1 Elihu nakalonga,

2 "Ayubu, kwangijesa kota mbuli ayi ndo ya hachi?

Hegwe kwangulonga, ‘Ndahela nongwa hali Nguluwi,’

3 ila kwanguuza, ‘Namhata mzidi whachi,

ama ganojile gachi kulawa kwa hegwe kusinda kuleka kudita gehile?’

4 "Ndokwidichila hegwe,

hamwe na goloko wa hegwe.

5 Ulole kilanga tandi leka wone,

ulole ng'hungugu vyoiwele mchanya ng'hatu.

6 Ndaze, wone kodita gehile,

ama wonjeze gehile ga hegwe, kwangijesa komlumiza Nguluwi?

7 Kota hegwe kwa yatanganiche, ndaze, kwangumha choni,

ama heye kangubochela mzidi wachi kulawa kwa hegwe?

8 Wihe wa hegwe womlumiza munhu kota hegwe hela,

na hachi ya hegwe yomnojeza munhu hela.

9 "Kuli mhela wa magazo,

chila munhu kangulila kwa chiwalo cha magazo menji,

wangulandaga utanzi kulawa kuli moko uwele na mong'ho.

10 Ila haduhu yalingulonga, ‘Kakohi Nguluwi yalumbile heni,

yalingundita ndiwe ndikwimba mhela wa magazo,

11 heye yalingutulangusa lukami kusinda migongolo ja isi,

na kutudita tuwe na luhala kusinda videje vya kilanga?’

12 "Wanhu wangulila kwa kulanda utanzi,

ila Nguluwi halinguwahulichiza hewo,

kwa vila walingulila ndo walingidaya na wehile.

13 Ena, Nguluwi halinguhulichiza kulanda kwa hewo kwa hihi hela,

Nguluwi Yawele na Ludali halingijesa kuwala chililo acho.

14 Lelo, houmumng'ung'utila kwa kulonga kota hulingumona Nguluwi,

na kumlonjela heye kota kwangubeteza kwamula kwa heye,

Nguluwi hokuhulichiza ne kukwidichila.

15 Kwangijesa kota Nguluwi halingugaza,

na halingijesa kuwala gehile,

16 Ayubu, kwangugubula mlomo kulonga ulonzi wa hihi hela,

kwangulonga ulonzi winji ulihela nyhala."