1 Hamba Sofali, Mnaama, nakamwidichila Ayubu,

2 "Ndaze, ulonzi awu weng'ha ukole hihi hela ne kwidichilwa?

Ndaze, ayu yalingulonga lukami yatawizwe kota kana hachi?

3 Ndaze, ulonzi wa hegwe wa chipoka uwadite wanhu wanyamalile?

Ndaze, munhu yaleche kukung'hanuchila hala houbeza?

4 Kwangumlonjela Nguluwi, ‘Makundo ga heni ndo ga kukomya,

ndahela nongwa hali hegwe.’

5 Wone Nguluwi yahalonjile,

yahagubule mlomo wa heye kukwidichila,

6 yahakulonjele kuwala uviso wa luhala,

kwa vila nakamema uwanzi.

Uvizele kota Nguluwi hagawazile gehile ga hegwe geng'ha.

7 "Ndaze, koweza kuvizela uviso wa Nguluwi

na mbaka wa mong'ho wa Nguluwi Yawele na Ludali?

8 Ukulu wa heye naupuluta ulanga, hegwe kwanguweza choni?

Wimo wa heye wangupuluta kuli isi ya wabagame,

hegwe kwanguweza kuvizela choni?

9 Ukulu awo wangupuluta ukulu wa isi,

na ugazi wa bahali.

10 Wone Nguluwi kokuya kwa hegwe,

na kukutagusa na kukuwika mchinweng'ho,

whaani yoweza kumlemeza?

11 Nguluwi kanguwazela wanhu wohambe watanze chinhu.

Ndaze, hoyogona gehile ga hewo kangugalekaga hela?

12 "Mpoka koweza kuwa na luhala,

hala du lyana lya idogowi lya kisolo lyopondigwa liwele munhu.

13 Ayubu, uleche gehile ga hegwe,

winule moko ga hegwe kumlanda Nguluwi!

14 Wone kuna wihe, utaje kutali,

uleche kukunda uwe mng'handa mwa hegwe.

15 Ahyo, wahawele ulihela soni hali wanhu,

wahawele nzinzili ne kudumba.

16 Kogasemwa magazo ga hegwe geng'ha,

kota vila mazi tendema gawele nagapuluta.

17 Kikala kwa hegwe kopulika kusinda isanya kuli mhela wa nemisi,

jiza lyake lyogaluka na kuwa lumuli lwa kubwemwenzuka.

18 Kowa na kikala goya, kwa vila kitumbila kwa baho,

kokwamilwa na kokwesela kwa kikala goya.

19 Kowasa ne kudumbizwa na munhu,

wanhu wenji wokulanda utanzi.

20 Ila meho ga wehile gobilabila,

nzila za hewo zeng'ha za kubilimila zokwajilila,

kitumbila kwa hewo kwa kuduma kowa ndo kubagama!"