1 Ayubu nakedichila,

2 "Ulole, nda ng'hochele na ndahela utanzi,

nagwe haunhanzile ne hado!

Ndaze, kwangijesa kota nakunhanza lukami?

3 Ndaze vyoundonjele ndilihela luhala,

na kumha heni uwanzi wa hegwe mwinji!

4 Whaani yakutanzile nakulonga ulonzi awo?

Ndo muhe wa whaani ulonjile kulawa kuli mlomo wa hegwe?

5 "Mihoka jiwele ako hasi jangudumba,

jangukakama mgati mwa mazi ga hasi ha isi.

6 Kuli isi ya wabagame kwa mwanzi ng'hatu hali Nguluwi.

Kuwifya kwahela chigubiko choneche.

7 Nguluwi kanguusambalulaga ulanga wa kasikazini hali honhu halihela chinhu,

na kuininiza isi kuli honhu halihela chinhu cha kuibatilila.

8 Kangugahindilaga mazi kuli ng'hungugu yake,

nayo ng'hungugu hailingutulika kwa itunyo lyake.

9 Kanguigubikaga nyelezi ikangale,

kwa kutandazula ng'hungugu mchanya mwake.

10 Nakawika msitali wa upeo kugawanula ulanga na mazi ga bahali,

leka uwe mbaka wa lumuli na jiza.

11 Mizengo ja ulanga najo jangukakama,

jangukabuswa hoyojing'hanuchila.

12 Kwa mong'ho wa heye nakaidita bahali isindamale,

kwa uwanzi wa heye nakachikopola chilumbigwe chikulu cha kuli bahali chilinguchemigwa Lahabu.

13 Kwa lweselo lwa heye nakauhovuga ulanga,

moko wa heye nauchikopola chilumbigwe acho, izoka lilingusulupuka.

14 Azi ndo mbuli ndodo hela kuli madito ga heye,

natuhulika kupwepwa kudo hela kuwala heye!

Lelo whaani yoweza kuuzela ukulu wa mong'ho wa heye?"