1 Petili 3

Malanguso kwa chiwalo cha walume na wadala

1 Hemwe wadala, muwahulichize walume wa hemwe, leka wone wawe baho walume wawele hambe wakunde ulonzi wa Nguluwi, wakunde kwa kuwinza madito ga hemwe. Haiwa lupichi kwa hemwe kulonga ulonzi, 2 kwa vila wokona madito ga hemwe logawele gelile na gakumuhulichiza Nguluwi. 3 Kuli kinoliga kwa hemwe, kuleche kuwa kinoliga kwa kunze, kota vila mbuli ya kudalanga mnvili kwa vinji na kuvala vinhu vya zahabu na nguwo zinojile. 4 Ila kinoliga kwa hemwe, kwanguganigwa kuwe mgati mwa nhumbula za hemwe, ila kinoliga kuli vinhu vyohambe viwifigwe, kota vila, muhe wa uliholile na kusindamala, uwele na katogo ng’hulu ng’hatu hali Nguluwi. 5 Ndo lowenolije aho katali wadala welile wawele womtumbila Nguluwi, nawawahulichiza ng’hatu walume wa hewo. 6 Kwa ulajilo Sala nakamhulichiza Abulahamu na kumchema mkulu. Hemwe sambi muwa wahinza wa heye wone mdite ganojile ne kudumba chinhu choneche chila.