1 Yɔŋbɛʼ, Jiso mɔ̀ʼ chəŋkə tʉ vâafɔʼɔ-bi ndə məchìi bɔŋ kínə mbɔ bɔ̂ŋ nɔ kie ndə mə-kə́-gháaNyii təvɛʼtəvɛʼ təmə kə́ lʉ́ʉtə fɛ. 2 Ɔ ghɔ̀ŋ tʉ bɔŋ mbɔ, "Mu kəyəŋkwɛʼtəŋbɛʼ, wokwɛʼtəŋ mu njaafɛʼbɛʼ nɔ nə bɛ chɔ ndə ɔ gòʼ təmə kə́ fàa Nyii fɛ, təmə bɔŋ kə́ fàa woməsʉʉ ghɔ fɛ. 3 Kwuʼ wokebɛʼ nɔ nə bɛ mu kəyəŋ-ghɔ̄ kə́ gɛ̀ tʉ wo-ghɔ̄ sɛŋ gɛ̀, ghɔ̀ŋ tʉ ɔŋ mbɔ, ‘Kə a kwáa mɔ kwɛ̀ fɛʼɛ-ɔ ndyʉndyʉ mɔ yú wobàa-ɔ.’ 4 Mbʉ wokwɛʼtəŋ njaafɛ̀ʼ fəŋ jʉhə ɔŋ məniʼ, bɔŋ kəliʼ, ɔ kwɔ̀ʼtə tʉkə-i mbɔ, ‘Mɔ kyinə fàa Nyii fɛ, təmə bɔŋ kə́ fàa woməsʉʉ fɛ, 5 bɔŋ bʉʼka woke-ɔ̄ nɔʼ chɔ́ŋhə mɔ daa, mɔ bu kwɛ̀ fɛʼɛ-ɛ ndyʉndyʉ ɔ̈ yú wobàa-ɛ ndəŋ fɛʼɛ-ɔ̄, byuunɔ təmə ɔ bu chɔ́ŋhə mɔ tə mɔ mì hə kəghɔ-ɔ.’ "

6 Tiekətʉ ghɔ̀ŋ mbɔ, "B̈ii lʉ̀ ndaa ndəŋ nukə ndə wo-ɔ̄ ndə ɔ kyinə kwɛ̀ fɛʼɛ ndyʉndyʉ fɛ kə ghɔŋ. 7 A bɔŋ kə́ kwɔ̀ʼtə nduɔ mbɔ Nyii bu kə́ kwɛ̀ nubə ndyʉndyʉ tʉ bʉə-bi ndə ɔ nɔʼ kə séʼ bɔŋ, ndə bɔ̂ŋ tʉʼ gwía gwè tʉ ɔŋ ndʉʉnəchî ghɔŋbə ndʉʉbətyuʼ fe? A kwɔ̀ʼtə mbɔ ɔ mə jʉhə gwia-yʉə tə i dɔ̀ŋnə mɛ? 8 M̈ɔ shyíi bii mbɔ, ɔ bu kwɛ̀ nubə tʉ bɔŋ ndyʉndyʉ nəndʉʉnəndʉʉ! Buŋ ndə nɔ, ndʉʉ ndə Vaa-Woməsʉʉ bu nə bʉ̀nə gwè nɔ, nyíɛ bʉə ndə bɔ̂ŋ mɔ̀ʼfyiihə-ʉə ndəŋ Nyii kəchisê-fɛ̄ŋ mɛ?"

9 Jiso mɔ̀ʼ chəŋkə-ɔ̄ŋ tʉ bʉə ndə bɔ̂ŋ mɔ̀ʼfyii ndəŋ ŋwɔŋtə-ʉə, kə́ kwɔ̀ʼtə mbɔ bɔ̂ŋ tə́nə ndyʉndyʉ, kə́ dʉ̀ʉhə bəbɛʼbʉə. 10 "Bələŋbɛʼbə bəbûu nɔ nə kə́ kóʼ gɛ̀ mu njaafɛ̀ʼndɛŋNyii ndə məgɛ̀ gháaNyii. Womɔʼ kə́ bɛ wo-Falasi, ibɛʼ-yə kə́ bɛ wo fí tashi. 11 Mbʉ wo-Falasi lɔ̀ tə́nə kə́ gháaNyii te ŋwɔŋ-ɛŋ kə́ ghɔ̀ŋ mbɔ, ‘Nyii, mɔ nɔ kɔ́ ndɔ a mbɔ mɔ kaa nə bəbɛʼbʉə fɛ, bəlʉʼʉ, bʉə-bʉ̂ʼʉ, bəŋghaa-bəsəŋ təmə bɔŋleʼ bɛ nə wo fí tashi-ɔ̄ fɛ. 12 M̃ɔ nɔ jì muu vɛʼ bûu mu vyii mbi, m̃ɔ nɔ gyʉ̀əhə fɔbə inchəŋ ndə mɔ kie yəŋbə wuŋ, mɔ kɔ́ viakə imɔʼ tʉ Nyii.’

13 "Bɔŋ wo fí tashi-ghɔ̄ ndə ɔ tə́nə kwɛ̀ʼtə mbʉə ɔ, təmə ɔ kʉ̀ʉ ndə mə-buŋ-chɔ̀ʼhə shʉ-i lɛ́nə yuo fɛ, véʼ vɛŋ-ɛŋ ghɔ̀ŋ mbɔ, ‘Nyii, kə ẗʉkə-a vyíi ndəŋ mɔ le, mɔ nɔ wo-bʉ̂ʼʉ.’ 14 M̈ɔ shyíi a mbɔ wo-ɔ̄ nɔ bʉ̀nə gɛ̀ chunjaa-ɔ kə́ bɛ ndyʉndyʉ tʉ Nyii, təmə wo-Falasi kə́ bɛ nɔ fɛ. Wo ndə ɔ kóʼhə ŋwɔŋ-ɛŋ ghɔʼ bə bu shúʼhə ɔŋ sê, bɔŋ wo ndə ɔ shúʼhə ŋwɔŋ-ɛŋ sê, bə bu kóʼhə ɔŋ ghɔʼ."

15 Bʉə kə́ leʼ gwè haʼ ghɔ nə vâa-bʉə tʉ ɔŋ mbɔ ɔ chʉʼ mɔ̀ʼ ghɔkə-i ndəŋ bɔŋ. Vâafɔʼɔ-bi kʉ̂ʉ nyíɛ, kə́ sɔ́ʼ bɔŋ. 16 Jiso buŋ leʼ tíi bɔŋ kə́ ghɔ̀ŋ mbɔ, "B̈ii mɛ̀ʼtə v̈âambuɔ gwè tʉ mɔ, kə bii mə leʼ chíe bɔŋ fɛ bʉʼka Sɔ́ʼ-Nyii nɔ bɛ tʉ ntɛ bʉə nə bɔ̄ŋbə. 17 Nɔʼ m̈ɔ shyíi bii nə shʉəŋ mbɔ wotəmiyɔŋ ndə ɔ gòʼ təmə kɔ́ ŋwɔŋ-ɛŋ mbɔ N̈yii sɔ́ʼ ɔ nə vaambuɔ fɛ, ɔ mə nə ŋíi mu Sɔ́ʼ-Nyii fɛ."

18 Ndʉʉmɛ, wokwɛʼtəŋbɛʼ bíʼtə tʉ Jiso mbɔ, "Tie-ɔ chicha, a nɔ wo-nuʼ-jyujyu, mɔ kie ndə məchìi ka ndə məkie məchímbi təmə liʼ-i ghɔ fɛ?"

19 Jiso bə̀ŋhə tʉ ɔŋ mbɔ, "A tíi mɔ nə wo-nuʼ-jyujyu bʉʼka ka? Wo kaa ghɔ ndə ɔ kie nuʼ-jyujyu fɛ yaʼkɛŋ Nyii tətɛʼ ɛ. 20 A nɔ kínə bəŋkahə Nyii ndə i ghɔ̀ŋ mbɔ, ‘Kə a mə gháa bəsəŋ fɛ, kə a mə yí wo fɛ, kə a mə lʉ́ʼ fɛ, kə a mə tɔ́ŋ bɔ̌ŋ wo ndəŋ lɛɛŋkə fɛ, kɔ́ kuŋhə tʉ naa-aŋ ghɔŋ tie-a.’ "

21 Ɔ bə̀ŋhə tʉ Jiso mbɔ, "Mɔ nɔʼ kɛŋ fɔ̀ʼ nubə-ɔ̄ŋ inchəŋ lʉ̀ hə vaambuɔ."

22 Jiso kʉ̂ʉ yʉ́ nubə ndə ɔ gìe, ghɔ̀ŋ mbɔ, "Mbyu kənu nɔ bíe imɔʼ ndə a kie ndə məchìi. Gɛ̀ fɛ̀ŋ fɔbə inchəŋ ndə a kie, gyʉ̀ə tʉ bʉə-mbʉʼ, kaʼ a chìi nɔ, a kie lə̂ŋ-aŋ yuo, ndʉʉmɛ, gwè, kə́ gwè hə bɔ̌ŋ mɔ." 23 Mbʉ wo-ghɔ̄ kʉ̂ʉ yʉ́ nukə ndə Jiso gìe, i chìi mbʉə-e dìe, bʉʼka mbɔ ɔ nɔ kə fʉ̀ʼ daa.

24 Jiso kʉ̂ʉ nyíɛ ndə mbʉə-e dìe daa, ɔ ghɔ̀ŋ mbɔ, "I bu shʉ́ə daa tʉ bʉə-kəfʉʼ ndə məŋíi mu Sɔ́ʼ-Nyii! 25 Bʉʼka i nɔ yùhə tʉ nyaa-bəkatə ndə məsʉ́ʉ hə ndəŋ gyii-sɔʼ-kə tə chàa ndə i bɛ tʉ wo-kəfʉʼ ndə məŋíi mu Sɔ́ʼ-Nyii."

26 Bʉə ndə bɔ̂ŋ yʉ́ nukə-ɔ̄ŋ bíʼtə mbɔ, "Bɛ nda ndʉʉghɔfii ndə bəkɔ ɔ kie ŋkwaaNyii?"

27 Jiso bə̀ŋhə mbɔ, "Nubə ndə i chàa ghʉəʼ-woməsʉʉ-kə, nɔ yùhə tʉ Nyii."

28 Bita ghɔ̀ŋ mbɔ, "Nyíɛ! Baʼa nɔʼ mɛ̀ʼtə futə-aʼ ndə məgwè hə bɔ̌ŋ aŋ."

29 Jiso ghɔ̀ŋ tʉ bɔŋ mbɔ, "Nɔʼ m̈ɔ shyíi bii nə shʉəŋ mbɔ wo kaa ghɔ ndə ɔ nɔʼ mɛ̀ʼtə fɔbə nə njaa-ɛ, byuunɔ vi-i, byuunɔ bəliŋ-bi, byuunɔ bətie-bi, byuunɔ vâa-bii, yie-Sɔ́ʼ-Nyii, 30 ndə ɔ bu gòʼ təmə kie buŋmbi bəfɔ tə tíŋ ndə ɔ kə fəŋ kie kəchisê-fɛ̄ŋ laa ghɔŋbə wʉʉnəmbikə ndə i tʉʼ gwè, məchímbi təmə liʼ-i ghɔ fɛ."

31 Mbəŋ-ɛŋ ghɔŋbə mbʉ vâafɔʼɔ-bi njuɔ bûu nə wuŋ fí ŋwɔŋ-yʉə-bɔŋ bɔ̌ŋ, ɔ ghɔ̀ŋ tʉ bɔŋ mbɔ, "B̈ii nyíɛ, bʉʼʉ nɔ tʉʼ kóʼ gɛ̀ Jɛlosalɛŋ, nchəŋnchəŋ bənu ndə bʉəyʉkəŋgieNyii kə nyɔ̀ʼ te Vaa-Woməsʉʉ bu fyú sê. 32 Bə bu chɔ̀ʼhə ɔŋ kɔ́ mu kəghɔ-bʉə ndə bɔ̂ŋ gòʼ təmə bɛ bʉə-Juu fɛ, bə bu dʉ̀ʉhə ɔŋ, bɔŋleʼ mɔ̀ʼ tʉvyiikə-i, tyù ntɛmə mbʉə-ɔ. 33 Bə bu kɛŋ gwúu ɔ yí, kʉ̂ʉ bɛ chîbə itia nɔ, ɔ bʉ̀nə kóʼ."

34 Bɔŋ kəliʼ, təmə bɔ̂ŋ kínə mbyu kənu mu nubə-bɔ̄ŋ fɛ. Bə nɔ kə lə̀ŋ mbʉ kənu kəghɔ-bɔŋ, təmə bɔŋ kínə nukə ndə bə gìe fɛ.

35 Ndə ɔ kə́ kə́ŋhə mbʉə Jɛliko, fʉ̀əŋtəshʉbɛʼ kə́ dùʼ kəmbia fia kə́ gháa ŋkwaa hə kəghɔ bəntiŋ fia. 36 Ɔ kʉ̂ʉ kə́ yʉ́ ndə nuɔ-bʉə tʉʼ tíŋ, ɔ bíʼtə mbɔ, "Tʉʼ tíŋ ka laa?"

37 Bə shyíi ɔ mbɔ, "Nɔ tʉʼ tíŋ Jiso ndə ɔ lɔ̀ hə Nasalɛ."

38 Ɔ tíi ghɔ̀ŋ mbɔ, "Jiso, V̈aa-Dɛbi, kə ẗʉkə-a vyíi ndəŋ mɔ le!"

39 Bʉə ndə bɔ̂ŋ tʉʼ gɛ̀ hə bəshʉ, sɔ́ʼ ɔ, kə́ ghɔ̀ŋ mbɔ ɔ̈ líitə. Bɔŋ ɔ bìʼ tíitíi nə ghʉəʼkə mbɔ, "V̈aa-Dɛbi, kə ẗʉkə-a vyíi ndəŋ mɔ le!"

40 Jiso tə́nə kàhə mbɔ b̈ə la gwè nə nɔŋ tʉ ɔŋ. Bɔ̂ŋ kʉ̂ʉ gwè nə nɔŋ, tə kə́ kə́ŋhə, ɔ bíʼtə tʉ ɔŋ mbɔ, 41 "A tʉʼ kʉ́ʉ mbɔ mɔ bɛ təka nə aŋ?"

Ɔ bə̀ŋhə mbɔ, "Tiekətʉ, mɔ nɔ tʉʼ kʉ́ʉ mə-kə́-bʉ̀nə nyíɛ yəŋkə."

42 Jiso bə̀ŋhə tʉ ɔŋ mbɔ, "Nyíɛ! Bʉʼka a mɔ̀ʼfyii-a ndəŋ mɔ, mɔ nɔʼ chìi a kie nchʉʼ."

43 Haʼ ndʉʉmɛ, ɔ bʉ̀nə nyíɛ yəŋkə, chʉ́ʉhə kə́ tòʼ gɛ̀ hə bɔ̌ŋ ɔŋ, kə́ kɔ́ kuŋhə tʉ Nyii. Bʉə bənchəŋ kʉ̂ʉ nyíɛ nukə ndə i fyú, bɔ̂ŋ kə́ lə̀ʼtə Nyii.