1 Loukolile mhela umwenga, Ayubu nakalonga kwa kulipanjila zuwa lyoyapondigwe. 2 Nakalonga,

3 "Lipanjilwe zuwa lila liwele namhondigwa,

mbaka nechilo yila iwele nailonjigwa, ‘Kana himila ya mwana mlume!’

4 Zuwa alyo liwe jiza!

Nguluwi kilanga yaleche kitunya kwa chiwalo cha zuwa alyo,

ne lumuli lwoneche luleche kulangazila kuli zuwa alyo!

5 Jiza totolo ilifiche,

ng'hungugu ng'hulu ziligubiche.

Utitu ugubiche lumuli lwake!

6 Nechilo yila ibatigwe na jiza totolo!

Ileche kuwazigwa kuli mazuwa ga mwaka,

ne kuwazigwa kuli mazuwa ga mwezi woneche.

7 Ena, nechilo ayo iwe mhende,

lizi lya kusangalala lileche kuhulikwa mgati mwake.

8 Wala walingugapanjilaga mazuwa, walipanjile zuwa alyo,

wala wawele goya kulinula linhu likulu, Lewiyatani.

9 Nhondwe zake za lufuku zigubikwe na jiza,

libeteze lumuli ne kulawila,

ne kona lumuli lya kubwemwenzuka,

10 kwa vila nechilo ayo haiwopile munda wa mayangu,

ne kugavisa magazo leka ndeche kugona.

11 "Lekachoni sibagame lomhondigwe?

Lekachoni sibagame lombele ndilawa mmunda?

12 Lekachoni mayangu nakamhonda?

Lekachoni mayangu nakonyeza heni?

13 Kwa vila lelo ndahawele nyesele kwa kikala goya.

Ndahawele mbasile na kwesela,

14 hamwe na wandewa na vilongozi wa isi wawele nawabagama,

wawele nawezenjela ng'handa za hewo, ziwele sambi ndo mahame.

15 Ndahawele hamwe na vilongozi wawele na zahabu,

wawele nawazimemeza ng'handa za hewo kwa sendi.

16 Lekachoni siwele kota himila iwifigwe,

ena kota mwana yawele nakapondigwa yawele nakabagama?

17 Ako kuli kubagama, wehile hawalingumtunya munhu,

watochile wangwesela.

18 Ako wanweng'hwa wangwesela hamwe,

hawalinguhulika lizi lya kung'ang'ala lya chilongozi wa hewo.

19 Wakulu na wadodo wa kuko,

nawo wapogozi nawaditigwa wawe na kilejeha kulawa kwa wakulu wawo.

20 "Lekachoni kumha lumuli yula yawele kuli magazo,

kumha ukomu yula yawele na masinzo mnhumbula?

21 Munhu yalingugana kubagama ila halingubagama,

kangupalaga kubagama kusinda kupala ng'hano ivisigwe.

22 Munhu kota ayo kotowa luchenze ng'hatu na kusangalala,

kosangalala hoyobagama na kutiligwa!

23 Lekachoni kumha ukomu munhu yawele nzila za heye nazihindigwa,

munhu yawele Nguluwi nakamzungulusila mbaka?

24 Kwa vila kulila kwa heni kwa usungu kwanguya honhu ha chilyo,

kung'ung'uta kwa heni kwangubohoka kota mazi.

25 Chila chondilinguchidumba nachifika kwa heni,

chinhu chiwele nachali chikabusa heni ndo chombele nacho.

26 Ndahela kikala goya ne kusindamala,

ndahela kwesela ila magazo yeka."