1 "Nhumbula ya heni naitweguka,

mazuwa ga heni nagamala,

chilaga changumbeteza.

2 Ndikomya walingubeza nawanzunguluta,

meho ga heni ganguwona ung'honyo wa hewo hela.

3 "Gwa Nguluwi, wiwiche lehani kwa chiwalo cha heni kwa gwegwe baho,

kwa vila haduhu yunji wa kudita ahyo kwa chiwalo cha heni.

4 Nakudinya luhala lwawo luleche kuwa na kuvizela,

ahyo uleche kukunda wasumye heni.

5 Munhu yalingumbelenhuka goloko wa heye leka yapate chinhu cha mzidi,

wana wa heye wogazika.

6 "Nguluwi nakandita nzomelwe na wanhu,

na kutemelwa mite.

7 Meho ga heni nagabilabila kwa masinzo,

lukuli lwa heni lweng'ha naluwa kota isisila.

8 Wagoloche wangububuwala howombona

na walihela ngongwa wangundonjeleza kota silingumdumba Nguluwi.

9 Ila yatanganiche kobatilila nzila za heye,

munhu yalingudita ganojile kangulutililaga kuwa na mong'ho ng'hatu.

10 Ila hemwe muye, muye mweng'ha,

kwa hemwe siweza kumpata yawele na luhala, ne yumwe.

11 Mazuwa ga heni nagamala, kiwika goya kwa heni nakubenigwa,

kitumbila kwa nhumbula ya heni nakwajilila.

12 Wanhu awa wanguiditaga nechilo kuwa nemisi,

kuwele na jiza, hewo wangulongaga, ‘Lumuli lwa habehi.’

13 Wone kuli isi ya wabagame ndo ng'handa ya heni,

kikala kwa heni kwa amo kuli jiza,

14 wone ndokulonjela kuwifya, ‘Hegwe ndo mhaza wa heni,’

na kuilonjela mhiko, ‘Hegwe ndo mamo wa heni’ ama ‘Lumbu lyangu,’

15 kwa kohi lelo kitumbila kwa heni?

Whaani yoweza kukona kitumbila koneche kwa chiwalo cha heni?

16 Kitumbila kwa heni kodulika na heni kuli isi ya wabagame!

Weng'ha weli todulika mbaka ako kuli nhimbwisi!"