1 Wo-Falasibɛʼ nɔ nə bɛ ghɔ ndə yie-e kə bɛ Nikodemu, ɔ kə́ bɛ mbyu wokwɛʼtəŋ-bʉə-Juu. 2 Wo-ɔ̄ gwè tʉ Jiso ndʉʉbətyuʼ, ghɔ̀ŋ tʉ ɔŋ mbɔ, "Labi, baʼa nɔ kínə mbɔ a nɔ bɛ chicha ndə a gwè hə bəshʉ-Nyii, bʉʼka wo mə chìi nubəcheʼbə-ɔ̄ŋ ndə a tʉʼ chìi nɔ təmə ghɔŋ Nyii kə́ bɛ mɔʼɔ fɛ." 3 Jiso bə̀ŋhə tʉ ɔŋ mbɔ, "M̈ɔ kɛŋ shyíi a nə shʉəŋ mbɔ kaʼ bə gòʼ təmə bʉ̀nə bìʼ * bí wo fɛ, ɔ mə nə kie yəŋkə mu Sɔ́ʼ-Nyii fɛ."

4 Nikodemu ghɔ̀ŋ tʉ ɔŋ mbɔ, "Bəkɔ bə bʉ̀nə bìʼ bí wo təka, tʉ ɔ nɔʼ tə́ŋ? Bəkɔ ɔ bʉ̀nə bìʼ ŋíi bətɔ-ŋkwê-i mbɔ b̈ə bʉ̀nə bí ɔ mɛ?"

5 Jiso bə̀ŋhə mbɔ, "M̈ɔ kɛŋ shyíi a nə shʉəŋ mbɔ kaʼ bə gòʼ təmə bʉ̀nə bí wo nə muu leʼnə LyʉʉhəNyiikə fɛ, ɔ mə nə ŋíi mu Sɔ́ʼ-Nyii fɛ. 6 W̃oməsʉʉ nɔ bí haʼ woməsʉʉ ndə ɔ, LyʉʉhəNyiikə bɔŋ-kə́-leʼ bí haʼ lyʉʉhəkə mu mbʉə wo. 7 Kə i mə chàa a, ndə mɔ ghɔ̀ŋ tʉ bii mbɔ, ‘Bə nɔ kie ndə məbʉ̀nə bìʼ bí a’ fɛ. 8 F̃ʉʉkə nɔ fʉ̀ʉ gɛ̀ nə yəŋkə ndə i kʉ̀ʉ, a yʉ́ mədùŋ-iŋ bɔŋ təmə kínə yəŋkə ndə i lɔ̀ hə chɔ, təmə bɔŋleʼ kínə yəŋkə ndə i tʉʼ gɛ̀ chɔ fɛ. Nɔ bɛ haʼ nɔ ndə i bɛ tʉ wotəmiyɔŋ ndə LyʉʉhəNyiikə nɔʼ bí ɔ."

9 Nikodemu ghɔ̀ŋ tʉ ɔŋ mbɔ, "Bəkɔ nubə-ɔ̄ŋ bɛ nɔ ntɛ təka?"

10 Jiso bə̀ŋhə tʉ ɔŋ mbɔ, "A bɛ chichakwɛʼtəŋ-bʉə-Isilɛ təmə bɔŋ kínə nubə-ɔŋ fɛ təka? 11 M̈ɔ kɛŋ shyíi a nə shʉəŋ mbɔ b̃aʼa nɔ kwə́ʼ nukə ndə baʼa kínə, kə́ nú gwù kənu ndə baʼa nɔʼ nyíɛ, təmə bii bɔŋ bɛ́ŋ nukə ndə baʼa tʉʼ gìe fɛ. 12 Kaʼ mɔ shyíi bii nə nu-kəwʉʉnəmbi-bə təmə bii bɛ́ŋ fɛ, bəkɔ bii bɛ́ŋ təka kaʼ mɔ shyíi bii nə nu-yuo-bə? 13 Wo chʉʼ nə kóʼ gɛ̀ yuo fɛ, yaʼkɛŋ wo ndə ɔ kə shíʼ gwè hə yuo, kə́ bɛ Vaa-Woməsʉʉ. * 14 Haʼ ndə Mushi kə chɔ̀ʼhə yɔ kɔ́ ghɔʼ mu kwɔŋkəyəŋnə, bə nɔ kie ndə mə-yaʼ-chɔ̀ʼhə Vaa-Woməsʉʉ haʼ nɔ kɔ́ ghɔʼ ghɔ, 15 mbɔ wotəmiyɔŋ ndə ɔ bɛ́ŋ ɔŋ, bu kie məchímbi təmə liʼ-i ghɔ fɛ.

16 "Bʉʼka Nyii nə kʉ̀ʉ wʉʉnəmbikə yɔ́ŋyɔ́ŋ mənɔ, ɔ kɔ́ mbyu Vaa-ɛ imɔʼ mbɔ wotəmiyɔŋ ndə ɔ bɛ́ŋ ɔŋ, bíeleʼnə kwú bɛ́ fɛ, bɔŋ bu kie məchímbi təmə liʼ-i ghɔ fɛ. 17 Nyii kə tə́ŋ Vaa-ɛ, kɔ́ kəwʉʉnəmbi mbɔ ɔ̈ gwè chʉ̀ə ŋkwɛ tʉ bʉə-bʉəbʉə fɛ, bɔŋ ɔ nɔ nə gwè mbɔ ẅʉʉnəmbikə kie ŋkwaaNyii tíŋ hə bɔ̌ŋ ɔŋ. 18 Wotəmiyɔŋ ndə ɔ bɛ́ŋ ɔŋ, bə kʉʉ chʉ̀ə ŋkwɛ-ɛ bʉəbʉə fɛ, bɔŋ wotəmiyɔŋ ndə ɔ gòʼ təmə bɛ́ŋ ɔŋ fɛ, bə nɔʼ chʉ̀ə ŋkwɛ-ɛ bʉəbʉə, bʉʼka ɔ bɛ́ŋ mbʉ mbyu VaaNyii imɔʼ fɛ. 19 Nɔ bɛ luu-mbʉ-ŋkwɛ nɔ, mbɔ kɛʼɛ nɔʼ gwè kəwʉʉnəmbi, bʉəməsʉʉ bɔŋ kʉ̀ʉ bə njəŋkə tə chàa mbʉ kɛʼɛ bʉʼka nchiinə-bənu-hə-ʉə nɔ bɛ bʉəbʉə. 20 Bʉʼka wotəmiyɔŋ ndə ɔ tʉʼ fɔ̀ʼ bʉ̂ʼʉ nɔ bàa kɛʼɛ təmə kʉ̀ʉ ndə məgwè mbʉə mbʉ kɛʼɛ fɛ bʉʼka i mə kɛ̀ʼ nu-bʉəbʉə-bə-i. 21 Bɔŋ wotəmiyɔŋ ndə ɔ tʉʼ gìe shʉəŋ nɔ kʉ̀ʉ ndə məgwè mbʉə mbʉ kɛʼɛ, mbɔ b̈ə chʉʼ nyíɛ jyujyu mbɔ ɔ̃ nɔ fɔ̀ʼ, kə́ yʉ́ chu-Nyii."

22 Yɔ̄ŋ-yə kʉ̂ʉ tíŋ, Jiso ghɔŋbə vâafɔʼɔ-bi lɔ̀ gɛ̀ mu lɔʼɔ Judia gɛ̀ kə́ chí ghɔŋ bɔŋ chɔ, bɔŋ-kə́-leʼ kɔ́ muu.

23 Jɔŋ nɔ kə́ kɔ́ muu mu Anu ndə i bɛ mbʉə Saliŋ bʉʼka muu nɔ nə yɔŋ chɔ, bʉə bɔŋleʼ kə́ gwè fí muu. 24 (Nɔ kə bɛ vɛʼ nɔ ndə bə kə gòʼ təmə nɔʼ fʉ̀əŋ Jɔŋ mu njaa-chaŋ fɛ.) 25 Ndʉʉghɔfii, wo-Juubɛʼ chʉ́ʉhə mətúŋ bəŋʉʉ ghɔŋbə vâafɔʼɔ-Jɔŋ te məbúu ŋwɔŋ. 26 Bɔ̂ŋ gwè tʉ Jɔŋ ghɔ̀ŋ tʉ ɔŋ mbɔ, "Chicha, wo-ē ndə bii ɔ kə bɛ mɔʼɔ njəŋ ŋgwɛŋ Jodaŋ, wo ndə a kə́ kwə́ʼ te ɔ le, nyíɛ, ɔ le kə́ kɔ́ muu, bʉə bənchəŋ kə́ gɛ̀ tʉ ɔŋ."

27 Jɔŋ bə̀ŋhə mbɔ, "Wo mə kie mbyu kəfɔ imɔʼ fɛ, yaʼkɛŋ mbɔ kɔ́ Nyii tʉ ɔŋ. 28 Mbəŋ-yii bənchəŋ nɔ bu nú gwù ɔ ndəŋ nukə ndə mɔ kə ghɔŋ, mbɔ mɔ kaa mbʉ Wo ndə Nyii Kùŋ Tə́ŋ fɛ, bɔŋ bə nɔ kə tə́ŋ mɔ ndə məgwè bəshʉ, ɔ buŋ yi gwè. 29 Nɔ kie ləŋ-woke ndə ɔ tʉʼ chìi lɔŋ, kie ɔ. Tieŋkɔŋ-mbʉ-woləŋ nɔ kə tə́nə mbʉə ɔ, tʉʉ-i kə́ bʉ̀ʉ daa ndʉʉ ndə ɔ tʉʼ yʉ́ gyʉʉ mbʉ tieŋkɔŋ-ɛŋ ndə ɔ tʉʼ kwə́ʼ. Nɔ yɔ̄ŋ-yə nɔ ndə tʉʉ-ɔ nɔʼ bʉ̀ʉ nduɔ tə gɛ̀ lìʼ. 30 Yie-e nɔ kie ndə məkóʼ ghɔʼ, yie-ɔ kie ndə məshíʼ sê.

31 "Wo ndə ɔ shíʼ kweghɔʼ nɔ gʉ́ə chàa bʉə bənchəŋ. Bɔŋ wo ndə ɔ gwè hə kəchisê, nɔ bɛ tʉ chisêkə bɔŋ-kə́-leʼ kwə́ʼ bə kwə́ʼ kəchisê. Wo ndə ɔ shíʼ hə yuo nɔ gʉ́ə chàa bʉə bənchəŋ. 32 Ɔ nɔ gwè kə́ fʉ̀ʼtə nubə ndə ɔ nyíɛ bɔŋleʼ yʉ́, təmə wo bɔŋ bɛ ghɔ ndə məbɛ́ŋ kwəʼ-ɛ fɛ. 33 Wotəmiyɔŋ ndə ɔ bɛ́ŋ kwəʼ-ɛ nɔʼ jìe ghɔkə-i mbɔ Nyii nɔ bɛ wo-shʉəŋ. 34 Bʉʼka wo ndə Nyii nɔʼ tə́ŋ ɔŋ, nɔ tʉʼ kwə́ʼ ŋgieNyiikə bʉʼka Nyii nɔʼ kɔ́ Lyʉʉhəkə-i tʉ ɔŋ təmə fʉ̀ʼfʉ̀ʼ fɛ. 35 Mbʉ Tie nɔ kʉ̀ʉ mbʉ Vaa-ɛ, nɔʼ kɔ́ fɔbə inchəŋ mu kəghɔ-ɔ. 36 Wotəmiyɔŋ ndə ɔ bɛ́ŋ mbʉ Vaa nɔʼ kie məchímbi təmə liʼ-i ghɔ fɛ, bɔŋ wotəmiyɔŋ ndə ɔ gòʼ təmə kə́ yʉ́ chu mbʉ Vaa fɛ kʉʉ nə kie məchímbi fɛ, bɔŋ tʉʉbʉə-Nyii bu káa kətʉ-ɔ."