1 Ayubu nakalutilila kulonga,

2 "Wone ndahawele kota vyombele katali,

mhela wula uwele Nguluwi nayali yonyamila,

3 mhela chenje cha heye lochiwele cholangazila kumutwi kwa heni,

kwa lumuli lwa Nguluwi nang'hola hagati ha jiza.

4 Kota vyombele na mong'ho kuli usongolo wa heni,

mhela Nguluwi loyawele nakaitambichiza ng'handa ya heni,

5 mhela uwele Nguluwi Yawele na Ludali nayali hamwe na heni,

nawo wana wa heni nawali wanzungulute,

6 misenga ja heni najingalila matombo menji,

na migodi ja mizeituni najilavya mafuta menji lukami.

7 "Londutile kuli lwizi lwa muji,

na kikalisa kuli chalanza hali nhing'hano ya wasekulu,

8 wasongolo lowambonile nawema hafungo kwa kuhulichiza,

nawo wasekulu nawema kwa kuhulichiza.

9 Wakulu nawaleka kulonga

na kudinya milomo jawo kwa moko ga hewo,

10 vilongozi nawalonjelwa wanyamalile,

kahi nawagubika milomo ja hewo leka wanyhulichize.

11 Chila yawele nakahulika mbuli za heni nakanganila ganojile

na yoneche yawele nakambona, nakanhogola.

12 Nandimlohola mzunwa yalingulanda utanzi,

na mlekwa yalihela munhu wa kumtanza.

13 Wawele nawali habehi kubagama nawanhambichiza,

nandizidita nhumbula za wafililwe na walume wa hewo zisangalale.

14 Kutanganika nakwali ndo ivalo lya heni,

hachi nayali ndo ikanzu lya heni na chipembelo cha heni.

15 Kwa wohambe walole nandali meho ga kuwalajila nzila,

kwa vyete nandali magulu ga hewo.

16 Kwa ng'hochele nandali mhaza wa hewo,

nandikangaza kulewela hachi za wajenzi.

17 Nandijibena mizino jing'hang'hale ja wehile,

na kusukula upelembi kulawa kuli milomo jawo.

18 Hamba nandijesa, ‘Ndochikala kwa kusangalala na kwa mhela winji,

hamba ndobagama mbele mchinhanda mwa heni.

19 Kuli mazuwa ago nandali nzinzili,

kota igodi liwele mizabi jake najiluta hasi ng'hatu,

na jina mazi menji lukami.

20 Ukulu wa heni wosigala uwele unyale mnhumbula mwa heni,

mazuwa gose mong'ho wa heni wowa kota upinde unyale.’

21 "Mhela awo wanhu nawali wonyhulichiza na kubeteza,

nawali wasindamale wobeteza chondilonga.

22 Losindile kulonga hawawele na cha konjeza,

ulonzi wa heni nawinjila goya kuli makutu ga hewo.

23 Wanhu nawambeteza heni,

kota vyowalinguibeteza nhonya mhela wa chipalangule.

24 Vyowagozole, nandiwalajila kumeho kusangalale,

lumuli lwa kumeho kwa heni nalwali utanzi kwa hewo.

25 Nandiwalongola kuwalajila nzila,

nandali kota mndewa hali wamizi wa heye,

kota yalinguwahembuliza walingulombocheza.