1 Nɔ nyɔ̀ʼ mbəŋ-ɔŋ Bɔɔ nyɔ̀ʼ ŋwɔʼnə-ɔ̄ŋ ndə mɔ bɛ vaafɔ̀ʼ-Nyii bɔŋleʼ kə́ bɛ lɔntəŋ Jiso Klai. Bə nɔ nə séʼ mɔ, tə́ŋ ndə məkwáa bʉə-Nyii ndə ɔ nɔʼ kə séʼ bɔŋ ndə məmɔʼfyiihə-ʉə ndəŋ ɔŋ bɔŋleʼ chìi b̈ɔ̂ŋ kínə shʉəŋ ndə i bu kwáa bɔŋ ndə mə-kə́-kínə shʉəŋ ndə i bu chìi bɔ̂ŋ kə́ chí mbi ndə ntɛ ndə i bu kɔ́ kuŋhə tʉ Nyii, 2 bʉʼka bɔ̂ŋ yʉ́əʼnə ndəŋ məchímbi ndə i bɛ təmə liʼ-i ghɔ fɛ. Nyii ndə ɔ kyinə chʉ̀ə lɛɛŋkə fɛ, nɔ nə kɔ̀ʼnə məchimbi-ɔ̄ wʉʉnəmbikə buŋ nə chʉ́ʉhə. 3 Bɔŋ kʉ̂ʉ bɛ ndə ndʉʉ ndə i kʉ̀ʼnə tʉ ɔŋ ɔ kɛ̀ʼ mu ŋgiekə-i ndə mɔ tʉʼ lɔ̀ʼ. Nɔ kə bɛ ndə Nyii Ŋkwaa-yʉʼʉ, kə kàhə mɔ ndə məfɔ̀ʼ tʉ ɔŋ.

4 Mɔ nɔ tʉʼ nyɔ̀ʼ tʉ Tatu, ŋkɛŋ vaa-ɔŋ ndə baʼa ɔ bɛ ndəŋ wukə imɔʼ ndə məmɔ̀ʼfyii ndəŋ Nyii.

Tə Nyii mbʉ Tie ghɔŋbə Klai Jiso Ŋkwaa-yʉʼʉ, dʉ̀ʼ buuŋjyu tʉ a bɔŋleʼ kɔ́ a nə fyiighʉ́ənə.

5 Mɔ nɔ kə mɛ̀ʼtə a mu Klit mbɔ a chʉʼ mìʼtə bəʼ-fɔ̀ʼ-kə ndə i kə káa, shʉ̀tə ï tə́nə ndyʉndyʉ bɔŋleʼ dùʼhə bəntəŋbəshʉ mu yəŋkwɛʼtəŋbə inchəŋ haʼ ndə mɔ kə gìe tʉ a mbɔ ä fɔ̀ʼ. 6 I nɔ bɛ mbɔ ntəŋbəshʉ kie ndə məkie mɔ̀ʼmbɛ mu məchimbi-ɔ fɛ, ɔ nɔ kie ndə məbɛ ləŋ woke imɔʼ, vâa-bi kie ndə məbɛ bʉə ndə bɔ̂ŋ nɔʼ bɛ́ŋ Nyii təmə bə kə́ dʉ̀ʼ ghɔkə chu-bɔŋ mbɔ bɔ̂ŋ bɛ nə nyaahə byuunɔ kə́ kwɛ̀ŋhə fɛ. 7 Ntəŋbəshʉ ndə ɔ tʉʼ lɛ́nə bʉə-Nyii, kie ndə məkie mɔ̀ʼmbɛ mu məchimbi-ɔ fɛ, bʉʼka nɔ tʉʼ lɛ́nə ɔŋ lɛ́nə fɔ-Nyii-bə. Ɔ kie ndə məbɛ wo tʉʉ fɛ byuunɔ kə́ chʉʼ kie tʉʉbʉə fɛ byuunɔ bɛ mbuuməndʉʼ fɛ byuunɔ bɛ wontɔŋntɔŋ fɛ byuunɔ kə́ bɛ wo ndə ɔ kʉ̀ʉ ndə məkie sii ndə nukə təmiyɔŋ ndə ɔ tʉʼ fɔ̀ʼ fɛ. 8 Ɔ bɔŋ kie ndə məbɛ wo ndə ɔ kʉ̀ʉ məkie bʉə-mətòʼ chunjaa-ɔ, kʉ̀ʉ nu-jyujyu-bə, kie ndə məbɛ wo ndə ɔ tʉʼ chìi nubə nə ndaahə-i ikʉ̀ʼnə, bɛ ndyʉndyʉ, bɛ ŋkʉʉ ndə bəbɛʼbʉə bɔŋleʼ bɛ wo ndə ɔ tʉʼ yá ŋwɔŋ-ɛŋ. 9 Ɔ nɔ kie ndə məmɔʼfyii-i shʉ́əshʉ́ə ndəŋ ŋgiekə-ɔ̄ŋ ndə bəkɔ wo yʉ́əʼnə ndəŋ ghɔ ndə bə kə dàhə ɔŋ nə yɔŋ. Ɔ̈ chìi yɔ̄ŋ-yə mbɔ ɔ chʉʼ kə́ kwèʼhə bəbɛʼbʉə nə mədàhə ndə i bɛ kʉ̀ʼnə bɔŋleʼ kə́ sɔ́ʼ bʉə ndə bɔ̂ŋ tʉʼ dàhə yʉə-yə gɛ̀ ŋkʉ̂ʉ.

10 Bʉə buŋmbi nɔ bɛ ghɔ ndə bɔ̂ŋ tʉʼ kwɛ̀ŋhə, kə́ kwə́ʼkwə́ʼ njəŋtə bɔŋleʼ fə́ʼhə bʉə, fɔŋ ɛŋ kə́ bɛ bʉə ndə bɔ̂ŋ tʉʼ dàhə mbɔ bə nɔ kie ndə məfɔ̀ʼ wo ɔ buŋ kie ŋkwaaNyii. 11 Bə nɔ kie ndə məchíe chutə-ʉə, bʉʼka bɔ̂ŋ nɔ tʉʼ byùutə chu-fyú-bʉə-tə, ndə mə-kə́-dàhə nubə ndə bɔ̂ŋ gòʼ təmə kie ndə mə fɔ̀ʼ fɛ, nchəŋnchəŋ-ɛ̄ŋ kə́ bɛ ndə məchìi kyʉə kətʉvyiinə. 12 Mbyu wo Klit, wo mukətʉ-súunə ndə ɔ nɔʼ nə bɛ ŋgʉʼŋgʉʼhə nɔ kə ghɔ̀ŋ mbɔ, "B̃ʉə Klit nɔ chʉ̀ə lɛɛŋkə təvɛʼtəvɛʼ, nyaa-bʉəbʉə-hə, kə́ bɛ bʉə-bəghʉʉhə ndə bɔ̂ŋ kʉ̀ʉ haʼ ndə mə-kə́-yúyú." 13 Nubə-ɔ̄ŋ nɔ bɛ shʉəŋ. Nɔ, sɔ́ʼ bɔŋ shʉ́əshʉ́ə mbɔ bɔ̂ŋ chʉʼ mɔ̀ʼfyiihə-ʉə ndəŋ Nyii nə shʉəŋ, 14 təmə kə́ kɔ́ tyunəbə-ʉə ndə chəŋ-mbi-nduɔŋ-bʉə-Juu-bə, byuunɔ bəŋkahə bʉə ndə bɔ̂ŋ shìe liɛŋtə-ʉə tʉ Nyii fɛ. 15 Tʉ bʉə ndə bɔ̂ŋ bɛ tʉ́ʉnə, nubə inchəŋ nɔ bɛ tʉ́ʉnə, bɔŋ tʉ bʉə ndə bɔ̂ŋ nɔʼ bʉ́əhə ŋwɔŋtə-ʉə, təmə kə mɔ̀ʼfyii ndəŋ Nyii fɛ, nubɛʼkə bɛ ghɔ ndə i bɛ tʉ́ʉnə shʉ-bɔŋ fɛ bʉʼka ndaahə-ʉə ghɔŋbə ŋkwɔʼtə-yʉə nɔʼ byʉ́ʼ. 16 Bɔ̂ŋ nɔ tʉʼ ghɔ̀ŋ mbɔ bɔ̂ŋ la kínə Nyii bɔŋ ntɛ-bənu-hə-ʉə nɔ tʉʼ dʉ̀ʼ mbɔ bɔ̂ŋ kínə ɔŋ fɛ. Bʉʼka bɔ̂ŋ nɔ tʉʼ chìi nubə ndə bʉə-bàa təmə bɔŋ-kə́-leʼ yʉ́ chu-Nyii fɛ, bɔ̂ŋ kʉ̀ʼnə ndə məfɔ̀ʼ fɔʼɔ jyujyubɛʼ təmiyɔŋ fɛ.