1 Ayubu nakedichila,

2 "Mhulichize goya ulonzi wa heni,

aku ndo kuhembuliza kondilingukugana kulawa kwa hemwe.

3 Mndeche ndonje,

hondisinda kulonga, mlutilile kumbeza.

4 Ndangumng'ung'utila Nguluwi haiwele munhu,

ahyo, lekachoni mbeteze?

5 Mndole, namwe mbubuwale kwa kumbona vyondilingutamika lukami,

mdinye milomo ja hemwe kwa moko ga hemwe.

6 Hondijesa kuwala mbuli ayi, ndangudumba,

lukuli lwa heni lwangukakama.

7 Lekachoni wehile wangulutilila kikala,

na mbuli za hewo zangulutilila goya,

na hawalingubagama mbaka howowa wasekulu ng'hatu?

8 Wanguwonaga wana wawo wolutilila goya,

na wazukulu wawo hali meho ga hewo.

9 Ng'handa za hewo zangulutilila goya haduhu lunhwinhwi,

na ng'hobwa ya Nguluwi hailinguwafika.

10 Ena, mibuguma jawo jangonjezeka,

misenga jawo jangulela ne myana jawo kubagama.

11 Wana wa hewo wangudawala na kuvina,

wanguvinaga waliyeka kwa kikala goya.

12 Wangwimbaga na ngoma na ving'hweleng'hwele,

na kusangalala kwa lizi lya mluli.

13 Wangulutilila goya kuli mhela weng'ha wa ukomu wa hewo,

hamba wangudulikaga kuli isi ya wabagame kwa kikala goya.

14 Wangumlonjelaga Nguluwi, ‘Uleche kututunya!

Hatulingugana kuzizela nzila za hegwe.

15 Nguluwi Yawele na Ludali ndo whaani mbaka tumkolele mijito?

Topata chinhu chachi cha mzidi hotumlanda?’

16 Wehile wangilonjela kota wangulutilila goya kwa mong'ho wa hewo,

ila silingugakunda majesa ga hewo.

17 "Hailingulawila mala nyinji kwa vyenje vya wehile kuzimigwa,

hawalingufichigwa na magazo chila mhela.

Nguluwi halinguwagaza hewo kwa vila kana ng'halazi lukami na hewo.

18 Ndaze, wehile wanguwaga kota mahamba gakalile hali mbeho,

ama kota mhumba vyoilinguholigwa na chivuluvumbi?

19 Yangulonjigwa, ‘Nguluwi kanguwikaga ng'hano ya magazo ga munhu kwa chiwalo cha wanage,’

Nguluwi yamhilusile chibida acho heye yuye, leka yavizele!

20 Meho ga heye yuye gakone kudumigwa kwa heye,

heye yuye yafichigwe na kuzudila kwa Nguluwi Yawele na Ludali.

21 Yehile hoyobagama,

howeza kijesa chiwele cholawila kuwala walelwa wa heye.

22 Kwa vila Nguluwi kangumtagusa chila yumwe, mbaka walingikala kilanga,

haduhu yawele koweza kumlangusa chinhu choneche.

23 "Wanhu wamwenga wangubagama kuno wawele na mong'ho wa hewo weng'ha,

wawele hali kikala goya na kusangalala,

24 wawele wanenehe,

na mizeje ja hewo jiwele jing'hali na mong'ho.

25 Wanji wangubagama wawele na masinzo ng'hatu mnhumbula,

wawele hawanawahika kujeza lyoneche linojile.

26 Hewo weng'ha wanguwasaga kuli nhimbwisi,

weng'ha wangugubikwa na mhiko.

27 "Mhulichize hemwe! Heni ndangugazela geng'ha gomlingijesa,

na majesa gehile kwa chiwalo cha kumbeza heni.

28 Mwanguuza, ‘Nakulawila choni kuli ng'handa ya wehile?

Ng'handa za wehile wakulu naziwifigwa.’

29 Ndaze, hamuwauzile wakola nzila,

hamijesile kuwala mbuli za wala wajenzi?

30 Wajenzi wangijesa kota mwihe kanguwichigwa kutali na zuwa lya kubagama,

kangugomboligwa kuli zuwa lya kuzudila!

31 Whaani yomlonjeleza munhu yehile,

ama kumhilusila geng'ha goyaditile?

32 Hoyohilichigwa mchilaga,

chilaga cha heye changwamilwa.

33 Wanhu wenji wangumuwinza kumbele,

na wanji wenji ng'hatu wangumlongola.

Hoyotiligwa, misanga janguduliswaga mholemhole.

34 Lelo moweza ndaze kuhembuliza heni kwa ulonzi hela?

Kwidichila kwa hemwe kwahela utanzi na ndo udesi hela."