1 "Lekachoni Nguluwi Yawele na Ludali kahela mhela ulinguzeleka wa utaguso,

ama lekachoni walingumzela Nguluwi hambe wagazele ago mazuwa ga heye ga kigala hachi?

2 Wanhu wanguhejeza ulajilo wa mbaka ja migunda,

wanji wanguhiza ming'holo na kujidima hamwe na vilundo vya migongolo ja hewo.

3 Wanguholaga midogowi ja walekwa na ibuguma lya mdala yafililwe na mlume wa heye,

mbaka hoyosinda kulipa sendi zoyalingudaigwa.

4 Wanguwakundujizaga walihela chinhu leka waileche nzila,

na kuwadita wazunwa weng'ha wa isi wevise kwa kuwadumba hewo.

5 Kota idogowi lya kisolo liwele kugunuche,

wazunwa wangupalaga chilyo kugunuche,

leka wapate choneche cha kuwapa wana wa hewo.

6 Wazunwa wangulokotezaga mbena zisigale kuli migunda,

wangulokotezaga zabibu kuli migunda ja wehile.

7 Nechilo yeng'ha wanguwasaga ne igolole

mhela wa chipute wahela cha kigubika.

8 Wangudodaga kwa nhonya ya kuli chidunda,

wangivisaga kuli mitalawe kwa vila wahela honhu ha kubilimila.

9 Wehile wanguwaholaga walekwa kwa lupichi kuli matombo,

na kuwahola wana wa wazunwa leka wawe lehani.

10 Wazunwa wangujendaga ne ikoti,

wangupikaga nganda za ngano, ila wanguwa na nzala.

11 Wanguwagongomanjila wehile mafuta ga zeituni,

na kukama zabibu ne kujeza divai.

12 Chililo cha walingubagama changuhulikwa kulawa kuli muji,

na wawele nawalumizwa wangutowa iyowe kulanda utanzi,

ila Nguluwi halinguhulichiza kulanda kwa hewo.

13 "Wa baho wehile wanji walingubelenhuka lumuli,

wohambe wazizele nzila za lumuli,

hawalingugana kuzibata nzila za heye.

14 Yalingukopola kangwinukaga lufuku,

kuwakopola ng'hochele na wazunwa,

loifika nechilo, mijito ja heye ndo kuhiza.

15 Mng'hondwa naye kangubetezaga jiza linjile,

yochilonjela, ‘Haduhu yawele kombona.’

Hamba kanguvisa kumeho kwa heye kwa ivalo.

16 Nechilo, wahizi wangubenaga honhu ha ng'handa leka kwinjila mgati mwake,

ila nemisi wangivisaga mgati,

kwa vila hawalingugana koneka hali lumuli.

17 Weng'ha awo, jiza totolo ndo lumuli lwa hamitondo kwa hewo,

hewo kahi ndo goloko wa ukabuso wa jiza totolo.

18 "Ila mwangulonga,

‘Wehile wanguholigwa himahima na mazi tendema,

haluga ha hewo hangusigalaga kuwa isi ipanjilwe,

ahyo, haduhu yalinguluta kuli migunda jawo ja mizabibu.’

19 Kota seluji vyoilingusungulumuka kuli ivuche na kugunuche

ndo kuli isi ya wabagame vyokulinguwahola walingudita gehile.

20 Lida liwapondile lyanguwasemwaga wanhu awo,

mhiko zolya ng'huli za hewo na kuziwifya kota igodi ligwile.

21 "Wehile wanguwabunzaga wadala walihela wana na mhende.

Hawalinguwaditila ganojile wadala wafililwe na walume wa hewo.

22 Nguluwi kanguwadumyaga wawele na ludali kwa mong'ho wa heye,

hanga nawalutilila goya, ila wahela makundo ga kikala lukami.

23 Kanguwalekaga wehile wewone kota wa hali kikala goya,

ila meho ga heye gangugalolaga madito ga hewo.

24 Wehile wangulutilila goya kwa mhela udo hela, hamba wangwajililaga,

wanguswinha kota ihamba,

wangutemigwa kota miso ja nyhule.

25 Whaani yoweza kutawiza kota heni nda mdesi

na kuudita ulonzi wa heni woneche kota hauwele wa kukomya?"