ, leʼnə ntɛ-ŋkʉ̂ʉ ndə bii kə kie ndəŋ bʉə-Nyii bənchəŋ, 16 mɔ chʉʼ nə káa ndə məkɔ́ ndɔ tʉ Nyii yie-bii fɛ, kə́ kwɛ́nə bii ndʉʉ ndə mɔ tʉʼ gháaNyii, 17 mbɔ N̈yii mbʉ Tie-məgʉ́ə, ndə ɔ bɛ Tie Tiekətʉ-yʉʼʉ Jiso Klai, kɔ́ bii nə fyii ndə məkie mukətʉ-súunə ndə i gwè hə kəghɔ-LyʉʉhəNyiikə bɔŋleʼ kɛ̀ʼ ŋwɔŋ-ɛŋ tʉ bii mbɔ bii kínə ɔŋ jyujyu, 18 mbɔ b̈ə ŋɔ́ʼhə shʉ mu fyiihə-ii, mbɔ b̈ii nyíɛ nukə ndə ɔ kə tíi bii, b̈ii yʉ́əʼnə chɔ b̈ii kə́ chyìi ndə məkie, ghɔŋbə buŋmbi fɔ-jyujyu-bə ndə ɔ nɔʼ kɔ̀ʼnə tʉ bʉə-bi. 19 Bɔŋleʼ nyíɛ ntɛ fɔŋ kəghʉəʼ təmə fʉʼ-e ghɔ fɛ ndə ɔ kie tʉ bʉʼʉ ndə bʉʼʉ bɛ́ŋ ɔŋ. Ghʉəʼkə-ɔ̄ŋ ndə i tʉʼ fɔ̀ʼ mu bʉʼʉ nɔ, nɔ bɛ ntɛ-fɔŋ-kəghʉəʼ ndə ɔ kie, 20 nɔ bɛ ntɛ-kəghʉəʼ ndə ɔ kə bʉ̀nə kóʼhə Klai nə yɔŋ, ndʉʉ ndə ɔ kə kwú, dùʼhə ɔŋ kwiiləŋ Nyii mu njəŋ-yuo-hə, 21 nɔ yəŋkə ndə Jiso Klai tʉʼ sɔ́ʼ bʉəkwɛʼtəŋ chɔ bənchəŋ ndə bɔ̂ŋ tʉʼ sɔ́ʼ njəŋ-yuo-hə, bʉəkwɛʼtəŋ leʼnə bʉə kəghʉəʼ leʼnə bətiekətʉ. Yetəkə-i nɔ chàa yetəbə inchəŋ ndə i bɛ kəchisê fɛ̄ŋ laa inchəŋ leʼnə mbi ndə i bɛ bəshʉ gwè. 22 Ɔ chìi ɔ kə́ gìe kətʉ fɔbə inchəŋ bɔŋleʼ chìi ɔ kə́ gìe kətʉ fɔbə inchəŋ mu chɔshi, 23 ndə bɛ mbʉə-e, Klai kwóhə chɔshi nə ghʉəʼkə-i inchəŋ, ɔ bɔŋleʼ kwóhə fɔbə inchəŋ ndə yəŋbə inchəŋ nə ghʉəʼkə-i.