1 "Munhu kana mijito jing'hang'hale ng'hatu muisi,

mazuwa ga heye ndo kota gala ga mkola mijito!

2 Heye ndo kota chitumagwa yawele na maya ga lubehelo,

ama mkola mijito yalingubeteza chinhu choyalinguganigwa kupegwa kwa chiwalo cha mijito joyakolile.

3 Lelo namhegwa myezi na myezi ja hihi hela,

kwa heni ndo masinzo nechilo nyinji.

4 Hondiwasa ndangulonga, ‘Ndokwinuka nili?’

Kwa vila mhela wa nechilo wanguwa ukulu ng'hatu,

ndangugalawata mchinhanda mbaka mhela wa kubwemwenzuka!

5 Lukuli lwa heni nalumema mhiko na wavu,

na ngozi ya heni yangulavya ufila wa lipu.

6 Mazuwa ga heni gangumala kota mazi kuli ibuli litubuche,

nago gangufika kuduma ne kuwa na kitumbila.

7 "Ukumbuchile, kikala kwa heni ndo kwa mhela udo hela kota lweselo,

iziho lya heni halilola linojile lyoneche kahi.

8 Yalingumbona sambi, hombona kahi,

wone undole, ndowa haduhu.

9 Kota ng'hungugu vyoilinguka na kwajilila,

ndo hihyo du, kwa munhu yalingudulika kuli isi ya wabagame ne kuhiluka.

10 Hohiluka kahi haluga ha heye,

naye kosemwigwa himahima.

11 Ahyo siweza kulemeza mlomo wa heni kulonga,

ndolonga kwa kiwhana na usungu wa muhe wa heni,

ndong'ung'uta kwa usungu wa nhumbula ya heni.

12 "Ndaze, heni nda bahali ama izoka likulu ng'hatu,

lilingikala mgati ng'hatu mwa mazi menji,

mbaka umbichile wamizi leka ndeche kusulupuka?

13 Hondilonga kota chinhanda cha heni chondita nyesele,

honhu ha heni ha kuwasa homhunguzila kung'ung'uta kwa heni,

14 nagwe kwanguya kundumbiza kwa lunhwinhwi kuli kulota,

kwangung'habusa kwa kingalila ulaguzi,

15 ahyo ndangona fola kikopola kwa kininiza,

fola kubagama kusinda kufichigwa na magazo aga.

16 Ndangukuzudila kikala kwa heni,

sichikala mazuwa gose.

Mndeche, kwa vila mazuwa ga heni ndo lweselo hela!

17 Munhu ndo chinhu chachi mbaka umganilile?

Lekachoni kwangijesa ng'hatu kuwala heye?

18 Hegwe kwanguya kumlola chila hamitondo,

na chila mhela kwangumjeza!

19 Kolutilila kundola mbaka nili,

ne kundeka kwa mhela uchefu wa kwesela?

20 Wone ndina gehile,

gangukuwifya choni, gwa mlolezi wa munhu?

Lekachoni nakumbika leka ndiwe honhu ha hegwe ha kutowa?

Ndaze, heni nandiwa itunyo lya hegwe?

21 Lekachoni haulingulechela nongwa za heni

na kumbusila gehile ga heni?

Mhela uchefu ndotiligwa,

komhala, ila ndowa haduhu!"