1 Nɔ nyɔ̀ʼ Bɔɔ ndə ghɔŋ Timɔti bɛ vâafɔʼɔ-Klai Jiso nyɔ̀ʼ ŋwɔʼnə-ɔ̄ŋ, kə́ tə́ŋ tʉ bʉə-Nyii bənchəŋ ndə bɔ̂ŋ nɔʼ fúu nuɔ ghɔŋbə Klai Jiso, kə́ bɛ mu kəyəŋkwɛʼtəŋ Filibai, ghɔŋbə bəntəŋbəshʉ ndə bɔ̂ŋ tʉʼ lɛ́nə bʉə-Nyii leʼnə bəŋgʉə.

2 Tə Nyii Tie-yʉʼʉ ghɔŋbə Jiso Klai Tiekətʉ, dʉ̀ʼ buuŋjyu tʉ bii bɔŋleʼ kɔ́ bii nə fyiighʉ́ənə.

3 Mɔ nɔ tʉʼ kɔ́ ndɔ Nyii təvɛʼtəvɛʼ ndə mɔ kwɛ́nə bii. 4 Vɛʼtəmiyɔŋ ndə mɔ gháaNyii tʉ bii bənchəŋ nɔ, mɔ kə́ gháa nə tʉʉjyu, 5 bʉʼka ntɛ ndə bii nɔʼ kə fúu ghɔkə bʉʼʉ ndə məlɔ̀ʼ ntəŋjyujyu, lʉ̀ hə ndəŋ fəŋ kəchî ndə bii bɛ́ŋ Nyii tə gwè dàa laa. 6 Nɔ, mɔ nɔ kɛŋ kínə shʉəŋ mbɔ Nyii ndə ɔ kə chʉ́ʉhə fɔʼɔ-jyujyu-ɔ̄ mu mbʉə-bii, bu gɛ̀ nə yɔŋ nə shʉbə tə liʼ ndə Chîkə ndə Klai Jiso bu bʉ̀nə gwè chɔ. 7 I nɔ kʉ̀ʼnə tʉ mɔ ndə məkie ntɛ-ŋkwɔʼtə-ɔ̄ŋ te bii, bʉʼka mɔ nɔ kie nukə-ii mu fyii-mɔ, bʉʼka bii bənchəŋ nɔ lʉ̀ yʉʉ ndə kɔ-buuŋjyu-kə ndə Nyii nɔʼ kɔ́ tʉ mɔ, nduɔ ndə mɔ bɛ ndəŋ ntɔɔnə ghɔŋbə vɛʼ ndə mɔ kə mə túunə mbʉ ntəŋjyujyu fɛ bɔŋ ndə mə-leʼ-dʉ̀ʼ mbɔ nɔ bɛ shʉəŋ. 8 Bəkɔ Nyii nú gwù ɔ, mbɔ nukə ndə mɔ tʉʼ ghɔ̀ŋ mbɔ mɔ kie fyii ndəŋ bii bənchəŋ, nɔ gwè hə ndəŋ buuŋjyu ndə Klai Jiso kɔ́ tʉ mɔ. 9 Bɔŋ kə́ bɛ gwia-ɔ tʉ Nyii mbɔ ŋkʉ̂ʉ ndə bii kʉ̀ʉ ŋwɔŋtə-ii nə yɔŋ-yə bu kə́ bìʼ gɛ̀ nə shʉbə yɔ́ŋyɔ́ŋ, bii bɔŋleʼ kie ndaa ghɔŋbə mətúhə nubə inchəŋ, 10 mbɔ bii chʉʼ kínə məséʼ fɔkə ndə i kɛŋ bʉ̀ʉ daa. Yɔ̄ŋ-yə, bu chìi bii bɛ bʉə shʉəŋ, təmə kwɔtəkə ndəŋ Chîkə ndə Klai bu gwè chɔ fɛ. 11 Məchimbi-yii bu bɛ ilə́ŋnə nə ntɔŋmə kə́ bɛ f̃ɔʼtə ndə i bɛ ndyʉndyʉ, ndə kɔ́ haʼ Jiso Klai tətɛʼ ɔ, ndə i bu gwè nə məgʉ́ə tʉ Nyii ghɔŋbə mələ̀ʼtə ɔŋ.

12 Bəliŋ-bɔŋ, mɔ nɔ tʉʼ kʉ́ʉ mbɔ bii kínə mbɔ nukə ndə i kə fyú tʉ mɔ, nɔʼ chìi bə bìʼ kɛŋ lɔ̀ʼ ntəŋjyujyu gɛ̀ nə shʉbə. 13 Bʉʼka yɔ̄ŋ-yə, bəsɔge ndə bɔ̂ŋ tʉʼ chyìi ntoʼ-Fɔŋ-Luŋ bənchəŋ ghɔŋbə bəbɛʼbʉə bənchəŋ nɔ kínə mbɔ mɔ nɔ bɛ chaŋ bʉʼka mɔ nɔ bɛ vaafɔ̀ʼ-Klai. 14 Bʉʼka məbɛ ɔ mu njaa-chaŋ nɔʼ chìi bʉə buŋmbi ndə bɔ̂ŋ nɔʼ bɛ́ŋ Tiekətʉ fɛ̄ŋ, kie fyii shʉ́əshʉ́ə ndə məkwə́ʼ ŋgieNyiikə nə fyii tə́nə təmə kə́ fàa fɛ.

15 Ndə ŋgie-shʉəŋ-kə, bəbɛʼbʉə nɔ tʉʼ lɔ̀ʼ ntəŋjyujyu te Klai nə məbàabʉʉ ghɔŋbə shʉnə, bɔŋ bəbɛʼbə kə́ lɔ̀ʼ nə mu fyii jyujyu, 16 bʉə-bɔ̄ŋ nɔ tʉʼ lɔ̀ʼ nə ŋkʉ̂ʉ, kə́ kínə mbɔ bə nɔ fʉ̀əŋ mɔ fɛ̄ŋ bʉʼka mɔ nɔ kə kə́ túunə ntəŋjyujyu. 17 Bəbɛʼbʉə-bīŋ kə́ lɔ̀ʼ ntəŋjyujyu te Klai nə məshʉ́nə mbi təmə bə nə mu fyii shʉəŋ fɛ, kə́ kwɔ̀ʼtə bə ndə məmɔ̀ʼ ŋgʉəʼ kətʉ-mɔ mu njaa-chaŋ. 18 Bɛ kabɛʼkə nduɔ? Nɔ bɛ haʼ mbɔ ndə fiatə inchəŋ, kə bɛ məlàhə shʉ, kə bɛ nə shʉəŋ loo, nchəŋnchəŋ-ɛŋ nɔ bɛ mbɔ bə tʉʼ lɔ̀ʼ yie-Klai gɛ̀ nə shʉbə, ndə maa-yɔ̄ŋ, tʉʉ-ɔ kə́ bʉ̀ʉ chɔ. Ɔŋ, tʉʉ-ɔ bɔŋ bu kə́ bìʼ bʉ̀ʉ gɛ̀ nə shʉbə, 19 bʉʼka mɔ nɔ kínə mbɔ tíŋ hə bɔ̌ŋ gwia-yii, leʼnə ŋkwaa ndə i gwè hə kəghɔ Lyʉʉhə-Jiso-Klai-kə, bu chìi bə fyúhə mɔ.

20 Mɔ nɔ tʉʼ mʉ̀ʉ shʉ́əshʉ́ə bɔŋleʼ kə́ yʉ́əʼnə ndəŋ Nyii mbɔ bə kʉʉnə mɔ̀ʼ tʉvyiikə-ɔŋ məniʼ fɛ, bɔŋ nə fyii shʉ́əshʉ́ə ndə mɔ kie nduɔ haʼ ndə m̃ɔ kie təvɛʼtəvɛʼ, mɔ bu kɔ́ kuŋhə tʉ Klai nə mbʉə-ɔ kaʼ kʉ̌ʉ bɛ ndʉʉ ndə mɔ tʉʼ chí mbi byuunɔ nɔʼ kwú. 21 Bʉʼka tʉ mɔ, məchimbi-ɔ nɔ bɛ ndə məkɔ́ kuŋhə tʉ Klai, ndə məkwú kə́ bɛ sii. 22 Kaʼ mɔ kə́ chí mbi nə woməsʉʉ, i bɛ ndə məkwáa bʉə buŋmbi. Bɔŋ yi ndə məséʼ, mɔ kínə fɛ. 23 Mɔ nɔ tə́nə ntɔʼnə ŋgwɔŋ ndə nu-maa-bə-ɔ̄ŋ. Bɔŋ ŋkʉʉnə tʉʉ-ɔ nɔ bɛ mbɔ mɔ lɔ̀ kəwʉʉnəmbi-fɛ̄ŋ gɛ̀ bɛ baʼa Klai, bʉʼka maa-yɔ̄ŋ nɔ bʉ̀ʉ yɔ́ŋyɔ́ŋ. 24 Bɔŋ ndə məgòʼ kəwʉʉnəmbi-fɛ̄ŋ nə mbɔʼ-mbʉə-ɔ nɔ bʉ̀ʉ tʉ bii yɔ́ŋyɔ́ŋ bʉʼka bii bu kə́ kʉ́ʉ mɔ.

25 Mɔ nɔ kínə yɔ̄ŋ-yə shʉəŋ, mbɔ mɔ bu káa kəwʉʉnəmbi fɛ̄ŋ, bʉʼʉ bənchəŋ bɛ mɔʼɔ, mbɔ i chʉʼ chìi bii gɛ̀ nə shʉbə bɔŋleʼ kie tʉʉjyu ndə məmɔʼfyiihə-ii ndəŋ Jiso Klai, 26 mbɔ ndʉʉ ndə mɔ bu bìʼ gwè tʉ bii nɔ, bii kie buŋ luu yɔ́ŋyɔ́ŋ ndə məŋàʼtə mu Klai Jiso bʉʼka nukə ndə ɔ tʉʼ fɔ̀ʼ tíŋ hə bɔ̌ŋ mɔ.

27 Fɔŋ-kənu nɔ bɛ haʼ mbɔ məchimbi-a nɔ kie ndə məbɛ ntɛ ndə ntəŋjyujyu te Klai tʉʼ dʉ̀ʼ mbɔ ï bɛ, mbɔ kə mɔ gwè nyíɛ bii byuunɔ gòʼ təmə gwè fɛ, mɔ kə́ yʉ́ haʼ mbɔ bii la tə́nə shʉ́əshʉ́ə nə Lyʉʉhəkə imɔʼ, kə́ kɔ̀ɔtə ntuo nə mbyu wo-imɔʼ bʉʼka məmɔ̀ʼfyiihə ndəŋ ntəŋjyujyu, 28 təmə kə́ fàa bʉə-bàa-bii ndə nubɛʼkə təmiyɔŋ fɛ. Yɔ̄ŋ-yə inchəŋ nɔ bɛ cheʼkə ndə mədʉ̀ʼ tʉ bɔŋ mbɔ bɔ̂ŋ la bu kwú bɛ́, bɔŋ bii bu kie ŋkwaaNyii, bʉʼka nɔ chìi Nyii mbɔ nubə-ɔ̄ŋ inchəŋ bɛ nɔ. 29 Bʉʼka Nyii kə dʉ̀ʼ buuŋjyu tʉ bii bə haʼ ndə məmɔʼfyiihə-ii ndəŋ Klai fɛ, bɔŋ b̈ii nyíɛ ŋgʉəʼ ghɔ yie-Klai, 30 ndə bii tʉʼ mɔ̀ʼ haʼ ntɛ-chɔ̂ ndə bii kə nyíɛ mɔ muŋgɔ, bɔŋleʼ yʉ́ nduɔ mbɔ mɔ bíe haʼ muŋgɔ mɔ̀ʼ.