1 Elihu nakalutilila kulonga,

2 "Unyimilile hado kahi,

ndina ulonzi winji kahi wa kulonga, honhu ha Nguluwi.

3 Ndokulonjela chondichilanguse kulawa honhu halivinji,

leka ndikulajile kota Nguluwi, yawele nakangongomanya kana hachi.

4 Ndikomya, ulonzi wa heni hauwele wa udesi,

heni ndilingwima hali hegwe, ndina uwanzi wa kukomya.

5 "Uhulichize, Nguluwi ndo yawele na mong'ho ng'hatu na halingumbeza munhu,

kanguchizela chila chinhu.

6 Halinguwalechela wehile walutilile kikala,

ila kanguwapaga walingubunzigwa hachi ya hewo.

7 Kanguwamilaga wawele na hachi,

kanguwaditaga wekalise kuli vigoda vya undewa hamwe na wandewa,

na kuwapa lutogo mazuwa gose.

8 Ila wone wanhu nawawohigwa na minyololo,

wawele webatililwe na ng'weso za magazo,

9 kanguwalajilaga gehile ga hewo,

na kota hewo ndo wanhu walingidaya.

10 Kanguwaditaga wahulichize makanyo ga heye,

na kuwalajiza kuleka gehile ga hewo.

11 Wone womuhulichiza na kumkolela mijito,

mbuli za hewo zolutilila goya kuli mazuwa ga hewo,

na miyaka ja hewo jeng'ha jowa ja kusangalala.

12 Ila wone hawohulichiza,

wodumigwa kwa ipanga,

nawo wobagama kwa vila nawali walihela uwanzi.

13 "Wohambe wamdumbe Nguluwi, wanguvisaga ng'halazi mnhumbula za hewo,

mbaka hoyowagaza, hawalingulanda utanzi.

14 Wangubagama wang'hali wasongolo,

kwa chiwalo cha soni na madito ga hewo gehile.

15 Ila Nguluwi kanguwaloholaga walingugazika kulawa kuli magazo ga hewo,

na kilajila kwa hewo kwa kukolela magazo ga hewo.

16 Ayubu, Nguluwi nakakulavya kulawa kuli magazo,

na kukudita usangalale kuli kikala goya,

mchisaga cha hegwe nakwali na vilyo vinji na vinonile.

17 "Ila sambi nakutagusigwa kota yehile,

utaguso wa hachi naukufika.

18 Wilolele, uleche kubochela sendi leka wajilize hachi,

ama ukulu wa lufufu lukwajilize.

19 Mong'ho wa hegwe na lufufu lwa hegwe,

haviweza kukuwika kutali na magazo.

20 Uleche kugana mhela wa nechilo wuye,

leka Nguluwi yaleche kukona na kukugaza,

kwa vila nechilo ndo mhela uwele wanhu wangudumigwa.

21 Wilolele! Uleche kugalamchila wihe,

nakupegwa magazo leka kukuwika kutali na wihe.

22 Ukumbuchile ukulu wa ludali lwa Nguluwi,

haduhu yawele yoweza kumlangusa heye.

23 Haduhu ne yumwe yawele nakamlonjela Nguluwi chinhu cha kudita,

ama kumlonjela, ‘Nakuwifya!’

24 "Wanji nawamtogola Nguluwi,

kwa gala goyaditile,

nagwe wilumbe na hewo kumtogola.

25 Wanhu weng'ha nawagona goyaditile Nguluwi,

ila mhela wunji toweza kugona hela kulawa kutali.

26 Nguluwi ndo mkulu ng'hatu,

kusinda kuvizela kwa hetwe,

miyaka ja kikala kwa heye hajilinguwazigwa.

27 Kangugakwega kuchanya kwa heye mazi ga bahali,

na kulawa kuli ikunguyosi kanguditaga midovu ja nhonya.

28 Kanguditaga ng'hungugu zilavye mazi,

nayo nhonya yanguwatowelaga wanhu.

29 Whaani yalinguvizela ndaze ng'hungugu vyoilingutandazulwa,

ama limlungu vyolilingubuma kilanga kwa heye?

30 Ulole, ndaze vyoyalingulweneza lumwemwesa lwa limlungu hali heye,

na kuhagubika mgati ng'hatu ha bahali.

31 Ahyo ndo vyoyalinguwalongoza wanhu muisi,

na kutigalila chilyo chinji lukami.

32 Yangujesigwa kota kanguumemezaga moko wa heye kwa lumwemwesa lwa limlungu,

na kululajiza lutowe hali honhu hoyalingugana heye.

33 Limlungu lyanguwikula kuya kwa chivuluvumbi,

mbaka migongolo janguvizelaga kota kanguya."