1 Chîlɔʼkə kʉ̂ʉ tíŋ, Mɛli Matalina ghɔŋbə Mɛli ndə ɔ bɛ ŋkwê-Jɛŋ leʼnə Salomɛ nyúɔ ŋgwo-lùŋ-mə ndə məgɛ̀ yóʼ ŋkwukə-i nə yɔŋ. 2 Kʉ̂ʉ bɛ ndʉʉsɛŋkə bətyuʼbətyuʼ ndəŋ fəŋ kəchî mu vyii mbi* ndə chichi sɔ́ʼ, bɔ̂ŋ gɛ̀ mbʉ chu-sě. 3 Bɔ̂ŋ kə́ bíʼtə tʉ mbəŋtə-ʉə mbɔ, "Bu tʉ́ʉhə nda tʉ́ʉhə mbʉ ŋgoʼ ndə mbʉ chu-sě kɔ́ tʉ bʉʼʉ?" 4 Bɔŋ ndʉʉ ndə bɔ̂ŋ dàa chɔ, kə́ chɔ̀ʼhə shʉtə-ʉə lɛ́nə, nyíɛ mbʉ ŋgoʼ ndə i kə gʉ́ə daa tʉ bə nɔʼ tʉ́ʉhə. 5 Bɔ̂ŋ kʉ̂ʉ ŋíi mu mbʉ sě nyíɛ vaakəyɔwobɛʼ ɔ kə́ dùʼ kwiimɔʼnə, mɔ̀ʼ ndyi-kəfyuʼ-hə mbʉə-ɔ, i chíe chu-yʉə. 6 Bɔŋ ɔ ghɔ̀ŋ tʉ bɔŋ mbɔ, "Kə i mə leʼ chàa bii fɛ, bii nɔ tʉʼ kʉ́ʉ Jiso ndə ɔ lɔ̀ hə Nasalɛ ndə bə kə kwɛ̀ŋ ɔŋ yí le. Ɔ nɔʼ bʉ̀nə kóʼ, ɔ kaa fɛ̄ŋ fɛ. B̈ii nyíɛ yəŋkə ndə bə kə mɔ̀ʼ ɔ chɔ. 7 B̈ii gɛ̀ shyíi vâafɔʼɔ-bi leʼnə Bita mbɔ ɔ la tʉʼ gɛ̀ hə bəshʉ bii mu Galili. Bii bu nyíɛ ɔŋ chɔ haʼ ndə ɔ kə shyíi bii."

8 Bɔ̂ŋ fyú hə mu mbʉ sě nyʉ́ʉ bʉʼka ŋgwonəkə nɔʼ kə yá bɔŋ, chu-yʉə chíe, təmə bɔ̂ŋ gìe nubɛʼkə tʉ wotəmiyɔŋ fɛ bʉʼka bɔ̂ŋ nɔ kə kə́ fàa.

9 [Jiso kʉ̂ʉ kóʼ ndʉʉsɛŋkə bətyuʼbətyuʼ ndə fəŋ kəchî mu vyii mbi, fəŋ fyú tʉ Mɛli Matalina ndə ɔ nɔʼ kə jə̀ŋ lyʉʉhəbʉəbʉəbə mbʉə-ɔ təkwiitia. 10 Ɔ gɛ̀ shyíi bʉə ndə ghɔŋbə Jiso kə bɛ mɔʼɔ, ndʉʉ ndə bɔ̂ŋ kə́ lí bɔŋleʼ gwía. 11 Bɔŋ ndʉʉ ndə bɔ̂ŋ kə yʉ́ mbɔ ɔ nɔʼ bʉ̀nə kóʼ, ɔ nɔʼ nyíɛ ɔŋ, təmə bɔ̂ŋ bɛ́ŋ nukə ndə ɔ kə gìe fɛ. 12 Nubə-ɔ̄ŋ kʉ̂ʉ tíŋ, ɔ bʉ̀nə bìʼ fyú ntɛ kədɔŋ tʉ vâafɔʼɔ-bi bəbûu, ndə bɔ̂ŋ kə́ tòʼ gɛ̀ mu lɔʼɔ. 13 Bɔ̂ŋ bʉ̀nə gɛ̀ shyíi bəʼkə, təmə bɔ̂ŋ bɛ́ŋ fɛ. 14 Ɔ bʉ̀nə bìʼ fyú tʉ vâafɔʼɔ-bi njuɔ mɔʼ nə wuŋ ndʉʉ ndə bɔ̂ŋ kə dùʼtə ndəŋ tebele kə́ yú fɔbə, ɔ sɔ́ʼ bɔŋ bʉʼka məjínə-nubə leʼnə məshʉ́əhə-fyiihə-ʉə, bʉʼka bɔ̂ŋ kə bɛ́ŋ bʉə ndə bɔ̂ŋ kə nyíɛ ɔŋ ndʉʉ ndə ɔ nɔʼ kə kóʼ, gwè shyíi bɔŋ fɛ. 15 Ɔ ghɔ̀ŋ tʉ bɔŋ mbɔ, "B̈ii gɛ̀ mu kəwʉʉnəmbi inchəŋ gɛ̀ lɔ̀ʼ ntəŋjyujyu chɔ tʉ bʉə bənchəŋ. 16 Wotəmiyɔŋ ndə ɔ bɛ́ŋ, fí muu, bu kie ŋkwaaNyii, wotəmiyɔŋ ndə ɔ gòʼ təmə bɛ́ŋ fɛ nɔʼ gwù fɛʼɛ. 17 Bʉə ndə bɔ̂ŋ bɛ́ŋ, nubəcheʼbə-ɔ̄ŋ bu gɛ̀ hə bɔ̌ŋ bɔŋ. Nə yie-ɔ, bɔ̂ŋ bu jə̀ŋ lyʉʉhəbʉəbʉəbə, kwə́ʼ ŋgie-bətə̂ŋ-fefe-bə. 18 Bɔ̂ŋ bu yá yɔhə nə ghɔbə-ʉə, kaʼ bɔ̂ŋ nú ndyʉʼ shʉ́əshʉ́ə təmiyɔŋ i yi nukə nə bɔŋ fɛ, bɔ̂ŋ bu mɔ̀ʼ ghɔbə-ʉə ndəŋ bʉə-bəyɔʼ, bɔ̂ŋ bìi."

19 Nɔ, ndʉʉ ndə Jiso Tiekətʉ nɔʼ kwə́ʼ tʉ bɔŋ liʼ, bə lʉ̀ ɔ gɛ̀ nə nɔŋ yuo, ɔ dùʼ kwiiləŋ Nyii. 20 Bɔ̂ŋ fyú gɛ̀ lɔ̀ʼ ŋgieNyiikə ndə yəŋbə inchəŋ, Tiekətʉ kə́ fɔ̀ʼ mu bɔŋ kə́ dʉ̀ʼ mbɔ mbʉ ntəŋ ndə bɔ̂ŋ tʉʼ téʼ nɔ bɛ shʉəŋ, nə nubəcheʼbə.]