1 Mkulu Nguluwi nakamwidichila Ayubu kulawa kuli chivuluvumbi, nakalonga,

2 "Hegwe ndo whaani ulingulonga kuwala mbuli za heni,

kwa ulonzi ulihela uwanzi?

3 Wiwiche goya,

ndokuuza, nagwe kwanguganigwa unyhidichile.

4 Nawali kohi londijiwichile misisi ja isi?

Ndonjele wone kuna kuvizela.

5 Whaani yawichile vipimilo vyake?

Ndikomya, hegwe kwanguvizela!

Whaani yawele nakagolosa ng'weso ya kupimila mchanya mwake?

6 Ndaze, misisi jake najiwichigwa mchanya mwa choni,

ama whaani yaliwichile iganga likulu lya msisi,

7 mhela nhondwe za mitondo lozimbile hamwe,

na wahilisi wa Nguluwi lowawele wotowa iyowe kwa kusangalala?

8 Mhela bahali loibohole mazi kulawa mgati mwa isi,

whaani yawele nakagalemeza mazi ago galutilile kubohoka?

9 Heni ndo ndiigubiche bahali kwa ng'hungugu

na kuiwichila jiza totolo.

10 Nandiiwichila bahali mbaka jake,

na lwizi na mhajilo,

11 hamba nandiilonjela, ‘Kuduma kwa hegwe ndo hano!

Nhigu za hegwe ziwele na mong'ho zodumila hano!’

12 "Ayubu, ndaze nakuwahika kukulonjela kubwemwenzuka kwaluche,

nako nakukuhulichiza?

13 Ndaze, nakuwahika kukulajiza kubwemwenzuka kulutilile muisi,

na kuwambuza wehile leka wabilimile kuli honhu hawo ha uviso?

14 Isi yangugaluka na kupata lanji kuli mhela wa kubwemwenzuka,

na kulajila vidunda na mibindi.

15 Ila lumuli lwake lwangulangaza lukami

kwa wala wehile na mong'ho wawo wangubenigwa.

16 "Ayubu, ndaze nakuwahika kufika kuli nzasa za bahali,

ama kujenda mgati ng'hatu mwa mazi?

17 Ndaze, nakuwahika kulajilwa lwizi ja kuli isi ya wabagame,

lwizi jiwele kuli jiza totolo?

18 Ndaze, kwanguuzela ukulu wa isi?

Ndonjele wone kwangugazela aga geng'ha.

19 Ndaze, kwanguhazela haluga ha lumuli,

ama jiza kolilingikala?

20 Ndaze, koweza kundajila?

Kwanguizela nzila ya kuluta ako?

21 Ndangukomya koweza, kwa vila hegwe kuna miyaka minji,

na nawali baho mhela isi loiwele ilumbigwa!

22 Ndaze, nakuwahika kwinjila kuli ng'hano ya seluji,

ama kuzona ng'hano za nhonya ya maganga,

23 ziwele nandiziwika kwa chiwalo cha kuwatanza wanhu wa heni,

lowowa kuli magazo, kuli mhela wa kitowa ngondo?

24 Kwanguizela nzila ya kuluta kuli mwaluko wa lumuli?

Kwa kohi haluga ha mbeho ya kolilawilaga isanya?

25 Whaani yabawile vikolola kwa chiwalo cha nhonya kulawa kilanga?

Whaani yagongomanyile nzila kwa chiwalo cha lumwemwesa lwa limlungu?

26 Whaani yaiditile nhonya kutowa kuli kugunuche,

hali honhu hawele haduhu munhu yalingikala?

27 Whaani yailajize nhonya ilingudita isi idode,

kuli honhu hawele na mizuchila michefu,

na kujidita misolo jote kahi?

28 Ndaze, nhonya ina mhaza?

Whaani nakajilela midovu ja nungwi?

29 Balafu yangulawa kuli lida lya whaani?

Whaani yailelile seluji ilingulawa kuli ulanga?

30 Mhela wa chipute, mazi ga ilamba gangugaluka,

ganguwa gagagadale kota iganga.

31 Ndaze, kwanguweza kuchiwoha kwa minyololo chilundo cha nhondwe chilinguchemigwa Kilimiya,

ama kulejeza vihindo vya Olioni?

32 Ndaze, kwanguweza kuvilongoza vilundo vya nhondwe kwa mhela wake,

ama kuzilongoza nhondwe za ulanga wa kasikazini zilinguchemigwa Idubu?

33 Ndaze, kwangujizela mizilo jilingulongoza ulanga?

Ndaze, kwanguweza kulajila ludali lwake muisi?

34 "Ayubu, ndaze kwanguweza kulandula lizi mbaka kuli ng'hungugu,

leka kigubika gwegwe baho kwa mazi?

35 Ndaze, wone ululonjele lumwemwesa lwa limlungu lulangaze,

lokuya na kulonga, ‘Nda hano’?

36 Whaani yaipele nhumbula luhala

ama mutwi kuweza kuvizela?

37 Whaani yawele na luhala lwa kuwaza ng'hungugu?

Whaani yalinguweza kujinamiza mibuli ja kilanga,

38 mhela nhimbwisi hoiwa hamwe

na ilongo hoihanzanya na kuwa nhope?

39 Ndaze, kopelemba kwa chiwalo cha isimba idala,

na kudita misimba jiwele na nzala jigute,

40 mhela hewo wesuate kuli mhalika zawo,

ama wovizila kuli visosolo?

41 Whaani yalingulipa ibondwa chilyo

mhela mibofu jake jangundilila heni Nguluwi,

hojilingulubaluba kwa vila jahela chilyo?"