1 Bilidadi, Mshuhi, nakedichila,

2 "Kopelemba ulonzi wa kulonga mbaka nili?

Uwe na luhala natwe tolonga.

3 Lekachoni hetwe twangujesigwa kota migongolo,

na koneka wapoka hali meho ga hegwe?

4 Hegwe ulingidadula kwa ng'halazi ya hegwe,

ndaze, kwangijesa kota kwa kudita ahyo koweza kuitigasa isi,

ama kujidita mitalawe jilawe kuli honhu hake?

5 "Kikala kwa mwihe kowa kota chenje chizimigwe,

nalyo ilapi lya chiluli chake halipulika.

6 Lumuli kuli ihema lya heye naluwa jiza,

chenje chiwele habehi na heye nachizimigwa.

7 Mong'ho wa heye wa kujenda wokusigwa,

majesa gehile ga heye gomgwisa heye yuye.

8 Magulu ga heye gangumgwiliza kuli utandawala,

kangugwila kuli ikulubila.

9 Idiwa lyomgwiliza kuli chisigino,

ng'weso zomibatilila ng'hatu.

10 Ng'weso naivisigwa kuli misanga kwa chiwalo cha heye,

idiwa lya kuli nzila ya heye.

11 Ukabuso wangumdita yawe na lunhwinhwi chila ubanzi,

wangumuwinza chila hoyojenda.

12 Nayali na mong'ho ila lelo nzala naimibata,

magazo gangugana kumgwisa.

13 Utamwa wangulya ngozi ya heye,

na kwambuza kola vitomo vya lukuli lwa heye.

14 Kokusigwa kulawa kuli ng'handa iwele nayali yochitumbila,

na kuhilichigwa kwa mndewa wa ukabuso.

15 Ng'handa ya heye yahela munhu, wanji wochikala amo,

chiluli cha chikwatilo chowichigwa mchanya mwa honhu hake ha kikala.

16 Kowa kota igodi, liwele mizabi jake najikala,

nhagala zake naziswinha.

17 Kukumbuchilwa kwa heye kuli isi kokwajilila,

haduhu yawele koweza kumkumbuchila.

18 Nakosigwa kuli lumuli na kutajigwa kuli jiza,

nakawinjigwa yalawe muisi.

19 Kahela wana ne wazukulu,

haduhuli yasigale kuli haluga hake.

20 Wanhu wa kolizinjilaga isanya nawabubuwazwa kwa gala gamfichile,

lunhwinhwi naluwafika wanhu wa kolilawilaga isanya.

21 Ago ndo galinguwafika wala wohambe wamdumbe Nguluwi,

aho ndo honhu ha wehile, wohambe wamzele Nguluwi."