1 Ndʉʉ ndə Jiso kə bʉ̀nə gwè lɔʼɔ Kabanu, ndə mbyu-bəchî-hə tíŋ məniʼ, bə yʉ́ mbɔ ɔ la nɔʼ bʉ̀nə gwè chunjaa. 2 Bʉə buŋmbi chə̀ŋtə, təmə fia leʼ bɛ ghɔ ndə mətíŋ fɛ, buŋ təkɔmə mətíŋ hə chusii. Ɔ kə́ lɔ̀ʼ ŋgieNyiikə tʉ bɔŋ. 3 Bʉəbɛʼbə gwè tʉ Jiso nə wo ndə ɔ nɔʼ kwú kəviakəmɔʼ, bʉə kwi bɛ̀ʼ ɔ ndəŋ mbyuukə. 4 Bɔ̂ŋ kʉ̂ʉ mùutə məgɛ̀ dàa mbʉə ɔ kəŋkaa bʉʼka bʉə ndə bɔ̂ŋ yɔ́ŋ daa, bɔ̂ŋ shùʼ mbyuu kətʉ njaa,* shúʼhə mbʉ kəmbyuu sê ndə mbʉ wo ndə ɔ nɔʼ kə kwú kəviakəmɔʼ nʉ̀ʉ chɔ. 5 Jiso kʉ̂ʉ nyíɛ ntɛ ndə bɔ̂ŋ mɔ̀ʼfyiihə-ʉə ndəŋ ɔŋ, ɔ ghɔ̀ŋ tʉ mbʉ wo ndə ɔ nɔʼ kwú kəviakəmɔʼ le mbɔ, "Ŋaʼ, bə nɔʼ sʉ̀fyii hə ndəŋ bʉ̂ʼʉ-a."

6 Bʉəbɛʼbə ndə b̃ɔ̂ŋ dàhə nuʼ-Mushi kə́ dùʼtə chɔ, kə́ bíʼtə mu fyii-bɔŋ mbɔ, 7 "Chìi ka wo-ɔ̄ kə́ kwə́ʼ mənɔ? Ɔ nɔ tʉʼ bʉ́əhə yie Nyii! Bɛ nda ndə bəkɔ ɔ sʉ̀fyii-i hə ndəŋ bʉ̂ʼʉ-wo yaʼkɛŋ Nyii tətɛʼ ɔ?" 8 Haʼ ndʉʉmɛ, Jiso kínə mu mbʉə-ɔ nukə ndə bɔ̂ŋ tʉʼ kwɔ̀ʼtə, gìe tʉ bɔŋ mbɔ, "Chìi ka bii kə́ bíʼtə nubə-ɔ̄ŋ hə mu fyii-bii? 9 Yùhə yɔ̂ŋ-yə, ndə məgìe tʉ wo-ɔ̄ ndə ɔ nɔʼ kwú kəviakəmɔʼ nɔ mbɔ, ‘Bə nɔʼ sʉ̀fyii hə ndəŋ bʉ̂ʼʉ-a’ mɛ byuunɔ kə məghɔ̀ŋ mbɔ, ‘Lɔ̀ hə sê, lʉ̀ mbyuukə-a, tòʼ ’? 10 Mɔ bu chìi bii kínə mbɔ mbʉ Vaa-Woməsʉʉ nɔ kie ghʉəʼkə kəchisê ndə məsʉ̀fyii-i hə ndəŋ bʉ̂ʼʉ." Ɔ ghɔ̀ŋ tʉ wo-ghɔ̄ ndə ɔ nɔʼ kə kwú kəviakəmɔʼ le mbɔ, 11 "Mɔ nɔ tʉʼ ghɔ̀ŋ tʉ a mbɔ, lɔ̀ hə sê, lʉ̀ mbyuukə-a, gɛ̀ chunjaa." 12 Haʼ ndʉʉmɛ, ɔ lɔ̀ hə sê lʉ̀ mbyuukə-i tòʼ tíŋ hə bəshʉ bʉə bənchəŋ fyú mbi, i chìi chu-yʉə chíe, bɔ̂ŋ kə́ lə̀ʼtə Nyii ghɔ̀ŋ mbɔ, "Baʼa chʉʼ nə nyíɛ nukə ndə yɔ̄ŋ-yə fɛ!"Məshúʼhə wo ndə ɔ nɔʼ kwú kəviakəmɔʼ ndə mbyuukə mɔ̀ʼ bəshʉ Jiso

13 Ndʉʉmɛ, Jiso bìʼ fyú gɛ̀ ŋgwuu taanə-kəghəŋ-Galili-kə, nuɔ-bʉə-tə kə́ gwè tʉ ɔŋ, ɔ kə́ dàhə bɔŋ. 14 Ndə ɔ kə́ tòʼ tíŋ, ɔ nyíɛ Lɛvi ndə ɔ bɛ vaa-Afio, ɔ dùʼ mu vaa-njaa fí tashi, Jiso ghɔ̀ŋ tʉ ɔŋ mbɔ, "Gwè hə bɔ̌ŋ mɔ." Ɔ lɔ̀ hə sê gɛ̀ hə bɔ̌ŋ ɔŋ.

15 Ndʉʉ ndə Jiso kə́ yú fɔbə mu njaa Lɛvi buŋmbi bʉə fí tashi ghɔŋbə bʉə-bʉ̂ʼʉ bìa ɔ ghɔŋbə vâafɔʼɔ-bi ndə məyú fɔbə, bʉʼka bɔŋ buŋmbi nɔ kə́ gɛ̀ hə bɔ̌ŋ ɔŋ. 16 Bʉə dàhə nuʼ-Mushi ndə bɔ̂ŋ kə bɛ bʉə-Falasi, kʉ̂ʉ nyíɛ mbɔ ɔ tʉʼ yú fɔbə* ghɔŋbə bʉə-bʉ̂ʼʉ leʼnə bʉə fí tashi, bɔ̂ŋ kə́ bíʼtə tʉ vâafɔʼɔ Jiso mbɔ, "Chìi ka ɔ kə́ yú fɔbə ghɔŋbə bʉə fí tashi leʼnə bʉə-bʉ̂ʼʉ?" 17 Ndʉʉ ndə Jiso kə yʉ́, ɔ ghɔ̀ŋ tʉ bɔŋ mbɔ, "Kaa w̃o shʉ́əshʉ́ə ndə ɔ gɛ̀ tʉ dota fɛ, nɔ gɛ̀ wokəyɔʼ. Mɔ gwè ndə mətíi bʉə ndə bɔ̂ŋ kwɔ̀ʼtə mbɔ bɔ̂ŋ bɛ ndyʉndyʉ fɛ, mɔ nɔ gwè ndə mətíi bʉə-bʉ̂ʼʉ."

18 Nduɔ, vâafɔʼɔ Jɔŋ ndə ɔ̃ kɔ́ muu ghɔŋbə bʉə-Falasi nɔ nə kə́ jì muu. Bʉəbɛʼbə gwè bíʼtə tʉ Jiso mbɔ, "Chìi ka vâafɔʼɔ Jɔŋ ghɔŋbə vâafɔʼɔ bʉə-Falasi kə́ jì muu bɔŋ təmə ya-yə vâafɔʼɔ kə́ jì fɛ?"

19 Jiso bə̀ŋhə tʉ bɔŋ mbɔ, "Bəkɔ bʉə-ŋkɔʼnə woləŋ ndə ɔ tʉʼ chìi lɔŋ, jì muu ghɔŋ bɔŋ kə́ bɛ mɔʼɔ mɛ? Kaʼ ghɔŋbə mbʉ woləŋ chìi lɔŋ bɛ mɔʼɔ, bɔ̂ŋ mə jì muu fɛ. 20 Bɔŋ chîbə tʉʼ gwè ndə bə bu lʉ̀ mbʉ woləŋ ndə ɔ tʉʼ chìi lɔŋ kəghɔ-bɔŋ, ndʉʉmɛ bɔ̂ŋ bu kə́ jì muu. 21 Wo mə lʉ̀ via-ndyi-fefe-kə tɛ́nɛ ndyi kənduɔŋ nə yɔŋ fɛ. Kaʼ ɔ chìi nɔ, mbʉ kəvia ndyi fefe ŋʉ́ə, chóʼ mbyuu chɔ, mbʉ mbyuu bìʼ ghʉ́ʉnə chàa ndə i kə bɛ. 22 Wo kyinə véʼ ndʉʼ-sʉ́ʼnə-mə mu bɔʼ-kənduɔŋ-kə ndə bə chìi nə gwo-nyaa fɛ. Kaʼ ɔ chìi nɔ mbʉ məndʉʼ sáa mbʉ gwo-məndʉʼ, mbʉ gwo byʉ́ʼ, mbʉ məndʉʼ tyùnə bɛ́. Bɔŋ ñdʉʼ-sʉ́ʼnə-mə nɔ ŋíi mu bɔʼ-fefe-kə." *

23 Nɔ nə bɛ Chîlɔʼbɛʼkə, Jiso kə́ tíŋ ghɔŋbə vâafɔʼɔ-bi mutɔ-məntɔŋ. Ndə bɔ̂ŋ kə́ tíŋ, vâafɔʼɔ-bi chʉ́ʉhə kə́ shyìi ntɔŋmə. 24 Bɔŋ bʉə-Falasi kə́ bíʼtə tʉ ɔŋ mbɔ, "Nyíɛ! Chìi ka vâafɔʼɔ-ba kə́ bə́ʼ nuʼ ndəŋ Chîlɔʼkə?" 25 Ɔ bə̀ŋhə tʉ bɔŋ mbɔ, "Bii chʉʼ nə tíi mu ŋwɔʼnə-Nyii, nukə ndə Dɛbi nə chìi, vɛʼ ndə jyʉʉ nə yɔ́ʼ ɔ ghɔŋbə bʉə-bi fe? 26 Ɔ nɔ kə sʉ́ʉ mu lɛʼ-Nyii-kə vɛʼ ndə Abiata kə bɛ tiefɛ̀ʼndɛŋkwɛʼtəŋNyii, kwó bele-fɛ̀ʼndɛŋ ndə kə kie haʼ bʉəfɛ̀ʼndɛŋNyii ndə məkwó bɔŋleʼ kɔ́ ibɛʼ-yə tʉ bʉə ndə ghɔŋ bɔŋ kə́ bɛ mɔʼɔ." 27 Jiso bə̀ŋhə tʉ bɔŋ mbɔ, "Bə nɔ chìi Chîlɔʼkə bʉʼka woməsʉʉ, bə kə chìi woməsʉʉ bʉʼka Chîlɔʼkə fɛ. 28 Nɔ, Vaa-Woməsʉʉ nɔ bɛ Tiekətʉ-Chîlɔʼkə ghɔ."