Lucas 16

Chəŋ-vaafɔ̀ʼkwɛʼtəŋ-kə ndə shʉ-i súunə

1 Jiso ghɔ̀ŋ tʉ vâafɔʼɔ-bi mbɔ, "Wo-kəfʉʼbɛʼ nɔ nə bɛ ghɔ ndə ɔ kie vaafɔ̀ʼ-ɛ, ɔ kə́ lɛ́nə fɔbə-i, bə mɔ̀ʼ nukə kətʉ mbʉ vaafɔ̀ʼkwɛʼtəŋ-ɛŋ mbɔ ɔ la tʉʼ chìi mbunə nə fɔbə-i. 2 Mbʉ wo-kəfʉʼ tíi ɔ, bíʼtə tʉ ɔŋ mbɔ, ‘Bɛ ka ndə mɔ tʉʼ yʉ́ te nə naŋ la? Nyɔ̀ʼ, shyíi mɔ nə ntɛ ndə a tʉʼ tɛ́nɛ nubə nə kyʉə ghɔŋbə fɔbə, bʉʼka fɔʼɔ-a nɔʼ lìʼ laa.’

3 "Mbʉ vaafɔ̀ʼkwɛʼtəŋ ghɔ̀ŋ tʉ ŋwɔŋ-ɛŋ mbɔ, ‘Mɔ bu bɛ təka? Tiefɔʼ-ɔ tʉʼ kʉ́ʉ jə̀ŋ mɔ ndə yəŋ-fɔ̀ʼ-kə-ɔŋ. Mɔ kie ghʉəʼkə ndə mələ̀ŋ ndəŋkə fɛ, tʉkə-ɔŋ bɔŋ kə́ vyíi ndə ghaabə. 4 Mɔ nɔ kínə nukə ndə mɔ bu chìi, kaʼ mɔ bɛ́ fɔʼɔ-ɔ fɛ̄ŋ, bʉə chʉʼ fí mɔ mu njaa-bɔŋ.’

5 "Ɔ gyʉ̀əhə ntəŋhə tʉ bʉə-ŋkwo-tiefɔʼ-ɛ mbɔ bɔ̂ŋ la gwè nyíɛ ɔŋ. Ɔ bíʼtə tʉ fəŋ mbɔ, ‘Kyʉə-tiefɔʼ-ɔ bɛ kəghɔ-a ntyʉʉ təka?’ 6 Ɔ bə̀ŋhə mbɔ, ‘Bəjɔkə-məŋgwo ghyʉʉ.’ Mbʉ vaafɔ̀ʼkwɛʼtəŋ gìe tʉ ɔŋ mbɔ, ‘Dùʼ sê gyʉ̀əhə ŋkwo-a yəŋbə ibûu.’

7 "Ɔ bíʼtə tʉ biitəkə mbɔ, ‘Ya-yə bɛ ntyʉʉ təka?’ Ɔ bə̀ŋhə mbɔ, ‘Bəkwo-lɛshi ghyʉʉ.’ Ɔ gìe tʉ ɔŋ mbɔ, ‘Nyɔ̀ʼ ŋwɔʼnə fefe ndə məshyʉ̀ʉ gyʉʉ mbɔ nɔ bɛ wuŋ fɔŋ.’ Ɔ fɔ̀ʼ haʼ nɔ nə bʉə bənchəŋ ndə bɔŋ kie ŋkwo tiefɔʼ-ɛ.

8 "Ndʉʉ ndə mbʉ tiefɔ̀ʼ yʉ́ yɔ̄ŋ-yə, ɔ bɛ́ŋ mbʉ wo-fɔ̀ʼ bʉəbʉə bʉʼka mbɔ ɔ fɔ̀ʼ nə shʉ súunə. Bʉə-kəwʉʉnəmbi nɔ kínə ntɛ-kənu ndə bɔŋ tʉʼ fɔ̀ʼ nə ntɛ-yʉə, bɔŋ bʉə ndə bɔ̂ŋ kínə Nyii kaa nɔ fɛ." 9 Jiso gɛ̀ nə shʉbə ghɔ̀ŋ mbɔ, "Lʉ̀ fɔ-kəwʉʉnəmbi-bə-ɔ̄ŋ, chìi bətiekənu chɔ kəchisê-fɛ̄ŋ, mbɔ ndʉʉ ndə i bu mì nɔ, Nyii fí a ntoʼ-ɔ təmə i mə nə lìʼ fɛ.

10 "Wotəmiyɔŋ ndə bəkɔ ɔ gìe shʉəŋ ndəŋ vaa-kəfɔ tîetîe, bəkɔ ɔ gìe shʉəŋ ndəŋ ŋkwê kəfɔ. Wo ndə ɔ mə gìe shʉəŋ ndəŋ vaa-kəfɔ məniʼ fɛ, ɔ mə gìe shʉəŋ ndəŋ ŋkwê kəfɔ fɛ. 11 Kaʼ bə gòʼ təmə nyíɛ bii ndə bʉə-shʉəŋ ndəŋ fɔ-kəwʉʉnəmbi-bə-ɔ̄ŋ fɛ, bii kwɔ̀ʼtə mbɔ bu kɔ́ nda kɔ́ ŋkɛŋ kəfʉʼ tʉ bii? 12 Kaʼ bii gòʼ təmə gìe shʉəŋ ndəŋ fɔ-wo-kədɔŋ-bə fɛ, bii kwɔ̀ʼtə mbɔ bu kɔ́ nda kɔ́ fɔbə tʉ bii ndə bu bɛ yii-yə?

13 "Vaafɔ̀ʼ mə kie bətiefɔʼɔ bəbûu fɛ, bʉʼka ɔ bu bàa imɔʼ kʉ̀ʉ ibɛʼ-yə, byuunɔ ɔ bu kɔ́ fyii-i tʉ imɔʼ, jɛ́ŋhə ibɛʼ-yə. Nyii ghɔŋbə fɔ-kəwʉʉnəmbi-bə mə bɛ bətiefɔʼɔ-ba bənchəŋ fɛ."

Nubɛʼbə ndə Jiso kə dàhə

14 Bʉə-Falasi ndə bɔ̂ŋ kʉ̀ʉ fɔ-kəwʉʉnəmbi-bə daa, kʉ̂ʉ yʉ́ ŋgiekə-ɔ̄ŋ, bíe chu-yʉə tʉ Jiso. 15 Jiso ghɔ̀ŋ mbɔ, "Nɔ, bii ndə bii tʉʼ dʉ̀ʼ ŋwɔŋ-yii mu bʉə mbɔ bii bɛ ndyʉndyʉ, bɔŋ Nyii nɔ kínə fyiihə-ii. Fɔkə ndə i gʉ́ə tʉ woməsʉʉ i nɔ byʉ́ʼ tʉ Nyii.

16 "Bə nɔ lɔ̀ʼ nuʼ-Mushi ghɔŋbə nubə ndə bʉəyʉkəŋgieNyii nɔʼ nə nyɔ̀ʼ tə vɛʼ kʉ̀ʼnə ndə Jɔŋ kə gwè kə́ lɔ̀ʼ ŋgieNyiikə. Lʉ̀ hə vɛʼ-ghɔ̄ bə nɔʼ téʼ ntəŋjyujyu te Sɔ́ʼ-Nyii, bʉə bənchəŋ kə́ fʉʼ fʉʼkə ndə məŋíi chɔ. 17 Bɔŋ i nɔ yùhə tʉ yuo ghɔŋbə chisêkə ndə məmì tə chàa mbɔ vaadyʉʼʉ kəŋgie i bɛ́ ndə nuʼ-Nyii-ɔ̄ŋ.

18 "Wotəmiyɔŋ ndə ɔ wɔ̀ʼtə lɔŋ ghɔŋ vi-i lʉ̀ yi-kədɔŋ-yə nɔʼ gháa bəsəŋ bɔŋ woləŋ ndə ɔ leʼ lʉ̀ woke ndə ɔ nɔʼ wɔ̀ʼtə lɔŋ ghɔŋ ləŋ-ɛŋ nɔʼ gháa bəsəŋ ghɔ.

Wo-kəfʉʼ ghɔŋ Lasalɔ

19 "Wo-kəfʉʼbɛʼ nɔ nə bɛ ghɔ ndə ɔ kə́ mɔ̀ʼ mbʉətə ndyi kəmbuu fʉ́əŋ mbʉə-ɔ ghɔŋbə vaa-mbʉətə-ndyi mu mbʉə ndə i bʉ̀ʉ haʼ bʉ̀ʉ, kə́ yú yu-bəfɔŋ-kə bəchibəchi. 20 Wo-mbʉʼbɛʼ ndə yie-e kə bɛ Lasalɔ ndə mbʉə-e bɛ bədyʉʼbədyʉʼ, nɔ nə kə́ dùʼ chulɔŋ fu wo-ɔ̄, 21 kə́ chyìi ndə məlɛ̀ʼtə kwuʼkwuʼ-bəfɔ ndə i tʉʼ gwùtə hə kəghɔ mbʉ wo-kəfʉʼ. Tə bûhə kə́ gwè líatə mbʉ bədyʉʼ-ghɔ̄. 22 Mbʉ wo mbʉʼ sɛŋ kwú, bʉəntəŋNyii lʉ̀ ɔ gɛ̀ dùʼhə ɔŋ mbʉə Ablahaŋ. Mbʉ wo-kəfʉʼ sɛŋ kwú ghɔ, bə tyúu ɔ. 23 Ɔ dùʼ mu viʼi kə́ nyíɛ ŋgʉəʼ, kʉ̂ʉ nə sɛŋ chɔ̀ʼhə shʉ-i kweghɔʼ nyíɛ Ablahaŋ kɛŋ dɔdɔ, Lasalɔ kə́ dùʼ mbʉə ɔ.

24 "Ɔ tíi ɔ mbɔ, ‘Tie-ɔ Ablahaŋ, kə ẗʉkə-a vyíi ndəŋ mɔ le! Tə́ŋ Lasalɔ, ɔ sʉ́ʉhə tʉ-vaa-kəghɔ-kə-i mu muu gwè nə yɔŋ, gwè yùʼ lɛɛŋhəkə-ɔŋ chɔ, bʉʼka mbɔ mɔ nɔ bɛ mu ŋgʉəʼ shʉ́əshʉ́ə mu viʼi-fɛ̄ŋ.’

25 "Ablahaŋ bə̀ŋhə mbɔ, ‘Ŋaʼ, kwɛ́nə mbɔ vɛʼ ndə a kə bɛ mu kəwʉʉnəmbi, a kie fɔ-jyujyu-bə-a, Lasalɔ kie yi-yə fɔ-bʉəbʉə-bə, bɔŋ nduɔ ɔ kə́ bɛ jyujyu yá mbəŋ kə́ nyíɛ ŋgʉəʼ. 26 Bɔŋ ndə nchəŋnchəŋ bənu-ɔ̄ŋ, ntəŋntəŋ bʉʼʉ bə nɔʼ tyúu ghuu təmə wo mə lɔ̀ hə mbʉə a dàa fɛ̄ŋ fɛ, təmə bɔŋ mə lɔ̀ hə mbʉə baʼa dàa kəvia-a fɛ.’

27 "Mbʉ wo-ghɔ̄ bə̀ŋhə mbɔ, ‘Mɔ nɔ fʉ̀ʉtə a, tie-ɔ, tə́ŋ Lasalɔ fu-bətie-ɔ, 28 mɔ nɔ kie bəliŋ-bɔŋ bələŋ bətaa, ɔ̈ gɛ̀, shyùu tyunəkə-ʉə bʉʼka bɔ̂ŋ mə yi gwè mu ŋgʉəʼ fɛ̄ŋ ghɔ.’

29 "Ablahaŋ bə̀ŋhə mbɔ, ‘Bɔ̂ŋ nɔ kie nuʼ-Mushi ghɔŋbə bəŋwɔʼnə-bʉəyʉkəŋgieNyii kəghɔ-bɔŋ, b̈ɔ̂ŋ yʉ́ nukə ndə i tʉʼ gìe.’

30 "Ɔ bə̀ŋhə mbɔ, ‘Mbee, tie-ɔ Ablahaŋ, ndʉʉbɛʼ kaʼ wo lɔ̀ hə mu bəŋkwusê gɛ̀ kwə́ʼ tʉ bɔŋ, bɔ̂ŋ shìe liɛŋ ndəŋ bʉ̂ʼtə-ʉə.’

31 "Ablahaŋ ghɔ̀ŋ tʉ ɔŋ mbɔ, ‘Kaʼ bɔ̂ŋ gòʼ təmə yʉ́ nukə ndə Mushi ghɔŋbə bʉəyʉkəŋgieNyii nyɔ̀ʼ fɛ, wo mə yi kóʼ bə mu bəŋkwusê, kɔ̀ɔtə ndə məlóʼtə bɔŋ, bɔ̂ŋ yʉ́ ɔ fɛ.’ "