1 "Ucheme lelo, ulole leka wone kota hana wa kukwidichila.

Whaani hali wahilisi yawele kokutanza?

2 Ndangukomya, ng'halazi yangumkopolaga mpoka,

na fihi yangumdumyaga.

3 Nandimona mpoka yolutilila goya,

ila baho du nandiipanjila ng'handa ya heye.

4 Wana wa heye wa kutali na kikala goya,

chila mhela wangubunzwa kuli chitala,

haduhu munhu wa kuwalewela.

5 Mbena za heye wangulyaga wawele na nzala,

mbaka nyhule ziwele hali miwa.

Wawele na maya wangulugana lufufu lwa heye.

6 Kwa vila magazo hagalingulawa kuli nhimbwisi,

ne kugazigwa hakulingulawa kuli misanga.

7 Ila munhu kangupondigwa leka yafichigwe na magazo,

kota misesela ja chiluli vyojilinguzuma kulutila kuchanya.

8 "Kota ndahawele hegwe ndahamgalamchile Nguluwi,

ndahalandile kutanzigwa na heye,

9 heye yalingudita mbuli ng'hulu za kububuwaza zohambe zipugajizwe,

yalingudita vinduzanduza vyohambe viwazigwe.

10 Kanguitowelega isi nhonya,

kangugahilikaga mazi kuli migunda.

11 Kanguwenulaga wawele ng'hochele,

walingulombocheza kanguwapaga kikala goya.

12 Kangubenaga kiwika goya kwa wahadi,

leka mbuli za hewo zileche kulutilila goya.

13 Kanguwagwilizaga wawele na luhala kuli wihe wa hewo,

na kanguwifyaga baho du kiwika goya kwa wasugu.

14 Wangonaga jiza kuli mhela wa isanya,

kuli mhela wa nemisi wangukwabasa kota vila nechilo.

15 Ila Nguluwi kanguwaloholaga walihela utanzi, kulawa kuli ulonzi ung'hang'hale wa wehile,

kanguwanyasulaga wazunwa kulawa kuli moko ga walingubunza.

16 Ahyo ng'hochele wana kitumbila,

wehile wanguditigwa wanyamalile.

17 "Nakatambichizwa yula yalingukanyigwa na Nguluwi!

Ahyo uleche kubeza houkanyigwa na Nguluwi Yawele na Ludali.

18 Kwa vila heye kanguwikaga vilonda, kahi kanguviwopaga,

kangulumizaga, ila moko wa heye wanguloholaga.

19 Kokulohola kuli kubagama mzidi wa hamwande,

kuli magazo ga kuduma, wihe hauweza kukudoliza.

20 Mhela wa lufemba kokulohola kulawa kuli kubagama,

kuli ngondo kokulohola kulawa kuli ipanga.

21 Kokwamilwa goya kulawa kuli kutowigwa kwa umyango wa wanhu,

kudumya hokukuyila, haudumba.

22 Kudumya na lufemba hovikuya kwa hegwe, koseka,

migongolo jing'hang'hale ja kisolo hojikuya kwa hegwe, haudumba.

23 Migunda joulingulima jowa jilihela maganga,

najo migongolo ja kisolo jowa na kikala goya na hegwe.

24 Kovizela kota ihema lya hegwe lya kuli kikala goya,

kokagula lufufu lwa hegwe, kovizela kota chila chinhu cha baho.

25 Kovizela kota wana wa hegwe wowa wenji,

walelwa wa hegwe wowa wenji kota misolo ja kuli isi.

26 Kobagama uwele sekulu ng'hatu,

kota miso ja ngano jiwele najikungajizwa kuli mhela wa mbena.

27 Natuipugajiza goya mbuli ayi, nayo ndo ya kukomya.

Ahyo uihulichize na uikolele mijito."