1 "Ndangukuzudila ng'hatu kikala kwa heni!

Ndolonga hazelu kung'ung'uta kwa heni ne kilemeza,

kwa kiwhana na usungu wa nhumbula ya heni.

2 Ndomlonjela Nguluwi, ‘Uleche kunhagusa kota ndina nongwa,

ila nzelese, kuna ulonjelezi wachi kuwala heni?’

3 Ndaze, yangukunojeza hegwe kunzudila,

kubeza mijito ja moko ga hegwe,

na kuganilila majesa gehile ga wehile?

4 Ndaze, kuna meho kota ga munhu?

Ndaze, kwangulola kota munhu vyoyalingulola?

5 Ndaze, mazuwa ga hegwe ndo kota ga munhu?

Ama miyaka ja hegwe ndo kota ja munhu,

6 mbaka ulole wihe wa heni

na kupala gehile ga heni?

7 Hegwe kwanguvizela kota heni ndahela nongwa,

haduhu yawele koweza kundavya kuli moko ga hegwe.

8 Moko ga hegwe nagandita na kulumba heni,

ila sambi moko ago gangundumya.

9 Ukumbuchile kota nakulumba heni kwa ilongo.

Ndaze, konyhilusa kuli nhimbwisi kahi?

10 Ndaze, hauwele hegwe uwele nakulongoza kulumbigwa kwa heni

na kundita ndikule kuli munda wa mayangu?

11 Nakulumba lukuli lwa heni kwa mizeje na mishipa,

nakujigubika mizeje ja heni kwa miwunde na ngozi.

12 Nakumha heni ukomu na igano lya kwimilila,

nakuwamila na kuulolela ukomu wa heni.

13 Ila mbuli azi nakuzivisa mnhumbula mwa hegwe.

Ndanguvizela kota ako nakwali ndo kunuwila kwa hegwe.

14 Nawali ubeteza leka wone kota ndodita gehile,

leka uleme kulechela wihe wa heni.

15 Ndochona heni wone ndina nongwa!

Wone ndo nhanganiche, siweza kidaya hebu,

kwa vila namema soni, londigalola magazo ga heni.

16 Wone nyhinule mutwi kwangumhelemba kota isimba,

na kundajila vinduzanduza vya kungaza.

17 Kwangigala walolezi wanyale,

kwangonjeza ng'halazi ya hegwe kwa heni,

kwangungalila wang'honyo wanji wanhowe.

18 "Gwa Nguluwi, lekachoni nakundavya mmunda mwa mayangu?

Fola ndahabagame ne wanhu kumbona.

19 Ndahahilichigwe kutiligwa,

ndahawele kota munhu yawele hanawahika kuwa baho.

20 Ndaze, mazuwa ga kikala kwa heni hagawele mado?

Undeche leka mhate mhela udo wa kusangalala,

21 mbele nding'hali kuluta kuli honhu hawele siweza kuhiluka,

kuli isi ya jiza totolo,

22 isi ya masinzo na iwele na ivuche,

kuwele lumuli lwake ndo kota jiza."