1 "Ayubu, ndaze kwanguweza kulilowa Lewiyatani, linhu lya kuli bahali kwa ndowano ilingulowa somba,

ama kuwoha umyango wake kwa ng'weso?

2 Ndaze, kwanguweza kwinjiza ng'weso mmhenyhelo yake leka kulilongoza,

ama kutubula izeze lyake kwa ndowano?

3 Ndaze, lyokulanda ulyonele isungu?

Ndaze, lyolongasa na hegwe kwa ulonzi wa uliholile leka uleche kulilumiza?"

4 Ndaze, lyodita ilagano na hegwe leka ulihole

liwe chitumagwa wa hegwe kuli kikala kwake kweng'ha?

5 Ndaze, koliwika haluga ha hegwe na kulidita livine na hegwe,

ama koliwoha ng'weso kwa chiwalo cha wahinza leka wadawale nalyo?

6 Ndaze, walingugula na kuguza vinhu woligula kulawa kwa walingulowa,

na kulitemanga vihande vihande na kuguza miwunde jake?

7 Ndaze, kwanguweza kuhoma lukuli lwake kwa igoha lya kuswandila somba,

ama kulihoma litwi lyake kwa chinhu chiwele na chihomo?

8 Wone kolidoliza kwa moko wa hegwe, lyokuditila ngondo iwele koikumbuchila mazuwa gose,

na hauwila kahi kudita ahyo!

9 Kitumbila koneche kwa kulidita lisindamale ndo kideteleza hela,

kula kulilola hela kwangumgwisa munhu hasi.

10 Haduhu yoneche yalinguweza kulyinula.

Lelo, whaani yoweza kwima hali heni?

11 Whaani yalingundai leka ndimhilusile?

Chila chiwele hasi ha ulanga ndo cha heni.

12 "Ayubu, ndokulonjela kuwala vitomo vya linhu alyo, Lewiyatani,

mong'ho wake na lukuli lwake lukulu.

13 Whaani yalinguweza kulavya igozi lyake ligagadale?

Ndo whaani yalinguweza kulihejelela na lijamu kwa kulilongoza?

14 Ndaze, whaani yoweza kugubula mlomo wa alyo

uwele nauzungulutwa na mizino ja kukabusa?

15 Mgongo wake una ngawo

zibatilize hamwe ziwele nzinzili,

16 chila yimwe ya habehi ng'hatu na iyage,

haduhuli mbeho ilinguweza kukola hagati.

17 Ngawo azo nazilumba nzinzili chila imwe na iyage,

nazinanahila, hazilingileka.

18 Holigubula mhenyelo yake, lumuli lwangumetameta,

meho gake gangupulika kota kubwemwenzuka.

19 Vyenje vilingwaka vyangulawa kuli mlomo wake,

misesela ja chiluli janguzuma kulawa mgati mwake.

20 Iyosi lyangufung'ha kulawa kuli mhenyelo yake,

kota ivuche lilingulawa kuli chiya chilingutogota kwa chiluli cha ngodi zikalile za midete.

21 Lweselo lwake lwangubwinaga makala ga maganga,

najo milapi ja chiluli jangulawaga kuli mlomo wake.

22 Singo yake ina mong'ho lukami,

koneche holiluta lyanguwambuza wanhu wadumbe.

23 Miwunde jake najibina na kinhanhahila,

ja nzinzili na hajilinguweza kusigwa.

24 Mhambaga yake naigagadala kota italawe,

ama iganga lya hanyi lya kubalasila.

25 Holikwinuka, wawele na mong'ho wangudumba,

wanguhiluka kumbele na kubilima.

26 Ipanga lilingumfichila hambe limteme,

ne igoha ama msale.

27 Chuma lyanguchonaga kota isolo,

na shaba kota igodi lyolile.

28 Misale hajilingwambuza libilime,

maganga ga mhembeyo kwake ndo kota mhumba.

29 Nyhimbati yanguwaga kota chihande cha ihamba likalile,

lyangusekaga lizi lya kitowa kwa migoha.

30 Honhu hake ha hasi kuli lida,

hana mizino kota vigaye vya chiya,

wone zileche ubuluno kuli nhope,

kota chinhu chiwele na mizino ja kupululila.

31 Holikojelela lyanguditaga mazi ga bahali gehanzanye,

kota mazi galinguhemula kuli chiya.

32 Holikola kumbele kwake lyangulekaga nzila ilingupulika,

munhu yahajesile kota hagati ng'hatu ha mazi menji kwa hazelu.

33 Haduhu choneche muisi chilingiwhana nalyo,

alyo ndo chilumbigwe chilihela lunhwinhwi.

34 "Heye kanguwalolaga hasi wala walingidaya,

heye ndo mndewa mchanya mwa weng'ha walingidaya."