1 Jiso bìʼ ŋíi mu njaagháaNyii, wobɛʼ kə́ bɛ chɔ ndə kwii-i nɔʼ kwú. 2 Bɔ̂ŋ kə́ kíi Jiso ndə mənyíɛ mbɔ ɔ bu chʉ́ʼ mbʉ wo-ghɔ̄ ndəŋ Chîlɔʼkə mɛɛ, bɔ̂ŋ chʉʼ mɔ̀ʼ nukə kətʉ-ɔ. 3 Ɔ ghɔ̀ŋ tʉ mbʉ wo-ghɔ̄ ndə kwii-i nɔʼ kwú le mbɔ, "Gwè cha fɛ̄ŋ." 4 Ɔ bíʼtə tʉ bɔŋ mbɔ, "Bɛ yɔ̄ŋ-yə nukə, ndə nuʼ mɛ̀ʼtə mbɔ b̈ə fɔ̀ʼ ndəŋ Chîlɔʼkə, ndə məfɔ̀ʼ bʉ̀ʉ mɛ, kə məfɔ̀ʼ bʉ̂ʼʉ? Ndə məkwáa tʉ-wo-kə mɛ, kə məyí ɔ?" Bɔ̂ŋ líitə mbɔ loʼo. 5 Jiso lɛ́nə bɔŋ nə tʉʉbʉə, mu fyii-i kə́ chɔ́ŋhə ɔŋ shʉ́əshʉ́ə ndə bɔ̂ŋ shʉ́əhə fyiihə-ʉə. Ndʉʉmɛ, ɔ ghɔ̀ŋ tʉ wo-ghɔ̄ mbɔ, "Shyìi kwii-a." Ɔ shyìi mbʉ kwii, i bʉ̀nə bɛ jyujyu. 6 Mbʉ bʉə-Falasi fyú gɛ̀ yá nchəŋtə haʼ ndʉʉmɛ ghɔŋbə bʉə nuɔ Hɛlo te nukə ndə bɔ̂ŋ bu chìi ndə məyí Jiso.

7 Jiso fyúhə ŋwɔŋ-ɛŋ ghɔŋbə vâafɔʼɔ-bi gɛ̀ mbʉə taanə-kəghəŋ-kə, nuɔ-bʉə-buŋmbi gɛ̀ hə bɔ̌ŋ ɔŋ. Bɔ̂ŋ nɔ kə lɔ̀ hə Galili, Judia, 8 Jɛlosalɛŋ, Idumia leʼnə bəbɛʼbə yəŋbə ndə i yíɛ́ʼ ŋgwɛŋ Jodaŋ ghɔŋbə yəŋbə ndə i bɛ mbʉə Taa ghɔŋ Sidɔŋ. Ndʉʉ ndə mbʉ nuɔ-bʉə yʉ́ nchəŋnchəŋ bənu ndə ɔ kə́ fɔ̀ʼ, bɔ̂ŋ gɛ̀ tʉ ɔŋ. 9 Ɔ ghɔ̀ŋ tʉ vâafɔʼɔ-bi mbɔ b̈ɔ̂ŋ la shʉ̀tə buukə tʉ́ʼ tʉ ɔŋ, bʉʼka bʉə nɔ kə yɔ́ŋ daa byuunɔ təmə bɔ̂ŋ bu yíʼtə ɔŋ. 10 Bʉʼka ɔ nɔʼ kə chʉ́ʼ bʉə buŋmbi, i chìi bʉə bənchəŋ ndə bɔ̂ŋ kə kie yɔʼbə kɔ́ʼ kətʉ-ɔ ndə məkə̀ŋ ɔŋ. 11 Bɔŋ ndʉʉtəmiyɔŋ ndə lyʉʉhənyaatəbə nyíɛ Jiso nɔ, bɔ̂ŋ bʉ́ʉnə bəshʉ ɔ, tíi mbɔ, "A nɔ bɛ VaaNyii." 12 Bɔŋ Jiso shyùu tyunəkə-ʉə shʉ́əshʉ́ə mbɔ bɔ̂ŋ mə chìi wo kínə wo ndə ɔ bɛ yɔŋ fɛ.

13 Ndʉʉ ndə Jiso kóʼ gɛ̀ kwɔŋ, ɔ tíi bʉə ndə ɔ kʉ̀ʉ, bɔ̂ŋ gwè tʉ ɔŋ. 14 Ndʉʉmɛ, ɔ chóʼ bʉə njuɔ bûu nə wuŋ ndə ɔ tíi bɔŋ nə bəlɔntəŋNyii mbɔ ghɔŋ bɔŋ chʉʼ bɛ mɔʼɔ, ɔ chʉʼ kə́ tə́ŋ bɔŋ mbi ndə məgɛ̀ lɔ̀ʼ ntəŋjyujyu, 15 bɔŋleʼ kie ghʉəʼkə ndə məjə̀ŋ lyʉʉhəbʉəbʉəbə. 16 Bʉə ndə ɔ kə séʼ bɔŋ nɔ kə bɛ Samu ndə ɔ tyú yie-e nə Bita, 17 Jɛŋ vaa-Sabɛdi leʼnə Jɔŋ liŋ-iŋ ndə Jiso tyú yie-yʉə nə Bonaji, i kə́ bɛ mbɔ bɔ̂ŋ la bɛ nə fuu-yuo, 18 Andolo, Fili, Batolomiɛ leʼnə Matia, Tɔmɔ, Jɛŋ vaa-Afio, Tadio, Samu ndə bə kə́ tíi ɔ nə tiɛŋ-lɔʼɔ, 19 leʼnə Juda Iskalo kə́ bɛ wo ndə ɔ kə fɛ̀ŋ Jiso.

20 Ndʉʉmɛ, Jiso bʉ̀nə chunjaa, mbʉ nuɔ-bʉə bìʼ chə̀ŋtə i bɛ təmə bɔ̂ŋ kie saa ndə məyú fɔkə fɛ. 21 Bɔŋ ndʉʉ ndə bʉə-bi kə yʉ́, bɔ̂ŋ fyú gɛ̀ ndə mədùu ɔ fyúhə, bʉʼka bə nɔ kə kə́ ghɔ̀ŋ mbɔ, "Ɔ nɔʼ bɛ ndaahə-i."

22 Bəbɛʼbʉə dàhə nuʼ-Mushi ndə bɔ̂ŋ kə shíʼ gwè hə Jɛlosalɛŋ kə́ ghɔ̀ŋ mbɔ, "Ɔ nɔ kie Bɛsɛbu* nɔ bɛ ibɛʼ-yə yie Sata.," bɔŋleʼ kə́ ghɔ̀ŋ mbɔ, "Ɔ nɔ tʉʼ jə̀ŋ lyʉʉhəbʉəbʉəbə nə ghʉəʼ-fɔŋ-bəlyʉʉhəbʉəbʉə-kə."

23 Ɔ tíi bɔŋ mbʉə ɔ, kwə́ʼ tʉ bɔŋ ndə mbɔ̂hə mbɔ, "Bəkɔ Sata jə̀ŋ Sata təka? 24 Kaʼ lɔʼɔ kətə̂ŋ dùʼ nə gyʉʉhə ibûu, lɔʼɔ-ghɔ̄ mə tə́nə fɛ. 25 Bɔŋ kaʼ chufu dùʼ nə gyʉʉhə ibûu, chufu-ghɔ̄ mə tə́nə fɛ. 26 Kaʼ Sata leʼ lɔ̀ hə sê kə́ bʉ̀nə shùɔ shʉ-i nə mbəŋ-ɛŋ, ɔ mə tə́nə fɛ, təmə məlìʼ-i nɔʼ tʉʼ gwè. 27 Bɔŋ wo mə leʼ sʉ́ʉ mu njaa wo shʉ́əshʉ́ə lʉ̀ fɔbə-i təka təmə nɔʼ fəŋ kɔ́ʼ ɔ mɔ̀ʼ sê fɛ? Ndʉʉmɛ, ɔ buŋ sɔ́ʼ mbʉ njaa.

28 "Nɔʼ m̈ɔ shyíi bii nə shʉəŋ, bə bu sʉ̀fyii hə ndəŋ bʉ̂ʼ-bʉə-tə inchəŋ leʼnə ntɛ-yie-bʉəbʉə-hə inchəŋ ndə wo kɔ́ tʉ Nyii, 29 bɔŋ wotəmiyɔŋ ndə ɔ bʉ́əhə yie-kəLyʉʉhəNyii, bə kʉʉ nə sʉ̀fyii hə ndəŋ bʉ̂ʼʉ-e fɛ, bʉʼka ɔ nɔʼ gwù njɔ bʉ̂ʼʉ təmə liʼ-i ghɔ fɛ." 30 Jiso nɔ nə ghɔ̀ŋ nɔ, bʉʼka bɔ̂ŋ nɔʼ kə ghɔ̀ŋ mbɔ, "Ɔ nɔ kie lyʉʉhənyaatəkə mbʉə-ɔ."

31 Ŋkwê-Jiso ghɔŋbə bəliŋ-bi bələŋ gwè tə́nə mbi tə́ŋ tíi ɔ. 32 Bɔŋ nuɔ-bʉə kə́ dùʼtə mbʉə ɔ yə̀ŋhə ɔŋ, kə́ ghɔ̀ŋ tʉ ɔŋ mbɔ, "Nyíɛ! Naa-aŋ ghɔŋbə bəliŋ-ba bələŋ nɔ bɛ mbi kə́ lɛ́nə aŋ." 33 Ɔ bə̀ŋhə tʉ bɔŋ mbɔ, "Naa-ɔŋ bɛ nda ghɔŋ bəliŋ-bɔŋ bələŋ bɛ bənda?" 34 Ɔ kʉ̂ʉ lɛ́nə bʉə ndə bɔ̂ŋ dùʼtə mbʉə ɔ ghɔ̀ŋ mbɔ, "Nɔ bɛ naa-ɔŋ nɔ ghɔŋbə bəliŋ-bɔŋ bələŋ! 35 Bʉʼka mbɔ wo ndə ɔ tʉʼ fɔ̀ʼ nukə ndə Nyii kʉ̀ʉ, ɔ nɔ bɛ liŋ-ɔŋ woləŋ ghɔŋbə liŋ-ɔŋ woke leʼnə naa-ɔŋ."