1 Nɔ kə bíe chîbə ibûu chî-Yíɛʼsii-kə buŋ gwè ghɔŋbə chî-Nchəŋtə-kə ndə bə Kwó Bele təmə yî chɔ fɛ. Bətiefɛ̀ʼndɛŋNyii ghɔŋbə bʉə dàhə nuʼ-Mushi nɔ nə kə́ kʉ́ʉ fia ndə məyá Jiso bɔ̌ŋbɔ̌ŋ yi ɔ. 2 Bʉʼka bɔ̂ŋ nɔ nə kə́ ghɔ̀ŋ mbɔ, "Bɔŋ i kie ndə məbɛ ndə chî-nchəŋtə-kə fɛ, bʉʼka bʉə mə yi ŋɛ̀hə ntɔŋntɔŋ."

3 Ndʉʉ ndə Jiso kə bɛ Bɛtani mu njaa-Samu ndə ɔ bɛ wo-kəlɔ. Ndə ɔ kə dùʼ tiɛŋ tebele ndə məyú fɔbə, wokebɛʼ gwè nə vaakətəŋ-məŋgwo ndə bə chìi nə ŋgoʼbɛʼ bə kə́ tíi nə alabasta leʼnə ŋkɛŋ ŋgwo-chuɔŋ-chyʉʉchyʉʉ-mə muŋgɔ. Ŋgwomə-ɔ̄ŋ yɔ̂ʼkə-i nɔ kə bʉ̀ʉ daa, bə chìi nə tyʉbɛʼkə ndə bə kə́ tíi nə naa təmə bə nɔʼ fyìʼnə fɛ. Ɔ sáa mbʉ kətəŋ véʼ kətʉ Jiso. 4 Bəbɛʼbʉə ndə bɔ̂ŋ kə bɛ chɔ, kə́ bíʼtə tʉ bəbɛʼbʉə nə tʉʉbʉə mbɔ, "Chìi ka bə kə́ bʉ́əhə ŋgwo-chuɔŋ-chyʉʉchyʉʉ-mə-ɔ̄ŋ mənɔ? 5 Bə nɔ kə kə́ kʉ̌ʉ fɛ̀ŋ ŋgwomə-ɔ̄ŋ i tíŋ kyʉə-fɔʼɔ-ŋgʉʼʉmbi, gyʉ̀ətə kyʉə-ɛ tʉ bʉə-mbʉʼ." Bɔ̂ŋ sɔ́ʼ ɔ shʉ́əshʉ́ə. 6 Bɔŋ Jiso bə̀ŋhə mbɔ, "B̈ii mɛ̀ʼtə ɔŋ chɔ, bii tʉʼ chɔ́ŋhə woke-ɔ̄ mbuka? Ɔ nɔʼ fɔ̀ʼ yʉʼ kənu ndəŋ mɔ. 7 Bʉʼka biibə bʉə-mbʉʼ bu kə́ bɛ mɔʼɔ, ndʉʉtəmiyɔŋ ndə bii kʉ̀ʉ, bii bu fɔ̀ʼ nu-jyujyu-bə tʉ bɔŋ. Bɔŋ təmə kʉʉ kə́ kie mɔ təvɛʼtəvɛʼ fɛ. 8 Ɔ nɔʼ fɔ̀ʼ nukə ndə bəkɔ ɔ fɔ̀ʼ, ɔ nɔʼ yóʼ mbʉə-ɔ, mɔ buŋ yi kwú bə tyúu mɔ. 9 M̈ɔ shyíi bii nə shʉəŋ mbɔ yəŋkə təmiyɔŋ ndə bə lɔ̀ʼ mbʉ ntəŋjyujyu chɔ mu kəwʉʉnəmbi inchəŋ, nukə ndə woke-ɔ̄ nɔʼ chìi, bə bu kə́ fʉ̀ʼtə ndə mə-kə́-kwɛ́nə ɔŋ."Bə núʼ Jiso mu njaa Simu wo-kəlɔ

10 Juda Iskalo ndə ɔ kə bɛ mbyu wo mu vâafɔʼɔ-bi njuɔ bûu nə wuŋ, lɔ̀ gɛ̀ bìatə bətiefɛ̀ʼndɛŋNyii ndə məfɛ̀ŋ Jiso tʉ bɔŋ. 11 Ndʉʉ ndə bɔ̂ŋ kə yʉ́, tʉʉ-yʉə bʉ̀ʉ, bɔ̂ŋ kɔ̀ʼnə ndə məkɔ́ kyʉə tʉ ɔŋ. Ɔ kə́ kʉ́ʉ yʉʼ fia ndə məfɛ̀ŋ ɔŋ tʉ bɔŋ.

12 Nɔ nə bɛ ndəŋ fəŋ kəchî Nchəŋtə ndə bə Kwó Bele təmə yî chɔ fɛ le, chîkə ndə bə síi Vaabinjyʉʉ Yíɛʼsii chɔ ndə məfɛ̀ʼndɛŋ nə yɔŋ. Vâafɔʼɔ-bi bíʼtə tʉ ɔŋ mbɔ, "A kʉ̀ʉ mbɔ baʼa gɛ̀ shʉ̀tə fa tʉ a ndə məyú mbʉ Yíɛʼsii?" 13 Ɔ tə́ŋ vâafɔʼɔ-bi bəbûu, ghɔ̀ŋ tʉ bɔŋ mbɔ, "B̈ii gɛ̀ mu kəyəŋkwɛʼtəŋ, woləŋbɛʼ bu bìatə bii ndə ɔ bɛ̀ʼ təŋ-muu-kə, b̈ii gɛ̀ hə bɔ̌ŋ ɔŋ. 14 Yəŋkə təmiyɔŋ ndə ɔ sʉ́ʉ chɔ, bii gìe tʉ mbʉ ŋwɔ̌ŋ-njaa mbɔ, ‘Chicha nɔ tʉʼ bíʼtə tʉ a mbɔ njəŋ-njaa-bʉə-mətòʼ ba, ndə bəkɔ mɔ yú fɔ-Yíɛʼsii-bə chɔ baʼabə vâafɔʼɔ-bɔŋ?’ 15 Ɔ bu dʉ̀ʼ njəŋ-njaakwɛʼtəŋ tʉ bii kweghɔʼ ndə bə nɔʼ shʉ̀tə mu-i tə i kʉ̀ʼnə, b̈ii shʉ̀tə chɔ tʉ bʉʼʉ." 16 Mbʉ vâafɔʼɔ-bi lɔ̀ gɛ̀ mbʉ mu kəyəŋkwɛʼtəŋ-ghɔ̄, gɛ̀ nyíɛ nubə kɛŋ haʼ ndə ɔ kə shyíi bɔŋ, bɔ̂ŋ shʉ̀tə mbʉ bəfɔ Yíɛʼsii chɔ.

17 Kʉ̂ʉ bɛ ndʉʉbuumbi, ɔ gwè ghɔŋbə vâafɔʼɔ-bi njuɔ bûu nə wuŋ. 18 Ndə bɔ̂ŋ dùʼtə mbʉə tebele kə́ yú fɔbə, Jiso ghɔ̀ŋ mbɔ, "Nɔʼ m̈ɔ shyíi bii nə shʉəŋ mbɔ, mbyu wo mu bii bu fɛ̀ŋ mɔ, wo ndə baʼa ɔ tʉʼ yú mɔʼɔ."

19 I chʉ́ʉhə məchɔ́ŋhə bɔŋ, bɔ̂ŋ kə́ bíʼtə tʉ ɔŋ bəmɔʼbəmɔʼ mbɔ, "Bɛ mɔ mɛ?"

20 Ɔ bə̀ŋhə tʉ bɔŋ mbɔ, "Nɔ bɛ mbyu wo-imɔʼ mu mbʉ bʉə njuɔ bûu nə wuŋ, wo ndə ɔ tʉʼ chùo bele baʼa ɔ mɔ̀ʼ mu kyʉʉ. 21 Bʉʼka Vaa-Woməsʉʉ bu gɛ̀ haʼ ndə bə nɔʼ kə nyɔ̀ʼ te ɔ, bɔŋ ŋgʉəʼ kətʉ wo ndə ɔ bu fɛ̀ŋ ɔŋ! I nɔ kə buŋ bɛ jyujyu tʉ wo-ghɔ̄ kaʼ bə kʉ̌ʉ kə gòʼ təmə bí ɔ fɛ."

22 Ndə bɔ̂ŋ kə́ yú fɔbə, ɔ lʉ̀ bele, kʉ̂ʉ kɔ́ ndɔ chɔ tʉ Nyii, bə́ʼtə, kɔ́ tʉ vâafɔʼɔ-bi, ghɔ̀ŋ tʉ bɔŋ mbɔ, "B̈ii kɔ́, nɔ bɛ mbɔʼ mbʉə-ɔ nɔ." 23 Ɔ leʼ lʉ̀ ndʉ̂ʉ, kʉ̂ʉ kɔ́ ndɔ tʉ Nyii, chɔ̀ʼhə kɔ́ tʉ bɔŋ, bɔ̂ŋ bənchəŋ nú hə muŋgɔ. 24 Ɔ ghɔ̀ŋ tʉ bɔŋ mbɔ, "Nɔ bɛ fɔbʉəkə-ɔŋ nɔ ndə i kɔ́ʼ mbʉ məŋkaa, ndə bə tyú yie bʉə buŋmbi. 25 Nɔʼ m̈ɔ shyíi bii nə shʉəŋ mɔ bieleʼ nə bìʼ nú ndʉʼmə-ɔ̄ŋ fɛ, tə chî-ghɔ̄-kə nə gwè ndʉʉ ndə mɔ bu nú fefe ndʉʉ ndə Nyii bu sɔ́ʼ bʉə-bi ndə fɔŋ." 26 Ndʉʉmɛ, bɔ̂ŋ yùɔ lyuu, lɔ̀ kóʼ gɛ̀ ndəŋ Kwɔŋ-bəTyʉ-Oli.

27 Jiso ghɔ̀ŋ tʉ bɔŋ mbɔ, "Bii bənchəŋ bu nyʉ́ʉ wɔ̀ʼnə tʉ́ʼ mɔ, bʉʼka bə nɔ nə nyɔ̀ʼ mu ŋwɔʼnə-Nyii mbɔ, ‘Mɔ bu yi nchyii-binjyʉʉhə, mbʉ binjyʉʉhə nyʉ́ʉ wɔ̀ʼnə.’ 28 Bɔŋ ndʉʉ ndə mɔ bu bʉ̀nə kóʼ nɔ, mɔ bu gɛ̀ bəshʉ mu Galili." 29 Bita ghɔ̀ŋ tʉ ɔŋ mbɔ, "Kaʼ buŋ kʉ̀ʉ bʉə bənchəŋ nyʉ́ʉ wɔ̀ʼnə tʉ́ʼ a, mɔ kʉʉ nyʉ́ʉ fɛ." 30 Jiso ghɔ̀ŋ tʉ ɔŋ mbɔ, "Mɔ shyíi a nə shʉəŋ mbɔ, ndʉʉbətyuʼ-ɔ̄ ŋkʉəʼə bu yi kə tʉ́ʉ vɛʼ bûu nɔ, tʉ a nɔʼ kɔ́tuu a vɛʼ tia mbɔ a la kínə mɔ fɛ." 31 Bita gìe shʉ́əshʉ́ə mbɔ, "Kaʼ kʉ̀ʉ i bɛ mbɔ b̈aʼa kwú mɔʼɔ, mɔ mə nə tɛ́ŋ aŋ fɛ." Bɔ̂ŋ bənchəŋ bə̀ŋhə haʼ nɔ.

32 Bɔ̂ŋ gɛ̀ dàa kəyəŋbɛʼ bə kə́ tíi nə Gɛsemani. Ɔ gìe tʉ vâafɔʼɔ-bi mbɔ, "B̈ii dùʼtə fɛ̄ŋ, m̈ɔ gɛ̀ gháaNyii." 33 Ɔ lʉ̀ Bita, Jɛŋ leʼnə Jɔŋ, mbʉə-e chʉ́ʉhə kə́ dìe daa, bɔŋ-kə́-leʼ chɔ́ŋhə ɔŋ. 34 Ɔ ghɔ̀ŋ tʉ bɔŋ mbɔ, "Fyii-ɔ tʉʼ chɔ́ŋhə mɔ daa, tə kə́ dʉ̀ʼ kwú. B̈ii káa fɛ̄ŋ, kə́ kíi dyʉʼbə."

35 Ɔ kʉ̂ʉ kwɛ̀ʼtə gɛ̀ məniʼ, bè kweʼtəbə-i sê gháaNyii mbɔ, "Kaʼ kʉʉ bɛ mbɔ i yùhə, ŋ̈gwɔʼmbi-ɔ̄ kwɛ̀ʼtə mbʉə mɔ." 36 Ɔ ghɔ̀ŋ mbɔ, "Baba, Tie-ɔ, nubɛʼkə bɛ ghɔ ndə i chàa a fɛ. Fí ndʉ̂ʉ ŋgʉəʼ-ɔ̄ hə kəghɔ-mɔ, kə a mə fɔ̀ʼ bə ŋkʉʉnə-tʉʉ-ɔ fɛ, fɔ̀ʼ bə ya-yə ŋkʉʉnə tʉʉ." 37 Ɔ gwè nyíɛ bɔŋ, bɔ̂ŋ kə́ bɛ́ŋbɛ́ŋ, ɔ ghɔ̀ŋ tʉ Bita mbɔ, "Samu, a tʉʼ bɛ́ŋbɛ́ŋ mɛ? Bɛ mbɔ a mə kíi dyʉʼbə ndə vaa kəkʉʉ mbi fe? 38 B̈ii kə́ kíi dyʉʼbə bɔŋleʼ gháaNyii bʉʼka bii mə yi gwù mu nubə ndə i mùutə wo ndə məgwù mu bʉ̂ʼʉ. Mbʉ fyii nɔ bɛ chɔ, bɔŋ mbɔʼ mbʉə lʉ́ʉtə."

39 Ɔ bìʼ gɛ̀ gháaNyii kə́ gìe haʼ nubə ndə ɔ nɔʼ kə gìe. 40 Ɔ bʉ̀nə bìʼ gwè nyíɛ bɔŋ, bɔ̂ŋ kə́ bɛ́ŋbɛ́ŋ, bʉʼka shʉtə-ʉə nɔ nə bɛ idìenə daa nə mbɛŋhə, təmə bɔ̂ŋ kínə nukə ndə məgìe tʉ ɔŋ fɛ. 41 Ɔ bʉ̀nə bìʼ gwè ndə vɛʼ tia, ghɔ̀ŋ tʉ bɔŋ mbɔ, "Bii bíe bɛ́ŋ mbɛŋhə-ii kə́ káa mɛ? I nɔʼ kʉ̀ʼnə, mbʉ ndʉʉ-ghɔ̄ nɔʼ gwè. Bə nɔʼ kɔ́ Vaa-Woməsʉʉ mu kəghɔ-bʉə bʉ̂ʼʉ. 42 B̈ii lɔ̀ hə sê b̈ʉʼʉ kə́ gɛ̀, b̈ii nyíɛ, wo ndə ɔ fɛ̀ŋ mɔ nɔʼ kə́ŋhə."

43 Haʼ ndʉʉmɛ, ndə ɔ kə́ bíe kwə́ʼ, Juda gwè, ndə ɔ bɛ mbyu wo mu vâafɔʼɔ-bi njuɔ bûu nə wuŋ, ghɔŋbə nuɔ-bʉə nə setəbə ghɔŋbə mbuuhə kəghɔ-bɔŋ. Nɔ kə tə́ŋ bətiefɛ̀ʼndɛŋNyii, bʉə dàhə nuʼ-Mushi leʼnə bəntəŋbəshʉ tə́ŋ bɔŋ. 44 Mbʉ wo ndə ɔ kə fɛ̀ŋ ɔŋ nɔʼ kə kɔ́ cheʼkə tʉ bɔŋ, ghɔ̀ŋ mbɔ, "Wo ndə mɔ bu bɔ́nə ɔŋ ndə nchaʼtə nɔ bɛ mbʉ wo-ghɔ̄. B̈ii yá ɔ, lʉ̀ ɔ, kə́ chyìi ɔ, gɛ̀ nə nɔŋ." 45 Ndʉʉ ndə Juda kə gwè, ɔ kwɛ̀ʼtə gɛ̀ mbʉə-Jiso, ghɔ̀ŋ tʉ ɔŋ mbɔ, "Chicha!" yá ɔ, bɔ́nə ɔŋ. 46 Bɔ̂ŋ mɔ̀ʼ ghɔbə-ʉə ndəŋ ɔŋ, yá ɔ. 47 Bɔŋ ibɛʼ-yə mbyu wo ndə bɔ̂ŋ kə tə́nə chɔ, sʉ̀ʉ setəkə-i gwìa tyunə-fʉə-tiefɛ̀ʼndɛŋkwɛʼtəŋNyii-kə chɔ chʉ̀ə. 48 Jiso ghɔ̀ŋ tʉ bɔŋ mbɔ, "Bii tʉʼ gwè tʉ mɔ nə setəbə ghɔŋbə mbuuhə təka fi nə bii tʉʼ gwè tʉ lʉʼ shùɔ wo ndə məyá mɔ? 49 Mɔ nɔ nə kə́ bɛ bʉʼʉ kə́ dàhə mu chunjaafɛ̀ʼndɛŋNyii bəchibəchi təmə bii yá mɔ fɛ. Bɔŋ yɔ̄ŋ-yə nɔ bɛ ndə məchìi ŋgieNyiikə fyú shʉəŋ."

50 Vâafɔʼɔ-bi bənchəŋ mɛ̀ʼtə ɔŋ nyʉ́ʉ nə wʉə. 51 Vaakəyɔwobɛʼ nɔ nə gɛ̀ hə bɔ̌ŋ liɛŋ-ɔŋ təmə mɔ̀ʼ ndyi fɛ, lʉ́əŋ bə haʼ vaa-kwii-ndyi mbʉə-ɔ. Mbʉ nuɔ-bʉə kʉ̂ʉ kə́ kɔ̀ɔtə ndə məyá ɔ, 52 ɔ nyʉ́ʉ mɛ̀ʼ mbʉ ndyi, nyʉ́ʉ lɔŋlɔŋ.

53 Bə lʉ̀ Jiso gɛ̀ nə nɔŋ fu-tiefɛ̀ʼndɛŋkwɛʼtəŋNyii. Bətiefɛ̀ʼndɛŋNyii bənchəŋ ghɔŋbə bəntəŋbəshʉ leʼnə bʉə dàhə nuʼ-Mushi chə̀ŋtə bənchəŋ. 54 Bita nɔ kə kə́ gwè hə bɔ̌ŋ ɔŋ dɔdɔ, gwè tə ŋíi mu sêfu-tiefɛ̀ʼndɛŋkwɛʼtəŋNyii. Ɔ gwè dùʼ ghɔŋbə bʉə chyìi mbʉ kəyəŋ kə́ yóʼ viʼi.

55 Nduɔ, bətiefɛ̀ʼndɛŋNyii ghɔŋbə ŋguu-kaŋsotə-hə bənchəŋ kə́ kʉ́ʉ wo ndə ɔ bu bɛ́ŋ mbɔ Jiso bɛ wo-bʉ̂ʼʉ, bɔ̂ŋ chʉʼ yi ɔ, bɔŋ təmə bɔ̂ŋ nyíɛ wo fɛ. 56 Bʉʼka bʉə buŋmbi nɔ kə́ chʉ̀ə lɛɛŋkə kətʉ-ɔ, bɔŋ nubə ndə bɔ̂ŋ kə́ gìe kətʉ-ɔ nɔ kə bɛ ŋkʉʉŋkʉʉ. 57 Bəbɛʼbʉə lɔ̀ tə́nə kə́ chʉ̀ə lɛɛŋkə kətʉ-ɔ kə́ ghɔ̀ŋ mbɔ, 58 "Baʼa nɔ yʉ́ ɔ, ɔ kə́ ghɔ̀ŋ mbɔ, ‘Mɔ bu kùu njaafɛ̀ʼndɛŋNyii-ɔ̄ŋ ndə bɔ́ŋ woməsʉʉ nə ghɔkə, bɔ́ŋ yi-kədɔŋ-yə ndə chîbə itia, təmə bə bɔ́ŋ nə ghɔkə fɛ.’ " 59 Buŋ ndə nubə ndə bɔ̂ŋ kə́ gìe nɔ, bɔ̂ŋ kə kie ŋgiekə imɔʼ fɛ.

60 Ndʉʉmɛ, tiefɛ̀ʼndɛŋkwɛʼtəŋNyii lɔ̀ tə́nə bəshʉ bəbɛʼbʉə, bíʼtə tʉ Jiso mbɔ, "A kie ŋgiekə ndə məbə̀ŋhə tʉ bɔŋ fe? Bɛ ka ndə a kie ndə məgìe te nubə-ɔ̄ŋ ndə bʉə-bɔ̄ŋ gìe kətʉ-a nɔ?" 61 Ɔ líitə mbɔ loʼo təmə bə̀ŋhə nukə fɛ. Mbʉ tiefɛ̀ʼndɛŋkwɛʼtəŋNyii bíʼtə tʉ ɔŋ mbɔ, "A bɛ mbʉ Wo ndə Nyii Kùŋ Tə́ŋ mɛ, Vaa-Wo ndə baʼa tʉʼ lə̀ʼtə ɔŋ mɛ?" 62 Jiso bə̀ŋhə mbɔ, "Mɔ nɔ bɛ ɔ, bii bɔŋ bu nyíɛ Vaa-Woməsʉʉ, ɔ kə́ dùʼ ndəŋ kwiiləŋ wo shʉ́əshʉ́ə, kə́ gwè hə ndəŋ mbɔʼ-yuo-kə." 63 Bɔŋ mbʉ tiefɛ̀ʼndɛŋkwɛʼtəŋNyii jɔ̀ʼtə ndyihə-i ghɔ̀ŋ mbɔ, "Bʉʼʉ tʉʼ kʉ́ʉ leʼ yʉ́ ka nduɔ kəghɔ-bəbɛʼbʉə te ɔ? 64 Bii nɔʼ yʉ́ ndə ɔ bʉ́əhə yie Nyii. Bii ghɔ̀ŋ mbuka chɔ?" Bɔ̂ŋ bənchəŋ ghɔ̀ŋ mbɔ ɔ la nɔʼ gwù, bə kie ndə məyí ɔ.

65 Bəbɛʼbʉə chʉ́ʉhə mətyùtə ntɛmə ndəŋ ɔŋ, kə́ bɔ̀ŋ shʉ-i bɔŋ-kə́-leʼ gwúu ɔ, kə́ ghɔ̀ŋ tʉ ɔŋ mbɔ, "Tɔ wo ndə ɔ kwɔ̀ŋ aŋ!" Mbʉ bʉə ndə bɔ̂ŋ kə́ chyìi yəŋbə lʉ̀ ɔ nə fʉəŋbə.

66 Ndə Bita kə dùʼ tiɛŋ mbɔŋ sêfu, mbyu vaafɔ̀ʼ tiefɛ̀ʼndɛŋkwɛʼtəŋNyii ndə ɔ bɛ vaabəke gwè, 67 nyíɛ Bita ɔ kə́ yóʼ viʼi, ɔ lɛ́nə ɔŋ shʉ-ɔ, ghɔ̀ŋ mbɔ, "Mbəŋ-aŋ ghɔ nɔ nə bɛ bii Jiso ndə ɔ lɔ̀ hə Nasalɛ." 68 Ɔ kɔ́tuu-i, ghɔ̀ŋ mbɔ, "Mɔ kínə fɛ byuunɔ kə́ yʉ́ nukə ndə a tʉʼ gìe fɛ." Ɔ lɔ̀ gɛ̀ chulɔŋ, ŋkʉəʼə tʉʉ.* 69 Mbʉ vaafɔ̀ʼ, vaabəke-ghɔ̄ nyíɛ ɔŋ, bìʼ chʉ́ʉhə kə́ gìe tʉ bʉə ndə bɔ̂ŋ kə tə́ŋtə chɔ mbɔ, "Wo-ɔ̄ nɔ bɛ mbyu wo-imɔʼ mu bɔŋ." 70 Ɔ bìʼ tɛ́ŋ. Kʉʉkə məniʼ, mbʉ bʉə ndə bɔ̂ŋ kə tə́ŋtə chɔ, bìʼ gìe tʉ Bita mbɔ, "A nɔ bɛ mbyu wo-yʉə leʼ shʉəŋ bʉʼka a nɔ lɔ̀ hə Galili." 71 Bɔŋ ɔ chʉ́ʉhə ndə mətíi ndɔŋ kɔ́ kətʉ-ɔ bɔŋleʼ kàa nukə, ghɔ̀ŋ mbɔ, "Mɔ buŋ kínə wo-ɔ̄ ndə bii tʉʼ kwə́ʼ te ɔ nɔ fɛ." 72 Haʼ ndʉʉmɛ, ŋkʉəʼə bìʼ tʉ́ʉ ndə vɛʼ bûu. Bita kwɛ́nə nukə ndə Jiso kə gìe tʉ ɔŋ mbɔ, "Ŋkʉəʼə bu yi kə tʉ́ʉ vɛʼ bûu nɔ, tʉ a nɔʼ kɔ́tuu vɛʼ tia mbɔ a la kínə mɔ fɛ." I bə́ʼtə Bita, ɔ gwía.