1 Kuli isi ya Usi nakwali na munhu yawele nayali yochemigwa Ayubu. Munhu ayo nayali yalihela nongwa na nayali na hachi. Nayali yomdumba Nguluwi na nayali yochiwika kutali na gehile. 2 Ayubu nayali na wana walume saba na wana wadala wadatu, 3 kahi nayali na ming'holo elufu saba (7,000) na ngamiya elufu zidatu (3,000) na mibuguma elufu imwe (1,000) na midogowi midala miya zihano (500) na vitumagwa wenji ng'hatu. Nayali na lufufu lwinji kusinda wanhu weng'ha ako kolilawilaga isanya. 4 Wana walume wa Ayubu nawali wodita mnvina chila mhela, chila yumwe kuli zuwa lya heye. Nawali wowalalika walumbu wa hewo wadatu leka kulya na kunwa hamwe na hewo.

5 Chila mhela mnvina loisindile, Ayubu nayali yowachema wanage leka yawelize. Nayali yokwinuka lufuku ng'hatu leka kulavya nhambiko za kulakazwa kwa chiwalo cha chila yumwe wa hewo kwa vila nayali yochijesa, "Hanji wana wa heni nawadita gehile na kumliga Nguluwi mnhumbula zawo."

6 Zuwa limwe wahilisi wa Nguluwi nawaluta hali Mkulu Nguluwi, Limazoga* nalyo naliluta hamwe na hewo. 7 Mkulu Nguluwi nakaliuza Limazoga, "Nakulawa kohi?" Limazoga nalimwidichila Mkulu Nguluwi, "Ndangulawa kuzunguluta kuli isi yeng'ha ndijendajenda aku na kula."

8 Ahyo Mkulu Nguluwi nakalilonjela Limazoga, "Ndaze, nakumona chitumagwa wa heni Ayubu? Kuli isi yeng'ha haduhu yunji yawele kota heye. Heye ndo munhu yalihela nongwa na yawele na hachi na yalingundumba na yalingiwika kutali na gehile." 9 Limazoga nalimwidichila Mkulu Nguluwi, "Ndaze, ayo Ayubu kangukudumba hegwe hihi hela? 10 Ndaze, haiwele kota hegwe kwangumwamila banzi zeng'ha hamwe na ng'handa ya heye na chila chinhu choyawele nacho? Nakujitambichiza mijito ja moko ga heye, ahyo nakuvidita vilundo vya heye vya ming'holo na mhene na migongolo ja heye jinji vyenele kuli isi yeng'ha. 11 Lelo ugolole moko wa hegwe na kusambalula chila chinhu choyawele nacho, ndikomya kokuliga."

12 Mkulu Nguluwi nakalilonjela Limazoga "Lelo, koweza kudita choneche choulinguweza kuwala lufufu lwa heye, ila hawele yuye, uleche kumdoliza." Lelo Limazoga nalyuka hali Mkulu Nguluwi.

13 Zuwa limwe wana wa Ayubu lowawele wodita mnvina, wolya na kunwa divai kuli ng'handa ya mng'holozawo mkulu, 14 nakoya chitumagwa kwa Ayubu na kulonga, "Natwali tulima kwa mihuka ja kukwejigwa na mibuguma. Midogowi najo najali jilya aho habehi. 15 Wanhu kulawa Sheba nawatutowa na kujihola migongolo ajo. Hamba nawawakopola vitumagwa kwa ipanga, heni ndiliyeka nasulupuka kukugalila mbuli ayi!"

16 Loyawele yang'hali kusinda kulonga, nakoya yunji na kulonga, "Lumwemwesa lwa limlungu nalulakaza na kujikopola ming'holo na vitumagwa, heni ndiliyeka nasulupuka kukugalila mbuli ayi!"

17 Ayo naye loyawele yang'hali kusinda kulonga, nakoya yunji na kulonga, "Wakalidayo nawewika goya kuli vilundo vidatu, nawawavaba ngamiya wa hegwe na kuwahola. Nawawakopola vitumagwa kwa ipanga, ila heni ndiliyeka nasulupuka kukugalila mbuli ayi!"

18 Loyawele yang'hali yolonga, nakoya msenga yunji na kulonga, "Wana wa hegwe walume na wadala lowawele wolya na kunwa divai kuli ng'handa ya mng'holozawo mkulu, 19 baho du chivuluvumbi kulawa kuchiwala nachiitowa ng'handa ayo chila ubanzi, nayo naiwagwila, wana wa hegwe weng'ha nawabagama, heni ndiliyeka nasulupuka kukugalila mbuli ayi!"

20 Ayubu nakema, nakadega mivalo ja heye na kubeya mnvili za heye kwa masinzo, hamba naketoza hanyi na kumfugamila Nguluwi. 21 Nakalonga,

"Nandawa kuli lida lya mayangu mbele mwanzi,

ndohiluka mbele mwanzi hihila,

Mkulu Nguluwi nakamha,

Mkulu Nguluwi nakahola,

itagwa lya Mkulu Nguluwi litogoligwe."

22 Kuli mbuli azo zeng'ha Ayubu haditile gehile kwa kumlonjeleza Nguluwi kwa kumditila mbuli zihile.