1 Jiso lɔ̀ hə chɔ bʉ̀nə gwè mu lɔʼɔbə-ɔŋ, vâafɔʼɔ-bi gɛ̀ hə bɔ̌ŋ ɔŋ. 2 Kʉ̂ʉ bɛ ndəŋ Chîlɔʼkə, ɔ chʉ́ʉhə mədàhə mu njaagháaNyii, bʉə buŋmbi ndə bɔ̂ŋ kə yʉ́ ɔ, i chíe chutə-ʉə, bɔ̂ŋ kə́ bíʼtə mbɔ, "Wo-ɔ̄ yétə nubə-ɔ̄ŋ fa? Bɛ ntɛ-mukətʉ-súunə ka ndə ɔ kie? Bəkɔ ɔ chìi ntɛ nufinəbə-ɔ̄ŋ təka?Jiso kə́ dahə mu njaagháaNyii 3 Yɔ̄ŋ-yə kaa vaa-kabənda nɔ fe, vaa-Mɛli bɔŋ-kə́-leʼ bɛ liŋ-Jɛŋ ghɔŋbə Josɛ leʼnə Juda nə Samu fe? Bəliŋ-bi vâabəke bɛ bʉʼʉ bɔŋ fɛ̄ŋ mɔʼɔ fe?" I byìi tʉʉ-yʉə.

4 Jiso ghɔ̀ŋ tʉ bɔŋ mbɔ, "B̃ə nɔ kɔ́ kuŋhə tʉ yʉkəŋgieNyii ndə yəŋbə inchəŋ yaʼkɛŋ mu lɔʼɔbə-ɔŋ, mu bʉə-bi leʼnə mu njaa-ɛ." 5 Ɔ kə mə fɔ̀ʼ nufinəbə yɔ́ŋyɔ́ŋ chɔ fɛ, yaʼkɛŋ mbyu-bʉə-bəyɔʼ-hə ndə ɔ kə mɔ̀ʼ ghɔkə-i ndəŋ bɔŋ, chʉ́ʼ bɔŋ. 6 I chàa ɔ bʉʼka ntɛ ndə bɔ̂ŋ kə gòʼ təmə mɔ̀ʼfyiihə-ʉə ndəŋ ɔŋ fɛ.

Jiso kə́ tòʼ mu lɔʼ-bətə̂ŋ-tə tòʼ dàhə. 7 Ɔ tíi mbʉ bəlɔntəŋNyii njuɔ bûu nə wuŋ chʉ́ʉhə kə́ tə́ŋ bɔŋ mbi bəbûubəbûu, kɔ́ ghʉəʼkə tʉ bɔŋ ndə məgìe kətʉ lyʉʉhənyaatəbə. 8 Ɔ kàhə bɔŋ mbɔ kə bɔŋ mə lʉ̀ fɔkə gɛ̀ nə yɔŋ fɛ, yaʼkɛŋ mbuu, təkɔmə fɔ-yú-kə, təkɔmə kwo, təkɔmə kyʉə mu kwo-kyʉə, 9 bɔŋleʼ ghɔ̀ŋ mbɔ b̈ɔ̂ŋ la kɔ́ takwubə təmə bɔŋ mɔ̀ʼ ndyihə ibûu fɛ, 10 ɔ bɔŋleʼ ghɔ̀ŋ tʉ bɔŋ mbɔ, "Ndʉʉ ndə bii ŋíi mu njaa təmiyɔŋ, b̈ii káa chɔ tə nə lɔ̀ hə chɔ. 11 Kaʼ bii gɛ̀ kəyəŋ təmə bɔ̂ŋ fí bii fɛ, təmə bɛ́ŋ ndə məyʉ́ nukə ndə bii tʉʼ gìe fɛ, ndʉʉ ndə bii tʉʼ lɔ̀ hə chɔ, b̈ii kwètə bʉəkə kəwu-bii, ndə mədʉ̀ʼ mbɔ ndɔŋ-yʉə nɔ kətʉ-bɔŋ."

12 Ndʉʉmɛ, bɔ̂ŋ fyú gɛ̀ mbi, kə́ tòʼ lɔ̀ʼ mbɔ b̈ʉə la shìe liɛŋtə-ʉə ndəŋ bʉ̂ʼtə-ʉə. 13 Bɔ̂ŋ jə̀ŋ lyʉʉhəbʉəbʉəbə buŋmbi, núʼ bʉə-bəyɔʼ buŋmbi nə ŋgwomə bɔŋleʼ chʉ́ʼ bɔŋ.

14 Nɔ, Fɔŋ Hɛlo yʉ́ nubə te Jiso, bʉʼka yie-e nɔ kə́ wɔ̀ʼnə bəyəŋbəyəŋ. Bəbɛʼbʉə ghɔ̀ŋ mbɔ, "Jɔŋ ndə ɔ̃ kɔ́ muu nɔʼ kə bʉ̀nə kóʼ ndəŋ kwú, nɔ bɛ nukə ndə i chìi ɔ kie ghʉəʼkə ndə məchìi nufinəbə-ɔ̄ŋ nɔ." 15 Bɔŋ bəbɛʼbə kə́ ghɔ̀ŋ mbɔ, "Ɔ nɔ bɛ Ɛlaja." Bəbɛʼbə kə́ ghɔ̀ŋ mbɔ, "Ɔ nɔ bɛ yʉkəŋgieNyii ndə bəbɛʼbə bʉəyʉkəŋgieNyii ndə ɔ nɔʼ nə bɛ hə bəshʉ." 16 Ndʉʉ ndə Hɛlo kə yʉ́, ɔ ghɔ̀ŋ mbɔ, "Jɔŋ ndə mɔ kə chʉ̀ə tʉkə-i le, la nɔʼ kə bʉ̀nə kóʼ."

17 Hɛlo nɔ kə gìe yɔ̄ŋ-yə bʉʼka ɔ nɔʼ kə fəŋ tə́ŋ yá Jɔŋ fʉ̀əŋ chaŋ ndə məchìi tʉʉ Hɛlodia bʉ̀ʉ, ndə ɔ kə bɛ vi-liŋ-iŋ, Fili. 18 Bʉʼka Jɔŋ nɔʼ kə́ ghɔ̀ŋ tʉ Hɛlo mbɔ, "I kʉ̀ʼnə mbɔ a lʉ̀ vi-liŋ-aŋ fɛ." 19 Nɔ, tʉʉ Hɛlodia nɔ nə byʉ́ʼ te Jɔŋ ɔ kə́ kʉ́ʉ fia ndə məyí ɔ, bɔŋ mùutə kəŋkaa, 20 bʉʼka Hɛlo nɔ nə kə́ fàa Jɔŋ bɔŋ-kə́-leʼ kyʉ̀hə ɔŋ, kə́ kínə mbɔ Jɔŋ nɔ nə bɛ wo ndə ɔ bɛ ndyʉndyʉ, kə́ bɛ ŋkʉʉ tʉ Nyii. Ndʉʉ ndə ɔ nə kə́ yʉ́ kwəʼ Jɔŋ nɔ, i chɔ́ŋhə ɔŋ, ɔ bɔŋ bìʼ kə́ kʉ́ʉ ndə məyʉ́ kwəʼ-ɛ.

21 Bɔŋ kəliʼ, Hɛlodia kie fia ndəŋ chîkə ndə Hɛlo nə chə̀ŋtə kuŋhə, bʉəkwɛʼtəŋ bəsɔge leʼnə bəntəŋbəshʉ mu Galili ndə məyú chîkə ndə bə nə bí ɔ chɔ. 22 Bʉʼka ndʉʉ ndə vaa-Hɛlodia vaabəke kə gwè mu njaa gwè kʉ̀ʉ ŋkʉʉkə, i chìi tʉʉ Hɛlo ghɔŋbə bʉə-ŋkɔʼnə-bi bʉ̀ʉ. Mbʉ fɔŋ bʉ́ tʉ mbʉ vaabəke mbɔ, "Bíʼtə fɔkə tʉ mɔ təmiyɔŋ ndə a kʉ̀ʉ, mɔ bu kɔ́ tʉ a." 23 Ɔ kàa tʉ ɔŋ mbɔ, "Fɔkə təmiyɔŋ ndə a bíʼtə, mɔ bu kɔ́ tʉ a, bəkɔ i bɛ via-lɔʼɔ-kə ndə mɔ tʉʼ sɔ́ʼ." 24 Mbʉ vaabəke fyú mbi bíʼtə tʉ ŋkwê-i mbɔ, "Bəkɔ mɔ bíʼtə ka?" Ɔ bə̀ŋhə mbɔ, "Bíʼtə tʉ-Jɔŋ-kə ndə ɔ̃ kɔ́ muu." 25 Ɔ nyʉ́ʉ haʼ ndʉʉghɔfii gwè mu njaa gwè gìe tʉ mbʉ fɔŋ mbɔ, "Mɔ nɔ tʉʼ kʉ́ʉ mbɔ ä kɔ́ tʉ-Jɔŋ-kə ndə ɔ̃ kɔ́ muu tʉ mɔ haʼ nduɔnduɔ mu fɔ-kwètə-kəbaa-kə." 26 I chɔ́ŋhə mbʉ fɔŋ daa bɔŋ bʉʼka mbɔ ɔ nɔʼ kə kàa tʉ ɔŋ bəshʉ bʉə-ŋkɔʼnə-bi, təmə ɔ kʉ̀ʉ ndə məbə́ʼ nukə ndə ɔ nɔʼ kə kàa fɛ. 27 Haʼ ndʉʉmɛ, mbʉ fɔŋ tə́ŋ wo chʉ̀ə kətʉ mbɔ ɔ gɛ̀ gwè nə tʉ-Jɔŋ-kə. Ɔ gɛ̀ chʉ̀ə tʉ-Jɔŋ-kə mu njaa-chaŋ gwè nə yɔŋ. 28 Gwè nə mbʉ kətʉ mu fɔ-kwètə-kəbaa-kə, gwè kɔ́ tʉ mbʉ vaabəke, ɔ kɔ́ tʉ ŋkwê-i. 29 Ndʉʉ ndə vâafɔʼɔ Jɔŋ kə yʉ́, bɔ̂ŋ gwè lʉ̀ ŋkwê mbʉə-e gɛ̀ tyúu.

30 Ndʉʉ ndə mbʉ bəlɔntəŋNyii kə bʉ̀nə gwè tʉ Jiso bɔ̂ŋ núhə nubə tʉ ɔŋ inchəŋ ndə bɔ̂ŋ nɔʼ kə fɔ̀ʼ bɔŋleʼ dàhə. 31 Ɔ ghɔ̀ŋ tʉ bɔŋ mbɔ, "B̈ii fyúhə ŋwɔŋ-yii gɛ̀ kəyəŋ-bəliinə, gɛ̀ dùʼ káa məniʼ." Bʉʼka bʉə buŋmbi nɔ nə kə́ gwètə tʉ bɔŋ bʉ̀nə gɛ̀tə təmə bɔŋ kie ŋgwɔʼmbi ndə mə-buŋ-káa yú fɔbə fɛ. 32 Bɔ̂ŋ fyúhə ŋwɔŋ-yʉə kóʼ mu kəbuu gɛ̀ kəyəŋ-bəliinə. 33 Bɔŋ ndʉʉmɛ, bʉə buŋmbi nyíɛ ndə bɔ̂ŋ tʉʼ gɛ̀, chèʼnə bɔŋ, bʉə lɔ̀ hə ndə yəŋkwɛʼtəŋbə inchəŋ nyʉ́ʉ kəwu gɛ̀ dàa chɔ bɔ̂ŋ buŋ gwè. 34 Ndʉʉ ndə ɔ gɛ̀ dàa ŋgwuu-muu, ɔ nyíɛ nuɔ-bʉə-buŋmbi, tʉkə-i vyíi ndəŋ bɔŋ, bʉʼka bɔ̂ŋ nɔ nə bɛ nə binjyʉʉhə təmə nchyii-yʉə bɛ ghɔ fɛ. Ɔ chʉ́ʉhə mədàhə bɔŋ nə nubə buŋmbi. 35 Ŋgwɔʼmbi kʉ̂ʉ kə́ tíŋ, vâafɔʼɔ-bi gwè tʉ ɔŋ ghɔ̀ŋ mbɔ, "Yɔ̄ŋ-yə nɔ bɛ yəŋ-mu-ŋkɔ-kə nɔ, ŋgwɔʼmbi bɔŋ-nɔʼ-leʼ tíŋ. 36 Wɔ̀ʼhə bɔŋ kɔ́ ndə yəŋbə ndə i bɛ mbʉə fɛ̄ŋ leʼnə lɔʼ-bətə̂ŋ-tə, b̈ɔ̂ŋ gɛ̀ nyúɔ fɔbə ndə məyú." 37 Bɔŋ ɔ bə̀ŋhə mbɔ, "B̈ii kɔ́ fɔbə tʉ bɔŋ, b̈ɔ̂ŋ yú." Bɔ̂ŋ bíʼtə mbɔ, "B̈aʼa gɛ̀ nyúɔ bele nə kyʉə ndə bəkɔ bə fɔ̀ʼ ndə bəchi fɔ̂ŋ buŋ gwè yúʼ bɔŋ chɔ mɛ?" 38 Ɔ bíʼtə tʉ bɔŋ mbɔ, "Bii kie mbyu-bele-hə isɛʼɛ? B̈ii gɛ̀ lɛ́nə." Bɔ̂ŋ kʉ̂ʉ gɛ̀ lɛ́nə gwè ghɔ̀ŋ mbɔ, "Nɔ mbyuhə itaa leʼnə mbyu-mbɔʼ-hə ibûu." 39 Ɔ kàhə bɔŋ bənchəŋ ndə mədùʼtə ndəŋ ŋkɔ nchʉʉnchʉʉ tənuɔtənuɔ. 40 Ndʉʉmɛ, bɔ̂ŋ dùʼtə ndəŋ ŋkɔ ndə nuɔtə təghyʉʉtəghyʉʉ leʼnə wuŋ taa wuŋ taa. 41 Ɔ kʉ̂ʉ lʉ̀ mbʉ mbyu-bele-hə itaa ghɔŋbə mbʉ mbyu-mbɔʼ-hə ibûu, lɛ́nə yuo, kɔ́ ndɔ, bə́ʼtə, kɔ́ tʉ vâafɔʼɔ-bi mbɔ bɔ̂ŋ gyʉ̀ətə tʉ mbʉ bʉə. Bɔŋleʼ gyʉ̀əhə mbʉ mbyu-mbɔʼ-hə ibûu kətʉ-bɔŋ bənchəŋ. 42 Bɔ̂ŋ bənchəŋ yú tə yúotə. 43 Bɔ̂ŋ lɛ̀ʼtə shyiibə njuɔ bûu nə wuŋ i lə́ŋtə nə kwuʼkwuʼ-bele ghɔŋbə mbʉ mbɔʼ. 44 Bʉə ndə bɔ̂ŋ kə kwó mbʉ bele nɔ nə bɛ ŋkɔŋ-bələŋ-hə itaa.

45 Haʼ ndʉʉmɛ ndə yɔ̄ŋ-yə tíŋ, Jiso téʼ tʉ vâafɔʼɔ-bi bɔ̂ŋ bʉ̀nə kóʼ mu kəbuu, gɛ̀ bəshʉ ndə ibɛʼ-yə via-kətaanə-kəghəŋ-kə, Bɛsieda, ndə ɔ tʉʼ wɔ̀ʼhə mbʉ nuɔ-bʉə b̈ɔ̂ŋ bʉ̀nə gɛ̀tə chu təlɔʼ-bɔŋ. 46 Bɔŋ ndʉʉ ndə ɔ tíŋhə bɔŋ, ɔ kóʼ gɛ̀ kwɔŋ ndə məgháaNyii.

47 Kʉ̂ʉ bɛ ndʉʉbuumbi, mbʉ kəbuu ndə vâafɔʼɔ-bi kə bɛ ndəŋ ghɔ kə́ bɛ ntəŋntəŋ muu, Jiso kə́ bɛ njəŋmbi tətɛʼ ɔ. 48 Ɔ nyíɛ mbɔ bɔ̂ŋ nɔ kə kə́ kɔ̀ɔtəkɔ̀ɔtə buŋ kə́ te mbʉ kəbuu, bʉʼka fʉʉkə nɔ kə́ bə̀ŋhə bɔŋ. Kʉ̂ʉ bɛ ndʉʉ ndə bəŋkʉəʼə-ndʉʉfiimbi tʉʼ tʉʉ, ɔ gwè bìatə bɔŋ, kə́ tòʼ ndəŋ muu. Ɔ kə́ kʉ́ʉ bìa tíŋ mbʉə bɔŋ, 49 bɔŋ ndʉʉ ndə bɔ̂ŋ kə nyíɛ ɔŋ, ɔ kə́ tòʼ ndəŋ muu, bɔ̂ŋ kwɔ̀ʼtə mbɔ la ŋkwusêkə, i chìi bɔ̂ŋ tíitə nə ghʉəʼkə, 50 bʉʼka bɔ̂ŋ bənchəŋ nɔ kə nyíɛ ɔŋ, i fɛ̀ŋhə bɔŋ. Ɔ bɔŋ kwə́ʼ tʉ bɔŋ haʼ ndʉʉmɛ, ghɔ̀ŋ mbɔ, "B̈ii yá fyiihə-ii, nɔ bɛ mɔ. Kə bii mə leʼ fàa fɛ." 51 Ɔ kóʼ mu mbʉ kəbuu bìatə bɔŋ mbʉ kəfʉʉ tə́nə. I chàa bɔŋ daa, 52 bʉʼka bɔ̂ŋ kə kínə nukə ndə məyúʼ mbʉ ŋkɔŋ-bʉə-hə itaa kə bɛ yɔŋ fɛ, i bʉnəleʼ shʉ́əhə fyiihə-ʉə shʉ́əhə.

53 Kʉ̂ʉ bɛ ndʉʉ ndə bɔ̂ŋ dàa mbʉ kətaanə-kəghəŋ, bɔ̂ŋ kóʼ mbi lɔʼɔ Gɛnɛsɛlɛ, kɔ́ʼ mbʉ kəbuu ŋgwuu-muu. 54 Bɔŋ ndʉʉ ndə bɔ̂ŋ kóʼ mu mbʉ kəbuu, bʉə chèʼnə ɔŋ, haʼ ndʉʉmɛ 55 nyʉ́ʉ wɔ̀ʼnə mbʉ mu kəyəŋ inchəŋ, chʉ́ʉhə kə́ bɛ̀ʼ bʉə-bəyɔʼ ndəŋ mbyuubə-ʉə gɛ̀ nə bɔŋ ndə yəŋkə təmiyɔŋ ndə bɔ̂ŋ yʉ́ mbɔ ɔ bɛ chɔ. 56 Bɔŋ yəŋkə təmiyɔŋ ndə ɔ gwè chɔ kə bɛ mu lɔʼɔ, kə bɛ mu kəyəŋkwɛʼtəŋ, kə bɛ mu ntəʼhə, bɔ̂ŋ gwè nə bʉə-bəyɔʼ ndə yəŋ-vyii-bə, kə́ fʉ̀ʉtə ɔŋ mbɔ b̈ɔ̂ŋ buŋ kə̀ŋ bə haʼ tiɛŋ-ndyi-i. Bɔŋ bʉə bənchəŋ ndə bɔ̂ŋ kə̀ŋtə, i chìi bɔŋ kie nchʉʼ.