1 Ndʉʉ ndə Jiso kə lɔ̀ hə Kabanu, ɔ gɛ̀ mu bie Judia, gɛ̀ tə dàa ŋgwɛŋ Jodaŋ gɛ̀ nə shʉbə, bʉə buŋmbi bìʼ chə̀ŋtə mbʉə-ɔ. Ɔ bìʼ chìi haʼ ndə ɔ̃ chìi, chʉ́ʉhə kə́ dàhə bɔŋ.

2 Bʉə-Falasi kóʼ gwè ndə məmùutə ɔŋ bíʼtə tʉ ɔŋ mbɔ, "Nuʼ Mushi bɛ́ŋ mbɔ ẅoləŋ wɔ̀ʼtə lɔŋ ghɔŋ vi-i mɛ?"

3 Ɔ bə̀ŋhə tʉ bɔŋ mbɔ, "Mushi kə kàhə bii mbuka?"

4 Bɔ̂ŋ ghɔ̀ŋ mbɔ, "Mushi nɔ nə bɛ́ŋ mbɔ bəkɔ woləŋ kɔ́ ŋwɔʼnə tʉ vi-i ndə mədʉ̀ʼ mbɔ ghɔŋ ɔŋ nɔʼ wɔ̀ʼtə lɔŋ, ndə məjə̀ŋ ɔŋ ɔ̈ gɛ̀ nə wi."

5 Jiso ghɔ̀ŋ tʉ bɔŋ mbɔ, "Nɔ kə bɛ bʉʼka məshʉ́əhə-fyii ndə bii kə shʉ́əhə fyiihə-ii ndə i chìi Mushi buŋ nyɔ̀ʼ mbyu ŋkahə-ɔ̄ŋ tʉ bii. 6 Bɔŋ lʉ̀ hə ndəŋ ŋgwunə-mbi, ‘Nyii nɔ nə chìi bɔŋ ndə woləŋ ghɔŋ woke.’ 7 ‘Nɔ, bʉʼka luu-ɔ̄, woləŋ nɔ kie ndə məmɛ̀ʼtə tie-e ghɔŋ ŋkwê-i, gɛ̀ tùonə ghɔŋ vi-i, * 8 mbʉ b̈ʉə bəbûu bɛ mbyu mbʉə imɔʼ.’ Bɔ̂ŋ leʼbie bʉə bəbûu fɛ, bɔ̂ŋ bəbûu bu bɛ mbyu mbʉə imɔʼ. 9 Nɔ, fɔkə ndə Nyii nɔʼ tùo, kə wo mə mùutə mbɔ ɔ wɔ̀ʼhə fɛ."

10 Ndʉʉ ndə bɔ̂ŋ kə bɛ mu njaa, vâafɔʼɔ-bi bìʼ bíʼtə tʉ ɔŋ te nukə ndə ɔ kə gìe. 11 Ɔ bə̀ŋhə tʉ bɔŋ mbɔ, "Wotəmiyɔŋ ndə ɔ wɔ̀ʼtə lɔŋ ghɔŋ vi-i, lʉ̀ yi-kədɔŋ-yə, nɔʼ chìi bʉ̂ʼʉ tʉ vi-i ndə məgháa bəsəŋ. 12 Bɔŋ kaʼ woke leʼ wɔ̀ʼtə lɔŋ ghɔŋ ləŋ-ɛŋ gɛ̀ lʉ̀ woləŋ kədɔŋ, təmə ɔ nɔʼ gháa bəsəŋ."

13 Nɔ nə bɛ yɔŋbɛʼ, bətie-vâa-bɛʼbə kə́ gwè nə vâa-bʉə tʉ Jiso mbɔ ɔ̈ mɔ̀ʼ ghɔkə-i ndəŋ bɔŋ, vâafɔʼɔ-bi sɔ́ʼ bɔŋ. 14 Bɔŋ ndʉʉ ndə Jiso nyíɛ, tʉʉ-i byʉ́ʼ, ɔ ghɔ̀ŋ tʉ bɔŋ mbɔ, "B̈ii mɛ̀ʼtə v̈âambuɔ gwè tʉ mɔ, kə bii mə leʼ chíe bɔŋ fɛ bʉʼka Sɔ́ʼ-Nyii nɔ bɛ tʉ ntɛ bʉə nə bɔ̄ŋbə. 15 Nɔʼ m̈ɔ shyíi bii nə shʉəŋ mbɔ wotəmiyɔŋ ndə ɔ gòʼ təmə kɔ́ ŋwɔŋ-ɛŋ mbɔ Nyii sɔ́ʼ ɔ nə vaambuɔ fɛ, ɔ mə nə ŋíi mu Sɔ́ʼ-Nyii fɛ." 16 Ɔ kwétə bɔŋ chu fyii-ɔ, mɔ̀ʼ ghɔkə-i ndəŋ bɔŋ túu biʼkə kɔ́ tʉ bɔŋ.

17 Ndʉʉ ndə Jiso kə́ gɛ̀ mətòʼ, wobɛʼ nyʉ́ʉ kóʼ gwè tʉ ɔŋ, gwè bè kweʼtəbə-i bəshʉ ɔ, bíʼtə tʉ ɔŋ mbɔ, "Tie-ɔ chicha, a nɔ wo-nuʼ-jyujyu, bɛ ka ndə mɔ kie ndə mə-yaʼ-chìi ndə məkie məchímbi təmə liʼ-i ghɔ fɛ?" 18 Jiso bə̀ŋhə tʉ ɔŋ mbɔ, "A tíi mɔ nə wo-nuʼ-jyujyu bʉʼka ka? Wo kaa ghɔ ndə ɔ kie nuʼ-jyujyu fɛ yaʼkɛŋ Nyii tətɛʼ ɛ. 19 Bii nɔ kínə bəŋkahə Nyii ndə i ghɔ̀ŋ mbɔ, ‘Kə a mə yí wo fɛ, kə a mə gháa bəsəŋ fɛ, kə a mə lʉ́ʼ fɛ, kə a mə tɔ́ŋ bɔ̌ŋ wo ndəŋ lɛɛŋkə fɛ, kə a mə yú ŋkwo fɛ, kɔ́ kuŋhə tʉ naa-aŋ ghɔŋ tie-a.’ "

20 Ɔ bə̀ŋhə tʉ Jiso mbɔ, "Chicha, mɔ nɔʼ kɛŋ fɔ̀ʼ nubə-ɔ̄ŋ inchəŋ lʉ̀ hə vaambuɔ."

21 Ndʉʉ ndə Jiso tʉʼ lɛ́nə ɔŋ, ɔ kie ŋkʉ̂ʉ tʉ ɔŋ, ghɔ̀ŋ tʉ ɔŋ mbɔ, "A nɔ byúu mbyu kənu imɔʼ, gɛ̀ fɛ̀ŋ fɔbə inchəŋ ndə a kie kɔ́ tʉ bʉə-mbʉʼ, kaʼ a chìi nɔ, a kie lə̂ŋ-aŋ yuo, ndʉʉmɛ, gwè, kə́ gwè hə bɔ̌ŋ mɔ." 22 Bʉʼka ŋgiekə-ɔ̄ŋ, shʉ-i jyùu, ɔ lɔ̀ kə́ gɛ̀ vínəvínə, bʉʼka ɔ nɔ nə kie fɔbə yɔ́ŋyɔ́ŋ.

23 Jiso lɛ́nə vâafɔʼɔ-bi mbʉə-ɔ, ghɔ̀ŋ tʉ bɔŋ mbɔ, "I bu shʉ́ə daa tʉ bʉə-kəfʉʼ ndə məŋíi mu Sɔ́ʼ-Nyii!" 24 Ŋgiekə-i chíe chu vâafɔʼɔ-bi. Bɔŋ Jiso gìe tʉ bɔŋ mbɔ, "Vâambuɔ, i nɔ shʉ́ə daa * ndə məŋíi mu Sɔ́ʼ-Nyii! 25 I nɔ yùhə tʉ nyaa-bəkatə * ndə məsʉ́ʉ hə ndəŋ gyii-sɔʼ-kə tə chàa ndə i bɛ tʉ wo-kəfʉʼ ndə məŋíi mu Sɔ́ʼ-Nyii."

26 I chíe chu-vâafɔʼɔ-bi daa, bɔ̂ŋ bíʼtə tʉ ɔŋ mbɔ, "Bɛ nda ndʉʉghɔfii ndə bəkɔ ɔ kie ŋkwaaNyii?"

27 Jiso lɛ́nə bɔŋ ghɔ̀ŋ mbɔ, "Yɔ̄ŋ-yə nɔ chàa ghʉəʼ-woməsʉʉ-kə, bɔŋ nubɛʼkə kaa ghɔ ndə i chàa Nyii fɛ. Bʉʼka nubə inchəŋ nɔ yùhə tʉ Nyii."

28 Bita chʉ́ʉhə kə́ ghɔ̀ŋ tʉ ɔŋ mbɔ, "Nyíɛ! Baʼa nɔʼ mɛ̀ʼtə fɔbə inchəŋ ndə məgwè hə bɔ̌ŋ aŋ."

29 Jiso gìe tʉ bɔŋ mbɔ, "Nɔʼ m̈ɔ shyíi bii nə shʉəŋ mbɔ, wo kaa ghɔ ndə ɔ nɔʼ mɛ̀ʼtə fɔbə nə njaa-ɛ byuunɔ bəliŋ-bi, bələŋ ghɔŋbə bəke, byuunɔ ŋkwê-i byuunɔ tie-e byuunɔ vâa-bi byuunɔ tɔ̂bə-i bʉʼka mɔ leʼnə ntəŋjyujyu, 30 ndə ɔ bu gòʼ təmə kie yɔ́ŋyɔ́ŋ tə dàa nə vɛʼ ghyʉʉ tíŋ ndə ɔ kə fəŋ kie ndə mbi-laa-ɔ̄ nɔ fɛ, ndə njaahə leʼnə bəliŋ-bi, bələŋ ghɔŋbə bəke, leʼnə bənaa-bi leʼnə vâa leʼnə tɔ̂bə leʼnə ŋgʉəʼ ghɔŋbə məchímbi təmə liʼ-i ghɔ fɛ ndə i bɛ bəshʉ gwè. 31 Bɔŋ bʉə buŋmbi ndə bɔ̂ŋ bɛ fəŋtə bu yi bɛ ndyiʼtəbə, ndyiʼtəbə bɛ fəŋtə."

32 Ndʉʉ ndə Jiso kə bɛ sêfia ghɔŋbə vâafɔʼɔ-bi, kə́ kóʼ gɛ̀ Jɛlosalɛŋ, Jiso nɔ nə kə́ gɛ̀ hə bəshʉ bɔŋ. I chíe chutə-ʉə, bʉə ndə bɔ̂ŋ kə́ gwè hə bɔ̌ŋ liɛŋ-bɔŋ kə́ fàa. Ndʉʉ ndə Jiso ghɔŋbə mbʉ vâafɔʼɔ-bi njuɔ bûu nə wuŋ fí ŋwɔŋ-yʉə-bɔŋ bɔ̌ŋ, ɔ chʉ́ʉhə kə́ shyíi bɔŋ nə nukə ndə i bu fyú chíe ɔ. 33 "B̈ii nyíɛ, bʉʼʉ nɔ tʉʼ kóʼ gɛ̀ Jɛlosalɛŋ, bə bɔŋ bu chɔ̀ʼhə Vaa-Woməsʉʉ, kɔ́ kəghɔ-bətiefɛ̀ʼndɛŋNyii leʼnə bʉə dàhə nuʼ-Mushi, bɔ̂ŋ chʉ̀ə ŋkwɛ mbɔ b̈ə yí ɔ. Bə bɔŋ-bu-leʼ chɔ̀ʼhə ɔŋ kɔ́ mu kəghɔ-bʉə ndə bɔ̂ŋ gòʼ təmə bɛ bʉə-Juu fɛ. 34 Bɔ̂ŋ bu dʉ̀ʉhə ɔŋ, tyù ntɛmə mbʉə-ɔ, kɛŋ gwúu ɔ yí, kʉ̂ʉ bɛ chîbə itia nɔ ɔ bʉ̀nə kóʼ."

35 Jɛŋ ghɔŋ Jɔŋ vâa-Sabɛdi kóʼ gwè tʉ Jiso ghɔ̀ŋ tʉ ɔŋ mbɔ, "Chicha, baʼa nɔ tʉʼ kʉ́ʉ mbɔ nukə təmiyɔŋ ndə baʼa bíʼtə tʉ a, ä fɔ̀ʼ tʉ baʼa."

36 Ɔ bíʼtə tʉ bɔŋ mbɔ, "Bɛ ka ndə bii tʉʼ kʉ́ʉ mbɔ m̈ɔ fɔ̀ʼ tʉ bii?"

37 Bɔ̂ŋ ghɔ̀ŋ tʉ ɔŋ mbɔ, "Chìi mbɔ mbyu wo-imɔʼ mu baʼa yi dùʼ kwiimɔʼnə-aŋ, mbyu wo-imɔʼ dùʼ kwiiŋkwie-a ndʉʉ ndə a bu yi kə́ sɔ́ʼ fɔŋ mu məŋwɔʼmə-a."

38 Jiso bə̀ŋhə tʉ bɔŋ mbɔ, "Bii kínə nukə ndə bii tʉʼ bíʼtə fɛ. Bəkɔ bii nú hə mu ndʉ̂ʉ ŋgʉəʼ ndə mɔ bu nú hə chɔ, byuunɔ fí ntɛ muu, ndə bɛ ŋgʉəʼ, ndə mɔ bu fí mɛ?" 39 Bɔ̂ŋ bə̀ŋhə tʉ ɔŋ mbɔ, "Bəkɔ baʼa chìi." Jiso ghɔ̀ŋ tʉ bɔŋ mbɔ, "Mbʉ ndʉ̂ʉ ŋgʉəʼ ndə mɔ bu nú hə chɔ, bii bu nú ntɛ muu-ŋgʉəʼ-mə ndə mɔ bu fí, bii bu fí. 40 Bɔŋ mədùʼ kwiimɔʼnə-mɔ byuunɔ kwiiŋkwie-mɔ, kaa yəŋkə-ɔŋ ndə məgìe fɛ, bə bɔŋ bu kɔ́ bə haʼ tʉ bʉə ndə bə nɔʼ kə shʉ̀tə tʉ bɔŋ." 41 Bɔŋ ndʉʉ ndə bəʼ-vâafɔʼɔ-Jiso-kə wuŋ kə yʉ́ yɔ̄ŋ-yə, tʉʉ-yʉə chʉ́ʉhə ndə məbyʉ́ʼ ndəŋ Jɛŋ ghɔŋ Jɔŋ. 42 Jiso tíi bɔŋ mbʉə ɔ, ghɔ̀ŋ tʉ bɔŋ mbɔ, "Bii nɔ kínə mbɔ bʉə ndə bə kínə bɔŋ ndə bəfɔŋ, bɔ̂ŋ kə́ sɔ́ʼ bʉə ndə bɔ̂ŋ gòʼ təmə bɛ bʉə-Juu fɛ, nɔ tʉʼ gìe kətʉ-bɔŋ, bəntəŋbəshʉ-bʉə kə́ bʉ́bʉ́ kətʉ-bɔŋ ndə nubə inchəŋ. 43 I bɔŋ kie ndə məbɛ nɔ mu bii fɛ. Bɔŋ kaʼ wo hə mu bii leʼ kʉ̀ʉ ndə məbɛ wokwɛʼtəŋ, ɔ nɔ kie ndə məlʉ̀ ŋwɔŋ-ɛŋ ndə vaafɔ̀ʼ, 44 bɔŋ kaʼ wo mu bii kʉ̀ʉ ndə məbɛ fəŋ, ɔ nɔ kie ndə məbɛ fʉə tʉ bʉə bənchəŋ. 45 Bʉʼka buŋ Vaa-Woməsʉʉ kə gwè mbɔ b̈ə kə́ fɔ̀ʼ tʉ ɔŋ fɛ, ɔ nɔ gwè ndə məfɔ̀ʼ bɔŋleʼ kɔ́ məchimbi-i ndə məchʉ̀ʼ tʉ-bʉə-buŋmbi-kə."

46 Bɔ̂ŋ gwè dàa Jɛliko. Kʉ̂ʉ bɛ ndʉʉ ndə ɔ tʉʼ lɔ̀ hə Jɛliko ghɔŋbə vâafɔʼɔ-bi leʼnə nuɔ-bʉə-buŋmbi, Batimu, ndə ɔ bɛ fʉ̀əŋtəshʉ bəghaa kə́ bɛ vaa-Timu, kə́ dùʼ kəmbia fia. 47 Ndʉʉ ndə ɔ kə yʉ́ mbɔ Jiso ndə ɔ lɔ̀ hə Nasalɛ kə́ gwè, ɔ chʉ́ʉhə mətíi nə ghʉəʼkə kə́ ghɔ̀ŋ mbɔ, "Jiso, V̈aa-Dɛbi, kə ẗʉkə-a vyíi ndəŋ mɔ le!" 48 Bʉə buŋmbi sɔ́ʼ ɔ, kə́ ghɔ̀ŋ mbɔ ɔ̈ líitə. Bɔŋ ɔ bìʼ tíitíi nə ghʉəʼkə, mbɔ, "V̈aa-Dɛbi, kə ẗʉkə-a vyíi le ndəŋ mɔ!" 49 Jiso tə́nə ghɔ̀ŋ mbɔ, "B̈ii tíi ɔ." Bɔ̂ŋ tíi mbʉ fʉ̀əŋtəshʉ, ghɔ̀ŋ tʉ ɔŋ mbɔ, "Kie fyii, lɔ̀ hə sê gwè, ɔ tʉʼ tíi a." 50 Ɔ shùɔ ndyi-fəʼə-ɛ mɛ̀ʼ, sɛ́ʼ gɛ̀ tʉ Jiso. 51 Jiso bíʼtə tʉ ɔŋ mbɔ, "A tʉʼ kʉ́ʉ mbɔ m̈ɔ bɛ təka nə naŋ?" Mbʉ fʉ̀əŋtəshʉ bə̀ŋhə mbɔ, "Chicha, mɔ nɔ tʉʼ kʉ́ʉ mə-kə́-bʉ̀nə nyíɛ yəŋkə." 52 Jiso ghɔ̀ŋ tʉ ɔŋ mbɔ, "Gɛ̀ nə wa, bʉʼka a mɔ̀ʼfyii-a ndəŋ mɔ, mɔ nɔʼ chìi a kie nchʉʼ." Haʼ ndʉʉmɛ, ɔ bʉ̀nə nyíɛ yəŋkə, chʉ́ʉhə kə́ tòʼ gɛ̀ hə bɔ̌ŋ Jiso.