1 Lelo goloko awo wadatu wa Ayubu, wawele ndo Elifasi na Bilidadi na Sofali nawaleka kumwidichila Ayubu kwa vila Ayubu naketawiza yuye kota kahela nongwa. 2 Ila Elihu, mwana wa Balakeli, wa nhanzi ya Busi, wa lukolo lwa Lamu, nakamzudila ng'hatu Ayubu kwa chiwalo cha kiwona kota kana hachi na kijesa kota Nguluwi nakamgaza ne chiwalo. 3 Kahi nakawazudila awo goloko wadatu wa Ayubu kwa vila nawalonga kota Ayubu nayali na nongwa nyinji, ila hawawezile kumdita Ayubu yagaluse majesa ga heye, kota chowalonjile nachali cha kukomya. Kwa kudita ahyo, nayoneka kota Nguluwi kana nongwa. 4 Mhela uwele wasekulu lowawele wolongasa na Ayubu, Elihu nayali yanyamalile kwa vila heye nayali msongolo kusinda hewo. 5 Ila Elihu loyawene wanhu awo wadatu wahela ulonzi wa mzidi wa kumwidichila Ayubu, nakazudila ng'hatu. 6 Lelo Elihu nakulonga,

"Heni nda msongolo, hemwe ndo wasekulu,

ahyo nandumba kuwalonjela chondilingijesa.

7 Nandilonjela mnhumbula, ‘Waleche wawele na mazuwa menji walonje,

wawele na miyaka minji walanguse luhala.’

8 Ila awo muhe uwele mgati mwa munhu,

muhe wa Nguluwi Yawele na Ludali,

ndo ulingumdita munhu yawe na kuvizela.

9 Hawawele wasekulu waliyeka wawele na luhala

ama wawele na miyaka minji ng'hatu walinguvizela kwamula kwa hachi.

10 Ahyo ndangulonga, ‘Mnyhulichize,

nani ndiwalonjele chila chondilingijesa.’

11 "Heni nambeteza hala homuwele mlonga,

nanyhulichiza ulonzi wa luhala womuulonjile,

vyomuwele mpala ulonzi wa kulonga.

12 Nandiwahulichiza goya ng'hatu,

ila haduhu ne yumwe hali hemwe yawele nakamsumya Ayubu,

mweng'ha namlemwela kwidichila ulonzi wa heye.

13 Milolele mleche kulonga, ‘Lelo natupegwa luhala.

Nguluwi komsumya, ila hawele munhu.’

14 Ulonzi wa Ayubu hauwele kwa chiwalo cha heni,

ahyo simwidichila kota vyommwidichile hemwe.

15 "Nambubuwala, namlemwela,

mwahela ulonzi wa kulonga kahi.

16 Ndaze, ndutilile kubeteza hela kwa vila hamlingulonga,

mwangunyamalila hela ne kwidichila chinhu?

17 Nani ndolavya ulonzi wa heni,

ndowa na chinhu cha kulonga.

18 Ndanawo ulonzi mwinji ng'hatu,

nhumbula ya heni yangung'hundujiza kulonga.

19 Mgati mwa heni nda kota ibuli limemile mazi,

kota mazi galinguhemla lukami gawele habehi kubohoka.

20 Ndanguganigwa kulonga leka heni sindamale,

yangundapa ngubule mlomo wa heni na kwidichila.

21 Simganilila munhu yoneche,

ne kulavya ulonzi wa kumhembuliza munhu,

22 kwa vila wone ndahawele goya kiwika habehi na munhu kwa chiwalo cha kugana kupata chinhu kulawa kwa heye,

Nguluwi yahandumye."