Mak 15

Bə chɔ̀ʼhə Jiso kɔ́ mu kəghɔ-Bale

1 Ndʉʉ ndə mbi kə fíi, bətiefɛ̀ʼndɛŋNyii yá nchəŋtə ghɔŋbə bəntəŋbəshʉ leʼnə bʉə dàhə nuʼ-Mushi leʼnə bʉə mu kaŋsotə bənchəŋ. Bɔ̂ŋ kɔ́ʼ Jiso, lʉ̀ ɔ gɛ̀ nə nɔŋ, gɛ̀ chɔ̀ʼhə ɔŋ kɔ́ kəghɔ-Bale. 2 Ndʉʉmɛ, Bale bíʼtə tʉ Jiso mbɔ, "A bɛ mbʉ Fɔŋ-bʉə-Juu mɛ?" Jiso bə̀ŋhə mbɔ, "Nɔ bɛ ndə a ghɔ̀ŋ." 3 Mbʉ bətiefɛ̀ʼndɛŋNyii súu nubə kətʉ-ɔ buŋmbi. 4 Bale bìʼ bíʼtə tʉ ɔŋ mbɔ, "A kie nukə ndə məgìe fe? Nyíɛ! Ntyʉʉ bənu ndə bə súu yie-a." 5 Təmə Jiso leʼ bə̀ŋhə fɛ, i chàa Bale.

6 Nɔ nə kə́ bɛ ndəŋ chî-nchəŋtə-Yíɛʼsii-kə nɔ, gɔməna fyúhə mbyu wo hə njaa-chaŋ ndə bʉə fʉ̀ʉtə mbɔ ɔ fyúhə. 7 Ndʉʉ-ghɔ̄ wobɛʼ ndə yie kə bɛ Balaba kə́ bɛ mu njaa-chaŋ ghɔŋbə bəbɛʼbʉə ntɔŋntɔŋ ndə bɔ̂ŋ nɔʼ kə yítə bʉə ndə ntɔŋntɔŋ. 8 Mbʉ nuɔ-bʉə gwè tʉ Bale kə́ bíʼtə tʉ ɔŋ ndə məchìi haʼ ndə ɔ̃ chìi tʉ bɔŋ. 9 Bɔŋ Bale bə̀ŋhə tʉ bɔŋ mbɔ, "Bii kʉ̀ʉ mbɔ m̈ɔ fyúhə Fɔŋ-bʉə-Juu kɔ́ tʉ bii mɛ?" 10 Bʉʼka ɔ nɔ nə kínə mbɔ bətiefɛ̀ʼndɛŋNyii nɔ nə chɔ̀ʼhə Jiso kɔ́ kəghɔ-ɔ bʉʼka məbàabʉʉ ndə bɔ̂ŋ kie tʉ ɔŋ. 11 Bɔŋ mbʉ bətiefɛ̀ʼndɛŋNyii kɔ́ buŋ mbʉ nuɔ-bʉə mbɔ b̈ɔ̂ŋ téʼ mbɔ ɔ̈ fyúhə Balaba kɔ́ tʉ bɔŋ. 12 Bale bìʼ bíʼtə tʉ bɔŋ mbɔ, "Nduɔ, m̈ɔ bɛ təka nə wo ndə bii tʉʼ tíi ɔ nə Fɔŋ-bʉə-Juu nɔ?" 13 Bɔ̂ŋ tíitə mbɔ, "Kwɛ̀ŋ ɔŋ yí." 14 Ndʉʉmɛ, Bale ghɔ̀ŋ tʉ bɔŋ mbɔ, "Bʉʼka ka, bɛ ntɛ bʉ̂ʼʉ ka ndə ɔ chìi?" Bɔŋ bɔ̂ŋ bìʼ tíitə nə ghʉəʼkə ghɔ̀ŋ mbɔ, "Kwɛ̀ŋ ɔŋ yi."

15 Nɔ, bʉʼka Bale kə kʉ̀ʉ mbɔ ɔ chìi tʉʉ mbʉ nuɔ-bʉə bʉ̀ʉ, ɔ fyúhə Balaba kɔ́ tʉ bɔŋ. Kʉ̂ʉ téʼ bə gwúu Jiso nə ŋgwɔŋhə, ɔ chɔ̀ʼhə ɔŋ kɔ́ mbɔ b̈ə gɛ̀ kwɛ̀ŋ ɔŋ yí.

Bəsɔge dʉ̀ʉhə Jiso

16 Mbʉ bəsɔge lʉ̀ ɔ gɛ̀ nə nɔŋ mu ntoʼ, sêfu gɔməna, tíi mbʉ nuɔ bəsɔge bənchəŋ. 17 Bɔ̂ŋ mɔ̀ʼ ndyi kəmbuu fʉ́əŋ mbʉə-ɔ, túŋ bɛnə nə ŋkinəŋkia, bìa kətʉ-ɔ. 18 Bɔ̂ŋ chʉ́ʉhə məchàʼtə ɔŋ kə́ ghɔ̀ŋ mbɔ, "C̈hichi báa b̈ə yóʼ bənchəŋ, Fɔŋ-bʉə-Juu!" 19 Bɔ̂ŋ kə́ gwúu vaakətyʉ kətʉ-ɔ bìʼ gwúu, kə́ tyùtə ntɛmə ndəŋ ɔŋ bɔŋ-kə́-leʼ bè kweʼtəbə-ʉə sê bəshʉ ɔ ndə məkɔ́ məgʉ́ə tʉ ɔŋ. 20 Bɔ̂ŋ kʉ̂ʉ dʉ̀ʉhə ɔŋ liʼ, shùɔ mbʉ ndyi kəmbuu fʉ́əŋ, mɔ̀ʼ yi-yə ndyihə mbʉə-ɔ, lʉ̀ ɔ gɛ̀ nə nɔŋ ndə məgɛ̀ kwɛ̀ŋ ɔŋ yí.

Bə kwɛ̀ŋ Jiso yí

21 Wobɛʼ ndə bə kə́ tíi ɔ nə Samu ndə ɔ lɔ̀ hə Silɛŋ, kə́ gwè mu lɔʼɔ ndʉʉ-ghɔ̄, bɔ̂ŋ kwɛ̀ŋhə ɔŋ ɔ bɛ̀ʼ tyʉntɔɔnə-Jiso-kə. Samu nɔ kə bɛ tie-Alɛsaŋnda ghɔŋ Lufɔ. 22 Bɔ̂ŋ gɛ̀ dàa nə nɔŋ kəyəŋbɛʼ, bə kə́ tíi nə Gogota (ndə i bɛ mbɔ, "Yəŋ-kəGhʉəʼ-kəTʉ-Wo-kə"). 23 Bɔ̂ŋ kɔ́ ndʉʼmə tʉ ɔŋ ndə bə nɔʼ fìnə nə məə*15:23 M̃əə nɔ bɛ jyʉʉhə ndə i lɔ̀ hə ndəŋ tyʉbɛʼkə ndə kaʼ bə fìnə ndʉʼmə kɔ́ tʉ wo ndə yəŋkə tʉʼ líŋ ɔŋ mbʉə-ɔ, i búɔhə məlíŋ., bɔŋ təmə ɔ bɛ́ŋ ndə mənú fɛ. 24 Bɔ̂ŋ kwɛ̀ŋ ɔŋ, lʉ̀ ndyihə-i gyʉ̀ə kətʉ-bɔŋ, kə́ mɔ̀ʼ njoʼ ndə məkínə ntɛ-kəfɔ ndə bɔ̂ŋ kie ndə məkɔ́ tʉ mbyu wo-imɔʼ. 25 Ndʉʉ ndə bɔ̂ŋ kə kwɛ̀ŋ ɔŋ chɔ, nɔ nə bɛ bəchî bɔmɔʼ ndʉʉsɛŋkə. 26 Bɔ̂ŋ nyɔ̀ʼ ŋwɔʼnə ndə mədʉ̀ʼ nukə ndə bə kə kwɛ̀ŋ ɔŋ bʉʼka yɔŋ, bíahə ndə i kə́ ghɔ̀ŋ mbɔ, "Fɔŋ-bʉə-Juu." 27 Bɔ̂ŋ kwɛ̀ŋ ɔŋ ghɔŋbə bəlʉʼʉ shùɔ wo bəbûu mɔʼɔ, mbyu wo-imɔʼ kwiimɔʼnə, ibɛʼ-yə kwiiŋkwie. 28 [Ndʉʉghɔfii, ŋgieNyiikə nɔ nə fyú shʉəŋ ndə i ghɔ̀ŋ mbɔ, "Bə nɔ nə súu ɔ mu bʉə-bʉ̂ʼʉ."] 29 Bʉə ndə bɔ̂ŋ kə́ tíŋtə sêfia kə́ chɛ̀ŋtə ɔŋ bɔŋleʼ ŋʉ̀ʼ tʉbə-ʉə ghɔ̀ŋ mbɔ, "Əŋhəŋ! Mbəŋ-aŋ ndə a bu kùu njaafɛ̀ʼndɛŋNyii bʉ̀nə bɔŋ ndə chîbə itia, 30 kwáa ŋwɔŋ-aŋ, shíʼ ndəŋ mbʉ kətyʉntɔɔnə!" 31 Bətiefɛ̀ʼndɛŋNyii ghɔŋbə bʉə dàhə nuʼ-Mushi kə́ leʼ dʉ̀ʉhə ɔŋ, kə́ ghɔ̀ŋ haʼ nɔ tʉ mbəŋtə-ʉə mbɔ, "Ɔ nɔ nə kə́ kwáa bəbɛʼbʉə, təmə bɔŋ mə kwáa ŋwɔŋ-ɛŋ fɛ. 32 M̈bʉ Wo ndə Nyii Kùŋ Tə́ŋ, Fɔŋ-bʉə-Isilɛ, shíʼ nduɔ ndəŋ mbʉ kətyʉntɔɔnə b̈aʼa nyíɛ chʉʼ bɛ́ŋ ɔŋ." Mbʉ bʉə ndə bə kə kwɛ̀ŋ ɔŋ ghɔŋ bɔŋ mɔʼɔ kə́ leʼ chɛ̀ŋtə ɔŋ ghɔ.

Kwu-Jiso

33 Kʉ̂ʉ bɛ ndʉʉbeʼ, njəŋkə gwù mu lɔʼɔ-ghɔ̄ inchəŋ tə gɛ̀ dàa ndə bəchî itia ndʉʉnəchî. 34 Kʉ̂ʉ bɛ ndə bəchî itia ndʉʉnəchî Jiso tíi nə gyʉʉ dədə ghɔ̀ŋ mbɔ, "Ɛlo, Ɛlo, lema sabatani?" Ndə i bɛ mbɔ, "Oo Nyii, Oo Nyii, a mɛ̀ʼtə mɔ mbuka?" 35 Bəbɛʼbʉə ndə bɔ̂ŋ kə tə́ŋtə mbʉə ɔ kʉ̂ʉ yʉ́, ghɔ̀ŋ mbɔ, "B̈ii yʉ́, ɔ tʉʼ tíi Ɛlaja." 36 Wobɛʼ nyʉ́ʉ gɛ̀ chùo kɔŋ-búɔnə-kə mu ndʉʼ-chyʉ́ʉtə-mə, fùɔ kətʉ kətyʉ, kɔ́ tʉ ɔŋ mbɔ ɔ̈ nú, kə́ ghɔ̀ŋ mbɔ, "B̈ii tə́nə, b̈ʉʼʉ nyíɛ ndə Ɛlaja bu gwè shúʼhə ɔŋ." 37 Jiso tíi nə ghʉəʼkə yìhə ndyiʼtə-bəyihə-kə-i. 38 Ndyi ndə bə kə chyúu kyʉ̀hə mu njaafɛ̀ʼndɛŋNyii nə yɔŋ jɔ̀ʼnə fyú viabə ibûu, lʉ̀ hə kweghɔʼ gɛ̀ dàa sê. 39 Wokwɛʼtəŋ-bəsɔge-ghyʉʉ ndə ɔ kə tə́nə bə̀ŋhə ɔŋ, kʉ̂ʉ nyíɛ ntɛ ndə ɔ yìhə ndyiʼtə-bəyihə-kə, ɔ ghɔ̀ŋ mbɔ, "Ndə shʉəŋ, wo-ɔ̄ nɔ kə bɛ VaaNyii!"

40 Bəke nɔ nə bɛ ghɔ ndə bɔ̂ŋ kə tə́nə kə́ lɛ́nə dɔdɔ, bɔ̂ŋ nɔ nə bɛ Mɛli Matalina, Mɛli ŋkwê-Jɛŋ vaakəyɔwo ghɔŋbə Jɔsɛ leʼnə Salomɛ. 41 Ndʉʉ ndə Jiso kə bɛ Galili bɔ̂ŋ gɛ̀ hə bɔ̌ŋ ɔŋ kə́ kwáa ɔ. Bəbɛʼbəke ghɔ nɔ nə bɛ chɔ buŋmbi ndə ghɔŋ bɔŋ kə kóʼ gɛ̀ Jɛlosalɛŋ.

Mətyúu-Jiso

42 Nɔ nə bɛ le kəChîlɔʼ, kə́ bɛ chîkə ndə bə shʉ̀tə ŋwɔŋ chɔ, ndʉʉbuumbi kʉ̂ʉ kə́ kə́ŋhə gwè, 43 Jɔsɛ ndə ɔ lɔ̀ hə Alamatia, kə́ bɛ ŋguu kaŋsotə ndə b̃ə kɔ́ kuŋhə tʉ ɔŋ ndə ɔ kə́ kʉ́ʉ ndə məkie Sɔ́ʼ-Nyii ghɔ nə mbəŋ-ɛŋ, kie fyii shʉ́əshʉ́ə gɛ̀ tʉ Bale bíʼtə ŋkwu-Jiso-kə. 44 I chàa Bale ndə məyʉ́ mbɔ Jiso nɔʼ kwú. Ɔ tíi mbʉ wokwɛʼtəŋ-bəsɔge ndə məyʉ́ kəghɔ-ɔ mbɔ Jiso nɔʼ kwú mɛ? 45 Kʉ̂ʉ yʉ́ hə kəghɔ mbʉ wokwɛʼtəŋ-bəsɔge mbɔ Jiso nɔʼ kwú, ɔ bɛ́ŋ Jɔsɛ gɛ̀ lʉ̀ ŋkwukə-i. 46 Jɔsɛ gɛ̀ nyúɔ ŋkia-ndyi-kəfyuʼ-kə, gwè shúʼhə ŋkwu-Jiso-kə, lʉ́əŋtə mu mbʉ ndyi kəfyuʼ, gɛ̀ mɔ̀ʼ mu sě ndə bə nɔʼ kə sáa ndəŋ ŋgoʼ. Tʉ́ʉhə ŋgoʼ gɛ̀ chíe mbʉ chu-sě nə yɔŋ. 47 Mɛli Matalina ghɔŋbə Mɛli ŋkwê Jɔsɛ nyíɛ yəŋkə ndə bə kə mɔ̀ʼ ɔ chɔ.