1 Hamba Elihu nakalutilila kulonga,

2 "Mhulichize ulonzi wa heni hemwe muwele na luhala,

mnyhulichize goya hemwe muwele na uwanzi,

3 kwa vila ikutu lyangupimaga ulonzi

kota vila umyango vyoulingujezaga chilyo.

4 Lelo, tihagulile gawele ga hachi,

natwe tilanguse hamwe gawele ganojile.

5 Lelo Ayubu nakalonga, ‘Ndahela nongwa,

Nguluwi nakambusila hachi ya heni.

6 Hanga ndahela nongwa, ndangoneka kota nda mdesi,

magazo ga heni hagalingumala hanga ndahela nongwa.’

7 Hana munhu yoneche yawele kota Ayubu?

Kwa heye, kuliga ndo ubewe kota kunwa mazi.

8 Kanguwaga hamwe na walingudita gehile

kangujendaga na wehile.

9 Kwa vila nakalonga, ‘Munhu halingupata mzidi woneche,

hoyochitunya leka kumnojeza Nguluwi.’

10 "Ahyo mnyhulichize hemwe mlingidita kota mwanguvizela.

Mazuwa gose Nguluwi halingudita wihe,

Nguluwi Yawele na Ludali howeza kudita gehile.

11 Nguluwi komlipa munhu kwa kiwhana na madito ga heye,

kwa kiwhana na nzila za heye.

12 Ndo kukomya ng'hatu, Nguluwi halingudita mbuli zihile,

Nguluwi Yawele na Ludali halingwajiliza hachi,

13 haduhu yoneche yampele ludali lwa kuilongoza isi.

Mazuwa gose heye ndo mlolezi wa isi yeng'ha.

14 Wone Nguluwi yahaholile muhe wa heye,

muhe uwele nakauwika mgati mwa hetwe,

15 wanhu weng'ha wahabagame hamwe,

naye munhu yahahiluche mnhimbwisi.

16 "Wone hegwe Ayubu kuna luhala uhulichize ali,

uhulichize achi chondilingulonga.

17 Ndaze, Nguluwi yawele kanguilongoza isi kwa malajizo ga heye kanguizudila hachi?

Ndaze, hegwe koweza kumtagusa yatanganiche, yawele na mong'ho kota kana nongwa?

18 Heye ndo yalinguwalonjela wandewa, ‘Hemwe hamlingutanza chinhu,’

na wanhu wakulu, ‘Hemwe mwa wehile!’

19 Halinguwaganilila wakulu,

ne wawele na lufufu kusinda wazunwa,

kwa vila awo weng'ha ndo mijito ja moko ga heye.

20 Wangubagama baho du nechilo ng'hatu,

wanhu wangutigasigwa nawo wangugwa na kwajilila,

wazidahe wangusigwa ne mong'ho wa munhu.

21 "Meho ga Nguluwi gangugona madito geng'ha ga wanhu,

heye kanguzonaga nzila za hewo zeng'ha.

22 Haduhuli honhu hawele na jiza totolo,

hawele walingudita wihe wanguweza kivisa.

23 Nguluwi halingugana kumzelesa munhu,

hoyogana kumtagusa.

24 Kanguwadumyaga wawele na mong'ho ne kuuza,

na kuwawika wanji hali honhu ha hewo,

25 kwa vila kangugonaga madito ga hewo geng'ha,

kanguwosaga nechilo na kuwadumya.

26 Kanguwagazaga kwa chiwalo cha wihe wa hewo,

honhu hawele chila yumwe koweza kuwona hewo,

27 kwa vila nawaleka kumuwinza heye,

hawakundile kuwinza nzila za heye zeng'ha.

28 Nawambuza chililo cha mzunwa chimfichile Nguluwi,

Nguluwi nakahulika chililo cha yalingubunzwa.

29 Wone Nguluwi yanyamalile, haduhu munhu yawele koweza kumng'ung'utila.

Wone kovisa kumeho kwa heye, towa tulihela utanzi.

Wone ndo wanhu wa isi ama munhu yumwe, kwa heye ndo chinhu chimwe,

30 leka kumlemeza mwihe kulongoza,

ama wala walinguwawichilaga wanhu midiwa.

31 "Wone munhu komlonjela Nguluwi,

‘Dedede ndina nongwa, ila siwila kahi kudita gehile.

32 Ndajile gehile gohambembeze kugona

wone nandita gehile siwila kahi.’

33 Ndaze Ayubu, Nguluwi koganigwa kumgaza kota vyoulingugana?

Hegwe ndo ulingwamula, siwele heni,

lelo, ulonje choulingijesa.

34 Munhu yoneche yawele na nyhala,

na chila yawele na luhala yalingunyhulichiza, kondonjela,

35 ‘Ayubu kangulonga ne luhala,

ulonzi wa heye haulingutanza chinhu.’

36 Ndahaganile Ayubu yagazigwe ng'hatu mbaka kuduma,

kwa vila kangwidichila kota wanhu wehile.

37 Kangonjeza kubelenhuka kuli gehile ga heye,

kangutowa vimbamba hali hetwe kwa kulajila kubeza,

na konjeza ng'hatu ulonzi wa heye kumlonjeleza Nguluwi."