1 Ndʉʉ ndə bʉə-Falasi chə̀ŋtə mbʉə ɔ, ghɔŋbə bəbɛʼbʉə dàhə nuʼ-Mushi ndə bɔ̂ŋ gwè hə Jɛlosalɛŋ, 2 bɔ̂ŋ nyíɛ ndə vâafɔʼɔ-bi-bɛʼbə tʉʼ yú fɔbə təmə nɔʼ búu ŋwɔŋ-yʉə ndə məsʉ̀ ghɔkə-ʉə fɛ. 3 Bʉʼka bʉə-Falasi ghɔŋbə bʉə-Juu bənchəŋ kyinə yú fɔbə təmə nɔʼ búu ŋwɔŋ-yʉə, ndə mətʉ́ʼ nuʼ bəntəŋbəshʉ fɛ. 4 Bɔ̂ŋ kə́ chìi haʼ nɔ, ndʉʉ ndə bɔ̂ŋ bʉ̀nə bəyəŋ vyii nɔ, bɔ̂ŋ búu ŋwɔŋ-yʉə ndə məsʉ̀ ghɔkə-ʉə buŋ yú fɔkə. Bəbɛʼbə ntɛ-nuʼ-hə nɔ nə bɛ ghɔ buŋmbi ndə bɔ̂ŋ kə́ búu, nuʼ ndə məsʉ̀ ndʉʉhə, sʉ̀ kyʉʉtə, sʉ̀ bɔʼ-kətəŋ-bə leʼnə fɔŋbə.* 5 Bəbɛʼbə bʉə-Falasi ghɔŋbə bʉə dàhə nuʼ-Mushi bíʼtə mbɔ, "Chìi ka təmə vâafɔʼɔ-ba kə́ tʉ́ʼ nuʼ bəntəŋbəshʉ, bɔŋ bɔ̂ŋ kə́ yú fɔbə təmə nɔʼ búu ŋwɔŋ-yʉə fɛ." 6 Jiso bə̀ŋhə tʉ bɔŋ mbɔ, "Adaya nɔ kə gìe i kʉ̀ʼnə te bii ndə ɔ kə téʼ ntəŋ ndə i kə gwè hə kəghɔ-Nyii te bii, bʉə làhə shʉ mu ŋwɔʼnə-i ndə ɔ kə nyɔ̀ʼ mbɔ,

‘Bʉə-bɔ̄ŋ nɔ tʉʼ lə̀ʼtə mɔ nə wuochubə-ʉə,

bɔŋ fyiihə-ʉə dɔ̀ŋnə mbʉə mɔ,

7 Bɔ̂ŋ nɔ tʉʼ lə̀ʼtə mɔ njʉnjʉ,

bʉʼka bɔ̂ŋ nɔ tʉʼ dàhə nuʼ-bʉəməsʉʉ, fi nə bɛ nuʼ-Nyii.’ *

8 Bii nɔ mɛ̀ʼtə nuʼ-Nyii yá bə nuʼ-bʉəməsʉʉ tə́nə chɔ."

9 Ɔ ghɔ̀ŋ tʉ bɔŋ mbɔ, "Bii nɔ kie ndaa ndə mətʉ́ʉhə nuʼ-Nyii tʉ́ʼ bɔ̌ŋ, lʉ̀ nuʼ-lɔʼɔ-yii tʉ́ʼ bəshʉ. 10 Bʉʼka Mushi nɔ nə kàhə mbɔ, ‘Kɔ́ kuŋhə tʉ naa-aŋ ghɔŋ tie-a’ bɔŋleʼ kàhə mbɔ, ‘Wotəmiyɔŋ ndə ɔ gìe nu-bʉə-kə kətʉ tie-e byuunɔ kətʉ ŋkwê-i nɔ kie ndə məkwú.’ 11 Bii bɔŋ tʉʼ dàhə mbɔ kaʼ wo gìe tʉ tie-e byuunɔ ŋkwê-i mbɔ, ‘Fɔkə ndə mɔ kie ndə məkɔ́ tʉ a nɔʼ Kubaŋ’ (ndə i bɛ mbɔ nɔ yi-Nyii-yə), 12 ndʉʉmɛ bii bɛ́ŋ kɔ́ tʉ ɔŋ mbɔ ɔ nɔ chìi i kʉ̀ʼnə mbɔ ɔ mə kwáa tie-e byuunɔ ŋkwê-i fɛ, 13 kə́ chìi haʼ nɔ, bʉ́əhə ŋgieNyiikə nə nuʼ ndə i tʉʼ lɔ̀ hə chu dàa chu. Bəbɛʼnubə nɔ ghɔ buŋmbi ndə bii tʉʼ chìi haʼ nɔ."

14 Jiso bìʼ tíi mbʉ bʉə mbʉə ɔ ghɔ̀ŋ tʉ bɔŋ mbɔ, "B̈ii bənchəŋ yʉ́ chʉʼ kínə, 15 fɔbɛʼkə kaa ghɔ ndə kaʼ i lɔ̀ hə njəŋmbi ŋíi mu mbʉə-a i bʉ́əhə a fɛ, bɔŋ nɔ bɛ fɔkə ndə ĩ fyú hə mu mbʉə-a ndə i bʉ́əhə a." 16 ["Kaʼ wotəmiyɔŋ kie tyunəkə, ɔ̈ yʉ́."]

17 Ndʉʉ ndə ɔ sʉ́ʉ mu njaa mɛ̀ʼtə mbʉ bʉə mbi, mbʉ vâafɔʼɔ-bi bíʼtə nukə tʉ ɔŋ ndə mbʉ kəchəŋ bɛ yɔŋ. 18 Jiso bə̀ŋhə tʉ bɔŋ mbɔ, "I dʉ̀ʼ mbɔ mbəŋ-yii kínə ghɔ fɛ mɛ? Bii kínə mbɔ fɔkə təmiyɔŋ ndə ĩ sʉ́ʉ mu bətɔ wo lɔ̀ hə njəŋmbi mə bʉ́əhə ɔŋ fɛ, 19 bʉʼka mbɔ i tʉʼ sʉ́ʉ mu fyii-ɔ fɛ, i nɔ tʉʼ sʉ́ʉ bə mu bətɔ-ɔ, ɔ nɔ́ kəbu fe?" Ndʉʉ ndə ɔ gìe yɔ̄ŋ-yə, i dʉ̀ʼ mbɔ fɔyubə inchəŋ nɔ bʉ̀ʉ ndə məyú. 20 Bɔŋ ɔ ghɔ̀ŋ mbɔ, "Nɔ bɛ fɔkə ndə ĩ fyú hə mu mbʉə wo ndə i bʉ́əhə ɔŋ. 21 Bʉʼka mu f̃yii-wo nɔ fyúhə fɔbə nə, bəŋkwɔʼtə bʉəbʉə, bəsəŋ ntɛntɛhə, lʉʼbə, məyí wo, 22 bəsəŋ, ntɔmə, buuŋbʉə, fə́ʼhə, ŋkwɔʼtə-bəsəŋ, məbàabʉʉ, məbʉ́əhə-yie, tʉʉ gʉənə, bənɔ̌ʼɔ. 23 Ñu-bʉəbʉə-bə-ɔ̄ŋ inchəŋ nɔ fyú hə mu fyii-wo, i bʉ́əhə mbʉ wo."

24 Jiso kʉ̂ʉ lɔ̀ hə chɔ gɛ̀ mu bie Taa ghɔŋ Sidɔŋ*. Ɔ gɛ̀ sʉ́ʉ mu njaabɛʼ təmə kʉ̀ʉ mbɔ wo kínə fɛ, bɔŋ líi kəŋkaa. 25 Bɔŋ haʼ ndʉʉmɛ, wokebɛʼ ndə lyʉʉhənyaatəkə bɛ mu mbʉə vaa-ɛ vaabəke tîetîe yʉ́ mbɔ ɔ nɔʼ gwè, ɔ gwè gwù bəshʉ ɔ. 26 Woke-ghɔ̄ kə bɛ woke Juu fɛ, bə nɔ nə bí ɔ Fɔnishia mu Silia. Ɔ fʉ̀ʉtə Jiso mbɔ ɔ̈ jə̀ŋ mbʉ kəlyʉʉhəbʉəbʉə hə mu mbʉ vaa-ɛ. 27 Ɔ bə̀ŋhə tʉ ɔŋ mbɔ, "N̈ɔʼ vâambuɔ yú yuo ŋkəŋ, bʉʼka i kʉ̀ʼnə ndə məlʉ̀ fɔyu-vaambuɔ-bə mɛ̀ʼ tʉ bûhə fɛ." 28 Bɔŋ ɔ bə̀ŋhə mbɔ, "Ɔŋ, Tiekətʉ, bɔŋ bɛ le, b̃ûhə ndə bɔ̂ŋ nʉ̀ʉ tɔʼɔ tebele nɔ lɛ̀ʼtə kwuʼkwuʼ-bəfɔ ndə i tʉʼ gwùtə kəghɔ-vâambuɔ." 29 Jiso ghɔ̀ŋ tʉ ɔŋ mbɔ, "Bʉʼka ŋgiekə-ɔ̄ŋ, gɛ̀ nə wa, mbʉ kəlyʉʉhəbʉəbʉə nɔʼ fyú hə mbʉə vaa-a." 30 Ɔ bʉ̀nə gɛ̀ chunjaa nyíɛ mbʉ vaa, ɔ kə nʉ̀ʉ ndəŋ kəbɔ tʉ mbʉ kəlyʉʉhəbʉəbʉə nɔʼ gɛ̀ nə wi.

31 Ndʉʉ ndə Jiso kə bʉ̀nə mu bie Taa, ɔ tíŋ hə mu Sidɔŋ gɛ̀ dàa chu-kətaanə-kəghəŋ-Galili, ndə i bɛ mu bie Dɛkaboli ndə i bɛ mbɔ Yəŋkwɛʼtəŋbə Wuŋ. 32 Bə gwè nə wobɛʼ tʉ ɔŋ ndə ɔ bɛ fʉ̀əŋtə bətyunə, ɔ bɔŋleʼ kə́ kwə́ʼ kəŋkaa. Bɔ̂ŋ fʉ̀ʉtə ɔŋ mbɔ ɔ̈ mɔ̀ʼ ghɔkə-i ndəŋ ɔŋ. 33 Ɔ kʉ̂ʉ lʉ̀ ɔ fyúhə ɔŋ mu bʉə gɛ̀ bɔ̌ŋ, sʉ́ʉhə vâabəghɔ-bi bətyunə-ɔŋ, tyù ntɛmə kə̀ŋ lɛɛŋhəkə-i chɔ. 34 Ndʉʉ ndə ɔ lɛ́nə yuo, ɔ sɔ́ŋ ghɔ̀ŋ mbɔ, "Ɛfata," ndə i bɛ mbɔ, "Ŋɔ́ʼnə." 35 Tyunəbə-i ŋɔ́ʼnə, lɛɛŋhəkə-i yɔ̀ʼnə, ɔ chʉ́ʉhə kə́ kwə́ʼ jyujyu. 36 Jiso kàhə bɔŋ mbɔ bɔ̂ŋ mə shyíi wo fɛ. Bɔŋ ndə ɔ tʉʼ kàhə mbɔ b̈ɔ̂ŋ mə shyíi wo fɛ, bɔ̂ŋ kə́ bìʼ lɔ̀ʼlɔ̀ʼ gɛ̀. 37 I chàa bɔ̂ŋ tə daa, bɔ̂ŋ kə́ ghɔ̀ŋ mbɔ, "Ɔ nɔʼ fɔ̀ʼ nubə inchəŋ i bɛ jyujyu. I bɛ tə ɔ chìi bəfʉ̀əŋtə bətyunə bɔ̂ŋ kə́ yʉ́ nukə bɔŋleʼ chìi bəchie bɔ̂ŋ kə́ kwə́ʼ."